Nombres 16
16
Kooree nì Daatan nì Abiiram jáń nì Mooyiisi
1Uleefiija un bi yíì Kooree u sá Isaar jipɔɔn ki sá Keeyaati maaliŋunee nìn dáaĺ Rubeen naakookun binib bita ki kútì u-ba pu. Bíǹ di nìn sá Eeliyaab jipɔmbi Datan nì Abiiram nì Peeleeti jipɔɔn Ooni#16.1 Kpèè Juudi 11.. 2Bi nìn bóob́ kí jáǹ Mooyiisi, ní bi ká Isirayeel yab kansikin bin sá abɔtibil nì binikpaambi bin samaa nìn lēē bi kpáfí ki sòoǹ tibɔtee binib alaataa ali nì imuŋku ili nì saalaa ki kútì bi-ba pu. 3Ní bi dɔ́miń ki kpáfì ki māntìi tú Mooyiisi nì Aarɔn, ní ki bí-bi yii: «Ni nín ŋáań puee gíti lákatì tikpil! Isirayeel yab kɔkɔ bí circir ní ti-Dindaan bí ti-kɔkɔ kansikin. Ba pu ní nimbi dàkafī yii ni jítiǹ ti-Dindaan nibul kɔkɔ ní?»
4Mooyiisi nín gbìl̄ bi bíi wòoǹ-u mimmee ní u tātìi dōoǹ dicincibil, 5ní ki bí Kooree nì u-yabee yii: «Fool kutaafaauee, ti-Dindaan làá fu yàntī tí béé un sá u-yɔuee, un u dūu sú u-ba ú nīn sútí ki pìl̀-uee. U làá fu yàntī un u lēēyee ń sútí kí pìl̄-u. 6Míǹ puee sii Kooree nì a-naacimbi, foolee ní fu nín̄ ŋúbiń nsambiyaamu mun poon bi tùutī talaaluee. 7Ní fu mɔ́fí ŋŋmi kí ŋá poon, kí dū talaalutuukaa kí páań ŋŋmi pu kí yóoń ti-Dindaan nimbiin. Niin ní ti làá fu béé un ti-Dindaan lēē ú nīn sá u-yɔuee. Nimbi Leefii yabee, m gīiǹ ni-bɔti!»
8Ní Mooyiisi gíti bí Kooree yii: «Nimbi Leefii yabee, pīlifìmaan! 9Ti-Dindaan Isirayeel Nimbɔtiu nín lēē-ni ni-nabiyaamu kansikin ní nīn sútí ki pìl̀-u, kí nīn tūǹ atuun ni-nabiyaamu yil pu circir kɔŋkooŋŋun ti-Dindaan nimbiinee, an kaa yá kí kɔ́-naaa? 10U yāntì sii Kooree nì a-nabiyaamu Leefii yab sútí ki pìl̀-u ní ni gíti bí ki nyàab̀ disaraaŋal tundaa! 11An pu ní sii nì a-naacimbi bóob́ kí jáǹ ti-Dindaanaa! Di sá yii, ŋma di sá Aarɔn ní ni kpākantí-u?»
12Ní Mooyiisi tú bí yíiń Eeliyaab jipɔmbi Daatan nì Abiiram, ní bíǹ kíí yii: «Taa làá dāan̄! 13A yōoǹní-ti kitiŋ kin poon nnaabiim nì tisiil còol̀ee ki cáań-ti kí kpɔ̀ kuteeun doo, míǹ kaa yá ki kɔ́-si, ní a gíti là kí dàkà mpɔn kí nīn sá ti-bɔtiuaa! 14An kaa sá kitiŋ kin poon nnaabiim nì tisiil còol̀ee ní a cáǹ-ti. An kaa sá tisati nì fiinyib ní a tīī-ti difakal! A dàkafī yii ti sá bijɔfub níii? Ti yíì taa làá dāan̄!» 15Mooyiisi nín gbìl̄ mimmee ní u fōō diŋuul tikpil ní ki bí ti-Dindaan yii: «Á taa fōō bi-saraau. Man kaa fōō bi-kansikin ubɔ maŋki kpaŋkpan. Maa tí ŋá bi-kansikin báà ubɔ ikpiti.»
Kooree nì u-naacimbi tafadaaldi
16Ní Mooyiisi bí Kooree yii: «Sii nì a-naacimbi ń fu dāan̄ kí yūĺ ti-Dindaan nimbiin, Aarɔn mun làá fu nín̄ bí. 17Sii nì a-naacimbi binib alaataa ali nì imuŋku ili nì saalaayee, báà ŋma ń fu nín̄ ŋúb́ u-sambiki kin poon u ŋáań talaalutuukaayee nì talaalu kí cáań ti-Dindaan nimbiin. Sii nì Aarɔn mun ń nīn ŋúb́ ni-yɔmu.» 18Ní Kooree nì u-naacimbi lafun ŋúbiń bi-sambiyaamu mun poon bi ŋáań talaalutuukaayee, ki ŋá ŋŋmi poon, ní ki dū talaalutuukaa ki sītì poon, ní ki cūtìi yúl̀ circir kɔŋkooŋŋu punyɔkɔpu, bi nì Mooyiisi nì Aarɔn. 19Ní Kooree kpáfì Isirayeel samaau bi yú ki túĺ Mooyiisi nì Aarɔn circir kɔŋkooŋŋu punyɔkɔpu.
Ní ti-Dindaan lēē u-nyooti ki dàkā samaa kɔkɔ. 20Ní ti-Dindaan bí Mooyiisi nì Aarɔn yii: 21«Ní kàkatī ni-ba kí wàatī binib nee, di sá m làá kúntí-bi dibɔbil pu doo!» 22Ní Mooyiisi nì Aarɔn tātìi dōoǹ dicincibil ní ki bíi kūuntí yii: «Óo Unimbɔti, sii un tìì tiwannáaŋkaal kɔkɔ dimaŋfalee, unibaanti kpitii puee, a làá fōō samaa nee kɔkɔ pu diŋuulaaa?» 23Ní ti-Dindaan bí Mooyiisi yii: 24«Á tùkù samaa un kóò ki pìl̄ Kooree nì Daatan nì Abiiramee yii bí kàkatī kí wàatī-bi.»
25Ní Mooyiisi yíkì, ní Isirayeel yab kpilib páaǹ u-boon ní bi nín cá Daatan nì Abiiram cee. 26Ní u bí samaa yii: «Ní kàkatīmaan kí wàatī binikpitib nee tantib, kí taa gbēē bi-wanti báà tiba, án nín làá ŋá pu bi-kpitii puee, ní taa kpúee.» 27Ní bin kóò ki pìl̄ Kooree nì Daatan nì Abiiramee yíkìi wāatì-bi.
Ní Daatan nì Abiiram nyáń ki yú bi-tantib nyɔkɔpu, bi nì bi-nimpoobi nì bi-biyaamu nì bi-naantiibi. 28Ní Mooyiisi bí yii: «Tin làá ŋá nee di làá yàntī ní béé yii ti-Dindaan di túnní-mi ḿ nīn tūǹ atuun ŋin bí nee kɔkɔ. An kaa sá man m-ba pɔŋŋu pu. 29Binib nee yaa kpíì kii báà ŋma wiiŋŋu nín bà ú kpú puee, mimmee ti-Dindaan di kaa túnní-mi. 30Ama ti-Dindaan yaa ŋá maamaaci tundi, kitiŋ dū bi nì tin bi cááyee kɔkɔ ki náĺ, bi yaa sīntì ditaŋkpiilin nì bi-nimbiliŋee, míǹ di làá dàkà-ni yii bi bēel̀ ti-Dindaan.» 31Mooyiisi tin pée lì yii u sòoǹ ki ŋmīlifée, laakin bi yúee, kitiŋ cúu látì bi-taaŋi taapu, 32ki wāaǹ ki-nyɔkɔ ní ki dū bi nì bi-dicaŋŋi ki náĺ ki kpáaǹ Kooree yab nì tin kɔkɔ bi cááyee. 33Bi pée wāĺ ní ki sīntì ditaŋkpiilin bi nì bi-wanti kɔkɔ, kitiŋ bīiǹ bi-pu ní baa ti ká-bi Isirayeel yab kansikin. 34Isirayeel yab bin nìn yú ki pìl̄-bee nín gbìl̄ bi bí ki gbáà ibiilee ní bi sáǹ ki lì yii: «Tí sām̀maan kitiŋ ń taa kpáaǹ ti mun kí náĺ!»
35Ní ŋŋmi ŋubɔ nyánní ti-Dindaan cee ki wùn̄ bin nìn bíi tùutī talaalub ti-Dindaan nimbiinee binib alaataa ali nì imuŋku ili nì saalaa.
Currently Selected:
Nombres 16: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
