Philippiens 1

Ijaam

1Man Pɔɔl nì Tiimootee, timbi bin sá Yeesu Kriisitoo tɔntɔnliibee, di ŋmàn̄ kugbɔŋu nee.

Ti ŋmàn̄-ku kí tīī nimbi bin sá Unimbɔti yab ki kóò Fiiliipi tiŋkin ki fōō Yeesu Kriisitoo ki kííyee, ki kpáaǹ bin kpòotī Kriisitoo nikitilee nì bin tútúǹ ditundi Kriisitoo nikitil kansikinee. 2Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

Pɔɔl mēē ki tīī Fiiliipi tiŋki yab

3Ŋyunti sá kamaa, m yaa bíi dàkafī ni-bɔtee, m jáaḿ Unimbɔti ni-pu. 4Ŋyunti kamaa m yaa bíi mèé ni-kɔkɔ puee, m mèé nì dipɔɔpindi ní. 5Di sá ni nìn tútuǹ-ti, kí yòon̄ ŋwimpeepeekaa#1.5 Kpèè Atuun 16.13-15. ŋun ni fōō Yeesu ki kííyee ki dāa dūu sāā díǹ, tí ŋmā kí sòoǹ Tibɔmɔntiil ajan kɔkɔ pu. 6M nyí yii Unimbɔti un kíĺ ki bíi tūǹ ditummɔntiil nee ni-pɔbiliŋ poonee kaa làá gbèen̄. U làá nīn pée gbíntìi tūǹ míǹ ní kí nīn pée cí Yeesu Kriisitoo gítintam wiiŋŋu#1.6 Dūú ŋmàntī nì 1.10, 1 Kɔra 1.8.. 7An kítì ḿ nīn dàkafī ni-kɔkɔ pu míǹ ní, kun puee ni-bɔti kɔ́-mi tiŋan. Di sá yii, m yaa bí sarkanaaa, m yaa tí bí ki dàkà ki cántí Tibɔmɔntiilee baamɔŋyi nín sá pueeyaaa, ni-kɔkɔ kútí m-pu ki fòol̄ diyimɔɔbaantiil din Unimbɔti tīī-mee. 8Unimbɔti u-ba nyí yii m néeń ni-kɔkɔ nì dineembaamɔndi din nyánní Yeesu Kriisitoo ceeyee ní.

9M nín mèé ni-pu tiŋyee di sá yii Unimbɔti ń yàntī ni-neendi ń nīn wīintí ki cá baabadal, ní nīn mɔ̀tīi béetí ibaamɔn ki gàntī tiŋan nì tikpitil, 10án nín làá ŋá pu ní ŋmā kí lēē tin kítèe. Ní Kriisitoo gítintam wiiŋŋu dalee, ní dāá nīn bí circir, bí taa ká ni-pu tiba. 11Yeesu Kriisitoo puee, ni làá dāá lòoǹ abil tikpil ŋin sá deedee tuuŋŋi ŋin tìì Unimbɔti tinyool nì inyɔŋkee.

Kriisitoo di sá dimaŋfal

12Nnabiyaamu, m là ní béé yii sarka un bi cúú-mi nee di yāntì ní Yeesu bɔti sòontam cūtì nyɔkɔpu malaa. 13Di sá yii gɔminakpaan kàliŋkpilib kɔkɔ nì bin kɔ kíǹee béè yii an sá Kriisitoo un m nóóyee pu ní m bí sarkan#1.13 Dūú ŋmàntī nì Atuun 28.30, Eef 3.1, 4.1.. 14Áli gba, man sarkau nee pu ní ti-nabiyaamu tikpil mɔ̀tīi dù bi-mákal ki ŋáań ti-Dindaan ni, ki kāntí kunyannyaau ki sòoǹ Unimbɔti bɔti, kaa fàŋkí.

15Ama bi-kansikin bibee, an sá kináŋ kin bi cáá m-puee di yì-tì ní bi sòoǹ Kriisitoo bɔti ki kpākantí-mi, ní bin kíǹee, bíǹ baasii sòoǹ Unimbɔti bɔti nì nlandɔkɔmɔnti. 16Bin sòoǹ Unimbɔti bɔti nì nlandɔkɔmɔntee, bíǹ néeń-mi ní ki nyí yii Unimbɔti lēē-mi ḿ nīn dàkà yii Kriisitoo bɔti sá ibaamɔn. 17Ama bin béeyee, bíǹ sòoǹ Kriisitoo bɔti nì ilandɔkɔkpiti ki là kí kpákáǹ-mi, ki nyàab̀ kí gíti kɔ́ǹ-mi digìńdi kí kūtì sarka un poon m bí nee.

18Bi yaa sòoǹ Unimbɔti bɔti ki là kí kpákáǹ-maaa, an yaa tí sá nì dipɔɔmɔntiilaaa, tíǹ kaa wù-mi. An sá man dipɔɔpindi ní ki làá nīn pée mɔ̄ǹ-mi ki cá, kun puee Kriisitoo bɔti ní bi-kɔkɔ sòoǹ. 19Di sá m nyí yii, nì ni-wimmeem pu, nì Yeesu Kriisitoo Fam tūtuntam puee, m làá ká difiil. 20M nín là tiwan tin ki cí tikpil ki cɔ́tí ti-puee di sá icoo ń taa cúú-mi tiba pu. Ama kɔŋkɔnnee kí nīn cée, m yaa làá kpúɔɔɔ, m yaa làá nīn tí báaa, ḿ mɔ̀tīí nīn cáá dipɔbil, m-wunti ń tīī Kriisitoo tinyool. 21Ama mamee, Kriisitoo di sá man maŋfal, ní ŋkúm cāabìń-mi ipaati. 22An yaa tí sá ḿ nīn bí dimaŋfal poon kí ŋmā kí tɔ̄ atummɔnti abaaa, maa nyí laakin m làá lēēyee. 23Ajan gbanti liitil bí ki dátí-mi, m bàà là kí kpú kí cùú nīn kā Kriisitoo cee, míǹ di bàà ŋān̄ tikpil. 24Ama, nimbi puee, an gíti páb́ ki lákatì yii ḿ nīn dáá bí dimaŋfalin. 25M nín béè yii an sá mimmee, ní m nyí yii m làá nīn bí dimaŋfalin, man nì ni kɔkɔ làá nīn bí, ḿ tūtuǹ-ni ní ŋmā kí cù nyɔkɔpu, kí nīn bí dipɔɔpindin Unimbɔti saŋŋu poon. 26Mimmee m yaa fātìi tí gítìń ni-kansikinee, man puee, án làá dāá nīn mɔ̄ǹ-ni ki gíti lákatì ni nì Yeesu Kriisitoo nín ŋá ubaantee pu.

27Tin páb́ee di sá ni-bimbim ń nīn táá nì Kriisitoo Bɔmɔntiiti, ní báà m yaa dɔ́miń ni-ceeyaaa, m yaa kaa dɔ́mińaaa, ḿ nīn gbìl̀ bi sòoǹ ni nín pēē kinyɔkɔ pu ki báaǹ inyaan, ki jáà nì dipɔbil diba Tibɔmɔntiilee ń cù nyɔkɔpuee. 28Ní taa yàntī ni-nannanliibi ń fàaǹ-ni tiba poon. Ni nín bí miŋyee di làá dàkà bíǹ yii bi wáŋkì, ní kí dàkà nimbi yii ni yú difiil saŋŋu pu. Unimbɔti di làá yàntī bí béé míǹ. 29Di sá yii u pú-ni diyimɔɔl ní nīn nóó Kriisitoo kí taa fōō-u kí kíí ŋmaniŋma, ama ní jī falaa mun u-pu. 30Kɔŋkɔnnee, man nì ni kɔkɔ di kpáfì ki bí dimool poon. Dooooyee ní ni nìn ká yii m bí dimool gbantin#1.30 Kpèè Atuun 16.19-40., ní ni gbìl̄ yii m dáá gbíntìi bí ki mɔ̀ áli nìn díǹ.

Currently Selected:

Philippiens 1: BASSARDC

Highlight

Copy

Compare