Josué 24
24
Isirayeel yab lēē kí nīn nóó ti-Dindaan
1Joosuwa kpáfì Isirayeel naakɔti kɔkɔ Siikeem tiŋkin, ní ki yíiń Isirayeel yab tindaŋkpilib nì bi-yidambi nì bi-bɔsoonliibi nì bi-gbaŋŋmaliibi ní bi-kɔkɔ dɔ́miń ki kpáfì ti-Dindaan nimbiin. 2Niinee ní Joosuwa bí Isirayeel yab kɔkɔ yii: «Ti-Dindaan Isirayeel Nimbɔtiu nín lī puee sèé: <Cannaakuee ni-naanjab Abraam nì Naakɔɔr baa Teera nìn kóòń Eefiraati mɔɔgbandi lapu jaaŋŋu pú ní, ní ki nìn tòotī awaa. 3Kitiŋ kin bí Eefiraati mɔɔgbandi lapu jaaŋŋu gbanti púee ní m nìn yōoǹní ni-naanja Abraam, ki nìn cáá-u ki yìin̄ ki māntì Kanaan#24.3 Kpèè Diny 12.1-7. tiŋki kɔkɔ, ki nìn yāntì u-maaliŋu būtì tiŋan, ní ki nìn tīī-u Isaaki. 4M nìn tīī Isaaki mun Jaakɔb nì Eesayuu. M nìn dū Seeyiir jool ki tīī Eesayuu ú nīn yì, ama ní Jaakɔb nì u-jipɔmbi nìn sīntì Eejipiti tiŋkin. 5Boonee, m nìn lēē Mooyiisi nì Aarɔn ki tú, ki nìn yāntì ditafadaaldi bàn̄ Eejipiti yab tiŋan bi-wunti píĺ nì bi-ba, ní m dāa nín nyántìń-ni niin#24.5 Kpèè Disa 7-12.. 6M nín nìn nyántì ni-naanjab Eejipiti tiŋkin bi bāań Tikati mɔɔl caŋinee, Eejipiti yab nìn jìn̄ bi-boon ki tin bāań niin, bi nì bi-janjatɔrɔkub nì bi-tanjakaliibi. 7Ni-naanjab nìn kúuǹ ki yíiń man ni-Dindaan ḿ jòoń-bi, ní m nìn dū dibɔmbɔndi#24.7 dibɔmbɔndi: kpèè Disa 14.19. ki pītì ni nì Eejipiti yab kansikin ní ki nìn yāntì dimɔɔl nyim fātìi gítì ki bīiǹ bi-pu. Nimbi ni-ba nìn ká m nín nìn ŋá Eejipiti yab puee. Míǹ boonee, ni nìn kāl̀ kuteeun ki yúntì tikpil. 8M nìn cáá-ni ki cūnnì Amɔɔr yab bin nìn kóòń Jɔɔdan buŋgbandi lapu puee tiŋki pu. Binib gbanti nìn jáń nì ni. M nìn dū-bi ki ŋá ni-ŋaan ni ŋúń ki jáń ki fōō bi-tiŋki, ní m kúntì bi-kɔkɔ ni-nimbiin. 9Siipɔɔr jipɔɔn Balaaki, Moowaab yab bɔtiu mun nìn yíkì kí jáǹ-ni ní ki nìn tú bi yíiń Beewɔɔr jipɔɔn Balaam ú dāan̄ kí tɔ̄-ni mbusu. 10Ama maa nìn kíí ki pílifiǹ Balaam. See u nín nìn líbitì ki bīiǹ ni-puee, ní m nìn fīī-ni ki nyántì Balaaki ŋaan#24.10 Kpèè Dikà 22 kí cáá sāā 24.. 11Ni nìn dūtì Jɔɔdan buŋŋu ki bāań Jeeriikoo tiŋkin ní Jeeriikoo yab nìn jáń nì ni. Amɔɔr yab nì Peeriisi yab nì Kanaan yab nì Eeti yab nì Giirgaasi yab nì Eefi yab nì Jeebusi yab mun nìn jáń nì ni. Ama m nìn dū bi-kɔkɔ ki ŋá ni-ŋaan#24.11 Kpèè 3.4-17, 6.1-21.. 12M nìn dū abaakati ní ki līntì ni-nyɔkɔpu ní ŋi sáǹ ki jìn̄ Amɔɔr yab bɔtiibi bilee. An kaa nìn sá ni-tàataajimmu nì ni-tɔfii ní ni nìn dūu jìn̄-bi. 13M nìn tīī-ni tikpaatan faalaa, ní naa nìn gīī digìńdi báà diba ti-pu. M nìn tīī-ni ntimu ni kāl̀, ama ní kaa máń-mu. M nìn tīī-ni fiinyi nì ɔliifi sufii in naa nìn cóoǹee, ama ní ki bí ki ŋmóò i-biliŋ.>»
14Ní Joosuwa kútì yii: «An puee, kɔŋkɔnnee ní fàŋkìmaan ti-Dindaan, kí nīn jáaḿ-u nì ni-pɔbil kɔkɔ nì ibaamɔn poon. Ní dū awaa ŋin ni-naanjab nìn tòotī Eefiraati mɔɔgbandi lapu jaaŋŋu pú nì Eejipiti tiŋkinee kí fá, kí nīn kíǹ ki jáaḿ ti-Dindaan baba. 15Ama an yaa kaa fáatì-ni yii ní nīn jáaḿ ti-Dindaanee, ní lēē díǹ nee un ni làá nīn jáaḿee. Ni yaa là awaa ŋin ni-naanjab nìn tòotī ŋyunti ŋun bi nìn bíń Eefiraati mɔɔgbandi lapu jaaŋŋu púeeyaaa, ni yaa tí là Amɔɔr yab bin tiŋki ni kóò nee waaŋaaa, ní lēē. An yaa kíǹ kii man nì m-dicaŋkuee, timbi làá nīn jáaḿ ti-Dindaan ní!»
16Ní samaa kíí Joosuwa yii: «Unimbɔti ń cáá cùnnì ndan! Timbi kpá kí fàtī ti-boon kí tīī ti-Dindaan kí cùú nīn tòotī awaa aba fám! 17Di sá yii ti-Dindaan ti-Nimbɔtiu di nìn nyántìń ti nì ti-naanjab kuyuŋun Eejipiti tiŋkin, ní ki nìn ŋáaǹ atuŋkpaan ti-nimbiin ti kántì. Úǹ di bīiǹ ti-boon nsan ŋun ti nìn cōom̀ee poon nì anibul ŋin kɔkɔ pu ti nìn jítì jítèe. 18Ti-Dindaan di nìn jìn̄ Amɔɔr yab nì anibul ŋin nìn kóò kitiŋ nee puee kɔkɔ ki wāatì-ti. An puee ti mun lēē yii ti-Dindaan ní ti làá nīn jáaḿ, kun puee úǹ di sá ti-Nimbɔtiu.»
19Ní Joosuwa bí samaa yii: «Naa làá ŋmā kí nīn jáaḿ ti-Dindaan, kun puee u sá Unimbɔti un bí circiree ní, ki sá Unimbɔti un cáá ipoompoonee#24.19 Kpèè Disa 20.5.. Waa làá dū ni-yìntitam nì ni-kpitii kí pɔ̄-ni. 20Ni yaa fātì ni-boon ki tīī ti-Dindaan ki kíǹ ki bí ki tòotī awaayee, u làá bíkití ni-pu ní kí ŋá-ni tin kaa ŋān̄ee. Tiŋan tin u ŋá-nee boonee, u làá nàan̄-ni ní pílpil!» 21Ní samaa kíí Joosuwa yii: «Kpataaa, ti-Dindaan ní ti làá nīn jáaḿ!» 22Niinee ní Joosuwa bí-bi yii: «Nimbi ni-ba sá ni-seeradambi yii ni lēē kí nīn jáaḿ ti-Dindaan!» Ní bi kíí-u yii: «Iiin, ti sá ti-seeradambi.» 23Ní Joosuwa bí-bi yii: «An yaa sée, kɔŋkɔnnee ní dū awaa ŋin kɔkɔ bí ni-ceeyee kí fá, ní kí dū ni-ba kí nákáǹ ti-Dindaan Isirayeel Nimbɔtiu nì ni-pɔbil kɔkɔ!» 24Ní samaa kíí Joosuwa yii: «Ti-Dindaan ti-Nimbɔtiu ní timbi làá nīn pée jáaḿ, ní kí nīn tɔ́-u.»
25Ŋwiin gbanti ní Joosuwa yāntì u nì samaa pūtì ki pōoǹ, ní u síiǹ Siikeem tiŋkin niin abɔkpaa nì akoobil ŋin ní bi máaǹ kí nīn nóóyee. 26Ní Joosuwa dū an bɔtee kɔkɔ ki ŋmàn̄ ki ŋá Unimbɔti Marau gbɔŋku poon. U dóòyee ní ki dū ditaŋkpakpaandi diba ki cóoǹ niin, busubu bun bi yíì yii teereebinti bu yú mpaan ŋun pu bi jáaḿ ti-Dindaanee taapu. 27U cóoǹ ki dóòyee ní ki bí samaa kɔkɔ yii: «Ní kpèèmaan! Ditaŋkpal nee di làá dāá nīn sá-ti seeradaan, kun puee di gbìl̄ anyɔɔbun ŋin kɔkɔ ní ti-Dindaan sòon̄ nì tee. Dì làá nīn sá ni-seeradaaŋwu án nín làá ŋá pu ní taa fàtī ni-boon ki tīī ni-Nimbɔtiuee.» 28Niinee ní Joosuwa pú samaa nsan yii báà ŋma ń nīn kùǹ, ní báà ŋma nín gítí u-tiŋki pu.
Joosuwa kúm nì u-síbitam
29Tibɔti nee kɔkɔ jítì boonee ní Nuuni jipɔɔn Joosuwa, ti-Dindaan tɔntɔnliu kpíì. U nìn cáá abin dilaataal nì saalaa ní. 30Bi nìn síb́-u kitiŋ kin bi nìn tīī-u u kíǹ ki yèe poon ní, an dàkà yii Tiiminati-Seera tiŋki kin bí Eefiraayiim jooŋŋi pu, ki gítí Gaasi jool ŋgan púee. 31Isirayeel yab nìn jáaḿ ti-Dindaan ŋyunti ŋun ní Joosuwa nìn dáá bí dimaŋfalinee nì u-kúm boon bikpilib bin nìn dáá gbíntìi bí dimaŋfalin, ki nìn ká atuŋkpaan ŋin kɔkɔ ti-Dindaan nìn ŋáaǹ ki tīī Isirayeel yabee.
32Isirayeel yab nìn cáá Jooseefi kpabiŋ ŋin bi nìn kpáaǹní Eejipiti tiŋkinee ki síb́ Siikeem tiŋkin, ntampaan ŋun Jaakɔb nìn dá Siikeem baa Amɔɔr naantiibi cee ki pàn̄-u animbil jitɔmbi dilaataalee pu#24.32 Jooseefi kpabiŋ bɔtee: kpèè Diny 50.25. - animbil jitɔmbi dilaataal bɔtee: kpèè Diny 33.19.. Ntampaan gbanti mun nìn kútì Jooseefi naantiibi tinjandi poon.
33Aarɔn jipɔɔn Eeleeyasaar mun dāa kpíì, ní bi cáá-u ki síb́ u-jipɔɔn Piinaasi gbantaŋki kin bi nìn tīī-u Eefiraayiim jooŋŋinee pu.
Currently Selected:
Josué 24: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
