Josué 18
18
Joosuwa yākatì ntimu ki tīī tinaakɔti tin kíǹee
1Isirayeel yab nìn jáń ki fōō kitiŋ kɔkɔ. Niinee ní bi kóoǹ ki kpáfì Siiloo tiŋkin, ní ki dū dikpafindi tantiu ki cóoǹ niin. 2Ama Isirayeel yab kansikinee, an nìn kíǹ tinaakɔti tiluli yab bin baa láá yākatì kitiŋ ki lēē bíǹ tinjaŋŋi ki tīī-bee. 3Niinee ní Joosuwa bí Isirayeel yab yii: «Ni làá kàl̄ kí cīití kí tin sāā ŋyunti ŋulɔŋu ní kí cùú fōō kitiŋ kin ti-Dindaan, ni-naanjab Nimbɔtiu dūu tīī-nee ní? 4Ní lēēmaan kunaakoou kamaa poon binib bita bita. M làá dū-bi kí tɔ̄ bí cùú yìiǹ kitiŋ kɔkɔ pu, kí ŋmà bi-naakɔti tinjaŋŋi nín sá puee, ní kí fàtīí gítiń kí tùkù-mi. 5Bi làá cúú-kì kí yàkatī miluli pu ní. Juuda yab làá gbíntí bi-tinjandi pu ŋgiil pú, ní Jooseefi yab ń gbíntí bi-yal pu ŋgan pú. 6Ní ŋmàmaan atinjan alulee nín bí puee kí cáań-mi. Man làá tɔ̄ kasi ti-Dindaan ti-Nimbɔtiu nimbiin, kí lēē kunaakoou kamaa tinjandi kí tīī-ku. 7Ama Leefii yab bíǹ kaa cáá ditinjandi ki làá fōō nimbi kansikin. Bíǹ fakal di sá bí nīn sá ti-Dindaan saraaŋaliibi. An yaa kíǹ Gaadi yab nì Rubeen yab nì Manasee naakookun yab dijandi dibee, bíǹ gíti dáá fōō bi-fakal Jɔɔdan buŋŋu lapu jaaŋŋu, ŋwìiń nyalaŋki pú. Ti-Dindaan tɔntɔnliu Mooyiisi di nìn tīī bíǹ bi-fakal gbanti niin.»
8Ní binib bin bi lēēyee lafun yíkì ki nín cá. Kí wàatī bí búntí kí cùú ŋmà kitiŋ nín bí puee ní Joosuwa bí-bi yii: «Nín̄ cámaan kí cùú yìiǹ kitiŋ kɔkɔ pu. Ní kpèè kì nín bí puee tiŋan kí fàtīí gítiń kí tùkù-mi. M làá tɔ̄ kasi ti-Dindaan nimbiin Siiloo tiŋkin doo, kí yàkatī-kì kí tīī kunaakoou kamaa ku-tinjandi.» 9Ní binibee nín cá ki cūtìi yìin̄ kitiŋee kɔkɔ pu. Bi nìn ŋmàn̄ atinjan alulee nín bí puee nì ŋi-timmu. Míǹ boonee ní bi fātìi nín gítiń Joosuwa cee Siiloo naapaal pu. 10Joosuwa nìn tɔ́ kasi Siiloo naapaalin niin ti-Dindaan nimbiin, ní ki yākatì kitiŋ ki tīī Isirayeel yab. U nìn tīī kunaakoou kamaa ku-tinjandi.
Beenjameen naakookun yab tinjandi
11Bi nín nìn tɔ́ kasee, an nìn péé ki lēē Beenjameen naakookun yab tinjandi ní ki tīī-bi. Bi-tinjandi gbanti nìn sáká Juuda naakookun yab nì Jooseefi naakookun yab tinjaŋŋi kansikin ní. 12Ŋgan púee, bi-kpaanyɔkɔ nìn kíĺ Jɔɔdan buŋŋu ní, ki dūu dī Jeeriikoo tiŋki ŋgan pú, ki kpākaǹ dijool ŋwìiń jeetilaŋki pú, ki tin cáa gbēeǹ Beeti-Aween teeku. 13Kikpaanyɔkɔ nìn yíkì niinee ní ki dūu kpākaǹ Luusi tiŋki kin bi gíti yíì yii Beeteel tiŋkee ŋgiil pú, ní ki nín sìntī Atarooti-Adaar tiŋki watil pú ki bàn̄ dijool din bí Beeti-Oorɔn tiŋkinee ŋgiil pú. 14Niinee ní kikpaanyɔkɔ nìn dūu pɔ́ĺ ki māntì ŋwìiń jeetilaŋki pú, dijool din bí Beeti-Oorɔn tiŋki nyɔkɔpuee ŋgiil pú ní ki cáa gbēeǹ Kiiriyati-Baal àá Kiiriyati-Yeeyariim tiŋki kin sá Juuda yab tiŋkee. Ŋwìiń jeetilaŋki púee, kikpaanyɔkɔ dee.
15Ŋgiil púee, kikpaanyɔkɔ nìn kíĺ doooo Kiiriyati-Yeeyariim nín kúntí puee ní, ki nìkī Ŋyaam mɔɔl watil pú ki tin cáa gbēeǹ Neefitoowa nyimbuliŋu. 16Kikpaanyɔkɔ tí yōoǹ niinee ní ki nín sìntī dijool kúntilaŋki laakin bíitiǹ Been-Inɔɔm tantakalee, Reefa yab tantakal poon ki cá ŋgiil pú. Ki nìn nóó Inoom tantakal gbantee ki dūu dī Jeebusi yab tiŋki ŋgiil pú, ki tin cáa gbēeǹ Eeni-Roogeel tiŋki. 17Kikpaanyɔkɔ nìn yíkì niinee ní ki pɔ́ĺ ŋgan pú ki nín cá Eeni-Seemeesi tiŋki pú, ki nìkī Geeliilɔti tiŋki kin bí Adumiim gbantaŋki nyɔkɔpuee ní ki nín sìntī laakin bi yíì yii Rubeen Jipɔɔn Boowan taŋkpalee watil pú. 18Ki nìn yōoǹ niinee ní ki kpākaǹ kigbantaŋ kin bí Beeti-Arabaa tiŋki nyɔkɔpuee ŋgan pú, ní ki nín nìkì Arabaa tantakalin. 19Niinee ní ki nìn dūu dī Beeti-Oogila tiŋki ŋgan pú ki cáa gbēeǹ Ŋyaam mɔɔl nín kífí pu ŋgan púee, an dàkà yii Jɔɔdan buŋŋu kúntilaŋki ŋgiil pú. Ŋgan pú kpaanyɔkɔ nín nìn sá puee dee. 20Jɔɔdan buŋŋu di nìn sá kikpaanyɔkɔ ŋwìiń nyalaŋki jaaŋŋu pú.
Beenjameen yab tinjandi din bi yākatì ki tīī-bee nì di-kpaanyɔkɔ nín nìn sá puee dee, ki nóó nì bi nín pēē pēē mmaal puee.
21Beenjameen naakookun yab gbanti timmu mun bi nìn fōō ki nóó nì bi nín nìn pēē pēē mmaal puee di nìn sá Jeeriikoo nì Beeti-Oogila nì Eemeeki-Keesiisi, 22nì Beeti-Arabaa nì Seemarayiim nì Beeteel, 23nì Awiim nì Paara nì Oofiraa, 24nì Keefaar-Amɔna nì Oofinii nì Geeba. Mu nìn kpáfì ntimu saalaa nì muli ní, mu nì mu-timbilimmu. 25Bi-timmu di nìn gíti sá Gabawɔn nì Raama nì Beerooti, 26nì Miisipee nì Keefiira nì Moosa, 27nì Reekeem nì Yiirpeel nì Tareeyala, 28nì Seera nì Eeleefi nì Jeebusi àá Jeerusaleem tiŋki nì Giibeeyaati nì Kiiriyati. Mu mun nìn kpáfì ntimu kiba kpá saalku ní, mun nì mu-timbilimmu.
Beenjameen yab tinjandi din bi nìn tīī-bi bi yākatì ki nóó nì bi nín pēē pēē mmaal puee dee.
Currently Selected:
Josué 18: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
