2Màkàbeòwo 6
6
Wo do gũ Mawuxɔ̀ a
(1Mak 1.41-64)
1Àzã ɖewo yomè a, èfìɔ a dɔ̃ Jèrɔ̃t, ŋusù sĩsĩ ɖe kè so Àtenè be èdù mèa, ɖoɖa Yèruzàlɛ̀m, ne bèa zĩ Yudàtɔwo ji, àleke be wo a trɔ lè woa togbewo be èkɔ̀dowo yomè, ne wo mu gbà zɔ̃ ɖo Mawu be èsewo ji ke ò. 2Èfìɔ a gbà ɖo na Jèrɔ̃t be ne dovlo Yèruzàlɛ̀m be Mawuxɔ̀ a, ne woa trɔ ɛ̀ sɔ wɔ̀ vòduxɔ̀ na Òlimpì-To ji be vòdu Zeus. E yomè a, woa sɔ Gàrìzim-To ji be Mawuxɔ̀ a wɔ̀ vɔ̀duxɔ̀ na vòdu Zeus, Àmèjroxɔ̀tɔ a, sìgbè leke funutɔwo le biɔa nène.
3Kè wo wɔ̀ ɖo èfìɔ be àfɔ̀ku be ɖoɖo kèawo ji a, e nyi àkpɔ̃ gãa ɖe kè mu nyã sɔ̀sɔ na dùkɔ̃ blibo a ò. 4Mawuxɔ̀ a va ɖɔ ku vɔ̀dusumɔ̃tɔwo be ènu mà-kɔ̀ mà-kɔ̀ ku ènu kpòtoewo wɔ̀wɔ. Wo va dɔ̃na ku nyɔ̃nù àhasìtɔwo lè mawuxɔ̀ a be àwà kɔ̀kɔ̀ɛwo mè, eye wo hɛ̃nà ènu kèwo nyi èkɔ̀ na Kɔ̀kɔ̀ɛpe a va e mè. 5Vɔsanu mà-kɔ̀ mà-kɔ̀ kèwo ŋuti Mawu do èse ɖoawo ye va ɖɔna vɔsakpe a ji. 6Àmè ɖe mu kpɔ èmɔ̃, la zɔ̃ ɖo jɛ̃gbɔ̃zã be ɖoɖowo ji ò, eye èmɔ̃ ɖèɖe mu lè, ne wo a ɖù Yudàtɔwo be àzã, àlo, wo a hũ e mè, ŋutɔ cã be àmè nyi Yudàvi ò. 7Wètri sia wètri a, àzã kè jè èfìɔ be jìgbèzã ji a, e nyi jizĩizĩ ɖìgbɔ àmè ɖe, be àmè sia àmè ne yì vɔsa nuɖùɖuwo tèpe. Ne vòdu Dionisos be àzã va ɖo a, àmèwo ɖo la sɔ ègbe-kà sɔ lɔ̃ jègbà ɖo èta, la zɔ̃ lè èhahò mè, sɔ do bùbu vɛ̃ti ku àhànùnu be vɔ̀du Dionisos ŋuti. 8Tòlèmaistɔwo biɔ be wo ne ɖè èse to, àleke be Yudàtɔ kèwo lè Grɛs be èdu kèwo gogo Yudà-nyigbã a mètɔwo cã ne nɔ zɔ̃ ɖo wɔ̀na kèawo ji, ne wo a nɔ ɖù vɔ̀du be ènuɖùɖu a. 9Wo ɖè ègbè be wo ne sò èhlò na àmè ɖekpekpe àmè kè gbe be yè mu la zɔ̃ ɖo Grɛstɔwo be èkɔ̀do kèawo ji ò à. Ekè a na be wo teŋu susu àhovì kè lè ŋùkɔ̀ gbànà a bɔ̀bɔ̀ɛ ɖe. 10Nène a, wo le nyɔ̃nù èvè, eye wo kplɔ̀ wo yì kòjo mè, ɖo a, wo na, wo sò èvo na woabe èviwo. Wo do-kà woabe èviwo ɖo woabe ànɔ̃wo nu, eye wo kplɔ̀ wo ɖisà to èdù a mè, lè àgũtòpò, gbɔ̀xue wo tùtù wo dàŋùgbe so èdù a be èglì-kpa a tamè. 11Yudàtɔ buwo yì ɖo àkpã-do kèwo gogo Yèruzàlɛ̀m awo mè, eye wo wɔ̀ jɛ̃gbɔ̃zã gbè be èkɔ̀nuwo ɖodu, lè bèbemè. Kè wo sãma wo na Fìlipò a, wo tɔzò wo àgbè-àgbè. Bùbu kè wo do leke àzã kè a lè kɔ̀kɔ̀ɛ ɖo a ŋuti a na be wo mu hlùɛ̃ woa ɖokoewo ta ò.
Ne wo le tĩ àmè yomè a, Mawu be àdɔ̀mènyɛ̃ zena
12Mù le pò ètoɖo na àmè kèwo le hlɛ̃ xoma kè a, be èjì mu gbà ɖè lè pò na wo, ɖo àhovì kèawo ŋuti ò. Wo ne sè e gɔ̃mè be àyà do na àmè kèawo jɔ̀, mu nyi ne wo a crɔ̃ miabe dùkɔ̃ a ŋuti ò, vɔ̀ a, ne wo a sɔ na kpakpla miabe dùkɔ̃ a ye. 13Mawu be àdɔ̀mè nyuɛ̃ wɔ̀wɔ gã ɖe ye be nyi, be ne dɔ̃ èto na àmè vuɛ̃wo kaba, sɔ wu be ne gble wo ɖɛ didi ɖe. 14Tɔhonɔ̀ tɔ̀na tè, gbɔ̃nà jì ɖɛ, be dùkɔ̃ kpɔ̀tɛawo be èvùɛ̃ wɔ̀wɔ ne glo, gbɔ̀xue yè a dɔ̃ èto na wo. Vɔ̀ a, mu nyi nène a ye Ŋusɛ̃kpatatɔ a kpɔ be yè a nɔ wɔ̀ ku mi ò. 15Mu tɔna tè be miabe èvùɛ̃ wɔ̀wɔ ne glo, ne yè a va nɔ dɔ̃ èto na mi, wàlɛbɛ kè miabe èvùɛ̃ wɔ̀wɔ la va wu jije kpɔ̀tɛ a ò. 16Leke a ye mu ɖènà yebe màje jo lè mia ji gbèɖe ò. E ɖona àyàɖùɖu ɖoɖa yebe dùkɔ̃ a, ne be a sɔ na ɛ̀ kpakpla, ekè a gɔ̃mè ye nyi be mu gblena yebe dùkɔ̃ a ɖɛ gbèɖe ò. 17Mi jro kpò be mi a ɖoŋù nyàwo kè a. Kè mi gblɔ̃ ènyà kè a vɔ̀ a, mi a yì miabe àseŋu a ji.
Èlèazar ku ɖo yebe xɔ̀sè ta.
18Èlèazar nyi Èse fiɔtɔ cucugbãtɔ̀awo dòmètɔ ɖèka. E nyi ŋusù ɖe kè ku àmègã vɔ̀, àmèŋukuta ɖe kè nyã kpɔkpɔ a. Wo zĩ e ji, kè ènu mè na ɛ̀, zĩ èhã-lã ɖo ènu mè na ɛ̀, ne be a mì ì. 19Vɔ̀ a, kè e lɔ̃ be yè a ku ŋutikɔ̀kɔ̀ɛ be èku, sɔ wu be yè a nɔ̀ àgbè vlo, lè ŋùkpɛ̃ mè a, e gbìgbɔ̀ tu èhã-lã kè lè ènu mè na ɛ̀ a ɖoɖa, 20eye ye ŋutɔ sɔ yebe èjro, sɔ zɔ̃ yì àyà do na àmè be èmɔ̃ a gbɔ. Ekè a nyi kpɔwɔɛ, be àmè ɖo la dojì, la gbe ènuɖùɖu kèwo be èkɔ̀ Mawu be Èse a do a, ne e nyi be e la hɛ̃ èku va ŋutɔ cã a.
21Amè kèwo ɖo la zĩ Èlèazar ji, be ne ɖù vòdu be vɔsanu kè ji Mawu be Èse a mu dà àsi ɖo ò a jèsi Èlèazar a, e dìdì ŋutɔ. Wo yɔ Èlèazar yì àsàmè, gblɔ̃ na ɛ̀ be, ne na wo a ɖà èlã kè mu nyi èkɔ̀ na Yudàtɔwo ò a na ɛ̀. E la nɔ ɖù ì, la nɔ wɔ̀ àyè, sìgbè vòdu be vɔsa-lã be le ɖù, sìgbè leke èfìɔ a ɖo è a nène. 22Ne Èlèazar wɔ̀ leke a, e la ɖè ye ɖokoe jo lè èku gbɔ, eye kè e nyi be èxlɔ̃ be èkàdodo lè yèwo dòmè xoxo a, àdɔ̀mè nyuɛ̃ kpò yèwo la wɔ̀ na ɛ̀.
23Vɔ̀ a, Èlèazar wɔ̀ cãcã be yè a zɔ̃ ɖo bùbu be àfɔ̀ɖèɖe be ɖoɖo nu. Bùbu be ɖoɖo kè jè na yebe èpè a, bùbu be ɖoɖo kè jè na àcɔ kè èɖà ɣe ɖo ɖo èta na ɛ̀, sɔ to èdɔ kèwo be wɔ̀ lè yebe àgbènɔ̀nɔ kè nyi kpɔwɔɛ, so kaka ɖèvi mè a mè. Vɔ̀ a, vevetɔ a, e sɔ ku leke Èlèazar jro be yè a wɔ̀ ànùkua na Mawu be Èse kɔ̀kɔ̀awo ɖo a. Ekè a ŋuti be biɔ be wo ne ɖo yè ɖoɖa èkuwo de kaba. 24E gblɔ̃ kpe è be: “Nè àmè sĩ, ɖo èpè kè lè àsi nyè a, mù ɖo la gbà nɔ wɔ̀ àyèmènu ò. Ne mu nyi nène ò a, ɖèkajɛ ku tùgbɛ̀jɛwo la nɔ susu be Èlèazar kè sĩ, xɔ̀ èpè èkà-vè ci-wo (90) vɔ̀ a, sɔ ye ɖokoe yì ɖo èdù bu mètɔwo be èkɔ̀nyìnyi mè. 25Ne mù flù àmèwo a, mù la gbà nɔ̀ àgbè vi ɖe kpe è. Vɔ̀ a, ekè a la bu èmɔ̃ na ɖèviawo, eye àgɔ̀jèje nyè ye be la nyi. E la nyi ŋùkpɛ̃ ɖe kè la pòɖi àpe tɔgbekuku. 26Eye, ne mù gbà si lè àgbètɔwo be ètodɔ̃ nu, fifì ŋutɔ cã a, nyè mu la teŋu si lè Mawu Ŋusɛ̃kpatatɔ a be ètodɔ̃ nu, lè àgbè mè, àlo, lè èku mè ò. 27Ekè a ŋuti mù sɔ̀gbè, la ku fifì ku èjìdo, kè la fiɔ be àmègãkuku nyè a nyi àcɔnu na mù. 28Mù la gble kpɔwɔɛ kè jè a ɖɛ na ɖèviwo, eye be la fiɔ wo, lekè àmè mu ɖo la vɔ̃, gbɔ̀xue la sɔ yebe àgbè ku bùbu, sɔ na ɖo Èse Kɔ̀kɔ̀ɛ kèwo ŋuti bùbu lè a ta.”
Kè be gblɔ̃ ènyà kèawo vɔ̀ a, e go tùtà àyàdo na àmè be èmɔ̃ a gbɔ. 29Àmè kèwo le kplɔ̀ ɛ̀ le yì a, wo sɔ ènyuɛ̃ ji na àmè kè wo ɖè fiɔ, zã ɖe kè a sɔ trɔ zũ èvùɛ̃ ji na àmè, ɖo a, lè woabe ŋùmè a, ènyà kè Èlèazar gblɔ̃ a mu nyi àmè kè nyãna ènu a be nupo pòpo ò. 30Wàlɛbɛ kè wo le pò Èlèazar, eye be nyã be yè lè èku-mɔ̃ ji a, e ŋè, eye be gblɔ̃ be: “Tɔhonɔ̀ nyã ènuwo keŋu kɛŋu nyuɛ̃ ɖe. E nyã be mù teŋu si lè èku kè a nu, gãke a, mù le sè veve ŋutɔ, lè àpe ŋutilã mè. Vɔ̀ a, lè àpe èjì mè a, mù sɔ jìjɔ̀ɛ le xɔ̀ veve sèsè a, ɖo a, Mawu ye mù bɔ̀bɔ̀ ɖokoe nyè na.” 31Leke a ye ŋusù kè a ku. Yebe ènùwuwu kè a le ɖè èjìdo gãa ɖe, lè èdɛ̃ nyuɛ̃ kè mu trɔna ò, kè jè be wo a nɔ ɖoŋù a be kpɔwɔɛ fiɔ, mu nyi na ɖèkajɛ ku tùgbɛ̀jɛwo ɖèɖe kpò ò, vɔ̀ a, e le ɖè è fiɔ yebe dùkɔ̃ a be àkpa gã ɖe cã.
Currently Selected:
2Màkàbeòwo 6: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.