Josué 5

1 Amɔɔr yab bin kóò Jɔɔdan buŋŋu ŋwìiń jeetilaŋki púee bɔtiibi, nì Kanaan yab bin kóò ki pìlīǹ tiŋkuee bɔtiibi nìn gbìl̄ yii ti-Dindaan yāntì Jɔɔdan buŋŋu nyim fóotì Isirayeel yab kɔkɔ ŋúń ki dūtì. Niinee bi-pɔbiliŋ bíil̀, ní Isirayeel yab puee, bi nyùn̄ ŋkpatim.

Bi gíí Isirayeel yab bininjab kɔkɔ Giilgaal

2Ŋyunti gbantee ní ti-Dindaan tùkū Joosuwa yii: «Kpítí ntaŋkpajimu kí gíí Isirayeel yab bininjab bin dáá sá binipɔmbee akpancan.» 3Ní Joosuwa kpítì ntaŋkpajimu ki gíí Isirayeel yab bininjab bin dáá sá binipɔmbee kɔkɔ akpancan. Kí yòon̄ yaadal ní bi kíǹ ki yíì niin yii Giibeeyaati Aralɔti#5.3 Giibeeyaati Aralɔti taapu di sá yii ŋkunlam gbantaŋki.. 4Kun yì-tì ní Joosuwa dāa gífí Isirayeel binipɔmbee sèé. Isirayeel nibul nín nìn nyánní Eejipiti tiŋkinee, bininjab bin kɔkɔ nìn bàn̄ kí cù kujaauee nìn kpíì nsanni, kuteeun. 5Bin nìn yíkìń Eejipiti tiŋkinee kɔkɔ nìn pée gíí ní, ama ní mbininjabiyaamu mun bi dāa màl̄ nsanni kuteeunee, múǹ kaa gíí. 6Di sá yii Isirayeel yab nìn gbíntì kuteeun ki bí ki yìiǹ míǹ ki tin sāā abin imuŋku ili, ní bi-kansikin bin nìn nyáń Eejipiti tiŋkin ki nìn bàn̄ kí cù kujaauee kɔkɔ dāa kpíì. Kun yì-tì bi nìn kpíì mimmee di sá yii baa nìn pílifì ti-Dindaan nyɔkɔ, ní ti-Dindaan nìn pūtì yii waa làá yàntī bí ká kitiŋ kin poon nnaabiim nì tisiil còol̀#5.6 kin poon nnaabiim nì tisiil còol̀: kpèè Disa 3.8 nì tin bi ŋmàn̄ kugbɔŋu faaku taapuee. u nìn pōoǹ bi-naanjab yii u làá dūú tīī-tee. 7Bi-jipɔmbi di yíkì ki fōō bi-yil. Bi-jipɔmbi gbanti ní Joosuwa nìn gíí akpancan, kun puee baa nìn gíiń-bi nsanni. 8Bi gíí-bi míǹ ki dóòyee ní samaa kɔkɔ gbíntì dinaapaal pu niin ki kāl̀ áli ibuun dāa kpíì. 9Ní ti-Dindaan bí Joosuwa yii: «Díǹ wiiŋŋu nee, m cúú Eejipiti tiŋki cooi in nìn bí ni-puee ki lēē.» An di yì-tì ní bi pú mpaan gbanti diyindi yii Giilgaal#5.9 Giilgaal : kpèè 4.19 nì tin bi ŋmàn̄ kugbɔŋu faaku taapuee. Eebru sooŋyi poonee, bi ŋūǹ kí nàatī diyindi gbanti yii lēē ni-pu ki fá., ní bi dáá gbíntìi yíì-ŋu míǹ ki dāa sāā díǹ.

Dilákatil jiŋaaliu upeepeekaa un bi jíń Kanaaŋyee

10Isirayeel yab nìn kāl̀ Giilgaal niin, Jeeriikoo tantakalin ní ki jíń Dilákatil jiŋaaliu uŋmal poon ŋwiin ŋubɔ kpá saalku dal kujoou. 11Kutaa wúntèe ní bi kíĺ kitiŋ gbanti jinti dijil. Bi nìn púĺ kpɔnɔb bin baa ŋá ŋkpɔnɔnyɔkɔee nì bilee fiŋyi ki ŋmɔ́. 12Ŋwiin ŋun bi jíń an jintee ní maana gbēeǹ kaa ti nyēeń kutaa pu ki lítiń. Dibindi gbanti ní Isirayeel yab kíĺ ki bíi jīǹ tijin tin lòoǹ Kanaan tiŋki puee#5.12 maana: kpèè Disa 16.13-35. - Kanaan : ti-Dindaan nín nìn pōoǹ kitiŋ kin kí tīī Isirayeel yabee yindi dee..

Joosuwa nì ti-Dindaan janjakitil kpiliu

13Dalba Joosuwa nìn bí Jeeriikoo tiŋki caŋin. U dāa pée yáatèe ní ki ká uninja ubɔ yú u-nyɔkɔpu, ki ŋúb́ njicál u-ŋaan. Joosuwa cōom̀ ki cūtì u-cee ní ki bālifì-u yii: «Sii sá ti-yɔu ubɔ naaa, a sá ti-nannanliu ubɔ ní?» 14Ní unaaciinee kíí Joosuwa yii: «Aayee, maa sá bi-kansikin báà ubɔ! Man di sá ti-Dindaan janjakitil kpiliu. Kɔŋkɔnnee ní m bāań!» Niinee ní Joosuwa tātìi dōoǹ dicincibil ki jáam̀-u ní ki bí-u yii: «M-dindaan, ba ní a là yii man a-tɔntɔnliu ń ŋá ní?» 15Ní ti-Dindaan janjakitil kpiliuee bí Joosuwa yii: «Cúú a-naatakaŋ kí tákatí, kun puee laakin a yú nee sá circir paaŋŋu pu ní#5.15 Cúú a-naatakaŋ kí tákatí: kpèè Disa 3.5..» Ní Joosuwa ŋá min ní u tùkū-u yii ú ŋée.

Currently Selected:

Josué 5: BASSARDC

Highlight

Copy

Compare