Nombres 13
13
Binib saalaa nì bili cūtìi cɔ́ŋkì Kanaan tiŋki
1Ti-Dindaan bí Mooyiisi yii: 2«Tɔ̄ binib bí cùú cɔ̄ŋkì Kanaan tiŋki kin m làá dūú tīī Isirayeel yabee. Lēē kunaakoou kamaa poon ukpil ubɔ kí tɔ̄.» 3Mooyiisi nìn lēē-bi ki tú, kii ti-Dindaan nín nìn lī puee doooo Paaran teekun. Bi-kɔkɔ nìn sá Isirayeel yab kpilib ní. 4Bin bi nìn túee yiŋŋi sɔ̀.
Sakuur jipɔɔn Samuwa, u sá Rubeen naakookun.
5Koor jipɔɔn Saafati, u sá Simeeyɔn naakookun.
6Yeefunee jipɔɔn Kaaleeb, u sá Juuda naakookun.
7Jooseefi jipɔɔn Yigeeyal, u sá Isakaar naakookun.
8Nuuni jipɔɔn Ooseeya, u sá Eefiraayiim naakookun.
9Raafu jipɔɔn Paltii, u sá Beenjameen naakookun.
10Soodi jipɔɔn Gadiyeel, u sá Sabulɔn naakookun.
11Suusi jipɔɔn Gaadi, u sá Jooseefi jipɔɔn Manasee naakookun.
12Geemalii jipɔɔn Amiyeel, u sá Daani naakookun.
13Miisayeel jipɔɔn Seetuur, u sá Aseer naakookun.
14Fɔfisii jipɔɔn Naabi, u sá Neefitalii naakookun.
15Maaki jipɔɔn Geewuyeel, u sá Gaadi naakookun.
16Binib bin Mooyiisi nìn tú bí cùú cɔ̄ŋkì kí kpèè Kanaan tiŋkee yiŋŋi dee. Mooyiisi nìn páaǹ Nuuni jipɔɔn Ooseeya diyindi yii Joosuwa#13.16 Ayin liitil Ooseeya nì Joosuwa taapu sá yii ti-Dindaan fìil̄..
17Ŋyunti ŋun Mooyiisi làá nìn tɔ̄-bi bí nīn cée ní u bí-bi yii: «Ní dī doo ki jɔ̄m̀ Neegeeb, an dàkà yii ŋgiil pú, ní kí tin dàb̄ ajoon kí nyā Kanaan. 18Ní cɔ̄ŋkì kí kpèè yii kitiŋ gbanti bí mana, kí kpèè yii ki-nib pɔ̄ɔ̄yaaa, baa pɔ̄ɔ̄, kí kpèè yii ki-nib wīikáaa, baa wīikí. 19Ní kpèè yii kitiŋ gbanti ŋān̄aaa, kaa ŋān̄, kí kpèè yii bi máń agun ki māntìi tú ntimu mun poon bi kóòyeeyaaa, baa máń. 20Ní kpèè yii kitiŋ gbanti cáá ntiŋkpamaaa, kaa cáá, kí kpèè yii isufi nyēē tiŋanaaa, iaa nyēē. Kámaan dipɔbil kí nīn cá, ni yaa gítińee ní lēeń niin subiliŋ kí cáań.» An nìn sá ŋyunti ŋun ní fiinyi lòoǹ abipeepeekaayee ní.
21Ní bi búntì ki cūtìi cɔ́ŋkì Kanaan tiŋki ki kíĺ Siini teekun áli ki tin bàn̄ Leeyoob-Amati caŋin. 22Bi nìn dī ki jɔ́m̀ Neegeeb pú, ki tin bàn̄ Eebrɔn, laakin Anaaki nibul nì Ayiiman yab nì Seesayi yab nì Talimayi yab nìn kóòyee. - Bi nìn máń Eebrɔn tiŋki abin aluli boon ní bi dāa nín náań Soowan tiŋki Eejipiti tiŋkin. - 23Ní bi dī kí nīn cá Eeskool tantakalin ní ki gāań fiinyi biliŋ disakal ki dūu lúntì ndɔ pu ní binib bili bùkū. Bi nìn lēeń greenaadi nì fiigi subiliŋ mun. 24Isirayeel yab nín nìn gāań fiinyi biliŋ disakalee pu ní bi pú niin diyindi yii Eeskool, taapu di sá yii: <Disakal tantakal>.
Bin Mooyiisi túee gítìń ki cáań tin bi kée
25Bi nìn dū iwiin imuŋku ili ní ki cōom̀ ki cɔ́ŋkì Kanaan tiŋki ní ki fātìi gítìń. 26Bi bāańee ní ki cūtìi ká Mooyiisi nì Aarɔn nì Isirayeel samaau kɔkɔ Kaadeesi, Paaran teekun, ní ki máafì-bi tin kɔkɔ bi kée, ní ki dū kitiŋee poon subiliŋ ki dàkā-bi. 27Tin bi nìn dɔ́miń ki máafì Mooyiisee sèé: «Ti nín bàn̄ kitiŋ kin poon a tú-tee, tiŋman nnaabiim nì tisiil còol̀ ní. Kpèè abil ŋin kì lòoǹee#13.27 nnaabiim nì tisiil còol̀: kpèè Disa 3.8.. 28Ama binib bin kóò kitiŋ gbantinee cáá mpɔn tikpil, ní bi máń aguŋkpaan ki māntìi tú bi-timmu. Ti ká gba kujawɔkɔu Anaaki naantiibi niin. 29Amaleeki yab kóò Neegeeb, ní Eeti yab nì Jeebusi yab nì Amɔɔr yab kóò dijool pu, ní Kanaan yab kóò dimɔɔl caŋin nì Jɔɔdan buŋgbandi.»
30Ní Kaaleeb céefì samaa un bíi kpākantí Mooyiisee ń ŋmīĺ, ní u bí-bi yii: «Tí cùmaan, ti làá já kí fōō kitiŋ gbanti, kun puee ti làá ŋmā kí já kí pɔ̄ɔkiǹ ki-nib!» 31Ama bin nì Kaaleeb nìn cūtì ki cɔ́ŋkì kitiŋee bí yii: «Taa ŋūǹ kí cùú já nì binib nee, bi pɔ̄ɔǹ-ti sɔ́kɔ sɔkɔ ní.» 32Niinee ní bi kíĺ ki bíi sòoǹ ki bíiĺ kitiŋ kin bi cūtìi cɔ́ŋkèe Isirayeel yab nimbiin. Bi nìn lī yii: «Kitiŋ kin ti cūtìi cōom̀ ki cɔ́ŋkèe nátí ki-nib bin kóò ki-puee, ní binib bin ti ká niinee sá tinikpaandi. 33Ti ká Anaaki naantiibi tijawɔkɔl niin, ní ti yaa kpēē ti-bee, timbi sá kii inaakitoonee ní bi-cee. Míǹ ní bi mun wāĺ-ti yii ti sá#13.33 Kpèè Diny 6.4..»
Currently Selected:
Nombres 13: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
