Nombres 28
28
Saraabi marab a. Ŋwiin kamaa saraabi
1Ti-Dindaan bí Mooyiisi 2ń tīī Isirayeel yab mara nee yii: «Ní nīn nyí kí cáań-mi saraabi ŋyunti ŋun an sá bí cáań-bee deedee, m-saraabi bin sá tijin bí dūú wà ŋŋmi mi-sɔnsɔfiŋu sɔ̀ŋkī m-pɔbilee.
3«Á tùkù-bi yii saraabi bin bi làá nīn ŋáań ki tìì-mee sɔ̀. Kutaa kamaayee, bí cáań apibil ŋin cáá abin ali, ŋi-laaba kaa wɔ̀b̄ee kí ŋá saraawɔkaa kí tīī-mi. An di sá saraawɔkaa un bi làá nīn ŋáań ki tìì-mi múlmul kí taa gbèen̄ee. 4Bí dū dipibil diba kí ŋá saraa kutaafaau, ní kí dū din kíǹee kí ŋá saraa kujoou. 5Bí dū ŋyim kiiloobi bita, kí dū ɔliifi kpam min wāĺ kílkilee liitiri ubɔ nì dijandi kí búuń ŋyimee kí dūú kūtì kí ŋá saraa. 6An di sá saraawɔkaa un ni làá nīn ŋáań múlmul kii un bi nìn ŋá Siinaayi jool puee. An sá saraa un sɔnsɔfiŋu sɔ̀ŋkī m-pɔbilee. 7Ní dū ndamam liitiri ubɔ nì dijandi kí kūtì kí ŋá saraapeepeekaa. Circir kɔŋkooŋŋun, ni-Dindaan nimbiin ní ni làá ŋá saraa gbanti nì ndaam min pɔ̄ɔ̄yee. 8Saraaliliitee, kujoou ní ni làá ŋá úǹ kí tīī-mi. Tiwan tin kɔkɔ ni kútì ki ŋá saraapeepeekaayee, tíǹ tibaantiil ní ni làá tí dūú kūtì kí ŋá saraaliliiti mun. An di sá saraawɔkaa un sɔnsɔfiŋu sɔ̀ŋkī m-pɔbilee.
b. Ŋwiŋŋuŋfikaa saraau
9«Ŋwiŋŋuŋfikaa dalee, ní dū dibindi diba pibiliŋ ali ŋin laaba kaa wɔ̀b̄ee kí ŋá saraa. Ní dū ŋyim kiiloobi biluu, kí dū ŋkpam ki búuń, ní ki dū ndamam kí kūtì kí ŋá saraa gbanti. 10Ŋwiŋŋuŋfikaa kamaa saraau dee. Ní dūú kūtì saraawɔkaa un ni làá nīn pée ŋáań baabadalee pu.
c. Uŋmal wimpeekaaŋu saraau
11«Uŋmal kamaa wimpeekaaŋu dalee, ní dū inajaa ili nì upìja ubɔ nì apibil aluli ŋin cáá dibindi dibee kí ŋá-mi saraa. Tiwaŋkuti gbantee, tì-laaba ń taa nīn wɔ̀b̄. 12Unaja kamaa saraau puee, ní dū ŋyim kiiloobi biwa kí dū ŋkpam kí búuń, ní upìja kamaa saraau puee, ní dū ŋyim kiiloobi biluu kí búuń ŋkpamin kí dūú kūtì kí ŋá saraa. 13Dipibil kamaa saraau puee, ní dū ŋyim kiiloobi bita kí dū ŋkpam kí búuń kí dūú kūtì kí ŋá saraa. An di sá saraawɔkaa un sɔnsɔfiŋu sɔ̀ŋkī m-pɔbilee. 14Ní dū ndamam liitirib bita kí kūtì unaja kamaa saraau pu, ní kí dū ndamam liitirib bili kí kūtì upìja kamaa saraau pu, ní kí dū ndamam liitiri ubɔ nì dijandi kí kūtì dipibil kamaa saraau pu. Saraabi bin ni làá nīn ŋáań uŋmal kamaa wimpeepeekaaŋu dal kí tin cáá sāā dibindee dee. 15Ní dāá dū uŋɔja ubɔ kí ŋá ikpiti pɔ̄tam saraau kí dūú kūtì saraawɔkaa un ni làá nīn ŋáań baabadal nì ndamamee pu.
d. Dilákatil jiŋaaliu bɔti
16«Dibimpɔndi ŋmapeepeekaau ŋwiin ŋubɔ kpá saalku dalee, ní jī man ni-Dindaan jiŋaaliu un bi yíì Dilákatil jiŋaaliuee, an dàkà yii jiŋaal un Isirayeel yab làá nīn jīǹ ki téetí Unimbɔti nín nìn nyántì-bi Eejipiti tiŋkin puee#28.16 Kpèè Disa 12.1-13.. 17Iwiin saalku dalee ní kíĺ jiŋaal kí nīn ŋmóò kpɔnɔb bin baa ŋá ŋkpɔnɔnyɔkɔee kí tin cáá sāā iwiin iluli. 18Jiŋaal gbanti wimpeekaaŋu dalee, ní kpāfì kí nyɔ̄ŋkìmaan man ni-Dindaan, ubɔ ń taa tɔ̄ ditundi diba ŋwiin gbanti. 19Ní dāá dū inajaa ili nì upìja ubɔ nì apibil aluli kí dūú ŋá saraawɔkaa kí tīī-mi. Tiwaŋkuti gbanti kɔkɔ laaba ń taa nīn wɔ̀b̄. 20Ní dāá dū ŋkpam kí búuń ŋyim kiiloobi biwa kí dūú kūtì unaja kamaa saraau pu ní kí dū ŋkpam kí búuń ŋyim kiiloobi biluu kí dūú kūtì kí ŋá upìja kamaa saraau. 21Ní dū ŋkpam kí búuń ŋyim kiiloobi bita kí dūú kūtì kí ŋá dipibil kamaa saraau. 22Ní dū uŋɔja ubɔ kí ŋá saraawɔkaa ní bí dū saraayee kí ŋá dikoobil din bi máaǹ kí ŋée ní ní ká ni-kpitii pɔ̄tam. 23Saraabi nee kɔkɔ ń dāá dūú kūtì saraawɔkaa un ni ŋáań kutaafaau kamaayee pu. 24Ní nīn ŋáań bisaraawɔkaabi baabadal kí tin sāā iwiin iluli. Saraabi gbanti sɔnsɔfiŋu di sɔ̀ŋkī man ni-Dindaan pɔbil. Saraabi gbanti ń dūú kūtì bisaraawɔkaabi nì bi-damam pu. 25Ní ŋwinluluúti dalee ní kpáfì kí nyɔ̄ŋkì-mi. Yaadalee ubɔ ń taa tɔ̄ ditundi báà diba#28.25 B. 17-25: kpèè Disa 12.14-20..
ee. Kudiceeu jiŋaaliu bɔti
26«Tijincɔ̀fikaal jiŋaaliu dal ni yaa cáań tijimpɔn kí ŋá man ni-Dindaan saraayee, ní kpāfì kí nyɔ̄ŋkì-mi, kí taa tɔ̄ ditundi báà diba yaadal wiiŋŋu#28.26 Pantikooti ní bi gíti yíì kudiceeu jiŋaaliu: kpèè Disa 23.16, 34.22, Akoo 23.15-21, Ditee 16.9-12.. 27Ní dāá dū anajapɔmbil ali nì upìja ubɔ nì apibil aluli ŋin cáá dibindi dibee kí ŋá-mi saraawɔkaa, ní u-sɔnsɔfiŋu ń sɔ̀ŋkì m-pɔbil. 28Ní dū ŋkpam kí búuń ŋyim kiiloobi biluu kí dūú kūtì unaja kamaa saraau pu, 29ní kí dū ŋkpam kí búuń ŋyim kiiloobi bita kí dūú kūtì dipibil kamaa saraau pu. 30Ní dū uŋɔjee kí ŋá saraa, ní bí ŋá akoobil ŋin bi máaǹ kí ŋá ni-puee ní ká ni-kpitii pɔ̄tam. 31Saraabi nee kɔkɔ ń dāá dūú kūtì saraawɔkaa nì tijin saraabi bin ni ŋáań baabadalee pu. Ní dū tiwaŋkuti tin laaba kaa wɔ̀b̄ee nì ndamam kí nīn cáa ŋáań saraabi.
Currently Selected:
Nombres 28: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
