Romains 14

Taa sòoǹ a-nabiki bɔti

1Ní fōōmaan ni-kansikin bin kaa láá ká mpɔn Unimbɔti saŋŋu poonee, kí taa nín̄ kpākantí bi-landɔkɔi#14.1 Dūú ŋmàntī nì 1 Kɔra 8.7-13, 10.23-33.. 2Ubɔ máká yii u yaa jīǹ tikɔkɔ an kaa ŋáań-u tiba, ama un kaa láá ká mpɔn nnimbɔtisan poonee kaa là, ní ki jīǹ nnyim ŋma. 3Sii un jīǹ tikɔkɔ nì tikɔkɔee ń taa kpèè un gàntī ki jīǹee fám, ní sii un gàntēe ń taa bīil̀ un jīǹ tikɔkɔ nì tikɔkɔee, kun puee Unimbɔti fōō-u. 4Sii di sá ŋma ní ki sòoǹ ubɔ tɔntɔnliu bɔti ní? U yaa yúɔɔɔ, u yaa tí lítàaa, an sá u-kpiliu bɔti, an kaa sá a-yati. Ama u làá nīn yú, kun puee ti-Dindaan cáá mpɔn kí tíkiń-u.

5Biba dàkafī yii iwiin iba sá ikpaan ki jítiǹ iba#14.5 Dūú ŋmàntī nì Gala 4.10, Kool 2.16., ní biba mun dàkafī yii iwiin kɔkɔ sá ibaanti ní. Báà ŋma ń nīn nyí u-ban yii min u ŋáańee di máaǹ. 6Un gàntī iwiin iba yii i sá ikpaanee ŋáań míǹ ti-Dindaan pu ní, ní un jīǹ tikɔkɔ nì tikɔkɔee mun jīǹ míǹ ti-Dindaan pu, kun puee u jáaḿ Unimbɔti tijin gbanti pu ní kí nín jī. Un mun jīǹ nnyimee, ti-Dindaan pu ní u jīǹ míǹ, ní ki jáaḿ Unimbɔti. 7Di sá yii ubɔ kaa bí dimaŋfalin ki tīī u-ba, ubɔ kaa tí kúù ki tīī u-ba mun. 8Ti yaa báaa, ti bí ki tīī ti-Dindaan ní, ti yaa tí kpíìyaaa, ti kpíì ki tīī ti-Dindaan ní. Ti yaa báaa, ti yaa tí kpíìyaaa, ti sá ti-Dindaan yab ní. 9Di sá yii Kriisitoo kpíì ki fīkitì kí ŋmā kí nīn sá bin kpíìyee nì bin bée kɔkɔ Dindaan ní. 10Kin sii, ba pu ní a sòoǹ ki bíiĺ a-nabiki? Ní si mun, ba pu ní a kpèé a-nabiki fám? Ti-kɔkɔ làá dāá cù Unimbɔti nimbiin ibɔsoon, 11kii an nín ŋmàn̄ puee, yii:

«Ti-Dindaan bí yii: Man Unimbɔti bí.

Báà ŋma làá dāá gbàan̄ man nimbiin,

dilimbil kamaa làá dāá nyɔ̄ŋkì man Unimbɔti#14.11 Kpèè Yees 45.23..»

12Míǹ ní ti-kɔkɔ làá dāá sòoǹ ti-ba yil pu bɔti Unimbɔti nimbiin.

Ubɔ ń taa yàntī u-nabiki ń lítí

13Tí gbèen̄ kí taa ti nín̄ sòom̀maan tɔb bɔti, ama á dàkafì min ní a làá ŋá a-nabiki ń taa gbéetáaa, kí taa lítí ikpitinee. 14Ti-Dindaan Yeesu yāntì m béè ki nyí ibaamɔn yii tijin tiba kaa bí ki kɔ̄ntí unil tijɔkɔndi Unimbɔti nimbiin#14.14 Dūú ŋmàntī nì Maar 7.19.. Sii ubɔ yaa dàkafī yii tiba kaa ŋān̄ee, tì lafun kpántì tin kaa ŋān̄ee sii cee ní. 15Tijin tiba pu ní a yaa yāntì an páb́ a-nabikee, mimmee, aa ti yàntī dineendi kpòotī-si dee. Tijikaal tin a jīǹee puee, taa yàntī un pu Kriisitoo kpíìyee ń wāŋkì. 16Tin ŋān̄ a-ceeyee ń taa gíti pɔ̄ nsan bí nīn sòoǹ tikpitil. 17Di sá yii Unimbɔti Beel kaa sá tijikaal nì tinyɔkaal bɔti, an sá deedee nì nsɔŋfi nì dipɔɔpindi din u-Fam tììyee ní. 18Un yaa nóó Kriisitoo mimmee fáatí Unimbɔti, ní binib mun lèekī u-mɔ́ɔŋŋu.

19Mimmee, tí nyàab̀maan tin làá cáań dipɔɔsɔŋkil ti-kansikinee nì tin làá tūtuǹ ti-nabiyaamu bí báań inyaan nnimbɔtisan poonee. 20Tijin puee, taa gbá kí kpìtī Unimbɔti tundi. Tikɔkɔ ŋān̄ ki tīī bí jī, ama an kaa ŋān̄ yii tijikaal tin a jīǹee puee, á yàntī a-nabiki ń lítí. 21Tin ŋān̄ee di sá á taa ŋmɔ́ tinan, kí taa nyɔ̀ ndaam, kí taa ŋá tiba min ŋūǹ kí yàntī a-nabiki ń lítée. 22Sii nín fōō ki kíí ki nyí tiŋyee, dūú kpāafì a-ban Unimbɔti nimbiin. Un yaa lēē min ŋān̄ u-cee u-pɔbil kaa máfée bí mmɔnni. 23Ama un yaa bíi jīǹ tiba ní u-pɔbil máfée kɔ́ tibɔtin, kun puee u-pɔbil tùkù-u yii min u ŋáańee kaa máaǹ ú ŋá. A yaa ŋá tiba ní a-pɔbil máfée, an sá ikpiti ní.

Currently Selected:

Romains 14: BASSARDC

Highlight

Copy