Matthieu 26

Yeesu nannanliibi nín kpáfì kinyɔkɔ u-pu kí kpɔ̀-u puee

(Kpèè Maar 14.1-2, Luuki 22.1-2, Yoow 11.45-53)

1Yeesu sòon̄ an bɔti ki dóòyee, ní ki bí u-boonnooliibi yii: 2«Kéè ni nyí yii an kíǹ iwiin ili dee tí jī Dilákatil jiŋaaliuaa#26.2 Kpèè Disa 12.1-27.! Niin ní bi làá dū man Kinibiki kí ŋúbiǹ m-nannanliibi bí kpáá-mi ndɔpuntikaa pu.»

3Ní bisaraaŋakpilib nì Juuda yab tindaŋkpilib kpáfì usaraaŋakpil un bi yíì Kaayiifee naakookun, 4ki sòon̄ ki bɔ́ntì kí cúú Yeesu dibalin kí kpɔ̀-u. 5Ama ní ki lī yii: «Án taa nín̄ sá jiŋaalin, án nín làá ŋá pu samaa ń taa láa yīkì kí jáǹ-tee.»

Unimpu ubɔ yāaǹ Yeesu pu talaalu

(Kpèè Maar 14.3-9, Yoow 12.1-8)

6Yeesu nín nìn bí Beetanii, Siimɔn un nìn sá unyaŋgbantee dumpuee, 7ní unimpu ubɔ sútìń ki pìl̄-u ki ŋúbiń talaalumɔnti un pɔ̄ɔ̄ kudaau tikpilee, an kā ditaŋkpal kpalbanyaaŋwun#26.7 ditaŋkpal kpalbanyaaŋwu: an sá ataŋkpee ŋin jɔ̀m̀ pɔ́lpɔl ki jìl̀ ki pɔ̄ɔ̄ kudaauee, ní bi nìn lùkù ki kpíl̀ talaalub poon.. Ŋyunti ŋun Yeesu kā ki jīǹ tijinee, ní u kpáatì talaaluee ki sītì Yeesu yil pu. 8Yeesu boonnooliibi nín ká mimmee, an kaa mɔ́ɔkiǹ-bi, ní bi bí yii: «Ba pu ní bi bíil̀ talaalumɔnti nee míǹ? 9Bi bàà ŋūǹ kí nyāfì-u animbikpaan kí dūú yàkatī biwɔfibaa!»

10Yeesu gbìl̄ bi nín bí ki sòoǹ tiŋyee, ní u bíi lìǹ-bi yii: «Ba pu ní ni páb́ unimpu nee míǹ? An sá ditummɔntiil ní u ŋá ki tīī-mi. 11Kun puee ni nì biwɔfib di làá nīn pée bí baabadal#26.11 Dūú ŋmàntī nì Ditee 15.11., ama man kaa làá nīn bí ni-cee baabadal. 12U nín yāaǹ m-wunti pu talaalu nee, u bɔ́ntì-tì ki síiǹ m-síbitam dee#26.12 Kpèè Maar 14.8.. 13Ibaamɔn ní m tùkù-ni, duulinya jaŋŋi kɔkɔ, laakin ní bi dāa sòoǹ tibɔmɔntiil neeyee, bi làá dāá sòoǹ unimpu nee nín ŋá min nee kí nīn téetí u-pu.»

Juudasi dū Yeesu ki nyáfiǹ u-nannanliibi

(Kpèè Maar 14.10-11, Luuki 22.3-6)

14Ní akpambal saalaa nì alee kansikin un bi yíì Juudasi Isikaariyɔtee cūtì ki ká bisaraaŋakpilib, 15ní ki bí-bi yii: «Ni làá tīī-mi ba ní ḿ nyàab̀ nsan ŋun ni làá dī kí cúú Yeesuee?» Ní bi kàan̄ animbil jitɔmbi mmuŋku nì saalaa ki tīī-u#26.15 Dūú ŋmàntī nì Saka 11.12.. 16Ŋyunti gbantee ní Juudasi kíĺ ki nyàab̀ nsan kí dū Yeesu kí ŋúbíǹ-bi.

Yeesu nì u-boonnooliibi jíń Dilákatil jiŋaaliu

(Kpèè Maar 14.12-25, Luuki 22.7-23, Yoow 13.21-30, 1 Kɔra 11.23-26)

17Jiŋaal un bi ŋmóò kpɔnɔb bin baa ŋá ŋkpɔnɔnyɔkɔee wimpeepeekaaŋuee, Yeesu boonnooliibi dɔ́miń ki bālifì-u yii: «La ní a là tí bɔ́ntí-si Dilákatil jiŋaaliu jinti ní?» 18Niinee ní u bí-bi yii, cùmaan kitiŋin ŋmɔŋŋmɔkɔ dumpu kí tùkù-u yii: «Ukpil bí yii: <M-yuntiŋu bāań ní nee, ní sii cee ní man nì m-boonnooliibi làá jī Dilákatil jiŋaaliu.>» 19Ní bi ŋá kíí Yeesu nín tùkū-bi puee, ki bɔ́ntì jiŋaalee.

20Kujoou jóotèe, bi nì u kāl̀ ki bíi jīǹ tijin. 21Bi bíi jīǹee, ní u bí-bi yii: «Ibaamɔn ní m sòoǹ, ni-kansikin ubɔ làá dū-mi kí tīī m-nannanliibi.» 22Niinee kunimbaau kɔ́-bi ní bi kíĺ ki bíi bàlifī-u ubɔ ubɔ yii: «Ukpil, kéè an kaa sá mamaa!» 23Ní Yeesu kíí-bi yii: «An sá man nì un jīǹ disambibaantiilinee#26.23 Kpèè Maar 14.20. di làá dū-mi kí ŋúbíǹ m-nannanliibi. 24Man Kinibiki cá kí kpú ní nee, kii an nín ŋmàn̄ m-pu ki yóoǹ miŋyee#26.24 Kpèè Ilan 22.2-19, Yees 53., ama mbusu dɔ̄ ki cí un làá dū-mi kí nyāfiǹ m-nannanliibee! Bi yaa kaa bàà màl̄ udaan, an bàà sɔ́.» 25Ní Juudasi un bíi cáá-u ki nyáfée bālifì-u yii: «Ukpil, man di làá dū-si kí tīīii?» Ní Yeesu kíí-u yii: «Iiin.»

Ti-Dindaan jikaati

(Kpèè Maar 14.22-26, Luuki 22.14-20, 1 Kɔra 11.23-25)

26Ŋyunti ŋun bi bí ki jīǹee, ní Yeesu yōoǹ kpɔnɔ ki pàkā Unimbɔti, ní ki cúu gífì ki yākatì ki tīī u-boonnooliibi, ní ki bí-bi yii: «Fōō kí ŋmɔ́maan! An di sá m-wunti.» 27Ní ki tí yōoǹ ndamam ní ki jáam̀ Unimbɔti mi-pu, ní ki dūu tīī-bi, ní ki bí-bi yii: «Ni-kɔkɔ fōō kí nyɔ̀maan! 28An di sá m-fatikuu un nyáń ki cáań mpèé Unimbɔti nì binib tikpil kansikin bí ká bi-kpitii pɔ̄tamee#26.28 Dūú ŋmàntī nì Disa 24.8, Yeer 31.31-34.. 29Ibaamɔn ní m tùkù-ni, m pée gíti kpá kí nyɔ̀ ndaam nee kí nīn cí daliŋkin man nì ni làá dāá gíti kpāfì kí nyɔ̀ ndaam min sá mpɔmee m-Baa Beelinee.» 30Ŋyunti ŋun bi gāā jiŋaal laŋyi ki dóòyee#26.30 jiŋaal laŋyi: an dàkà yii Ilan 113 kí cáá sāā 118., ní bi nyáń ki búntì Ɔliifi sufii jool pu.

Peetroo làá dāá néé yii waa nyí Yeesu

(Maar 14.26-31, Luuki 22.31-34, Yoow 13.36-38)

31Niinee, Yeesu bí u-boonnooliibi yii: «Bi nín làá ŋá-mi puee làá yàntī ni-kɔkɔ ń fá-mi kunyeeu nee gba, kii Unimbɔti gbɔŋku nín sòon̄ ki síiǹ puee yii: <M làá kpɔ̀ upikpaal ní ipii ń yàl̄#26.31 Saka 13.7..> 32Ama m yaa láa fīkitèe, m làá lìntī kí cùú cīití-ni Galiilee». 33Ní Peetroo kíí-u yii: «Báà bi-kɔkɔ yaa féeń-si, man kpá kí fá-si jaanjaan!» 34Ní Yeesu bí-u yii: «Ibaamɔn ní m tùkù-si, díǹ nyeeku gba, kí wàatī ukooja ń bāakèe, a làá néé mita ní yii saa nyí-mi.» 35Ní Peetroo kíí-u yii: «Báà an yaa sá-mi ŋkúm, man nì si làá kpú, man kpá kí néé yii maa nyí-si!» Ní u-boonnooliibi bin kɔkɔ kíǹee mun lī míǹ mbaantiim.

Yeesu bí Geetiseemanee ki mèé Unimbɔti

(Kpèè Maar 14.32-42, Luuki 22.39-46)

36Niinee ní Yeesu nì u-boonnooliibi bàn̄ laakin bi yíì Geetiseemaneeyee#26.36 Geetiseemaneeyee sá Aram sooŋyin ní, taapu di sá kubòóu kun poon bi ŋmāam̀ ki nyāntí ŋkpamee., ní u bí-bi yii: «Kàl̄maan doo, man làá cù nyɔkɔpu doo kí mèè.» 37Ní u kpáaǹ Peetroo nì Seebeedee jipɔmbi liitil. Niinee, u kíĺ ki kpáàa bíi gbìl̀ dinimbinaamandi nì kunimbaau pu, 38ní ki bí-bi yii: «Kunimbaau kɔ́-mi tikpil, ki cáǹ-mi ŋkúmin! Nín̄ kāmaan doo kí nīn wāĺ kí taa gèeǹ!» 39Ní Yeesu sútì nyɔkɔpu fiii ní ki tātìi dōoǹ dicincibil ní ki bíi mèé yii: «M-Baa, falaanyɔkaa nee yaan ŋūǹ kí kàkatī kí wàatī-mi! Ama, min sii lèe nín ŋá, án taa ŋá min man lèe.»

40Ní u fātìi gítìń u-boonnooliibi bitee cee ki ká bi dɔ̄ ki gèeǹ, ní u bí Peetroo yii: «Naa kpáàa ŋūǹ man nì ni ń kàl̄ kukúbambaantiiu kpaŋkpam ní taa gèeǹaaa? 41Fìntīmaan kí nīn mèé, án nín làá ŋá pu ni yaa kɔ́ icɔŋkinee ní taa lítée. Unil bàà cáá nlandɔkɔmɔnti, ama ní ki bí iwɔfin.» 42Ní Yeesu fātìi tí nín gítí nliliitiim ki tí mēē yii: «M-Baa, an yaa sá yii m yaa kaa nyùn̄ falaa nee waa ŋūǹ kí jītée, a nín là puee ní ń ŋá!» 43Ní u fātìi tí nín gítiń ki bāańee, bi tí dɔ̄ ki gèeǹ, kun puee ŋgeem nìn cáá-bi tikpil. 44Ní u gíti tí yāntì-bi ki fātìi nín gítí ntataatiim, ki tí mēē ki būsì tibɔbaantiil. 45Míǹ boonee u fātìi nín gítiń u-boonnooliibi cee, ní ki bí-bi yii: «Ni dɔ̄ ki gèeǹ ki ŋùŋfāa! Kpèè, kukúluu kun bi làá dū man Kinibiki kí nyāfiǹ binikpitibee bāań ní nee. 46Yīkì, tí nīn cámaan! Un làá dū-mi kí nyāfèe di bāań nee!»

Bi cúú Yeesu

(Kpèè Maar 14.43-50, Luuki 22.47-53, Yoow 18.2-11)

47Yeesu kaa láá sòon̄ ki ŋmíl̀, ní u-kpambaliŋ saalaa nì alee kansikin un bi yíì Juudasee bāań u nì kunipaau nóoń ki ŋúbiń njimu nì atambɔn. Bisaraaŋakpilib nì Juuda yab tindaŋkpilib di nìn túnní-bi. 48Úǹ un làá dū Yeesu kí nyāfèe nìn tīiń-bi kudaaŋŋu yii: «Un m yaa tin jáam̀ ki kpàl̄ee, un ni nyàab̀ee dee, ní cúú-u!» 49Dicilpu niinee, u sútì ki pìl̄ Yeesu, ki bí-u yii: «Ukpil, a-jooku!» ní ki kpàl̄-u. 50Ní Yeesu bí-u yii: «M-bɔɔ, ŋá tin pú a dɔ́mińee!» Niinee ní binibee dɔ́miń ki cúú Yeesu. 51Bin nìn bí Yeesu ceeyee kansikin ubɔ fɔ́fì u-tàataajiki ní ki gāā ki wúkutì usaraaŋakpil tɔntɔnliu tafal#26.51 Dūú ŋmàntī nì Yoow 18.26.. 52Ní Yeesu bí-u yii: «Gíiǹ a-tàataajiki kí fúuń kujitooun, kun puee bin kɔkɔ yaa yōoǹ njimuee, njimu di làá dāá kpɔ̀ bidambi. 53A nyí yii maan ŋūǹ kí yíiń m-Baa ń jòoń-mi, ní ú tīiń-mi niin niin ituun kutukub kutukubaaa? 54Ama, m yaa ŋá mimmee, mana ní Unimbɔti gbɔŋku nín sòon̄ ki síiǹ m-pu miŋyee làá ŋmā kí ŋá?»

55Niinee ní u fātìi bí kunipaauee yii: «M sá unikpiti naaa? Ba pu ní ni ŋúbiń ntàataajimu nì atambɔn kí dāá cúú-mi! Baabadal m kàal̀ kunimbɔtidiin ki dàkà, ba pu ní naa cúú-mi niin? 56Ama tin bí nee kɔkɔ bāań, án ŋá kii Unimbɔti bɔnaatiliibi nín ŋmàn̄ ki síiǹ m-pu miŋyee#26.56 Dūú ŋmàntī nì 26.31..» Niinee ní u-boonnooliibi kɔkɔ sáǹ ki fá-u.

Bi cáá Yeesu ibɔsoon Juuda yab kpilib cee

(Kpèè Maar 14.53-65, Luuki 22.54-55,63-71, Yoow 18.12-14,19-24)

57Bin nìn cúú Yeesuee cáá-u ki cūnnì usaraaŋakpil Kaayiifi dumpu, niin ní bimaradakaliibi nì bitindaŋkpilib nìn kpáfì. 58Ní Peetroo táá Yeesu aboon aboon ki tin bàn̄ usaraaŋakpil dumpu ki kāl̀ u-tɔntɔnliibi cee kí kpèè án nín làá kúntí miŋyee.

59Bisaraaŋakpilib nì bibɔsoonliibi bin kɔkɔ kíǹee bíi nyàab̀ un làá ká nnyimɔn ŋubɔ kí sòoǹ u-pu bí ká nnaakpal kí kpɔ̀-uee. 60Ama, nì min kɔkɔ binib dɔ́miń kupaau ki cáań inyimɔn seerab ki túǹ u-puee, báà ubɔ yɔu kaa kāl̀#26.60 Dūú ŋmàntī nì Ilan 27.12, 35.11.. Boonee ní bili dɔ́miń ki bí yii: 61«Kijapaai nee bí yii, úǹ ŋūǹ kí wīī kunimbɔtidii kí fàtīí mā-ku iwiin ita#26.61 Kpèè Yoow 2.19..»

62Niinee ní usaraaŋakpil yíkì ki bí Yeesu yii: «Binib nee nín bí ki sòoǹ a-pu miŋyee, ba ŋá ní saa kíikí ní?» 63Ama ní Yeesu ŋmí-bi fɔ́ŋfɔŋ. Ní usaraaŋakpil gíti bí-u yii: «Nì Unimbɔti un bí dimaŋfalinee ní m pūtì ki tīī-si, á tùkù-ti a yaa sá Meesiya, ki sá Unimbɔti Jipɔɔn!» 64Ní Yeesu kíí-u yii: «Míǹ ní a lī nee. Ama m tùkù-ni yii, kí yòon̄ kɔŋkɔnnee, ni làá ká man Kinibiki kā Mpɔŋkɔdaan ŋaŋgiil pú, ki làá dāá ká m nyánní yilpu atagbanni ki dòoń#26.64 Ilan 110.1, Dani 7.13..» 65Niinee, usaraaŋakpil dáaĺ ki cátì tiwan tin u pēēyee, ní ki bí yii: «U ŋèeǹ nì Unimbɔti ní! Ti gíti nyàab̀ seeradambi kí ŋá ba? Nimbi ni-ba, ni gbìl̄ u nín ŋèeǹ nì Unimbɔtee. 66Ni ká yii ba?» Ní bi kíí-u yii: «U máaǹ ŋkúm ní#26.66 Kpèè Akoo 24.16.!»

67Niinee ní bi kíĺ ki tíiĺ timɔtan ki làbitī u-nimbiin ní ki gbáà-u aŋaŋkul, ní biba mun fátí-u itampa#26.67 Dūú ŋmàntī nì Yees 50.6. 68ki lì-u yii: «Sii un bí yii a sá un Unimbɔti lēē ki túnnée, dàkà yii a sá Unimbɔti bɔnaatiliu, tùkù-ti un di fáá-see!»

Peetroo néé yii waa nyí Yeesu

(Maar 14.66-72, Luuki 22.56-62, Yoow 18.15-18,25-27)

69Ŋyunti ŋun Peetroo nyáń mmɔŋki ki kā dicindinee, usapɔɔn ubɔ un bí niin ki tūǹ ditundee sútìń ki pìl̄-u, ní ki bí-u yii: «A mun nìn bí Yeesu Galiilee yɔuee cee ní!» 70Ní Peetroo néé báà ŋma nimbiin yii: «Maa nyí tibɔti tin a sòoǹ nee.» 71U còom̄ ki cá kipunyɔkɔ watil púee, ní usapɔɔn ubɔ mun gíti ká-u, ní ki tùkū bin bí niinee yii: «Kijapaai nee mun nìn bí Yeesu Naasaareeti yɔuee cee ní.» 72Ní Peetroo gíti tí néé ki pūtì yii: «Maa nyí uninja gbanti!» 73An kútì fiiiyee, bin bí niinee mun sútìń u-cee ní ki bí-u yii: «A mun lafun sá binib bin nóó-uee kansikin ubɔ ní, a-sòontam dàkà míǹ.» 74Niinee ní u kíǹ ki bíi pùtī ki tíntí yii: «Maa pée nyí kijapaai nee!» Kpalaayee, ní ukooja báakì. 75Niinee ní Peetroo téetì dinyɔɔbundi din Yeesu bàà lī-uee, yii: «Kí wàatī ukooja ń bāakèe, a làá néé ŋfunyɔm mita yii saa nyí-mi#26.75 Kpèè 26.34..» Ní u nyáń ki súń ki yáliŋkì.

Currently Selected:

Matthieu 26: BASSARDC

Highlight

Copy