Nombres 10

Animbil kúti kantáŋŋi ali bɔti

1Ti-Dindaan tùkū Mooyiisi yii: 2«Á dū animbil kúti kí mɔ́ɔ́ akantán ali kí nīn cáa búǹ ki yíì Isirayeel samaau ki kpáfí. An yaa tí ŋmāntì bí yīkì dinaapaal puee, á búń bí yīkì. 3Bi yaa búń akantán liitil dicilpuee, an sá Isirayeel yab kɔkɔ ní ń kpāfì a-cee circir kɔŋkooŋŋu nyɔkɔpu. 4Dikantámbaantiil ní bi yaa búńee, mimmee an sá Isirayeel yab naakɔti kpilib ŋmaniŋma di làá kpāfì a-cee. 5Bi yaa búń dikantándi ikuŋkuunti ŋmàl̄ee, bin bí dinaapaal ŋwìiń nyalaŋki púee ń yīkì. 6Bi yaa búń nliliitiim nì ikuŋkuuntee, bin bí dinaapaal ŋgiil púee ń yīkì. 7Ama bi yaa làá búń dikpafil kantándee, ikuŋkuunti ń taa nín̄ bí.

8«Aarɔn naantiibi bisaraaŋaliibi baba di cáá nsan kí búń dikantándi. Án nīn sá mara un ní ni nì ni-naantiibi làá nīn ŋúb́ kí nīn cá jaanjaanee.

9«Ni yaa làá yīkì ni-tiŋkin kí cùú jáǹ ni-nannanliibi bin táká-nee, ní búń akantán nì ijanjakuŋkuunti. An di làá yàntī ḿ téetí ni-pu, ní man ni-Dindaan ni-Nimbɔtiu ń dāá fīī-ni ni-nannanliibi gbanti ŋaan. 10Ni-jiŋaalib wiiŋyi nì uŋmal kamaa wimpeepeekaaŋu nì jiŋaalib bin kíǹeeyee, ní nīn búǹ dikantándi ŋyunti ŋun ni bíi ŋáań saraawɔkaa nì mpèé saraau ki tìì-mee. Míǹ di làá yàntī ní m téetí ni-pu. Man di sá ni-Dindaan ni-Nimbɔtiu.»

ISIRAYEEL YAB YÍKÌ SIINAAYI KI BÚNTÌ MOOWAAB

(10.11–21.35)

Isirayeel yab yíkì Siinaayi teekun

11Isirayeel yab nín nìn nyáń Eejipiti tiŋkin, dibinliliitiil ŋmaliliitiu poon, iwiin mmuŋku dalee ní ditagbandi din nìn dàn̄ tanti un poon Dipoondi dakaau bée yíkì. 12Isirayeel yab nìn yíkì Siinaayi teekun ki nìkī bi-saŋkindi. Ní ditagbandee cūtìi yúl̀ Paaran teekun. 13Mpeepeekaam dee Isirayeel yab ń nìn yīkì dinaapaal pu ki nóó nì ti-Dindaan marau un Mooyiisi nìn dūu tīī-bee#10.13 Kpèè Ayil 2..

14Juuda naakooku janjakitil nì bi-falaŋkau di nìn péé ki yíkì ki līntì nsan. Bi-janjakpiliu di nìn sá Amiinadaab jipɔɔn Naakɔn. 15Suwaar jipɔɔn Neetaneeyeel di nìn sá Isakaar naakookun yab janjakpiliu. 16Eelɔn jipɔɔn Eeliyaab di nìn sá Sabulɔn naakookun yab janjakpiliu.

17Bi nìn cúú circir kɔŋkooŋŋu ki cóotì ní Geersɔn nì Meerarii naantiibi yab yōoǹ ki túǹ.

18Rubeen naakookun yab janjakitil nì bi-falaŋkau di nìn páaǹ bi-boon. Bíǹ janjakpiliu di nìn sá Seedeeyuur jipɔɔn Eelsuur 19Suriisadaayi jipɔɔn Seelumiyeel di nìn sá Simeeyɔn naakookun yab janjakpiliu. 20Deewuyeel jipɔɔn Eeliyasaafi di nìn sá Gaadi naakookun yab janjakpiliu.

21Keeyaati naakookun yab Leefii yab bin tūntí circir wantee di nìn páaǹ bíǹ boon. Leefii yab bin kíǹee nìn līntì ki cūtìi bíi cōontí circir kɔŋkooŋŋu bi-yab ń nín bàń.

22Míǹ boonee, Eefiraayiim naakookun yab janjakitil nì bi-falaŋkau di nìn páaǹ. Bi-janjakpiliu di nìn sá Amiiyuudi jipɔɔn Eeliisama. 23Peedasuur jipɔɔn Gamaliyeel di nìn sá Manasee naakookun yab janjakpiliu. 24Giideewoonii jipɔɔn Abidan di nìn sá Beenjameen naakookun yab janjakpiliu.

25Daani naakookun yab janjakitil nì bi-falaŋkau di nìn lúŋkì. Bíǹ di nìn sá bin pá akiti kɔkɔ boon ki cí-bee. Bi-janjakpiliu di nìn sá Amiisadaayi jipɔɔn Ayeeseer. 26Ookiran jipɔɔn Pagiyeel di nìn sá Aseer naakookun yab janjakpiliu. 27Eeyinan jipɔɔn Ayiira di nìn sá Neefitalii naakookun yab janjakpiliu. 28Isirayeel yab nì bi-janjakitiŋi nín nìn máaǹ kí dī tɔb pu kí yīkèe, míǹ ní bi nìn dī ki yíkì.

Mooyiisi bíi nyàab̀ un làá dàkà-bi nsanee

29Mooyiisi bí u-coo Reewuyeel un sá Madiyan yab tiŋkinee jipɔɔn Oobaab yii: «Ti làá yīkì kí nīn cá kitiŋ kin poon ti-Dindaan pōoǹ yii u làá tīī-tee dee. Dāan̄ ti nì si ń cù, sii mun ń dāá ká tiŋan tin ti-Dindaan làá ŋá-tee poon tiba#10.29 Kpèè Disa 2.16..» 30Ní Oobaab kíí-u yii: «Aayee, maa làá cù. M làá gítí m-tiŋkin, m-dicaŋku poon.» 31Ní Mooyiisi bí-u yii: «M gbāam̀-si, taa dū-ti kí fá. Di sá yii sii nyí kuteeun jaaŋŋi ki ŋūǹ kí dàkà-ti laakin ti máaǹ kí nīn kàal̀ee. Nín̄ bí ti-cee ki dàkà-ti nsan. 32A yaa céeǹ-tee, ti-Dindaan yaa làá tin ŋá-ti tiŋan tiŋyee, a mun dāa cáá tiba poon.»

33Ní bi yíkì ti-Dindaan jool taapu ki cōom̀ iwiin ita. Iwiin ita gbantee, ti-Dindaan dakaau nìn līī bi-nyɔkɔpu ki nyàab̀ mpaan ŋun ŋān̄ee bí kàl̄#10.33 Kpèè Disa 3.1.. 34Bi yaa yíkì dinaapaal pu ŋwiimpuee, ti-Dindaan tagbandi dàn̄ bi-pu ní bi còom̄. 35Ŋyunti ŋun bi yaa làá yòon̄ ti-Dindaan dakaauee ní Mooyiisi ń téeń yii: «Ti-Dindaan, lìntī nyɔkɔpu a-pulincɔntiibi ń yàl̄, a-nannanliibi ń wāŋkì a-nimbiin#10.35 Kpèè Ilan 68.1.!» 36Ní bi yaa làá tí dū u-dakaauee kí yóońee, ní ú tí téeń yii: «Ti-Dindaan, fàtīí gítiń kí nīn kóò Isirayeel yab dicaŋŋi cutimaanyi kansikin!»

Currently Selected:

Nombres 10: BASSARDC

Highlight

Copy

Compare