Matthieu 27
27
Bi cáá Yeesu ki cūnnì Piilati cee
(Kpèè Maar 15.1, Luuki 23.1-2, Yoow 18.28-32)
1Kutaafaau pɔ̀lpɔlee, bisaraaŋakpilib kɔkɔ nì Juuda yab tindaŋkpilib kpáfì ki sòon̄ bi nín làá dī nsan ŋun pu ní kí kpɔ̀ Yeesuee. 2Ní bi bóob́-u ŋŋmii ki cáá-u ki ŋúbiǹ gɔmina Piilati.
Juudasi kūū u-ba
(Kpèè Atuun 1.18-19)
3Juudasi un nìn dū Yeesu ki nyáfèe nín ká yii bi làá kpɔ̀ Yeesuee, ní u-pɔbil bíil̀ tin u ŋée pu, ní u cáań animbil jitɔmbi mmuŋku nì saalaayee ki gíiǹ ki tīī bisaraaŋakpilib nì Juuda yab tindaŋkpilib, 4ní ki bí-bi yii: «M ŋá ikpiti ní ki dū un kaa ŋá tibee ki tīī ní kpɔ̀!» Ní bíǹ kíí-u yii: «An ká timbi la? Sii nì a-bɔti dee!» 5Ní Juudasi dū animbilee ki yàl̄ kunimbɔtidiin, ní ki cūtìi lúntì u-ba ŋŋmii ki kpíì. 6Niinee bisaraaŋakpilib cūtì ki tōō animbilee, ní ki bí yii: «Ti-marau kaa pú-ti nsan tí dū an nimbiliŋee kí ŋá kunimbɔtidii nimbiliŋ dakaaun, kun puee an sá fatiku nimbiliŋ ní.» 7Ní bi sòon̄ ki gbìlīǹ tɔb, ní ki dū animbilee ki dá uyɔɔmaati ubɔ kpaabu ki dūu ŋá binicambi ceeku. 8An puee, bi yíì bukpaa gbanti yii «Fatiku kpaabu» áli nìn díǹ. 9An ŋá kii Unimbɔti bɔnaatiliu Yeereemii nín nìn sòon̄ puee dee yii: «Ní bi fōō animbil jitɔmbi mmuŋku nì saalaa ŋin Isirayeel yab nìn kíí yii bí pà u-puee, 10ní ki dū an nimbiliŋ ki dá uyɔɔmaati kpaabu, kii ti-Dindaan nín nìn tùkū-mi puee#27.10 Dijandi nee yōoǹ Yeer 18.2-3, 19.1-2, 32.6-15 ní ki dūu kútì Saka 11.12-13 pu..»
Piilati bālifì Yeesu tibɔti
(Kpèè Maar 15.2-5, Luuki 23.3-5, Yoow 18.33-38)
11Bi cáá Yeesu gɔmina nimbiin, ní gɔmina bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Míǹ ní a lī nee.» 12Ama, bisaraaŋakpilib nì Juuda yab tindaŋkpilib nín dū tibɔti tin ki túǹ u-puee, waa gātì báà tiba. 13Ní gɔmina Piilati bí-u yii: «Aa gbìl̄ tin kɔkɔ bi sòoǹ ki tūntí a-puee níii?» 14Ama Yeesu kaa pée gātì-u báà tiba an poon, ní an mɔ̄tìi bākatiǹ gɔmina tikpil.
Piilati dū Yeesu ki tīī bí kpɔ̀
(Kpèè Maar 15.6-20, Luuki 23.13-25, Yoow 18.38–19.16)
15 Dilákatil jiŋaaliu kamaayee, gɔmina nìn gīintí usarkadaan un samaa kɔkɔ yaa bālifèe ní kí líí. 16Ŋyunti gbantee usarkadaan ubɔ nìn bí un pu báà ŋma pée nyée, bi yíì-u Baaraabaasi. 17Ní Piilati bālifì samaa un nìn kpáfèe yii: «Ŋma ní ni là ḿ gíiǹ kí líí, Baaraabaasaaa, Yeesu un bi yíì yii Kriisitooyee?» 18Di sá yii u nìn nyí yii nnimbidiki ŋun bi cáá Yeesu puee di yì-tì ní bi cáań-u ki ŋúbiǹ-u. 19Ŋyunti ŋun u kā ibɔsoon puee, ní u-nimpuu túnní bí tùkù-u yii: «Á taa pée cèeǹ deedeedaan nee bɔtin! Di sá yii m jíń u-pu falaa tikpil kudamintiiun díǹ.»
20Ní bisaraaŋakpilib nì Juuda yab tindaŋkpilib téé kunipaau ń lì yii bi là bí gíiǹ Baaraabaasi kí líí kí kpɔ̀ Yeesu. 21Ní gɔmina fātìi tí būsì ki bālifì-bi yii: «Binib bili nee kansikinee, ŋma ní ni là ḿ gíiǹ kí líí ní?» Ní bi kíí-u yii: «Baaraabaasi ní ti là á gíiǹ kí líí!» 22Ní u fātìi bālifì-bi yii: «Kin, m làá ŋá Yeesu un bi yíì yii Kriisitooyee úǹ mana?» Ní bi-kɔkɔ kíí yii: «Bí kpáá-u ndɔpuntikaa pu!» 23Ní u bālifì-bi yii: «Mimmee, ba kpitii ní u ŋá?» Ama ní bi mɔ̀tīi kūuntí mpɔn yii: «Bí kpáá-u ndɔpuntikaa pu!» 24Gɔmina Piilati ká yii waa ti ŋūǹ kí ŋá tiba, fìkil fikil mɔ̀tīi bíi wīintée, ní u yōoǹ nnyim ki fíntì u-ŋalii samaa kɔkɔ nimbiin#27.24 Dūú ŋmàntī nì Ditee 21.6-8., ní ki bí yii: «Maa bí uninja nee kúm poon, ni nì ni-bɔti dee!» 25Ní kunipaauee kɔkɔ kíí yii: «U-kpuulool ń lúntí timbi nì ti-biyaamu pu!» 26Niinee ní gɔmina gíiǹ Baaraabaasi ki líì, ní ki yāntì bi gbáń Yeesu anaalab, ní ki dū-u ki tīī bí cáá-u kí kpáá ndɔpuntikaa pu.
Soojab bēel̀ Yeesu
(Kpèè Maar 15.16-20, Yoow 19.2-3)
27Niinee ní Piilati soojab cáá Yeesu ki kɔ́ǹ gɔmina cindi poon, ní ki yíiń disoojakitil kɔkɔ dɔ́miń ki kpáfì. 28Bi nìn pēetì u-wanti ní ki dū dibɔkutimandi cínciŋ ki pēeǹ-u. 29Bi nìn dū ikuŋkum ki lùn̄ kibeefuulii ki cíkiǹ-u, ki dū ŋkpandɔ ki ŋúbiǹ u-ŋaŋgiil, ní ki kíǹ ki gbàantí u-nimbiin ki bèel̄-u yii: «Ti jáaḿ-si, Juuda yab bɔtiu!» 30ní ki tíiĺ timɔtan ki làbitī-u, ki fòol̄ ŋkpandɔee ki cáa fátí u-yil. 31Bi bēel̀-u míǹ ki dóòyee, ní ki cúú dibɔkutimandee ki pēetì-u, ní ki gíiǹ úǹ u-ba wanti ki pēeǹ-u, ní ki cáá-u ki búntì kí tin kpáá ndɔpuntikaa pu.
Bi kpáá Yeesu ndɔpuntikaa pu
(Kpèè Maar 15.21-32, Luuki 23.26-43, Yoow 19.17-27)
32Bi nyáń ki cée, ki tú uninja ubɔ nsanni u sá Siireen tiŋkin, bi yíì-u Siimɔn. Bi nìn páb́-u ú fōō Yeesu dɔpuntikaaŋu kí bùkun̄. 33Bi nìn cáá Yeesu ki bānnì laakin bi yii Gɔlgɔtee, an taapu sá yii: «Kuyikpabiku laŋki.» 34Bi nìn dū ŋkaam ki ŋmālim̀ ndamam poon#27.34 Kpèè Ilan 69.22. ki tīī-u ú nyɔ̀. U dákée ní ki yíì, kaa nyùn̄.
35Ní bi dū-u ki kpáá ndɔpuntikaa pu, ní ki tɔ́ kasi ki yākatì u-bɔkutiŋ#27.35 Kpèè Ilan 22.19., 36ki kíǹ ki kā ki cí-u. 37Bi nìn ŋmàn̄ tiŋmaŋmabiti ki nákáǹ u-yil pú kí dàkà kun pu ní bi kūū-uee, yii: «Un bí nee di sá Yeesu, Juuda yab bɔtiu.» 38Bi nìn kpáá digaŋgandambi bili idɔpuntikaa pu ki ŋàl̄-u, ubɔ bí u-ŋaŋgiil pú ní un kíǹee bí u-ŋaŋgan pú#27.38 Dūú ŋmàntī nì Yees 53.12..
39Bisanjitiliibi nìn bèel̄-u, ki gàatī bi-yiliŋ#27.39 Kpèè Ilan 22.8., 40ki lì yii: «Sii un gbáà kí wīī kunimbɔtidii kí fàtīí mā-ku iwiin itee, a yaa sá Unimbɔti biki, fīī a-ba kí kpákatiń ndɔpuntikaa pu#27.40 Kpèè 26.61, Yoow 2.19.!» 41Míǹ mbaantiim, bisaraaŋakpilib, nì bimaradakaliibi nì Juuda yab tindaŋkpilib mun bí ki bèel̄-u, ki lì yii: 42«U fīī biba dee, kaa ŋūǹ kí fīī u-ba! U sá Isirayeel yab bɔtiu naa! Ú kpákatiń ndɔpuntikaa pu kɔŋkɔnnee! Mimmee, ti làá fōō-u kí kíí. 43U dū u-mákal ki ŋá Unimbɔti pu dee, ki lì yii: <Man sá Unimbɔti Jipɔɔn>. Too, kɔŋkɔnnee Unimbɔti yaa néeń-u, ú fīī-uaa#27.43 Kpèè Ilan 22.9.!» 44Digaŋgandambi bin bi nìn kpáá ki ŋàl̄-uee mun nìn sìí-u míǹ mbaantiim.
Yeesu kúm
(Kpèè Maar 15.33-41, Luuki 23.44-49, Yoow 19.28-30)
45Kuwiŋkuluuee, dibɔmbɔndi jéetì kitiŋ kɔkɔ pu ki tin sāā tikúti tita. 46Ki cá tikúti titee, Yeesu fáá mbiil mpɔn, yii: «Eelii, Eelii, lama sabakitanii?» Taapu sá yii, «M-Nimbɔtiu, m-Nimbɔtiu, ba ŋá ní a dū-mi ki fá?#27.46 Ilan 22.2.» 47Yeesu fáá mbiil mimmee, ní bin bí niinee biba gbìl̄ u-biiliŋuee pu, ní ki lī yii: «U yíì Eelii dee!» 48Ní bi-kansikin ubɔ sáǹ ki yōoǹ kuca ki múĺ ndaam min gàm̀ee ni, ki dūu túuń ŋkpandɔ pu ki tīī-u ú nyɔ̀#27.48 Dūú ŋmàntī nì Ilan 69.22.. 49Ama ní bin kíǹee bí yii: «Yàntī! Tí kpèèmaan Eelii yaa làá dāá fīī-u!»
50Yeesu gíti fáá mbiil mpɔnee ní ki sīntì. 51Niinee, sata un bi nìn dūu pītì kunimbɔtidii#27.51 Kpèè Disa 26.31-33. poon ki gāntì laakin bi yíì circir páaa laŋkee nì laan kíǹee cúu cátì yilpu ki tin kátì taapu, ní kitiŋ cīŋkì, ní titaŋkpanaakɔti cúu búkutì. 52Akaakul nìn cúu bīitì, ní bin nìn nóó Unimbɔti ki kpíìyee tikpil fīkitì, 53ki nyáń bi-kaakuliŋin. Yeesu fìkititam boonee, an nibee kɔ́ Jeerusaleem tiŋkin, ní binib tikpil ká-bi.
54Room soojakpiliu nì u-yab bin nìn cí Yeesuee nín ká kitiŋ cìŋkitam nì tin kɔkɔ pée jítèe, ní tifaandi cúú-bi tikpil ní bi lī yii: «Tiŋman, kijapaai nee lafun sá Unimbɔti Jipɔɔn ní.» 55Binimpoobi kupaau mun nìn yú ndan ki kpèeń. Bi nìn céeǹní-u doooo Galiilee ní ki tútúǹ-u atuun. 56Maarii un sá Magidalaa tiŋkinee nì Maarii un sá Yakubu nì Jooseefi nee, nì Seebeedee jipɔmbi na nìn bí bi-kansikin.
Bi nín síb́ Yeesu puee
(Kpèè Maar 15.42-47, Luuki 23.50-56, Yoow 19.38-42)
57Kujoou jóotèe, ní ugaaja ubɔ dɔ́miń laakin bi nìn kpáá Yeesuee, bi yíì-u Jooseefi, u sá Arimatee tiŋkin. U mun nìn sá Yeesu boonnooliu. 58Ní u cūtì ki ká Piilati, ní ki mēē-u nsan kí yòon̄ Yeesu wunti, ní Piilati bí yii bí dūú tīī-u. 59Ní u cūtìi yōoǹ, ki nyàab̄ ŋŋaapiin mpɔɔn ki dūu fìn̄-u, 60ní ki cáa ŋá u-kaakupɔndi din u nìn lùkū ditaŋkpalinee poon, ní ki bíntì ditaŋkpakpaandi diba ki pīiǹ dikaakul nyɔkɔpu, ní ki búntì. 61Maarii un sá Magidalaa tiŋkinee nì Maarii un kíǹee mun nìn cūtì ki kā ki pìl̄ dikaakulee nyɔkɔpu.
Bi cíitì Yeesu kaakul
62Bi bɔ́ntì ŋwiŋŋuŋfikaa kutaa wúntèe, ní bisaraaŋakpilib nì Fariisab nóó dicilpu ki cūtìi ká Piilati, 63ní ki bí-u yii: «Ukpil, ti téetí yii unyimɔndaan nee nín nìn dáá bí dimaŋfalinee u nìn bí yii, u yaa kpíìyee, winta dalee u làá fìkitī#27.63 Kpèè 16.21, 17.23, 20.19.. 64Míǹ puee, yàntī soojab ń cù kí cīití u-kaakul áli iwiin ita, án nín làá ŋá pu u-boonnooliibi ń taa dāan̄ kí yɔ̀ u-wunti kí tùkù samaa yii u fīkitèe: mimmee, nnyimɔn gbanti ŋúǹ dāa pɔ́ɔkí kí jītíǹ mpeepeekaa.» 65Ní Piilati kíí-bi yii «Ni cáá soojabaa! Cáámaan-bi bí cīití u-kaakul ni nín là puee.» 66Ní bi dū kudaaŋŋu ki nákáǹ ditaŋkpalee pu ubɔ yaa gbēēyee bí bée, ní ki cáá soojab ki cíitì.
Currently Selected:
Matthieu 27: BASSARDC
Highlight
Share
Copy
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
Matthieu 27
27
Bi cáá Yeesu ki cūnnì Piilati cee
(Kpèè Maar 15.1, Luuki 23.1-2, Yoow 18.28-32)
1Kutaafaau pɔ̀lpɔlee, bisaraaŋakpilib kɔkɔ nì Juuda yab tindaŋkpilib kpáfì ki sòon̄ bi nín làá dī nsan ŋun pu ní kí kpɔ̀ Yeesuee. 2Ní bi bóob́-u ŋŋmii ki cáá-u ki ŋúbiǹ gɔmina Piilati.
Juudasi kūū u-ba
(Kpèè Atuun 1.18-19)
3Juudasi un nìn dū Yeesu ki nyáfèe nín ká yii bi làá kpɔ̀ Yeesuee, ní u-pɔbil bíil̀ tin u ŋée pu, ní u cáań animbil jitɔmbi mmuŋku nì saalaayee ki gíiǹ ki tīī bisaraaŋakpilib nì Juuda yab tindaŋkpilib, 4ní ki bí-bi yii: «M ŋá ikpiti ní ki dū un kaa ŋá tibee ki tīī ní kpɔ̀!» Ní bíǹ kíí-u yii: «An ká timbi la? Sii nì a-bɔti dee!» 5Ní Juudasi dū animbilee ki yàl̄ kunimbɔtidiin, ní ki cūtìi lúntì u-ba ŋŋmii ki kpíì. 6Niinee bisaraaŋakpilib cūtì ki tōō animbilee, ní ki bí yii: «Ti-marau kaa pú-ti nsan tí dū an nimbiliŋee kí ŋá kunimbɔtidii nimbiliŋ dakaaun, kun puee an sá fatiku nimbiliŋ ní.» 7Ní bi sòon̄ ki gbìlīǹ tɔb, ní ki dū animbilee ki dá uyɔɔmaati ubɔ kpaabu ki dūu ŋá binicambi ceeku. 8An puee, bi yíì bukpaa gbanti yii «Fatiku kpaabu» áli nìn díǹ. 9An ŋá kii Unimbɔti bɔnaatiliu Yeereemii nín nìn sòon̄ puee dee yii: «Ní bi fōō animbil jitɔmbi mmuŋku nì saalaa ŋin Isirayeel yab nìn kíí yii bí pà u-puee, 10ní ki dū an nimbiliŋ ki dá uyɔɔmaati kpaabu, kii ti-Dindaan nín nìn tùkū-mi puee#27.10 Dijandi nee yōoǹ Yeer 18.2-3, 19.1-2, 32.6-15 ní ki dūu kútì Saka 11.12-13 pu..»
Piilati bālifì Yeesu tibɔti
(Kpèè Maar 15.2-5, Luuki 23.3-5, Yoow 18.33-38)
11Bi cáá Yeesu gɔmina nimbiin, ní gɔmina bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Míǹ ní a lī nee.» 12Ama, bisaraaŋakpilib nì Juuda yab tindaŋkpilib nín dū tibɔti tin ki túǹ u-puee, waa gātì báà tiba. 13Ní gɔmina Piilati bí-u yii: «Aa gbìl̄ tin kɔkɔ bi sòoǹ ki tūntí a-puee níii?» 14Ama Yeesu kaa pée gātì-u báà tiba an poon, ní an mɔ̄tìi bākatiǹ gɔmina tikpil.
Piilati dū Yeesu ki tīī bí kpɔ̀
(Kpèè Maar 15.6-20, Luuki 23.13-25, Yoow 18.38–19.16)
15 Dilákatil jiŋaaliu kamaayee, gɔmina nìn gīintí usarkadaan un samaa kɔkɔ yaa bālifèe ní kí líí. 16Ŋyunti gbantee usarkadaan ubɔ nìn bí un pu báà ŋma pée nyée, bi yíì-u Baaraabaasi. 17Ní Piilati bālifì samaa un nìn kpáfèe yii: «Ŋma ní ni là ḿ gíiǹ kí líí, Baaraabaasaaa, Yeesu un bi yíì yii Kriisitooyee?» 18Di sá yii u nìn nyí yii nnimbidiki ŋun bi cáá Yeesu puee di yì-tì ní bi cáań-u ki ŋúbiǹ-u. 19Ŋyunti ŋun u kā ibɔsoon puee, ní u-nimpuu túnní bí tùkù-u yii: «Á taa pée cèeǹ deedeedaan nee bɔtin! Di sá yii m jíń u-pu falaa tikpil kudamintiiun díǹ.»
20Ní bisaraaŋakpilib nì Juuda yab tindaŋkpilib téé kunipaau ń lì yii bi là bí gíiǹ Baaraabaasi kí líí kí kpɔ̀ Yeesu. 21Ní gɔmina fātìi tí būsì ki bālifì-bi yii: «Binib bili nee kansikinee, ŋma ní ni là ḿ gíiǹ kí líí ní?» Ní bi kíí-u yii: «Baaraabaasi ní ti là á gíiǹ kí líí!» 22Ní u fātìi bālifì-bi yii: «Kin, m làá ŋá Yeesu un bi yíì yii Kriisitooyee úǹ mana?» Ní bi-kɔkɔ kíí yii: «Bí kpáá-u ndɔpuntikaa pu!» 23Ní u bālifì-bi yii: «Mimmee, ba kpitii ní u ŋá?» Ama ní bi mɔ̀tīi kūuntí mpɔn yii: «Bí kpáá-u ndɔpuntikaa pu!» 24Gɔmina Piilati ká yii waa ti ŋūǹ kí ŋá tiba, fìkil fikil mɔ̀tīi bíi wīintée, ní u yōoǹ nnyim ki fíntì u-ŋalii samaa kɔkɔ nimbiin#27.24 Dūú ŋmàntī nì Ditee 21.6-8., ní ki bí yii: «Maa bí uninja nee kúm poon, ni nì ni-bɔti dee!» 25Ní kunipaauee kɔkɔ kíí yii: «U-kpuulool ń lúntí timbi nì ti-biyaamu pu!» 26Niinee ní gɔmina gíiǹ Baaraabaasi ki líì, ní ki yāntì bi gbáń Yeesu anaalab, ní ki dū-u ki tīī bí cáá-u kí kpáá ndɔpuntikaa pu.
Soojab bēel̀ Yeesu
(Kpèè Maar 15.16-20, Yoow 19.2-3)
27Niinee ní Piilati soojab cáá Yeesu ki kɔ́ǹ gɔmina cindi poon, ní ki yíiń disoojakitil kɔkɔ dɔ́miń ki kpáfì. 28Bi nìn pēetì u-wanti ní ki dū dibɔkutimandi cínciŋ ki pēeǹ-u. 29Bi nìn dū ikuŋkum ki lùn̄ kibeefuulii ki cíkiǹ-u, ki dū ŋkpandɔ ki ŋúbiǹ u-ŋaŋgiil, ní ki kíǹ ki gbàantí u-nimbiin ki bèel̄-u yii: «Ti jáaḿ-si, Juuda yab bɔtiu!» 30ní ki tíiĺ timɔtan ki làbitī-u, ki fòol̄ ŋkpandɔee ki cáa fátí u-yil. 31Bi bēel̀-u míǹ ki dóòyee, ní ki cúú dibɔkutimandee ki pēetì-u, ní ki gíiǹ úǹ u-ba wanti ki pēeǹ-u, ní ki cáá-u ki búntì kí tin kpáá ndɔpuntikaa pu.
Bi kpáá Yeesu ndɔpuntikaa pu
(Kpèè Maar 15.21-32, Luuki 23.26-43, Yoow 19.17-27)
32Bi nyáń ki cée, ki tú uninja ubɔ nsanni u sá Siireen tiŋkin, bi yíì-u Siimɔn. Bi nìn páb́-u ú fōō Yeesu dɔpuntikaaŋu kí bùkun̄. 33Bi nìn cáá Yeesu ki bānnì laakin bi yii Gɔlgɔtee, an taapu sá yii: «Kuyikpabiku laŋki.» 34Bi nìn dū ŋkaam ki ŋmālim̀ ndamam poon#27.34 Kpèè Ilan 69.22. ki tīī-u ú nyɔ̀. U dákée ní ki yíì, kaa nyùn̄.
35Ní bi dū-u ki kpáá ndɔpuntikaa pu, ní ki tɔ́ kasi ki yākatì u-bɔkutiŋ#27.35 Kpèè Ilan 22.19., 36ki kíǹ ki kā ki cí-u. 37Bi nìn ŋmàn̄ tiŋmaŋmabiti ki nákáǹ u-yil pú kí dàkà kun pu ní bi kūū-uee, yii: «Un bí nee di sá Yeesu, Juuda yab bɔtiu.» 38Bi nìn kpáá digaŋgandambi bili idɔpuntikaa pu ki ŋàl̄-u, ubɔ bí u-ŋaŋgiil pú ní un kíǹee bí u-ŋaŋgan pú#27.38 Dūú ŋmàntī nì Yees 53.12..
39Bisanjitiliibi nìn bèel̄-u, ki gàatī bi-yiliŋ#27.39 Kpèè Ilan 22.8., 40ki lì yii: «Sii un gbáà kí wīī kunimbɔtidii kí fàtīí mā-ku iwiin itee, a yaa sá Unimbɔti biki, fīī a-ba kí kpákatiń ndɔpuntikaa pu#27.40 Kpèè 26.61, Yoow 2.19.!» 41Míǹ mbaantiim, bisaraaŋakpilib, nì bimaradakaliibi nì Juuda yab tindaŋkpilib mun bí ki bèel̄-u, ki lì yii: 42«U fīī biba dee, kaa ŋūǹ kí fīī u-ba! U sá Isirayeel yab bɔtiu naa! Ú kpákatiń ndɔpuntikaa pu kɔŋkɔnnee! Mimmee, ti làá fōō-u kí kíí. 43U dū u-mákal ki ŋá Unimbɔti pu dee, ki lì yii: <Man sá Unimbɔti Jipɔɔn>. Too, kɔŋkɔnnee Unimbɔti yaa néeń-u, ú fīī-uaa#27.43 Kpèè Ilan 22.9.!» 44Digaŋgandambi bin bi nìn kpáá ki ŋàl̄-uee mun nìn sìí-u míǹ mbaantiim.
Yeesu kúm
(Kpèè Maar 15.33-41, Luuki 23.44-49, Yoow 19.28-30)
45Kuwiŋkuluuee, dibɔmbɔndi jéetì kitiŋ kɔkɔ pu ki tin sāā tikúti tita. 46Ki cá tikúti titee, Yeesu fáá mbiil mpɔn, yii: «Eelii, Eelii, lama sabakitanii?» Taapu sá yii, «M-Nimbɔtiu, m-Nimbɔtiu, ba ŋá ní a dū-mi ki fá?#27.46 Ilan 22.2.» 47Yeesu fáá mbiil mimmee, ní bin bí niinee biba gbìl̄ u-biiliŋuee pu, ní ki lī yii: «U yíì Eelii dee!» 48Ní bi-kansikin ubɔ sáǹ ki yōoǹ kuca ki múĺ ndaam min gàm̀ee ni, ki dūu túuń ŋkpandɔ pu ki tīī-u ú nyɔ̀#27.48 Dūú ŋmàntī nì Ilan 69.22.. 49Ama ní bin kíǹee bí yii: «Yàntī! Tí kpèèmaan Eelii yaa làá dāá fīī-u!»
50Yeesu gíti fáá mbiil mpɔnee ní ki sīntì. 51Niinee, sata un bi nìn dūu pītì kunimbɔtidii#27.51 Kpèè Disa 26.31-33. poon ki gāntì laakin bi yíì circir páaa laŋkee nì laan kíǹee cúu cátì yilpu ki tin kátì taapu, ní kitiŋ cīŋkì, ní titaŋkpanaakɔti cúu búkutì. 52Akaakul nìn cúu bīitì, ní bin nìn nóó Unimbɔti ki kpíìyee tikpil fīkitì, 53ki nyáń bi-kaakuliŋin. Yeesu fìkititam boonee, an nibee kɔ́ Jeerusaleem tiŋkin, ní binib tikpil ká-bi.
54Room soojakpiliu nì u-yab bin nìn cí Yeesuee nín ká kitiŋ cìŋkitam nì tin kɔkɔ pée jítèe, ní tifaandi cúú-bi tikpil ní bi lī yii: «Tiŋman, kijapaai nee lafun sá Unimbɔti Jipɔɔn ní.» 55Binimpoobi kupaau mun nìn yú ndan ki kpèeń. Bi nìn céeǹní-u doooo Galiilee ní ki tútúǹ-u atuun. 56Maarii un sá Magidalaa tiŋkinee nì Maarii un sá Yakubu nì Jooseefi nee, nì Seebeedee jipɔmbi na nìn bí bi-kansikin.
Bi nín síb́ Yeesu puee
(Kpèè Maar 15.42-47, Luuki 23.50-56, Yoow 19.38-42)
57Kujoou jóotèe, ní ugaaja ubɔ dɔ́miń laakin bi nìn kpáá Yeesuee, bi yíì-u Jooseefi, u sá Arimatee tiŋkin. U mun nìn sá Yeesu boonnooliu. 58Ní u cūtì ki ká Piilati, ní ki mēē-u nsan kí yòon̄ Yeesu wunti, ní Piilati bí yii bí dūú tīī-u. 59Ní u cūtìi yōoǹ, ki nyàab̄ ŋŋaapiin mpɔɔn ki dūu fìn̄-u, 60ní ki cáa ŋá u-kaakupɔndi din u nìn lùkū ditaŋkpalinee poon, ní ki bíntì ditaŋkpakpaandi diba ki pīiǹ dikaakul nyɔkɔpu, ní ki búntì. 61Maarii un sá Magidalaa tiŋkinee nì Maarii un kíǹee mun nìn cūtì ki kā ki pìl̄ dikaakulee nyɔkɔpu.
Bi cíitì Yeesu kaakul
62Bi bɔ́ntì ŋwiŋŋuŋfikaa kutaa wúntèe, ní bisaraaŋakpilib nì Fariisab nóó dicilpu ki cūtìi ká Piilati, 63ní ki bí-u yii: «Ukpil, ti téetí yii unyimɔndaan nee nín nìn dáá bí dimaŋfalinee u nìn bí yii, u yaa kpíìyee, winta dalee u làá fìkitī#27.63 Kpèè 16.21, 17.23, 20.19.. 64Míǹ puee, yàntī soojab ń cù kí cīití u-kaakul áli iwiin ita, án nín làá ŋá pu u-boonnooliibi ń taa dāan̄ kí yɔ̀ u-wunti kí tùkù samaa yii u fīkitèe: mimmee, nnyimɔn gbanti ŋúǹ dāa pɔ́ɔkí kí jītíǹ mpeepeekaa.» 65Ní Piilati kíí-bi yii «Ni cáá soojabaa! Cáámaan-bi bí cīití u-kaakul ni nín là puee.» 66Ní bi dū kudaaŋŋu ki nákáǹ ditaŋkpalee pu ubɔ yaa gbēēyee bí bée, ní ki cáá soojab ki cíitì.
Currently Selected:
:
Highlight
Share
Copy
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.