1Samuɛl 10
10
1Samuɛl sɔ àmì be ègòvi kè be sɔ ɖo àsia, eye be kɔ̀ àmìa ɖo èta na Saolò. Ekèa yomè a, e kpla àsi èkɔ̀ na Saolò, eye be gblɔ̃ na ɛ̀ be: “Mu nyi Tɔhonɔ̀ ŋutɔ ye do àmì èta na wò, sɔ wò ɖo èfìɔ ɖo yebe ècrɔ̃nu ji òa? 2Egbèa, ne wò jo lè gbɔ nyè vɔ̀a, wò la dogò ŋusù èvè, lè Raxɛl be èyɔ̀doa gbɔ, lè Bɛnyamìn be èdùa be lipò ji, lè Sɛlsà. Wo la gblɔ̃ na wò be: “Wo kpɔ èsɔ-àkɛtɛ-nɔ kèwo wò yì jiawo, eye ètɔ wò ŋlɔ̀be èsɔ-àkɛtɛ-nɔawo be ènyà, vɔ̀a e jo le xànu ɖo mìa ta, eye be le gblɔ̃ be: 'Leke mù la wɔ̀, la kpɔ èvi nyè ò?'” 3Ne wò so funu, yì ŋùkɔ̀ vi ɖe a, wò la yì ɖo Tabɔ̀r be logòtia gbɔ. Ŋusù ètɔ̃ ɖewo le yì Mawu sɛ̃pe le Betɛ̀l la dogò wò. Woa dòmètɔ ɖèka la hɛ̃ ègbɔvi ètɔ̃. Àmè èvègɔ̃a la hɛ̃ kpɔ̃nɔ ètɔ̃, eye àmè ɖèka kpɔ̀tɛa la hɛ̃ vɛ̃ ègò ɖèka. 4Wo la dogbè na wò eye wo la na wò kpɔ̃nɔ èvè, kèwo wo ɖo la sɔ wɔ̀ vɔsa na Mawu a. Wò la xɔ̀ wo. 5E yomè a, wò la yì Mawu be ètokɔ̃ɛ̃ kè wo yɔna be Gibeaa ji, lè àfi kè Filistìtɔwo be èdùjikpɔtɔwo nɔ̀nàa. Wàlɛbɛ kè wò la nɔ ɖo èdùa mèa, wò la dogò gblɔ̃ɖɛtɔwo be èha ɖe kè la nɔ ɖì so sɛ̃sɛ̃ be ètoa jia. Èhũpòpo, èkpɛ̃kuku, èkàsãŋùguwo la nɔ ɖì lè ŋùkɔ̀ na wo, gbɔ̃gbɔ̃ la ɖì ɖo woa ji, eye wo la nɔ gblɔ̃ ènyà ɖɛ. 6Wàlɛbɛ ŋuaa, Tɔhonɔ̀ be gbɔ̃gbɔ̃ la ɖì ɖo ji wò, eye wò la tɔ ènyà gbɔ̃gblɔ̃ ɖɛ ku wo. Gà ŋua mèa, wò la trɔ zũ àmè bu. 7Ne jèsìdo kèawo ze na wòa, wò la nya be Mawu lè ku wò nyàwo. So gà ŋua mèa, wɔ̀ ènu kè wò ɖo la wɔ̀a. 8Wò la gbà trɔ ɖì jè ŋùkɔ̀ na mù, yì Gilgàl. Ènyè yaa, mù la va jè yo wò mè, ne ma wɔ̀ ènumème vɔsa ku ɖèkawɔ̀wɔ vɔsa. Nɔ̀tè kpɔ mù lè funua, ŋùkèkè adrɛ̃. Ne mù vaa, mù la gblɔ̃ ènu kè wò la wɔ̀a na wò.”
9Kè Samuɛl gbe trɔ, le jo, gble Saolò ɖɛ kpòa, Mawu trɔ Saolò be èjì bliboa keŋu-keŋu, eye, ènu kèwo Samuɛl gblɔ̃ na ɛ̀awo keŋu va e mè, gbè ŋua gbè. 10Kè Saolò ku yebe sumɔ̃via va ɖo Gibeaa, gblɔ̃ɖɛtɔwo be èha ɖe va dogò wo, eye Mawu be gbɔ̃gbɔ̃ ɖì ɖo Saolò ji, eye be tɔ ènyà gbɔ̃gblɔ̃ ɖɛ ku wo. 11Ekè àmè kèwo jèsi Saolò sãa, kpɔ Saolò, le gblɔ̃ ènyà ɖɛ ku gblɔ̃ɖɛtɔwoa, e dãŋù do wo, eye wo biɔ woa nɔ̀nɔwo be: “Nukɛ ye le jɔ̀ ɖo Kis be èvia ji ò? Ɖe ye Saolò cã lè gblɔ̃ɖɛtɔwo dòmèa?” 12Ŋusù ɖe lè funua biɔ sè be: “Vɔ̀a ɖe, àmè kɛ be ènukplaviwo wo nyi ò? Ekèa ye trɔ zũ èlodonyà be: “Ɖe ye Saolò cã lè gblɔ̃ɖɛtɔwo dòmèa?” 13Kè gbɔ̃gbɔ̃a jo lè Saolò ji vɔ̀a, Saolò yì sɛ̃sɛ̃ be ètoa ji. 14Saolò be àtàvi#10.14 Lè xoma buwo mèa, wo gblɔ̃ be 'nyìne', ɖoa, yòvowo be ègbè sùgbɔ mu ɖo yɔyɔ vòvò na nyìne ku àtàvi, àlo àtàgã ò. biɔ Saolò ku Saolò be sumɔ̃via be: “Fikɛ ye mì so ò?” Saolò ɖo e ŋuti be: “Mi yì ji èsɔ-àkɛtɛ-nɔwo. Vɔ̀a, kè mi mu kpɔ wo òa, mi yì Samuɛl gbɔ, yì biɔ e mè sè.” 15Saolò be àtàvia gblɔ̃ be: “Tɔ̀ wò jɔ̀, gblɔ̃ ènu kè Samuɛl to na wòa na mù.” 16Saolò gblɔ̃ na yebe àtàvia be: “E gblɔ̃ na mi be wo kpɔ èsɔ-àkɛtɛ-nɔawo.” Vɔ̀a mu gblɔ̃ ènyà ɖekpe na àtàvia so ènu kè Samuɛl gblɔ̃ so èfìɔɖùɖua ŋuti ò.
Wo dà àkɔ̀ sɔ cã Saolò
17Samuɛl na dùkɔ̃a bɔ̀ ɖo Tɔhonɔ̀ be ŋùmè lè Mispà 18E gblɔ̃ na Izràɛlviwo be: “Tɔhonɔ̀, Izràɛlviwo be Mawu a gblɔ̃ be: 'Ènyè ye kplɔ̀ Izràɛl be dùkɔ̃a to lè Ejiptè-nyigbã ji, eye mù hlùɛ̃ mì gã so Ejiptètɔwo ku èfìɔdu kèwo keŋu le zĩ mì ɖo ànyiawo si mè.' 19Vɔ̀a, egbèa, mìawo yaa, mì gbe mìabe Mawu, Mawu kè hlùɛ̃ mì gã, lè mìabe jɔ̀gbèvuɛ̃wo ku vevesèsewo mèa, eye mì gblɔ̃ na ɛ̀ be: 'Ɖo èfìɔ ɖo mia nu.' E nyɔ! Fifìa, mìa kpata mì va ɖo ɖo Tɔhonɔ̀ be ŋùmè, ɖo mìabe hɛ̃nu ku mìabe kɔ̀tawo nu.”
20Samuɛl na Izràɛlviwo be kɔ̀tawo keŋu dɔ̃ va, eye cãcãa va jè Bɛnyamìn be kɔ̀taa ji. 21Ekè Samuɛl na Izràɛlviwo be kɔ̀tawo dɔ̃ vaa, cãcãa va jè Matrì be hɛ̃nu ji. E yomè ye cãcã kè gbà va e mèa, va jè Kis be èvi, Saolò ji. Wo ji Saolò lè àmèawo keŋu dòmè, vɔ̀a, wo mu kpɔ ɛ̀ ò. 22Wo gbà biɔ Tɔhonɔ̀ be: “Ŋusù kèa va fikèa?” Tɔhonɔ̀ ɖo e ŋuti be: “Kpɔɖa, mì yì ji ì lè àgbãwo be dòmè. E wla ɖo funua!” 23Àmèwo pu dù yì dɔ̃ Saolò to va, eye wo kplɔ̀ ɛ̀ va ɖo dùkɔ̃a be dòdòmè. Saolò be àmètia jɔ̀ àsu, àleke be, lè dùkɔ̃a keŋu mèa, àmè ɖekpe mu sɛ̃ àbɔta na ɛ̀ ò.
24Samuɛl gblɔ̃ na dùkɔ̃ bliboa be: “Mì kpɔ àmè kè Tɔhonɔ̀ cã na mìa? Àmè ɖekpe mu sɔ̀ ku ì lè dùkɔ̃ bliboa dòmè ò.” Eye dùkɔ̃ bliboa sò àyo, kpà àbòbo be: “Èfìɔ bùbùtɔa ne nɔ̀ àgbè!” 25Ekèa yomè a, Samuɛl gblɔ̃ èfìɔɖùɖu be ɖoɖowo na dùkɔ̃a, eye be ŋlɔ̀ wo ɖo xoma a mè, sɔ ɖo Tɔhonɔ̀ be ŋùkɔ̀. Eye Samuɛl ɖè àsi lè dùkɔ̃a ŋuti, eye àmè sia àmè yì àxue. 26Saolò cã jo yì àxue, lè Gibea, eye kãlìwɔ̀tɔ kèwo be èjì Mawu tɔ àsiawo cã kplɔ̀ ɛ̀ do. 27Gãkea, àmè kpòtoe ɖewo gblɔ̃ be: “Lekè àmè kèa cã la teŋu hlùɛ̃ àmè gã ɖo ò?” Ekèa ŋutia, wo crì ì, eye wo mu hɛ̃ ènu nana ɖekpe va na Saolò ò. Saolò yaa, mu sɔ èɖe lè e mè na wo ò.
Currently Selected:
1Samuɛl 10: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
