Josué 21

Leefii naakookun yab timmu

(Kpèè 1 Kroo 6.39-66)

1Boonee ní Leefii naakookun yab dicaŋŋi kpilib cūtì ki ká usaraaŋakpil Eeleeyasaar nì Nuuni jipɔɔn Joosuwa nì Isirayeel naakɔti tin kíǹee yab dicaŋŋi kpilib 2Siiloo, Kanaan tiŋkin. Bi nìn bí-bi yii: «Ti-Dindaan nìn dī Mooyiisi pu ki tùkū-ni yii ní tīī-ti ntimu tí nīn kóò, ní kí tīī-ti ntimu gbanti kpaanceetii tí nīn kpàá ti-waŋkuti.» 3Di sá ní Isirayeel yab nìn lēē bi-timmu mun bi tīī-bi bí yàkatēe mubɔ, ki kpáaǹ mu-kpaanceetii kɔkɔ ki dūu tīī Leefii naakookun yab, kii ti-Dindaan nín nìn tùkū-bi yii bí ŋá puee.

4Bi nín nìn tɔ́ kasee, Leefii naakookun yab bin sá Keeyaati maaliŋunee di nìn péé ki fōō bi-timmu. Keeyaati yab gbanti kansikinee, bin nìn sá usaraaŋakpil Aarɔn maaliŋunee ní bi nìn tɔ́ kasi ki lēē ntimu saalaa nì muta ki tīī. Ntimu gbantee, bi nìn lēē-mu Juuda nì Simeeyɔn nì Beenjameen naakɔti yab timmu poon ní. 5Bi nìn tɔ́ kasi ní ki lēē ntimu saalaa ki tīī Keeyaati naantiibi bin kíǹee. Bi nìn lēē ntimu gbanti Eefiraayiim nì Daani naakɔti nì Manasee naakooku dijandi diba yab timmu poon ní. 6Bi nìn tí tɔ́ kasi ki lēē ntimu saalaa nì muta ki tīī Geersɔn naantiibi, Isakaar nì Aseer nì Neefitalii naakɔti nì Manasee naakookun yab dijandi din bí Baasan tiŋkinee yab timmu poon ní. 7Bi nìn tɔ́ kasi ki lēē ntimu saalaa nì muli ki tīī Meerarii naantiibi. Bi nìn lēē ntimu gbanti Rubeen nì Gaadi nì Sabulɔn naakɔtin yab timmu poon ní. 8Isirayeel yab nìn tɔ́ kasi ní ki lēē ntimu gbanti nì mu-kpaanceetii kɔkɔ ki tīī Leefii yab, kii ti-Dindaan nín nìn dī Mooyiisi pu ki tīī-bi mara puee.

9Juuda nì Simeeyɔn naakɔtin yab timmu mun bi nìn lēē ki tīī Leefii naakookun yabee sɔ̀. 10Aarɔn naantiibi Leefii naakookun yab bin sá Keeyaati maaliŋunee di làá nīn yì ntimu gbanti, di sá yii bíǹ ní bi nìn péé ki tɔ́ kasi ki lēē ntimu ki tīī. 11Bi nìn tīī-bi Kiiriyati-Ariba tiŋki kin bi gíti yíì yii Eebrɔn tiŋki kì bí Juuda jool puee, nì ki-kpaanceetii. Arba di nìn sá Anaaki baa. 12Ama ní ki dū kitiŋ gbanti sati nì ki-timbilimmu ki tīī Yeefunee jipɔɔn Kaleeb ú nīn kíǹ ki yì. 13Usaraaŋakpil Aarɔn naantiibi ní bi nìn tīī Eebrɔn tiŋki kin sá ntimu mun unil yaa kaa nyí ki kūū u-juti ú sāǹ kí kɔ́ee kansikin kibee, nì ki-kpaanceetii, nì Liibina tiŋki nì ki-kpaanceetii, 14nì Yatiir tiŋki nì ki-kpaanceetii, nì Eesiteemoowa tiŋki nì ki-kpaanceetii, 15nì Oolɔn tiŋki nì ki-kpaanceetii, nì Deebiir tiŋki nì ki-kpaanceetii, 16nì Aayin tiŋki nì ki-kpaanceetii, nì Yuuta tiŋki nì ki-kpaanceetii, nì Beeti-Seemeesi tiŋki nì ki-kpaanceetii. Ntimu mun bi nìn lēē Juuda nì Simeeyɔn naakɔti liitil yab timmu poonee dee. Mu nìn nyáń ntimu muwa ní. 17Beenjameen naakookun yab timmu mun bi nìn lēēyee di sá Gabawɔn tiŋki nì ki-kpaanceetii, nì Geeba tiŋki nì ki-kpaanceetii, 18nì Anatooti tiŋki nì ki-kpaanceetii, nì Almɔn tiŋki nì ki-kpaanceetii. Múǹ nìn nyáń ntimu munaa ní. 19Ntimu mun bi nìn tīī Aarɔn naantiibi bisaraaŋaliibee nìn kpáfì ntimu saalaa nì muta ní, mu nì mu-kpaanceetii.

20Leefii naakookun yab poon Keeyaati naantiibi bin kíǹee, bi nìn gíti tɔ́ kasi ní ki lēē Eefiraayiim naakookun yab timmu mubɔ ki tīī bíǹ. 21Bi nìn tīī-bi Siikeem tiŋki kin nìn bí Eefiraayiim jool pu, ki sá ntimu mun unil yaa kaa nyí ki kūū u-juti ú sāǹ kí kɔ́ee kansikin kibee nì ki-kpaanceetii, nì Geeseer tiŋki nì ki-kpaanceetii, 22nì Kiifisayiim tiŋki nì ki-kpaanceetii. Mu nìn nyáń ntimu munaa ní. 23Daani naakookun yab timmu poonee, bi nìn tīī-bi Eelteekee tiŋki nì ki-kpaanceetii, nì Giibeetɔn tiŋki nì ki-kpaanceetii, 24nì Ayalɔn tiŋki nì ki-kpaanceetii, nì Gaati-Riimɔn tiŋki nì ki-kpaanceetii. Mu nìn nyáń ntimu munaa ní. 25Manasee naakookun yab dijandi diba timmu poonee, bi nìn tīī-bi Taanaki tiŋki nì ki-kpaanceetii, nì Yibileeyam tiŋki nì ki-kpaanceetii. Mu nìn nyáń ntimu muli ní. 26Ntimu mun bi nìn lēē ki tīī Keeyaati naantiibi bin kíǹee nìn kpáfì ntimu saalaa ní, ki kpáaǹ mu-kpaanceetii. 27Leefii naakookun yab poon bin sá Geersɔn naantiibee, Manasee naakooku dijandi din kíǹee timmu mubɔ ní bi nìn tīī bíǹ. Ntimu gbanti di sá Goolan tiŋki kin nìn bí Baasan tiŋkin ki sá ntimu mun unil yaa kaa nyí ki kūū u-juti ú sāǹ kí kɔ́ee kansikin kibee nì ki-kpaanceetii, nì Beesteera tiŋki nì ki-kpaanceetii. Mu nìn nyáń ntimu muli ní. 28Isakaar naakookun yab timmu poonee, bi nìn tīī-bi Kiisiyɔn tiŋki nì ki-kpaanceetii, nì Deebeerati tiŋki nì ki-kpaanceetii, 29nì Yaarmuti tiŋki nì ki-kpaanceetii, nì Eeni-Ganiim tiŋki nì ki-kpaanceetii. Mu nìn nyáń ntimu munaa ní. 30Aseer naakookun yab timmu poonee, bi nìn tīī-bi Miiseeyaal tiŋki nì ki-kpaanceetii, nì Abidɔn tiŋki nì ki-kpaanceetii, 31nì Eelkaati tiŋki nì ki-kpaanceetii, nì Reewoob tiŋki nì ki-kpaanceetii. Mu nìn nyáń ntimu munaa ní. 32Neefitalii naakookun yab timmu poonee, bi nìn tīī-bi Keedeesi tiŋki kin nìn bí Galiilee tiŋkin ki sá ntimu mun unil yaa kaa nyí ki kūū u-juti ú sāǹ kí kɔ́ee kansikin kibee, nì ki-kpaanceetii, nì Amɔti-Dɔɔr tiŋki nì ki-kpaanceetii, nì Kaartan tiŋki nì ki-kpaanceetii. Mu nìn nyáń ntimu muta ní. 33Ntimu mun bi nìn tīī Geersɔn naantiibee dee. Mu nìn kpáfì ntimu saalaa nì muta ní, mu nì mu-kpaanceetii.

34Leefii naakookun yab poon bin nìn sá Meerarii naantiibee, Sabulɔn naakookun yab timmu mubɔ ní bi nìn tīī bíǹ. Ntimu gbanti di sá Yɔkineeyam tiŋki nì ki-kpaanceetii, nì Kaarta tiŋki nì ki-kpaanceetii, 35nì Diimina tiŋki nì ki-kpaanceetii, nì Naalal tiŋki nì ki-kpaanceetii. Mu nìn nyáń ntimu munaa ní. 36Rubeen naakookun yab timmu poonee, bi nìn tīī-bi Beeseer tiŋki nì ki-kpaanceetii, nì Yaakisa tiŋki nì ki-kpaanceetii, 37nì Keedeemooti tiŋki nì ki-kpaanceetii, nì Meefaati tiŋki nì ki-kpaanceetii. Mu nìn nyáń ntimu munaa ní. 38Gaadi naakookun yab timmu poonee, bi nìn tīī-bi Ramooti tiŋki kin nìn bí Galaadi tiŋkin ki sá ntimu mun unil yaa kaa nyí ki kūū u-juti ú sāǹ kí kɔ́ee kansikin kibee nì ki-kpaanceetii, nì Maanayiim tiŋki nì ki-kpaanceetii, 39nì Eesbɔn tiŋki nì ki-kpaanceetii, nì Yaseer tiŋki nì ki-kpaanceetii. Mu nìn nyáń ntimu munaa ní. 40Leefii naakookun yab poon bin nìn sá Meerarii naantiibee nín nìn fōō ntimu mun kɔkɔee nìn kpáfì ntimu saalaa nì muli ní.

41Leefii naakookun yab timmu mun nìn bí Isirayeel yab bin kíǹee timmu poonee kɔkɔ nìn kpáfì ntimu imuŋku ili nì munii ní, mu nì ki-kpaanceetii. 42Bi nìn tīī ntimu gbanti kɔkɔ nì mu-kpaanceetii ní.

43Ti-Dindaan nìn lafun tīī Isirayeel yab kitiŋ kin u nìn pūtì ki pōoǹ kí tīī bi-naanjabee kɔkɔ. Ní Isirayeel yab fōō kitiŋ gbanti ki kíǹ ki yì ní ki kāl̀ ki-poon. 44Ti-Dindaan nìn yāntì bi ká diŋuŋfil ajan kɔkɔ pu, kii u nín nìn pōoǹ bi-naanjab puee. Bi-nannanliibi báà ubɔ kaa nìn ŋúń ki jáń ki pɔ́ɔkiǹ-bi, kun puee ti-Dindaan nìn dū bi-nannanliibi kɔkɔ ki ŋá bi-ŋaan. 45Ti-Dindaan nìn ŋá Isirayeel yab tiŋan tin kɔkɔ u nìn pōoǹ yii u làá ŋá kí tīī-bee, báà tiba kaa nìn gbíntì waa ŋá.

Currently Selected:

Josué 21: BASSARDC

Highlight

Copy

Compare