2Màkàbeòwo 3
3
Templo be àdɔ̀kùnuwo
1Wàlɛbɛ kè mawunɔ gã Onià lè èdɔ nu, lè Yèruzàlɛ̀m, èdù kɔ̀kɔ̀ɛa mèa, èdùa mètɔwo zɔ̃nà ɖo Mawu be Èse a nu veve ɖe, lè ŋutifafa blibo mè. Mawunɔ gã a, Ònia wɔ̀nà ànùkua na Mawu ŋutɔ, eye e crìnà èvùɛ̃. 2Èfìɔwo ŋuto cã dona bùbu mawuxɔ̀ a ŋuti eye wo wɔ̀na ènunana fàa na Kɔ̀kɔ̀ɛpe a. 3Ekè a na be Azìa be èfìɔ Sèlekus sɔna lè ye ŋutɔ be àdɔ̀kùnuwo mè, sɔ tuna zazã kèwo kpata wo hiã na vɔsa kèawo wɔwɔ a be èfɛ̃. 4Wo va sɔ àmè ɖe kè wo yɔna be Simɔ̀n, so Bilga be kɔ̀ta mè a, sɔ wɔ̀ mawuxɔ̀ a jikpɔtɔ gã. Mu lɔ̃ ɖo leke mawunɔ gã a kplɔ̀nà èdù a be àsìɖìɖi be ènyàwo ɖo a ji ò. 5Kè mu teŋu ɖù Onia ji ò à, e yì kpɔ Apòlonìo, Tràseàs be èvi kè nyi Èdùjiɖùtɔ lè Siria Gã a ku Foenikè, hùe ŋua nu a. 6E gblɔ̃ na ɛ̀ be Yèruzàlɛ̀m be mawuxɔ̀ a be àdɔ̀kùnuwo jràɖope a ɖo ku èci mà-sè gbèɖe, kè wo mu la teŋu hlɛ̃ ò a. E gblɔ̃ be ègà gbogbo kè bɔ ɖo funu a be gbɔsùsu mu kã kè hiã ne wo a sɔ nɔ wɔ̀ vɔsawo ò, eye yèwo teŋu ɖo àlɔ̀ e ji, ne be a nyi èfìɔ a tɔ̀.
Wo dɔ̃ Hèlìodorò ɖoɖa Yèruzàlɛ̀m
7Kè Àpòlonìo gbe dogò èfìɔa kpò a, e kã àseŋu na ɛ̀ so àdɔ̀kùnu kèwo be ènyà Simɔ̀n gblɔ̃ na ɛ̀ a ŋuti. Efìɔ a dɔ̃ Hèlìodorò, yebe èdùdɔnunɔ̀tɔ cucugbã a ɖoɖa Yèruzàlɛ̀m, be ne yì sɔ àdɔ̀kùnu kèawo gbɔ̀ va na yè. 8Hèlìodorò jè èmɔ̃, zè ɖèka, be yè a yì le ŋùkuvi ɖo Sirìa Gã ku Foenikè be èdùwo be èdɔwɔ̀wɔwo ŋuti, vɔ̀ a, lè nyàwototo mè a, e le yì, la yì wɔ̀ ɖo èfìɔ a be ɖoɖowo ji ye. 9Kè be ɖo Yèruzàlɛ̀m a, mawunɔ gã ku èdù a mètɔwo xɔ̀ ɛ̀ èxlɔ̃tɔ̀. E ɖè ènu kè ŋuti be va èdù a mè ɖo a gɔ̃mè na wo, eye be gblɔ̃ ènyà kè wo sè so mawuxɔ̀ a be àdòkùnuwo ŋuti a cã na wo. E yomè a, e biɔ sè be ènyà a sɔ̀gbè màa.
10Mawunɔ gã a kɔ̀ e ŋuti na ɛ̀ be àdɔ̀kùnu kè lè a be àkpa ɖe le nyi ènu kèwo wo sɔ ɖɛ na àhòsìwo ku ècɔ̃ɛ̀viwo be ènubɔ̀ɖɛwo, 11eye àkpa bu le nyi Hìrkanò, Tobi be èvi kè nyi àmèkpɛ̃kpɛ̃ ɖe lè èdùmèhùɛ̃yiwo dòmè a tɔ̀. Lè lɛ̀bli be ènyà kè Simɔ̀n, àmè vlo a gblɔ̃ a mè a, àdòkùnu kè lè a kpata lè klòsalò tàlɛ̃tò èkà èwo (400) ku sìka tàlɛ̃tò èkà àtɔ̃ (200). 12Eye, sɔ yì e ji a, àmè ɖe mu ɖo la tɔ àsi àdɔ̀kùnu kèawo ŋuti gbèɖe, lè Mawuxɔ̀ kè a kè mè àmè ɖe mu ɖo la ɖo òa mè ò. E nyi ènu mà-jɔ̀ mà-jɔ̀ wɔ̀wɔ̀ gãa ɖe ɖo àmè kèwo do jì ɖo tèpe kè a be kɔ̀kɔ̀ɛ nɔ̀nɔ ku yebe nyiɖìɖi ŋuti, ɖo a, Mawuxɔ̀ a ɖo bùbu lè xixe kplògòdò a mè.
Yèruzàlɛ̀m-dù a mè nɔ̀tɔwo titɔ
13Vɔ̀ a, kè e nyi be èfìɔ a ɖè ègbè ɖe na Hèlìodorò a, ye cã tù àfɔ̀ tè be wo ɖo la ɖo àlɔ̀ àdɔ̀kùnu kèawo ji, la sɔ do àsi na èfìɔ a. 14Kè àzã kè be ɖo a gbè va ɖo a, e gɛ̃ ɖo Mawuxɔ̀ a mè, ne be a hlɛ̃ àdɔ̀kùnu kèawo ŋlɔ̃.
Èdù a mètɔwo ci jojojoe, eye leke be ènu a kãkã ɖo èdù a keŋu mè. 15Mawunɔwo do woabe vɔsawùwo, le cɔ̃ ŋùmè ànyi lè vɔsakpe a be ŋùkɔ̀. Wo le fã yɔ Mawu kè do ènu dà ɖo àmè gbɔ be Èse a be ne wɔ̀, ne àdɔ̀kùnu kèawo ne nɔ̀ blibɔ̀ ɖɛ, na àmè kèwo ye sɔ wo dàɖɛ a. 16Leke mawunɔ gã a be ŋùmè ku yebe àgbàze mè trɔ ɖo a lè ɖè àkpɔ̃ gã kè ɖɔ ɛ̀ a fiɔ, àleke be e la sɛ̃ŋu gbɔ̀xue àmè kè le kpɔ ɛ̀ be èjì mu la gbã ò. 17Àɖìkasòamè ku leke mawunɔ a be àmèti blibo a le pò tìtìtì ɖo a, na be vevesèsè kè lè èjì mè na ɛ̀ a le ze na àmè sia àmè kè le kpɔ ɛ̀a. 18Àmèwo bɔ̀, le to so àxuewo mè, le fãkue ɖodu, ne èvlododo kè le nɔ̀tè kpɔ Mawuxɔ̀ a, ne zɛ̃ to e ŋuti va yì. 19Nyɔ̃nùwo le tà àkpãnyà, gble àkɔta ɖɛ, ɖɔ èmɔ̃wo ji. Tùgbɛ̀jɛvi kèwo kpɔ̀tɔ̀ cina àxomè awo dòmètɔ ɖewo le pudù tùtà àgbo nu, èɖewo tùtà èglìkpa ji, èbuwo le drɛ̃ lè flɛsɛ̀wo nu. 20Woa kpata, wo kɔ àlɔ̀ ɖoɖa èji, le fã yɔ Mawu be ne xɔ̀ na yèwo. 21Leke àmèha gbogbo kè a mlɔ̃ ànyigbã, kãkã ɖɛ, le blìbɔ̀, wàlɛbɛ kè mawunɔ gã a ɖɔ ku àkpɔ̃ ɖo a wɔ̀ ŋuzĩzĩ ŋutɔ.
Tɔhonɔ̀ ŋutɔ cɔ̃ àlɔ̀ yebe dùkɔ̃ a ji
22Wàlɛbɛ kè àmè sia àmè le fã biɔ Tɔhonɔ̀ ŋusɛ̃kpatatɔ a be ne cɔ̃ àlɔ̀ ènu dà ɖo àmè gbɔ kèawo ji, ne wo a nɔ̀ blibo ɖɛ na àmè kèwo sɔ wo dà ɖɛawo a, 23Hèliòdorò ya, tɔ ɖoɖo kè wo do àsi na ɛ̀ a ji. 24Ye ku yebe ɖiatɔwo va ɖo Mawuxɔ̀ a be àdɔ̀kùnuwo be ɖope a gbɔ, wàlɛbɛ kè Jiŋùkusi be Gɔ̃gbɔ̃wo be Èfìɔ Ŋusɛ̃kpatatɔ Bùbutɔ a na ŋùdãnu gã ɖe ze do wo, eye Mawu be Ggɔ̃gbɔ̃ a pò àmè kèwo dojì va funuawo; àdìka sò wo, wo gbɔjɔ, eye vɔ̃vɔ̃ wù wo ɖo tè. 25Wo kpɔ èsɔ ɖe kè wo bla àkpà ɖo àcɔ na a, eye èsɔdotɔ ɖo vɔ̃vɔ̃ ɖe kè bla sìka be àgbàja a lè e ji. Esɔ a sitè ɖo yebe ŋùgbedòmè be àfɔ̀wo ji ku àdã, dà yebe ŋùkɔ̀ be èfɛ̃wo ɖoɖa Hèlìodorò gbɔ. 26Zè ɖèka a, ɖèkajɛ èvè buwo gbà ɖè woa ɖokoe fiɔ Hèliòdorò. Wo nyi àmè ɖo ŋusɛ̃ mà-nyãgblɔ̃ kèwo jè ɖèkajɛ ŋutɔ, lè àwù nyã kpɔkpɔwo mè. Wo nòtè ɖo èmìɔ̃ mè ku ɖùsi mè na Hèlìodorò, eye wo le pò è, ŋuzĩzĩ mà-ku tɔ̀. 27Hèliòdorò jè ànyi, eye vìvìti cricri pòxla ɛ̀, eye be ɖo èɖi mè. Wo kɔkɔ ɛ̀ ɖo àba ji, 28eye ŋusù kè a, kè gɛ̃ ɖo àdɔ̀kùnuwo be èxɔ̀ a mè, wàlɛbɛ kè àmè sùgbɔ kplɔ̀ ɛ̀ do, eye ɖìatɔwo gla ɛ̀ a, trɔ zũ àmè gbɔjɔ kè mu gbà teŋu le yeɖokoe ɖotè ò. Wo kɔkɔ ɛ̀ jo, eye àmè sia àmè kpɔ̀ Mawu be ŋusɛ̃ ku yeɖokoe si nɔ̀nɔ be àcɛ̀.
29To Mawu be ŋusɛ̃ mè a, Hèlìodorò be lãmè tu, lè àba ji, ègbè cã mu gbà le è nu ò, eye èmɔ̃kpɔkpɔ mu lè be ne gbà ci àgbè ò. 30Èdù a mètɔwo le kafu Mawu be ye ŋutɔ sɔ gogo sɔ cɔ̃ àlɔ̀ yebe Kɔ̀kɔ̀ɛpe a ji. Tèpe kè a kè nɔ̀ àdìka sò àmè ku tìtɔ̀-titɔ mè, zãa ɖe kè a va yì a, ɖɔ fifìa ku jìjɔ̀ɛ kpɔkpɔ gã ɖe kudo àyo sòso, ɖo a, Mawu Ŋusɛ̃kpatatɔ a ɖè yebe gogo fiɔ. 31Hèliòdorò be ŋutimewo dòmètɔ ɖewo ɖèbla biɔ mawunɔ Ònià be ne fãkùe na Èji Hũitɔ a, ne bè a gble Hèlìoɖorò, ŋusù kè lè ànyi mɔmlɔ̃ bèɖè-bèɖè, lè funu a ɖo àgbè. 32Mawunɔ gã Ònia wɔ̀ vɔsa na Mawu, sɔ le ɖè kuku na ɛ̀ be, ne trɔ Hèlìodorò gbɔ̀ va àgbè mè, ɖo a, wo le vɔ̃ be èfìɔ a la susu be Yudàtɔwo wɔ̀ sebla ɖe ɖo Hèliòdorò, yebe àmèdɔ̃dɔ̃ a ŋuti.
33Wàlɛbɛ kè mawunɔ gã a le wɔ̀ èɖiɖèɖe be vɔsa a, ɖèkajɛ èvè kèwo ze na Hèliòdorò sã a, gbà ze na ɛ̀ kè, lè àwù kè wo do sã a ke mè. Wo tɔtè ɖo e gbɔ, gblɔ̃ na ɛ̀ be: “Do àkpe na Ònia, mawunɔ̀ a, ɖo a eye ŋuti ye Tɔhonɔ̀ a le hlùɛ̃ àpo àgbè gã ɖo. 34Kè Mawu na wò ètodɔ̃ gã kè a vɔ̀ a, yì gblɔ̃ leke Mawu be ŋusɛ̃ gã a lòlò ɖo a na àmèwo kpata”. Kè wo gblɔ̃ ènyà kè a vɔ̀ a, wo gbà bu.
Hèliòdorò le kãkã Mawu be Gã nyinyi
35Hèliòdorò wɔ̀ vɔsa na Tɔhonɔ̀, eye be fìã àjɔ̀gbè be yè la na ènu sùgbɔ, ɖo a e le yè ɖo àgbè. Kè be sìa mawunɔ Ònià vɔ̀ a, ye ku yebe àhùakɔ̃ a trɔ yì èfìɔ a gbɔ. 36E le ɖù ènu kè Mawu Gã wɔ̀ na ɛ̀ a be ɖase lè àmèwo kpata be ŋùmè, eye be le gblɔ̃ ènu gã kèwo Mawu wɔ̀, be kpɔ ku ye ŋutɔ be ŋùkuviwo a na wo.
37Èfìɔ a biɔ ɛ̀ be àmè kɛ ye yè la dɔ̃ ɖoɖa Yèruzàlɛ̀m màa, Hèliòdorò ɖo e ŋuti be: 38“Ne wò ɖo èkɛ̃tɔ ɖe, àlo, àmè ɖe kè le blase ɖo àpo èdùjiɖùɖu a ŋuti a, dɔ̃ ɛ̀ ɖoɖa funu a. Ne e teŋu gbɔ̀ a, wò la kpɔ ɛ̀, èba la sù ì nyuɛ̃ ɖe, ɖoa, e mè kɔ̀ be Mawu be ŋusɛ̃ le wɔ̀ èdɔ lè tèpe kè a. 39Mawu kè be nɔ̀pe lè Jiŋùkusi a be àlɔ̀ le mawuxɔ̀ kè a ji, eye be le kpɔ e ji. E crɔ̃na àmè kèwo jina la ɖo e mè ku susu vuɛ̃awo a.” 40Ènu kè a ye jɔ̀ ɖo Hèlìodorò ji, eye leke a ye Mawu ŋutɔ be àlɔ̀ nɔ̀ mawuxɔ̀ a be àdɔ̀kùnuwo ji, ne àmèwo mu gbà va fì ì jo ò.
Currently Selected:
2Màkàbeòwo 3: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.