1Samuɛl 27

David wla ɖo Filistìtɔwo gbɔ

1David yì ye ɖokoe mè, eye be gblɔ̃ be: “Ne ènuwo le yì lekea, gbè ɖèkaa, mù la va ci Saolò simè. Nyè mu gbà teŋu wɔ̀ ènu bu, sɔ wu be ma si yì bè ɖo Filistìtɔwo be ànyigbã ji ò. Nène a, Saolò la tɔtè yo nyè mè tĩtĩ, lè Izràɛl nyigbãa keŋu ji, eye mù la to lè e simè.” 2David kplɔ̀ àgbètɔ èkà woeàtɔ̃ (600) ɖo àsi, eye be jè èmɔ. E yì to Gat be èfìɔ, Àkis, Màɔk be èvia gbɔ. 3David ku yebe ŋutimeawo keŋu nɔ̀ Gat, lè Àkis gbɔ, àmè sia àmè ku yebe xòmè. David kplɔ̀ èsrɔ̃a èvè kèwo ye le nyi: Yizreɛl nyɔ̃nù kè wo yɔna be Ahinɔ̀am ku Nabal be àhòsì, Àbìgaɛl so Karmèl. 4Ekè Saolò sè be David si bè ɖo Gat be èdùa mèa, Saolò tɔtè David yomè tĩtĩ.

5Gbè ɖèkaa, David gblɔ̃ na Àkis be: “Èfìɔ bùbùtɔ, ne wò dojì ɖo sumɔ̃vi wò ŋutia, ɖè èmɔ be ma yì nɔ̀ kɔpe ɖe mè, lè èdùa be àgblè ji. Nukɛ ŋuti sumɔ̃vi wò la nɔ̀ èfìɔ-dùa mè ku wò ɖo ò?” 6Àkis sɔ Siklag be èdùa na David. Ekèa ŋuti Siklag be èdùa lè Yudà be èfìɔwo be ànyigbãwo ji kaka va na fifì.

7David nɔ̀ Filistìtɔwo be ànyigbãwo ji, èpè ɖèka ku wètri ènè. 8David sona Siklag ku yebe àmèwo, yì xana Gɛsuritɔwo, Girizitɔwo ku Àmàlɛktɔ kèwo ye nyi dùkɔ̃ kèwo ye lè ànyigbã ŋuawo ji, so kaka gbè ɖe gbè kea, sɔ tùtà Sur, kaka yì ɖo Ejiptè-nyigbã ji, sɔ hlànà wo. 9David wùnà èdùa mètɔwo, eye mu gblena ŋusù ɖèka pɛ, àlo nyɔ̃nù ɖèka pɛ ɖo àgbè ò. Wo lena ènyì ku àlɛ̃wo jona, eye wo mu gblena èsɔ-àkɛtɛ, àlo èsɔ kpotɔnɔ̀, àlo àwù, àvɔ ku ènudodo buwo ɖɛ ò. Ne David trɔ gbɔ̀a, e yì kpɔna Àkis. 10Ne Àkis biɔ David be: “Àmè kɛwo mì hlà egbèa ò?”, David ɖona e ŋuti be: “Mi hlà Yudà be Nègev-nyigbãa,” àlo, “Mi hlà Yerahmelìtɔwo be Nègev”, àlo, “Mi hlà Kenìtɔwo be Nègev.” 11David mu lɔ̃nà be woa kplɔ̀ àhùale ŋusù, àlo nyɔ̃nù ɖekpe gbɔ̀ va Gat àgbèagbè ò. David gblɔ̃nà be: “Àmè kèawo be nupo pòpo teŋu va ɖè mi sia na kɛ̃tɔwo.” Nène a ye David wɔ̀nà, wàlɛbɛ kè keŋu be nɔ̀ Filistìtɔwo be àgblè jia. 12Àkis kã ɖo David ji, eye be gblɔ̃nà be: “David wɔ̀ ènu bàɖà ku Izràɛl dùkɔ̃ kè nyi yebe dùkɔ̃a. Ekèa ŋutia, sumɔ̃vi nyè kpò be la nyi, kaka sɔ yì.”

Currently Selected:

1Samuɛl 27: GEN

Highlight

Copy

Compare