Lévitique 7
7
d. Dibɔkpil saraau
1«Dibɔkpil saraau bí circir páaa ní. Bi nín máaǹ kí nīn ŋáań-u puee sèé. 2Laakin bi làntī saraawɔkaa waŋkulukuee, niin ní bi máaǹ kí làntì dibɔkpil saraau waŋkuluku mun, ní bí dū fatiku kí yàaǹ nsaraafan kɔkɔ pu kí màntīí tū. 3Tin bi làá lēē kí wà ŋŋmi kí tīī ti-Dindaanee di sá dijugbindi#7.3 Kpèè Disa 29.22. nì ŋkpam min bīī ina puee, 4nì aceebil liitil nì ŋkpam min pá ŋi nì ntikakal puee, ní kí lēē mpɔɔlam kɔkɔ kí nákatí kí kpáaǹ aceebil dicilpu. 5Niinee ní usaraaŋal ń cáá wà ŋŋmi nsaraafan pu. An di sá saraa un ŋáŋkí dibɔkpilee, saraa un bi dùú wà ŋŋmi kí tīī ti-Dindaanee. 6Bisaraaŋaliibi kansikinee, bin pée sá bininjabee ŋūǹ kí ŋmɔ́ tinan gbanti, ama bí ŋmɔ́-tì mpaan ŋun bí circiree pu, kun puee tì sá circir páaa nanti ní. 7Dibɔkpil saraau nì ikpiti pɔ̄tam saraau sá ubaanti ní, bi-ŋátam marau mun sá ubaanti ní. Usaraaŋal un di ŋá saraayee di yì kuwaŋkuluu kun bi dūu ŋá saraayee nanti.
ee. Usaraaŋal jandi
8«Ubɔ yaa cáań kuwaŋkuluu ki ŋá saraawɔkaayee, usaraaŋal un ŋá an saraauee di yì kuwaŋkuluuee gbaŋŋu. 9Tijin tin kɔkɔ bi pūul̀ dibubulin àá bi tɔ̄kɔntí kusɔŋun àá bi tòó kitaŋkpapiliŋ pu kí dūú ŋá saraa kí tīī ti-Dindaanee, usaraaŋal un dū saraa gbanti ki tīī ti-Dindaanee di yì. 10Tijin saraabi bin kɔkɔ kíǹ bi dū ŋkpam ki búuń àá baa búuń ŋkpamee, Aarɔn jipɔmbi kɔkɔ di yì, bí yàkatī án nīn ŋmà.»
f. Mpèé saraau
11«Mpèé saraau un bi ŋáań ki tìì ti-Dindaanee ŋátam marau sɔ̀. 12Ubɔ yaa làá ŋá mpèé saraau kí jāam̀#7.12 Kpèè Ilan 107.22, 116.17. ti-Dindaanee, ú dū kpɔnɔb bin bi dū ŋkpam ki búuń ki púĺ ŋkpɔnɔnyɔkɔ kpá poonee, nì ŋkpɔnɔwaamu mun pu bi yɔ́kɔfì ŋkpam ki púĺ ŋkpɔnɔnyɔkɔ kpá poonee, nì kalaabi bin bi dū ŋkpam ki ŋmālim̀ ki búuńee kí kūtì ijaam saraau waŋkuluku pu. 13Míǹ boonee ní ú gíti dū kpɔnɔb bin bi ŋá ŋkpɔnɔnyɔkɔ poon ki púĺee kí kūtì mpèé saraauee pu. 14Bí lēē kpɔnɔbee kɔkɔ pu ubɔ ubɔ kí ŋá saraa kí tīī ti-Dindaan. Kpɔnɔb gbantee, usaraaŋal un dū ijaam saraau waŋkuluku fatikuu ki yāaǹ nsaraafan jaŋŋi puee di yì. 15Bí ŋmɔ́ mpèé saraau un bi ŋá ki jáam̀ ti-Dindaanee nanti ŋwiin ŋun bi ŋá saraa gbantee, tí taa wúntí kutaa.
16«Ama an yaa sá ipoon saraau àá nlammɔntiim saraau nantee, bi ŋūǹ kí ŋmɔ́-tì ŋwiin ŋun bi ŋá saraa gbantee nì ŋwinliliiti dal. 17Ama tin yaa kíǹ winta dalee, bí wà-tì ŋŋmi. 18Ubɔ yaa ŋmɔ́ mpèé saraau nanti winta dalee, ti-Dindaan kaa làá fōō un cáań saraa gbantee saraau. Udaan ŋman ŋá saraa gbanti fám dee, di sá yii tinan gbantee bíil̀. Un ŋmɔ́ tinan gbantee fōō dibɔkpil ní ki làá túń u-yìntitam tafadaaldi. 19Tinan yaa gbēē tiwan tin kɔ́ tijɔkɔndee, bí taa ŋmɔ́-tì, bí dū-tì kí wà ŋŋmi.
«Unil un kamaa pée bí circiree ŋūǹ kí ŋmɔ́ saraa nanti. 20Ama ubɔ yaa bí tijɔkɔndin#7.20 Kpèè ayil 12-15. ní ki ŋmɔ́ tinan tin bi dūu ŋá saraa ki tīī ti-Dindaanee, bí nyāntí udaan Isirayeel nibul kansikin. 21Míǹ mbaantiim un di yaa gbēē tin bí tijɔkɔndinee, an dàkà yii tin kɔ̄ntí unil tijɔkɔndee àá kuwaŋkuluu kun kòóyee àá tin fù ti-pool pu bi kòóyee, ní ki yaa ŋmɔ́ mpèé saraau nantee, bí nyāntí-u Isirayeel nibul kansikin.»
g. Samaa marau
22Ti-Dindaan bí Mooyiisi 23ń tùkù Isirayeel yab yii:
«Ní taa ŋmɔ́ unaa àá upii àá uŋoobu kpam. 24Ni ŋūǹ kí dū tiwaŋkuti tin kpíìyee àá tin ní an cúúyee kpam kí ŋá tiba, ama ní taa ŋmɔ́-mì. 25Ubɔ yaa ŋmɔ́ kuwaŋkuluu kpam min bàà sá bí dūú wà ŋŋmi kí tīī ti-Dindaanee, bí nyāntí-u Isirayeel nibul kansikin. 26Báà laakin kamaa ní ni yaa bàn̄ ki kóòyee, ní taa ŋmɔ́ kinɔmbiki àá kuwaŋkuluu kubɔ fatikuu. 27Un yaa ŋmɔ́ fatikuee, bí nyāntí-u Isirayeel nibul kansikin#7.27 B. 26-27: kpèè 17.10-14, Diny 9.4, Ditee 12.16,23, 15.23..»
28Ti-Dindaan bí Mooyiisi 29ń tùkù Isirayeel yab yii:
«Ubɔ yaa cáań mpèé saraau kí tīī ti-Dindaanee, ú lēē dijandi din sá ti-Dindaan yalee. 30Úǹ u-ba ń cáań dijandi gbanti, an dàkà yii ŋkpam nì dibindi, ní kí yòon̄ dibindi gbanti yilpu kí fíiǹ fíiǹ ti-Dindaan nimbiin niin. 31Niinee usaraaŋal ń fōō ŋkpamee kí cáá wà ŋŋmi nsaraafan pu. Ama dibindee, Aarɔn nì u-jipɔmbi di yì. 32Ní lēē mpèé saraau waŋkuluku diŋaŋgiitaal kí tīī usaraaŋal. 33Aarɔn jipɔmbi kansikin un cūnnì mpèé saraau waŋkuluku fatikuu nì ku-kpam nsaraafan puee di yì diŋaŋgiitaal gbanti. 34Isirayeel yab saraabi bin bi ŋáań an sá mpèé saraabee poonee, m lēē dibindi din bi fīintí fīintí m-nimbiinee nì diŋaŋgiitaal ki tīī usaraaŋakpil Aarɔn nì u-jipɔmbi. Tin Isirayeel yab máaǹ kí nīn tìì bisaraaŋaliibi kí nīn pée cáa cá jaanjaanee dee.»
35Daliŋkin ti-Dindaan nìn kāaǹ Aarɔn nì u-jipɔmbi bí nīn sá bisaraaŋaliibee, dijandi din bi nìn lēē ki tīī-bi ti-Dindaan saraabi bin bi nìn cāabìń ki wù ŋŋmi ki tìì-uee poonee dee. 36Ŋwiin gbanti ní ti-Dindaan yóoǹ Isirayeel yab yii bí nīn tìì Aarɔn nì u-jipɔmbi saraabi jandi gbanti. Án nīn sá dibɔkpaal ki tīī Isirayeel yab kí nīn cáa cá jaanjaan.
37Bi nín máaǹ kí nīn ŋáań saraawɔkaa nì tijimpin saraau nì ikpiti pɔ̄tam saraau nì dibɔkpil saraau nì bi yaa làá kàan̄ bisaraaŋaliibee saraau nì mpèé saraau puee dee. 38Ti-Dindaan di nìn dū marab gbanti ki tīī Mooyiisi Siinaayi jool pu, kuteeun, ŋwiin ŋun u nìn bālifì Isirayeel yab yii bí cáań-u bi-saraabee.
Currently Selected:
Lévitique 7: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
