Lévitique 18

Uninja nì unimpu kpāfitam min kòóyee

1Ti-Dindaan bí Mooyiisi yii: 2«Tùkù Isirayeel yab yii man di sá ni-Dindaan, ni-Nimbɔtiu. 3Naa máaǹ kí nīn ŋáań kii Eejipiti tiŋki kin poon ni nìn kóòyee yab nín nìn ŋáań puee, kaa tí máaǹ kí nīn ŋáań kii Kanaan tiŋki kin poon m cáǹ-ni nee yab nín ŋáań puee. Naa máaǹ kí fōō bi-bimbim. 4Nín̄ tɔ́maan m-koobiliŋ kí nīn ŋúb́ m-bɔkpaaŋi. Man di sá ni-Dindaan, ni-Nimbɔtiu.

5«Nín̄ ŋúb́maan m-bɔkpaaŋi nì m-koobiliŋ. Un yaa ŋáań min marab gbanti lēe di ŋmátí#18.5 Kpèè Neey 9.29, Eesee 18.9, 20.11-13, Luuki 10.28, Room 10.5, Gala 3.12.. Man di sá ni-Dindaan.

6«Ni-kansikin ubɔ ń taa dòon̄ nì unimpu u nì un pēē mmaalee. Man di sá ni-Dindaan.

7«Aa máaǹ kí dòon̄ nì a-na kí kɔ́ǹ a-baa icoo. Di sá yii a-na dee ní aa máaǹ kí kɔ́ǹ u mun icoo.

8«Aa máaǹ kí dòon̄ nì a-baa nimpoobi kansikin báà ubɔ#18.8 Kpèè 20.11, Diny 35.22, Ditee 23.1, 27.20, 1 Kɔra 5.1.. A yaa ŋá mimmee a kɔ́ǹ a-baa icoo dee.

9«Aa máaǹ kí dòon̄ nì a-niisal, pēē na nì baa, àá pēē na kaa pēē baa, àá pēē baa kaa pēē na, báà bi yaa màl̄-u kudicaŋun àá laaba ní bi màlīń-u#18.9 Kpèè 20.17, Ditee 27.22, 2 Sami 13.11-14, Eesee 22.11..

10«Aa máaǹ kí dòon̄ nì a-naantiiu, an dàkà yii a-jipɔɔn bisal àá a-bisal bisal. A yaa ŋá mimmee, a kɔ́ǹ a-ba icoo dee.

11«Aa máaǹ kí dòon̄ nì a-na yɔnti bisal un a-baa màl̄ee. A-baa nín màl̄-uee puee, a-niisal dee.

12«Aa máaǹ kí dòon̄ nì a-pool, kun puee u nì a-baa pēē ní.

13«Aa máaǹ kí dòon̄ nì a-na naal àá u-maan, kun puee u nì a-na pēē ní.

14«Aa máaǹ kí kɔ́ǹ a-baa naal àá u-maan icoo kí dòon̄ nì u-nimpuu, kun puee a-na dee.

15«Aa máaǹ kí dòon̄ nì a-coopu, a-jipɔɔn nimpuu, kun puee a-jipɔɔn nimpuu dee ní aa máaǹ kí kɔ́ǹ-u icoo#18.15 Kpèè 20.12, Diny 38.16, 26, Eesee 22.11..

16«Aa máaǹ kí kɔ́ǹ a-maan àá a-naal icoo kí dòon̄ nì u-nimpuu#18.16 Kpèè 20.21, Maat 14.3-12, Ditee 25.5-20, Maat 22.23-33..

17«Aa máaǹ kí dòon̄ nì unimpu nì u-bisal àá u-jipɔɔn bisal àá u-bisal bisal, kun puee an sá u-maaliŋu poon biyaamu ní ki sá ajɔkɔntuun#18.17 Kpèè 20.14, Ditee 27.23..

18«Aa máaǹ kí cáá a-nimpuu maan àá u-naal kí kūtì u-pu ŋyunti ŋun ní u dáá bí dimaŋfalinee. A yaa ŋá mimmee, a náań ipoompoon ki bíl̀ bi-kansikin dee.

19«Aa máaǹ kí dòon̄ nì unimpu ŋyunti ŋun ní u ká u-ba ki bí tijɔkɔndinee#18.19 Kpèè 20.18, Eesee 22.10..

20«Aa máaǹ kí dòon̄ nì a-juti nimpuu, di sá yii án làá kɔ́ǹ-si tijɔkɔndi#18.20 Kpèè 20.10, Disa 20.14, Ditee 5.18, 2 Sami 11.2-4, Eesee 22.11..

21«Aa máaǹ kí dū a-biyaamu kansikin kiba kí wà ŋŋmi kí ŋá saraa kí tīī diwaal Mooleeki#18.21 kpèè 20.2-5, Ditee 12.31, 2 Bib 17.17, Yeer 7.31, Ilan 106.37-38. kí kpèè man ni-Nimbɔtiu yindi fám. Man di sá ni-Dindaan.

22«Aa máaǹ kí dòon̄ nì a-ninjajuti kii bi nín dɔ̀ nì unimpu puee. An sá ntimbiil ní#18.22 Kpèè 20.13, Diny 19.5, Bibɔ 19.22, Room 1.27..

23«Aa máaǹ kí kɔ́ǹ a-ba tijɔkɔndi kí dòon̄ nì kuwaŋkuluu. Unimpu mun kaa máaǹ kí yàntī kuwaŋkuluu ń jɔ̄m̀-u. An sá ditiŋwiil ní#18.23 Kpèè 20.15-16, Disa 22.18, Ditee 27.21..

24«Ní taa yàntī atuŋkpiti nee kansikin báà diba ń kɔ́ǹ-ni tijɔkɔndi. Di sá yii atuŋkpiti gbanti di kɔ́ǹ atimbun ŋin nib m làá jà ni-nyɔkɔpu kí fōō bi-timmu kí tīī-ni nee tijɔkɔndi. 25Kitiŋ kɔkɔ kɔ́ tijɔkɔndi ní m làá dáaĺ ki-tafal binib bin kóò ki-puee kpitii pu, ní kitiŋee ń wùliŋkì ki-nib kí fá.

26«Ama nimbi Isirayeel yab àá binicambi bin kóò ni-kansikinee máaǹ kí nīn ŋúb́ m-bɔkpaaŋi nì m-koobiliŋ, kí yíí kí taa ŋá ntimbiil tuuŋŋi gbanti. 27Di sá yii ntimbiil tuuŋŋi gbanti ní binib bin péé péé ki kāl̀ kitiŋ gbantin ní nimbi dāa nín bāańee ŋá ní ki yāntì kì kɔ́ tijɔkɔndi. 28Ní taa ti kɔ́ǹ-kì tijɔkɔndi, án nín làá ŋá pu kí taa wùliŋkì-ni kí fá kii kì nín nìn wūliŋkì bin līntiǹ-nee ki fá puee. 29Ama un di yaa ŋá ntimbiil tuuŋŋi nee kansikin dibee, bí nyāntí-u Isirayeel nibul kansikin.

30«Nín̄ ŋúb́maan tibɔti tin m kpáafì-ni nee kí taa ŋá ntimbiil tuuŋŋi ŋin bi nìn ŋáań ki wāatì ní nimbi nín bāańee, kí taa yàntī an tuuŋŋee ń kɔ́ǹ-ni tijɔkɔndi. Man di sá ni-Dindaan, ni-Nimbɔtiu.»

Currently Selected:

Lévitique 18: BASSARDC

Highlight

Copy

Compare