1Màkàbeòwo 14
14
Midia be èfìɔ le Dèmetrio
1Lè èpè èkà ènè ci wo èvègɔ̃a (172) mèa, èfìɔ Dèmètrio bɔ̀ yebe àhùakɔ̃ a, eye be jo yì Midia, ne be a yì ji àlɔ̀do, la sɔ wɔ̀ àhùa ku Trifɔ̀n. 2Kè Arsas, Pɛrsìa ku Midia be èfìɔ a, sè be Dèmètrio gɛ̃ ɖo yèbe ànyigbã ji a, e dɔ̃ yebe àhùagawo dòmètɔ ɖèka be ne yì le Dèmètriò àgbè-àgbè va. 3Àmè kè a so, jè èmɔ̃, ɖù Dèmètrio be àhùakɔ̃ a ji, eye be le Dèmètriò, kplɔ̀ ɛ̀ yì na Arsas, eye Arsas do è ègà-kpà mè.
Kafuhà na Simɔ̀n
4Yudàviwo kpɔ gbɔ̃jɛ̃, so gà ŋua mè, kaka sɔ na Simɔ̀n be èfìɔɖùɖu be hùenu bliboa. Simɔ̀n jina la wɔ̀ ènu kè nyina dùkɔ̃a be nyɔ̃na a. Àcɛ̀ kè be ɖoa jènà e ji na Yudàviwo, eye wo lɔ̃ yebe nyiɖiɖi a yebe àgbè ŋùkèkèwo kpata. 5Kè be ɖo àlɔ̀ Yopa be èdù a ji a, e gbà kɔkɔ yebe gogo a yì èji, ɖo èdù kè a na be Yudàviwo teŋu ɖo èhũjèpè kè hũ èmɔ̃ na wo, sɔ yì Grɛs be àpùdòmèkɔ̃ɛwo ji. 6E kèke yebe èdù a be ànyigbãwo ɖo e ji, eye be ɖo àcɛ̀ ɖo èdù a ji goŋu-goŋu. 7E kplɔ̀ àhùale sùgbɔ kèwo cigbeawo gbɔ̀. E ɖo àlɔ̀ Gazer, Bait-Sur ku Àgbògbò a ji, eye be ɖè èɖi ɖe sia ɖe jo lè woa mè. Àmè ɖekpe mu gbà teŋu kpe àkɔ ku ì ke ò. 8Amè sia àmè kpɔna yebe ènyà gbɔ, lè ŋutifafa mè, wàlɛbe kè ànyigbã a cã le na yebe nukuwo, eye gbàjàmè be àtiwo le na woabe èkusɛ̃sɛ̃wo a. 9Amè sisĩwo nɔ̀nà ànyi lè àblɔwo mè, la nɔ kã ènu jè e ji na àmè be àseŋuwo. Ɖèkajɛwo dona woabe gbàdagbã be àwùwo, sɔna woabe àhùawɔ̀nu yeyewo sɔ wɔ̀nà èglo. 10Simɔ̀n nana wo hɛ̃nà ènuɖùɖu va èdù gãwo mè; e nana wo ɖona àhùawɔ̀nu kèwo wo la sɔ nɔ hlùɛ̃ woa ɖokoewo ta a, lè àgbògbò kèwo be sɔ èdùawo wɔ̀ a mè. Ekè a na be yebe gogoa ɖì yì ànyigbã be ènukpòpewo. 11E na ŋutifafa va èdù a mè, eye jìjɔ̀ɛ kè va nɔ̀ Izràɛl-nyigbã ji a va lòlò ŋutɔ. 12Amè sia àmè nɔ̀nà ànyi lè yebe vɛ̃ti gɔ̃mè ku lè yebe ègboti gɔ̃mè, kè àmè ɖekpe mu dona vɔ̃vɔ̃, àlo, ŋùklɛ̃ na ɛ̀ ò a. 13Avũ do na àmètɔwo keŋu bu jo lè Yudà-nyigbã ji, eye wo ɖù èfìɔawo ji, hùe ŋuawo nu. 14Simɔ̀n dona àlɔ̀ yebe dùkɔ̃ mètɔ kèwo mu ɖo ŋusɛ̃ dekpe ò a, eye be likè woa kpata. E zɔ̃ ɖo Mosè be Èse a ji, sɔ gũ èta na Yudàvi vlo mà-wɔ̀ ànùkuawo keŋu. 15E na kɔ̀kɔ̀ɛpe a ɖɔ ku gogo, eye be sɔ ènuzãzã ku kogò xɔ̀ àsì sùgbɔ kɔ yebe àdɔ̀kùnuwo yì èji.
16Kè wo sè le Romà ku Spartìa be Yònatàn ku a, èdùawo mètɔwo ci ŋuzĩzĩ mè ŋutɔ. 17Vɔ̀ a, kè wo va sè be Simɔ̀n, nɔ̀via ye trɔ zũ mawunɔ gã ɖo e tèpe, eye be nyi àpetɔ ɖo àgblè ji ku èdùwo ji a, 18wo gbìgbɔ̀ ŋlɔ̃ èxlɔ̃wɔ̀wɔ ku ègbè lè du be èkàdodo kè Yudà ku Yonatan fòfoawo wɔ̀ sã xoxo a be ènyàwo ɖo àkɔblì gbàjà ji, sɔ ɖoɖa ɛ̀. 19Wo hlɛ̃ ènyà kèawo lè àgũtòpò, lè dùkɔ̃ a tèpenɔ̀tɔwo be èhabɔ̀bɔ a be ŋùkɔ̀, lè Yèruzàlɛ̀m. 20Xoma kè Spàtiatɔwo gbìgbɔ̀ ŋlɔ̃ ɖoɖa a mè be ènyàwo ye nyi ekè a: “Spartia be ègawo ku dùkɔ̃ a le do ègbè ɖoɖa Simɔ̀n, Mawunɔ Gã a, ɖoɖa Èdùmè-Mègãwo kudo Mawunɔ Gãwo gbàkudo Yudàtɔwo be dùkɔ̃ a ku nɔ̀vi kpɔ̀tɛawo keŋu.
21Amèdɔ̃dɔ̃ kèwo mì ɖo ɖoɖa miabe dùkɔ̃ a kã mìabe gogo ku mìabe nyikɔ xɔ̀xɔ ta na mi, eye mi kpɔ jìjɔ̀ɛ so woabe vava ŋuti. 22Mi ŋlɔ̃ woabe ènyà gbɔ̃gblɔ̃wo ɖo dùkɔ̃ a be ɖoɖowo dòmè be: “Nùmenìo, Ãtiokus be èvia ku Ãtipatɛ, Yazɔ̀n be èvia, àmè kèwo nyi àmèdɔ̃dɔ̃wo so Yudàtɔwo gbɔ a, va mia gbɔ, be yèwo a gbìgbɔ̀ wɔ̀ èxlɔ̃jèjè be èkàdodo ku mi. 23E jè ŋùmè na dùkɔ̃ a be wo a xɔ̀ ŋusu kèawo ku bùbu, ne wo a sɔ woabe nupo pòpo be ènyàŋlɔ̃ɖɛ a ɖo dùkɔ̃ a be xomajràɖope a, aleke be Spartìa be dùkɔ̃ a ne teŋu nɔ ɖo ŋùku e ji. Sɔ yì e ji a, wo gbà ɖè xoma kè a be ŋɔ̃ŋlɔ̃ pɛpɛpɛ, sɔ le ɖoɖa Simɔ̀n, Mawunɔ Gã a”.
24Ekè a yomè a, Simɔ̀n dɔ̃ Nùmenìo ɖoɖa Romà, be ne sɔ sìka be àkpoxɔ̀nu gã ɖèka kè be kpɛ̃kpɛ̃mè la nɔ̀ kpɛ̃kpɛ̃dànu minas èkàwìvɔàtɔ̃a (1000) gbìgbɔ̀ sɔ ɖo èkpe ègbèlèdu be èkàdodo a ji ku wo.
Simɔ̀n, mawunɔ gã ku Yudà dùkɔ̃ blibo a kplɔ̀tɔ
25Kè Yudà dùkɔ̃ a sè ènyà kèawo a, wo biɔ woa ɖokoewo be: “Leke mi la wɔ̀, la ɖè miabe àkpedodo fiɔ Simɔ̀n ku yebe èviwo ò? 26Ɖo a, ye ku fòfoawo, kudo ètɔa be àxuedo blibo a ye ɖo èjì, sɔ tù àfɔ̀ tè. E ɖè àhùa kpe na Izràɛlviwo be èkɛ̃tɔwo, nyà wo yì ŋùgbe, eye be na Izràɛl be dùkɔ̃ a vò.”
Wo ŋlɔ̀ ènu ɖo àkɔblì gbàjà ji, sɔ tɛ ɖo èkpeliwo-ŋuti, le Ziɔ̀n-toa ji. 27Ènu kè wo ŋlɔ̃ a ye nyi ekè a be: “Lè Elul be wètri be ŋùkèkè 18/woènyigɔ̃ a gbè, lè èpè èkà-nè ci woèvègɔ̃a (172) kè nyi èpè ètɔ̃gɔ̃ a na Simɔ̀n be mawunɔ gã be èdɔ a lè Asaràmèl a, 28lè mawunɔwo, dùkɔ̃ a, èdù a be ègawo, ku èdù a be àmè sĩsĩwo be àgũ gã a mè a, wo kã ènyà kè a ta na mi be: 29Lè àhùa wɔ̀wɔ̀ sùgbɔ kèwo va do ŋùmè ɖoɖa, lè ènuto a mè a, Simɔ̀n, Màtatìa be èvi kè le nyi Yoarib be tɔgbeyɔviwo dòmètɔ ɖèka, ku fòfoawo sɔ woa ɖokoe do àfɔ̀ku mè, sitè ɖo woabe èdù a be èkɛ̃tɔwo ŋuti, sɔ hlùɛ̃ miabe Kɔ̀kɔ̀ɛpe a ku Mose be Èse a ta. Wo wɔ̀ ekè a, sɔ na gogo gã ɖe miabe dùkɔ̃a. 30Yònatàn bɔ̀ miabe dùkɔ̃ a, eye be trɔ zũ miabe mawunɔ gã; e yomè a, e jo yì èyɔ̀mè, lè tɔgbèawo gbɔ. 31Yudàtɔwo be èkɛ̃tɔwo ji be yèwo a va cɔ̃ èdù a, yèwo a gbã ɛ̀, ne yèwo a ɖo àsi woabe Kɔ̀kɔ̀ɛpe a ji. 32Ekè a na be Simɔ̀n so, eye be wɔ̀ àhùa ɖo yebe èdu a ta. E zã ye ŋutɔ be àdɔ̀kùcinuwo be àkpa gã ɖe, sɔ ji àhùawɔ̀nuwo na èdù a be àhùakɔ̃ a, eye be tu èfɛ̃ na wo. 33E gbìgbɔ̀ tù Yudea ku Bait-Sur be èdu kèwo nyi èkɛ̃tɔwo be èdù kèwo mè àhùawɔ̀nuwo nɔ̀nà sã, lè èdɛ̃ ji a, eye be sɔ wo ɖo àgbògbò. E sɔ Yudàviwo be gbàdagbãwo ɖo woa mè. 34E gbìgbɔ̀ sɔ Yopà be èdù a ɖo àgbògbò lè àpù a to, ɖo Gezɛr kè mè èkɛ̃tɔwo nɔ̀ sã xoxoa cã àgbògbò, lè Azɔt be lipòwo ji. E sɔ Yudàtɔwo ɖo funu a eye be sɔ ènu kèwo kpata hiã na wo a ɖo èdùawo mè. 35Kè dùkɔ̃ a kpɔ lekè Simɔ̀n wɔ̀nà ànùkua ɖo a ku gogo kè be ɖo be yè a na yèbe dùkɔ̃ a, wo sɔ ɛ̀ ɖo woabe èga ku mawunɔ gã, ne wo a sɔ do àkpe na ɛ̀, ɖo ènu kèwo kpata be wɔ̀ na dùkɔ̃ a, ku leke be sònà jɔ̀jɔ̀ɛ ɖo a ŋuti. 36Lè Simɔ̀n be àgbè mè a, e teŋu nyà vòdu sɛ̃tɔwo ku àmè kèwo va ci David be èdù a mè, le Yèruzàlɛ̀m a jo. Àmè kèawo tù àgbògbò ɖo funu a, eye wo sona e mè, yì donavlo kɔ̀kɔ̀ɛpe a, gblena èkɔ̀do na ɛ̀ veve ɖe. 37Simɔ̀n sɔ Yudàviwo be gbàdagbãwo ɖo funua, eye be gbìgbɔ̀ do è àgbògbò. E gbìgbɔ̀ kɔ Yèruzàlɛ̀m be èglìkpawo yì èji, ne ènugbletɔ ɖekpe mu gbà teŋu va gble ènu lè èdù a ŋuti ò. 38E yomè a, èfìɔ Demètrio Èvègɔ̃ a ɖo èkpe yebe Mawunɔ Gã be èdɔ a ji na ɛ̀. 39E sɔ ɛ̀ ɖo Èfìɔ be Èxlɔ̃wo dòmè, eye be na ɛ̀ bùbu jèsì gã sùgbɔ. 40Èfìɔ Dèmètriò Èvègɔ̃ wɔ̀ ènu kè a, ɖo a, e sè be Romatɔwo sɔ Yudàviwo wɔ̀ èxlɔ̃, eye wo kpɔna wo be wo nyi àmè kèwo lè èkàdodo mè ku yèwo, eye wo nyi yèwo nɔ̀viwo. E gbà sè be Yudàtɔwo xɔ̀ Simɔ̀n be àmèdɔ̃dɔ̃wo ku bùbu, 41eye Yudàtɔwo ku mawunɔwo susu be e nyɔ̃ be yèwo a ɖo Simɔ̀n Èga ku Mawunɔ Kòkòɖàbì, kaka na gà kè mè gblɔ̃ɖɛtɔ wɔ̀ ànùkua ɖe la va a, 42yèwo a sɔ Simɔ̀n ɖo àhùawɔ̀tɔ gãwo nu, eye be la kpɔ Kɔ̀kɔ̀ɛpe a ji, la nɔ cã èdɔwɔ̀tɔwo be ŋùkɔ̀nɔ̀tɔwo, èdù-dɔwɔ̀tɔwo jikpɔtɔwo, àhùawɔ̀nuwo ku àgbògbòwo jikpɔtɔwo. 43Sìgbè Kɔ̀kɔ̀ɛpe a jikpɔtɔ nène a, àmè sia àmè la nɔ̀ wɔ̀ ɖo Simɔ̀n be ègbè ɖèɖe ji. E la ɖè èse to be wo la nɔ wɔ̀ xoma ku èdù a be ɖoɖo ɖe sia ɖe lè yèbe nyikɔ mè. E la nɔ do àwù jɛ̃ hɛ̃lĩ kè ji sìka be àcɔ ɖonu la nɔ̀ a. 44Àmè ɖekpe mu kpɔ èmɔ̃, lè dùkɔ̃ dòmè, àlo, lè mawunɔwo dòmè, la dà èse kèawo dòmètɔ ɖe ji, àlo la jè àgla ɖo yebe ègbèɖèɖe ɖe ŋuti, àlo, la wɔ̀ bɔ̀bɔ ɖe lè èdùa mè, kè mu la xɔ̀ èmɔ̃ ɖèɖe so e gbɔ ò. Nènea ke, àmè ɖekpe mu kpɔ èmɔ̃, la do àwù jɛ̃, la do sìka be àcɔɖonu ɖo e ji ò. 45Àmè ɖekpe àmè kè la dà ɖoɖo kèawo ji a, jè na ètodɔ̃.
46“Dùkɔ̃ blibo a lɔ̃ ɖo e ji be wo ne sɔ̀ àcɛ̀ kèawo keŋu na Simɔ̀n. 47Simɔ̀n lɔ̃, eye be dà àsi ɖo e ji be yè a wɔ̀ Mawunɔ Gã be èdɔ a, be yè a nyi Àhùawɔ̀tɔ Gã a, Yudàviwo ku mawunɔwo be Èga, ne yè a nɔ̀ èta na àmè sia àmè.”
48Yudàviwo ɖo è be wo ne ŋlɔ̃ ènyàa kèawo ɖo àkɔblì gbàjà ji, sɔ tɛ ɖo gàglàgbè, lè Mawuxɔ̀ a be èkpa mè. 49Wo la sɔ ŋɔ̀nlɔ̃ kèawo ke ɖɛ, ɖo àdɔ̀kùnuwo jràɖope, lè àlɔ̀sɔpe na Simɔ̀n ku èviawo.”
Currently Selected:
1Màkàbeòwo 14: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.