2Màkàbeòwo 1
1
Xoma cucugbã a ɖoɖa Yudàtɔwo lè Ejiptè
1Yudàvi kèwo ye lè Yèruzàlɛ̀m be èdù a mè ku Yudà-nyigbã jiawo keŋu le dogbè ɖoɖa woa nɔ̀vi Yudàviwo lè Ejiptè.
2Mawu ne ɖɔ mi taŋu ku nyɔnawo eye ne ɖo ŋuku yebe nubabla ku Abràham, Isàk ku Yakɔb, yebe sumɔvi ànukuatɔwo ji. 3Ne na mìa kpata èjì kè mì la sɔ sumɔ̃ ɛ̀ a, ne mì a sɔ èjro nyuɛ̃ wɔ̀ ɖo yebe jojrowo ji ku èjì blibo. 4Ne na mì a teŋu sè yebe Èse a ku yebe ɖoɖowo gɔ̃mè, eye ne na mì ŋutifafa. 5Ne ɖo èto mìabe kùefãwo, ne sɔ mìabe àgɔ̀jèjwo kè mì, eye mu gbà ɖè àsi lè mìa ŋuti lè jɔ̀gbèvuɛ̃ be hùenu ò. 6Ekè a ye le nyi kuefã kè mi le wɔ̀ na ɛ̀, fifì lè fikè a, ɖo mia ta. 7Lè Dèmètriò be èfìɔɖùɖu be hùenu, lè èpè èkà-nè ci àsiɖèkɛgɔ̃a (169) mèa, mi, Yudàtɔwo, mi ŋlɔ̃ xoma ɖoɖa mì be: “Lè àkpɔ̃ gã ku tùkaɖa kèwo mè mi ɖo, lè èpè kèawo mè, so gà kè mè Yazɔ̀n ku yebe àmèwo gble ànyigbã kɔ̀kɔ̀ɛa ku èfìɔdua ɖɛ a, 8wo yì kaka tɔzò Mawuxɔ̀ a be hɔ̃tru gã a, eye wo kɔ̀ èhũ mà-nyã ɖe ɖɛ. Ekè a ŋuti a, mi fãkùe yɔ Tɔhonɔ̀, eye be sè na mi; mi wɔ̀ vɔsa eye mi na ènu ku èwɔ mɛmɛ, mi sì Mawuxɔ̀ a mè be kãligbɛ̃wo, eye mi sɔ vɔsa kpɔ̃nɔwo ɖo Tɔhonɔ̀ be ŋùmè.”
9Eye fifì a, mi le kpe mì be a mì a sɔ ŋùkèkè ènyi, sɔ ɖù Gòxɔ̀wo be Àzã lè Kislɛv be wètri a mè.
10“Mi le ŋlɔ̃ xoma kè a lè èpè èkà-nè takpo ci ènyi (188) mè.
Xoma èvègɔ̃a: Kè Ãtiokus kua, Yudàviwo kafu Tɔhonɔ̀
Yèruzàlɛ̀m ku Yudà-nyigbã jitɔwo, Àmèsĩsĩwo be Àɖàŋùɖoha a ku Yudà lè ŋlɔ̀ xoma kèa, sɔ le dogbè na Aristobulo kè nyi, Tɔhonɔ̀ be mawunɔ kèwo wo sì àmì nawo be jìjìmèvi ku èfìɔ Tòlòmeò be àɖàŋùɖotɔ. Xoma kè a, mi gbà sɔ le dogbè na Ejiptè-nyigbã ji be Yudàtɔwo cã, sɔ le biɔ jìjɔ̀ɛ kpɔkpɔ ku lãmèsɛ̃ na wo.
11Mi le do àkpe, so èjì mè ke, na Mawu, ɖo a, e ɖè mi so àfɔ̀ku gãwo mè. E hlùɛ̃ mi gã lè èfìɔ a si. 12Ye ŋutɔ nyà àmè kèwo va la ɖè àhùa kpe na èdù kɔ̀kɔ̀ɛ a. 13Kè èfìɔ Ãtiokus yì Pɛrsìa-nyigbã ji a, yebe àhùakɔ̃ ze sìgbè wo mu la teŋu kpe woa ji ò nène. Vɔ̀ a, wo wù ye ku àmè kèwo kplɔ̀ ɛ̀ doawo hànyà-hãnyã, lè Nànaìɔn be vòduxɔa mè, to àyè kè Nànaìɔn be hũbonɔwo tre na wo a mè. 14Ãtiokus ku yebe àɖàŋùɖètɔ vevewo yì vòduxɔ̀ a mè, ne woa wɔ̀ èsrɔ̃ɖèɖe be èkɔ̀nu na ye ku vòdu Nànaìɔn kè nyi vòdu-nɔ̀ a. Yebe susu ye nyi be àdɔ̀kùnu gbogbo kè lè vòduxɔa mèa, la nyi àgbã kè yè la xɔ̀, na èsrɔ̃ɖèɖe a. 15Nànaìɔn be hũbonɔawo ɖè àdɔ̀kùnuawo sia ɖo vòduxɔ̀ a mè, eye Ãtiokus ku yebe cãmìawo ɖo e mè. Kè èfìɔ a gbe ɖo vòduxɔ̀ a mè kpò a, hũbonɔawo tu vòduxɔ̀ a be hɔ̃tru a. 16Wo hũ hɔ̃tru vi ɖe kè wo wla ɖo èji a, eye wo dà èkpewo sùgbɔ, sɔ wù Ãtiokus ku ye tɔ̀wo. Wo sò woabe ètawo, àta ku àbɔwo, sɔ dà ɖoɖa àmè kèwo lè xixenu a. 17Kafu, lè ènu sia ènu mè, na miabe Mawu, kè sɔ àmè kèwo dovlo èawo do àsi na èku a!”
Vɔsakpe a be èzò be ŋùdãnu
18“Lè Kìslɛv be wètri a be ŋùkèkè wìvɔàtɔ̃gɔ̃ a gbè a, mi la ɖù Mawuxɔ̀ a be ŋutikɔ̀kɔ be Àzã a. Mi susu be mi ɖo la gblɔ̃ ɛ̀ na mì, ne mìawo cã mìa ɖù ì, sìgbè Gòxɔ̀wo be Àzã a ke nène. Ne mì le ɖù ì a, mì la ɖoŋù èzò kè va, wàlɛbɛ kè Nèhemìa kè tù Mawuxɔ̀ a ku vɔsakpe a, wɔ̀ vɔsawo a. 19Nyàwo ye be nyi be kè wo le mia tɔgbewo, sɔ yì Pɛrsìa-nyigbã ji a, mawunɔ kèwo wɔ̀nà ànùkua hùe nya nu a, ɖè vɔsakpe a be èzò, sɔ yì wla ɖo vudo ɖe kè mè èsì pu lè a mè. Wo wla èzò a ɖo funu a, àleke be, àmè ɖekpe mu nyã ɛ̀ ò. 20Èpè sùgbɔ yomè a, kè be nyɔ̃ na Mawu a, Pɛrsìa be èfìɔ a dɔ̃ Nèhemìa ɖoɖa Yèruzàlɛ̀m. Nèhemìa ɖè ègbè na mawunɔ kèwo wla èzò a be jìjimèviwo be wo ne yì ji èzò a va. Wo trɔ va, glɔ̃ be yèwo mu kpɔ èzò ò, vɔ̀ a ènu kpɛ̃tɛ̃ ɖe, sìgbè àmì nène, ye yèwo kpɔ. Nèhemì a gblɔ̃ na wo be, wo ne kù ì va. 21Kè ènu sia ènu sɔ̀gbè ne wo a wɔ̀ vɔsawo a, Nèhemìa ɖè ègbè na mawunɔawo be wo ne kɔ̀ ènu kè wo kù va a ɖo ànakè a ku vɔsa-lã kè ye lè e ji a ji. 22Mawunɔawo wɔ̀ ɖo e ji. Zãa ɖe kpò a, èwè klɛ̃ so lilikpo kèwo le wla ɛ̀ a godo, eye èzò gã ɖe bì lè vɔsakpe a ji, eye be wɔ̀ ŋùdã gã ɖe na àmè sia àmè. 23Wàlɛbɛ kè vɔsanu a le fiɔ̃ a, mawunɔawo ku àmèha a le fãkùe. Yònatàn to èhà a ɖoɖa, eye Nèhemìa ku àmè kpɔ̀tɛawo le xɔ̀ ɛ̀. 24Kuefã kè wo wɔ̀a ye nyi ekè a: Tɔhonɔ̀, Tɔhonɔ̀, miabe Mawu, èwò ye ɖo ènuwo kpata. Ŋɔ̃jitɔ, ŋusɛ̃tɔ jɔ̀jɔ̀ɛ ku àdɔ̀mènyuiɛtɔ ye wò nyi. Wò ɖèka kpò ye nyi èfìɔ, wò ɖèka kpò ye nyɔ̃. 25Èwò ɖèka kpò ye nana ènu fàa; wò ɖèka kpò ye lè jɔ̀jɔ̀ɛ, èwò ŋusɛ̃ kpatatɔ ku mà-vɔ̀tɔ, kè hlùɛ̃nà Izràɛl lè èvùɛ̃ ɖekpekpe mè. Wò cã mia tɔgbewo, eye wò ɖè wo ɖo vɔ̀, ne wo a sɛ̃ wò, eye wò sɔ̀gbè la ɖè Iztaɛ̀l to lè èvùɛ̃ ɖekpekpe mè. 26Lɔ̃, ne wò a xɔ̀ vɔsa kè a jro, vɔ̀sa kè mi le wɔ̀ na wò a, ɖo àpo dùkɔ̃ Izràɛl blibo a ta. Kɔ̀ dùkɔ̃ wò a ŋuti, ne be a jè, la sɛ̃ wò. 27Ɖè ègà mia dòmètɔ kèwo nyi kluviwo kãkã ɖo ègbe ji a. Bɔ̀ wo so èdù kèwo kpata mè wo kãkã ɖo a. Trɔ àpo ŋùmè ɖoɖa àmè kèawo, ɖo a, wo ci àsi na àmè kèwo le crì wo, eye wo le dovlo wo a. Sè miabe kùefã jro, ne dùkɔ̃wo keŋu ne nyã be èwò ye nyi miabe Mawu. 28Asi wò ne sù àmè kèwo wɔ̀nà àkpɛ̃nyɛ̃ do mi, eye wo dona vlo mi ku jajra a. 29Gbìgbɔ̀ li dùkɔ̃ wò a ɖo àpo Kɔ̀kɔ̀ɛpe a, sìgbè aleke Mosè gblɔ̃ ɛ̀ a nène”.
30“Ekè a yomè a, mawunɔwo, to kafuhàwo ɖoɖa. 31Kè vɔ̀sa a fiɔ̃ keŋu vɔ̀ a, Nèhemìa ɖè ègbè be wo ne sɔ̀ ènu kpɛ̃tɛ̃ kè wo ku so vudo a mè va a be kpɔ̀tɛ a kɔ̀ ɖo èkpe gãawo ji. 32Kè wo wɔ̀ ekè a, èzò be àɖe ɖe bì, vɔ̀ a vɔsakpe a be kɛ̃klɛ̃ a mì yebe kɛ̃klɛ̃ a.
33“Ènu kè jɔ̀ lè fikè a be ènyà gbã, kaka yì ɖo Pɛrsìa be èfìɔ a be èto mè. Wo gblɔ̃ na èfìɔ a be ènu kpɛ̃tɛ̃ ɖe kè lè sìgbè àmì nène a to lè àfi kè mawunɔwo wla èzò ɖo, gà kè mè wo kplɔ̀ wo àhùale a, eye fifì a, Nèhenìa ku yebe àmèwo sɔ ènu kè a kɔ̀ vɔsa a ŋuti. 34Kè èfìɔ va kpɔ ɛ̀ jèsi be nyàwo ye be nyi a, e na wo tɔ̃ èkpa trɔ do tèpe a, eye e ɖo è be nyi tèpe kɔ̀kɔ̀ɛ. 35Ekè a hɛ̃ èci sùgbɔ va na èfìɔ a, eye be na àmè kèwo lè veve ɖe na ɛ̀awo kpɔ gomè sùgbɔ lè e mè.
36Nèhemìa ku yebe ŋutimèwo ɖo nyikɔ na ènu kpɛ̃tɛ̃ kè a be “neftar” kè gɔ̃mè ye nyi “ŋutikɔklɔ”, vɔ̀ a àmèhawo yɔna ɛ̀ be “naftà”.
Currently Selected:
2Màkàbeòwo 1: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.