Marc 2

Yeesu cáaǹ ufaliŋfaan ubɔ

(Kpèè Maat 9.1-8, Luuki 5.17-26)

1Iwiin iba boonee, Yeesu nìn gítì Kapeernayum, ní binib gbìl̄ yii u bí mmɔŋki. 2Kunipaau nìn dɔ́miń ki kpáfì u-cee kudiin, ní mpaan kaa ti kpáàa bí kipunyɔkɔpu gba. U nìn bíi sòoǹ nì bi Unimbɔti bɔti ní. 3Ní bininjab binaa túǹní ufaliŋfaan ubɔ ki cáań u-cee. 4Nniwíin puee, baa nìn ŋúń kí pìl̄ Yeesu. Míǹ puee, bi nìn jɔ́m̀ ki cíl̀ kudii yilpu#2.4 bi cíl̀ kudii yilpu: Dooooyee, Isirayeel yab yaa nìn máń kudiiyee, baa nìn píǹ, bi nìn bɔ̀b̀ yilpu ní kí mā akɔl kí ŋmā kí nīn jɔ́ḿ kudii yilpu. ki bíitì laakin Yeesu bée, ní ki dū ufaliŋfaan nì nlún ki dīń dibùndee ni ki sīntìń ki bíl̀. 5Yeesu nín ká binib gbanti fōō ki kíí yii u ŋūǹ kí cáaǹ ubunlee, ní u tùkū ufaliŋfaanee yii: «M-biki, m dū a-kpitii ki pú-si.» 6Bimaradakaliibi biba nìn kā niin ki dàkafī bi-pɔbiliŋin yii: 7«Ba pu ní uninja nee lì míǹ? U ŋèeǹ nì Unimbɔti ní. Ubɔ kaa ŋūǹ kí dū ikpiti kí pɔ̄, asee Unimbɔti baba#2.7 U ŋèeǹ nì Unimbɔti: dūú ŋmàntī nì Akoo 24.16. - Unimbɔti baba: kpèè Ilan 103.3, Yees 43.25..» 8Niinee Yeesu béè bi-landɔkɔŋu ní ki bālifì-bi yii: «Ba pu ní ni dàkafī míǹ ni-pɔbiliŋin? 9Ba di kaa pɔ̄ɔ̄ dilil ní? Á tùkù ufaliŋfaan yii: <A ká a-kpitii pɔ̄tam> di kaa pɔ̄ɔ̄ dilil naaa, <Yòon̄ a-lúŋŋu kí nīn còom̄> di kaa pɔ̄ɔ̄ ní? 10Ama ní béé yii man Kinibiki cáá mpɔn kitiŋ pu kí dū unil kpitii kí pɔ̄-u.» Niinee ní u tùkū ufaliŋfaanee yii: 11«Sii yīkìm̄ kí yòon̄ a-lúŋŋu kí nīn kùǹ a-dumpu!» 12Ní u nyīī ki yíkì dicilpu niin ki yōoǹ u-lúŋŋu ki nyáń báà ŋma nimbiin, ní an bākatiǹ-bi sèeee, ní bi bíi pàkà Unimbɔti ki lì yii: «Taa láá pée ká míǹ dalba dalba!»

Yeesu yíiń Leefii ú nóó-u

(Kpèè Maat 9.9-13, Luuki 5.27-32)

13Yeesu nyáń ki gítì Galiilee mɔɔl caŋin. Kunipaau nìn dɔ́miń u-cee ní u dàkā-bi Unimbɔti bɔti. 14U jītée, ki ká Leefii Alfee jipɔɔn kā fɔtiku diikun. Ní u bí-u yii: «Dāan̄ kí nīn nóó-mi!» Ní Leefii lafun yíkì ki táá-u. 15Yeesu nìn kɔ́ Leefii dumpu ki bíi jīǹ tijinee, bifɔtiliibi tikpil nì binikpitib bin kɔkɔ kíǹee dɔ́miń ki kútì u nì u-boonnooliibi pu: di sá yii an nikpitibee nìn nóó-u ki wīikí. 16Bimaradakaliibi bin sá Fariisab kitilinee nín ká u nì binikpitib kpáfí ki jīǹee, ní bi bālifì u-boonnooliibi yii: «Ba pu ní u nì binib nee kpáfí ki jīǹ míǹ#2.16 Dū B. 15-16 kí ŋmàntī nì Luuki 15.1-2.?» 17Yeesu gbìl̄ bi nín lī puee, ní ki gāā-bi dilaŋkpandi yii: «Bin cáá laafiyee kaa nyàab̀ unyɔɔdaan, see bin būǹee di nyàab̀ unyɔɔdaan. Di sá yii maa dɔ́miń kí yíiń deedeedambi, m dɔ́miń kí yíiń binikpitib ní.»

Yeesu sòon̄ dinyɔɔboobil pu

(Kpèè Maat 9.14-17, Luuki 5.33-39)

18Yoowaneesi boonnooliibi nì Fariisab nìn bōob̀ kinyɔkɔ. Dalbee ní biba dɔ́miń ki bālifì Yeesu yii: «Ba pu ní Yoowaneesi boonnooliibi nì Fariisab boonnooliibi bōob̀ kinyɔkɔ ní sii yab kaa bōob̀ ní?» 19Ní Yeesu fātìi bālifì-bi yii: «Ubɔ yaa cáá unimpucaan ki yaa yíiń u-bɔɔbee, bi jīǹ ki nyù naaa, kinyɔkɔ ní bi bōob̀ ní? Unimpucaan cal yaa bí bi-kansikinee, baa kàal̀ ŋkùm. 20Ama ŋwiin ŋubɔ bí ki dòoń bi làá dāa yòon̄ unimpucaan cal bi-kansikin, an yuntiŋu ní u-bɔɔbi dāa bōob̀ kinyɔkɔ.

21«Bi yaa dū ŋŋaapɔɔn ki lìb̄ satakpiki bundi, ki yaa fíntèe, ŋŋaapɔɔn kōontí ní kí kpáaǹ satakpiki kí cátí, ní dibùndee ń mɔ̀tīí wàan̄. 22Míǹ mbaantiim ní baa tí dù ndapɔm kí fúuń tilɔkpikilin. Bi yaa dūu fúuń míǹ, tilɔkpikil pòol̄ ní ndaam ń fá, ní tilɔti mun ń bīil̀. Bi dù ndapɔm kí fúuń tilɔpɔn ni ní.»

Yeesu sá ŋwiŋŋuŋfikaa Dindaan

(Kpèè Maat 12.1-8, Luuki 6.1-5)

23 Ŋwiŋŋuŋfikaa ŋubɔ dalee, Yeesu nì u-boonnooliibi bíi jītí bilee kpaaŋŋin ní u-boonnooliibi bíi gífí bilee fiŋyi ki ŋmèem̄ abil ki ŋmóò#2.23 Kpèè Ditee 23.26.. 24Fariisab ká mimmee, ní ki bí-u yii: «Ba pu ní a-boonnooliibi ŋáań min kòó ŋwiŋŋuŋfikaa dalee#2.24 Kpèè Disa 34.21.?» 25Ní u fātìi kíí-bi yii: «Naa láá pée kàan̄ kugbɔŋu poon ki ká tijin takaasiu nín nìn cúú ubɔti Daafiidi nì u-naacimbi bi ŋá pueeee? Ŋyunti ŋun Abiyataar nìn sá usaraaŋakpilee, 26Daafiidi nìn kɔ́ kunimbɔtidiin ki ŋmɔ́ saraa kpɔnɔb ki kíǹ ki tīī u-yab. Abiyataar di nìn sá usaraaŋakpil ŋyunti gbanti. Ti-koobiliŋ poonee, usaraaŋal baba di cáá nsan kí ŋmɔ́ kpɔnɔb gbanti#2.26 ŋmɔ́ saraa kpɔnɔb...: kpèè 1 Sami 21.2-7. - Abiyataar : kpèè 2 Sami 15.35. - Usaraaŋal baba di cáá nsan: kpèè Akoo 24.9.. Ama Daafiidi nìn ŋmɔ́ ki kíǹ ki tīī u-naacimbi gba.» 27Yeesu gíti lī-bi yii: «Unimbɔti náań ŋwiŋŋuŋfikaa binib pu ní, waa náań binib ŋwiŋŋuŋfikaa pu. 28Man Kinibiki di sá ŋwiŋŋuŋfikaa daan.»

Currently Selected:

Marc 2: BASSARDC

Highlight

Copy