Tobit 6
6
Ujɔŋkpaan bɔti
1Kinaacimpɔmbikee nìn táá ntuunee ki búntì. Kibɔkɔ mun nìn táá-bi. Kunyapeepeekaauee, bi nìn gbíntì Tiigiri mɔɔgbandi ní ki dōoǹ. 2Toobiyaasi nìn sīntì Tiigiri mɔɔlin kí fíntí u-taaŋi. Niinee ujɔŋkpaan ubɔ nyánní nnyimin ki bàà là kí cúú u-taal kí náĺ.
Kinaacimpɔmbikee nìn fáá mbiil. 3Niinee ntuunee bí-u yii: «Cúú-u kí nīn ŋúb́ tiŋan!» Toobiyaasi nìn ŋúń ki cúú ujɔmee ní ki dáaĺ-u ki bíl̀ dimɔɔgbandi. 4Ntuunee nìn bí-u yii: «Pùtī-u kí cúú ŋkaam nì diŋuul nì dipɔɔl kí lēē kí bíĺ ŋkpaanceeti, ní kí dū ina kí fá. Di sá yii ŋkaam nì diŋuul nì dipɔɔl nee sá nnyɔkɔkpaan ní.» 5Kinaacimpɔmbikee nìn pūtì ujɔmee ní ki lēē ŋkaam nì diŋuul nì dipɔɔl. U nìn lēē ujɔmee dijandi ki ŋmɔ́ ní ki dū ŋyaam ki pùkū din kíǹee.
6Míǹ boonee, bi-liitil nìkī bi-saŋŋu dicilpu ki tóob́ kí kɔ́ Meedii tiŋkin. 7Niinee kinaacimpɔmbikee bālifì ntuunee yii: «M-nabiki Asariyasi, ba weeŋyi ní ujɔm ŋuul nì u-pɔɔl nì u-kaam cāantí ní?» 8Ní ntuunee kíí-u yii: «Ŋfaŋkpitim yaa páb́ uninja àá unimpuee, á wà ujɔmee ŋuul nì u-pɔɔl udaan nimbiin. Nnyiim min làá yīkèe làá jà ŋfaŋkpitim gbanti ní uninjee àá unimpuee ń tɔ̄ u-ba kí nīn cáa cá jaanjaan. 9Tinipɔn yaa bí unil nimbiliŋ pu ní bi dū ŋkaam gbanti ki ŋmītèe, udaan làá ká dicáaǹdi.»
Rafayeel sáŋkì Toobiyaasi ú cáá Saara
10Bi nìn kɔ́ Meedii tiŋkin ki tóob́ Eekibataani, 11ní Rafayeel bí kinaacimpɔmbikee yii: «M-nabiki Toobiyaasi!» Ní úǹ kíí-ŋu yii: «Ba ŋá?» Ní ntuunee bí-u yii: «Raguweel cee ní ti làá gbíntí kí dòon̄ kunyeeu nee. A-nabiki kiba dee. U cáá bisal ubɔ bi yíì-u Saara. 12Usapɔɔn gbanti boonee, waa ti cáá jipɔɔnaaa, kaa ti cáá bisal ubɔ mun. Sii nì Saara pēē kiŋkiŋ ní. An puee a cáá nsan kí cáá Saara kí jī u-baa fakal. U sá usapɔɔn un cáá iciinee, ki cáá dipɔbil ní ki ŋān̄ mun, ní u-baa mun sá unimɔnti.» 13Ní ŋu nìkī ki lī yii: «A cáá nsan kí cáá-u. M-nabiki, pīlifiǹ-mi, m làá sòoǹ kisapɔmbiki gbanti pu ki-baa cee kujoou nee ú dū-kì kí tīī-si. Ní ti yaa láa fātìi gítìń Rageesee, tí dāá ŋá u-pu tinimpucan. M nyí tiŋan yii Raguweel kaa làá yíí kí taa dū-kì kí tīī-si àá kí kíí kí dū-kì kí tīī ubɔ. U yaa ŋá mimmee, see bí kpɔ̀-u kí nóó nì Mooyiisi marau. Di sá yii u nyí mara poonee, sii di cáá nsan kí cáá-kì kí wàatī ní bin kɔkɔ kíǹee ń nín páań. An puee, pīlifiǹ-mi m-nabiki, kujoou nee, man nì Raguweel làá sòoǹ kisapɔmbiki nee pu, ní ḿ tùkù ki-baa ń dū-kì kí tīī-si ticati. Ti yaa láa fàtīi gítí Rageesee, ti làá dāá yòon̄-kì ní kí cáá-kì kí cùnnì a-dumpu.» 14Niinee Toobiyaasi kíí Rafayeel yii: «M-nabiki Asariyasi, m gbìl̄ yii bi dū-u ki tīī ticati ŋfunyɔm miluli pu, ní u-calib kɔkɔ kpíì kunimpucandiin. Kunyeeu, bi yaa là kí dòon̄ nì uee, bi kúù ní. M gbìl̄ biba mun cee yii arasinii ubɔ di nìn kù-bi. 15An pu ní m fàŋkí. Arasiniiyee kaa ŋáań usapɔɔnee tiba, ama ŋyunti ŋun ní uninja yaa là kí dòon̄ nì uee ní ú fáá kí kpɔ̀ uninjee. M sá m-baa bibaabil ní. M yaa kpíìyee, m làá yàntī m-baa nì m-na ń kpú kunimbaaun m-pu. Baa ti cáá jipɔɔn ubɔ ń síb́-bi.»
16Ní Rafayeel bí-u yii: «A súntì tin a-baa tùkū-see pu níii? M nyí u tīī-si mara yii á yòon̄ unimpu úǹ u-ba dicaŋkun naa! M-nabiki, pīlifiǹ-mi, taa yàntī arasinii gbanti bɔti ń páb́-si, sii dee cáá-u. M nyí tiŋan yii kujoou nee gbee, bi làá dū-u kí tīī-si ú kpántí a-nimpuu. 17Ama a yaa làá kɔ́ kunimpucandiinee, á yòon̄ ujɔmee pɔɔl kikatii nì u-ŋuulee kí dūú páká amɔsiŋkoon kisambiki kin poon bi tùutī talaaluee poon. Nnunnu làá gbìtī ní arasiniiyee yaa gbìl̄ ŋu-puee, u làá sāǹ kí taa ti pée gítiń u-cee dalba dalba. 18Ŋyunti ŋun ní si nì u làá kpāfèe, ni-liitil ń yīkì dicilpu kí mèè ní kí gbàam̀ ti-Dindaan un bí yilpuee yii ú sɔ̄ ni-saai kí wúń ni-pu. Á taa fàŋkì, di sá yii sii di pée yì unimpu gbanti kí nīn cáa cá talku ní an sá yii sii di làá fīī-u. U làá táá-si ní m tīī-si dimákal yii u làá màal̀-si mbiyaamu mun làá nīn bí kii nnabiyaamuee kí tīī-si. An puee á taa dūú páb́ a-ba.»
19Ŋyunti ŋun Toobiyaasi gbìl̄ tin Rafayeel sòon̄ee nì u nín béè yii Saara sá u-dicaŋkun niliu ubɔ ki sá u-baa naakookunee, ní u kíĺ ki néeń-u tikpil tikpil ní usapɔɔnee kɔ́-u tiŋan.
Currently Selected:
Tobit 6: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.