Juges 8
8
Eefiraayiim naakookun yab gíí Geedeeyɔn pu diŋuul
1Niinee ní Eefiraayiim yab bālifì Geedeeyɔn yii: «Ba bɔti ní a ŋá-ti mimmee? A nín cá kí jáǹ Madiyan yabee, ba ŋá ní aa yíiń-ti?» Bi nìn nyáń u-pu an kaa kítì. 2Ní Geedeeyɔn kíí-bi yii: «Tin man ŋée kɔkɔ téé tin nimbi ŋá neeee? Nimbi Eefiraayiim yab nín ŋá tin nee, báà an yaa kaa pée náaǹ gba, an kaa jítiǹ man nì m-nabiyaamu Abiyeeseer yab nín ŋá tin kɔkɔee kpataaa puɔɔɔ? 3Nimbi ŋaan ní Unimbɔti dū Madiyan yab kpilib Ooreeb nì Seeyeeb ki ŋá. Ba ní man ŋúń ki ŋá kí dūú ŋmàntīǹ tin nimbi ŋée?» Geedeeyɔn nín sòon̄ an nyɔɔbundee ní bi-ŋuul sɔ̄ŋkì u-pu.
Geedeeyɔn bí Jɔɔdan buŋŋu ŋwìiń nyalaŋki pú
4Geedeeyɔn nì u-yab binib alaataa ata bin nìn bí u-ceeyee nìn bàn̄ ki dūtì Jɔɔdan buŋŋu. Bi nìn baasii gīī ní an kaa cáá bí lì, ama ní ki nìn pée gbíntìi nìkì ki cá. 5Bi bàn̄ Sukooti tiŋkinee ní Geedeeyɔn bí niin yab yii: «M gbāam̀-ni, ní tīīmaan binib bin nóó-mi nee tijin bí jī, kun puee bi gīī tikpil. M bíi jì Madiyan yab bɔtiibi Seeba nì Salmuuna boon ní.» 6Ama ní Sukooti kpilib kíí-u yii: «Seeba nì Salmuuna gíti dáá kɔ́ a-ŋaan ní timbi ń tīī a-janjaliibi tijin bí jāaa?» 7Ní Geedeeyɔn bí-bi yii: «Too, an ŋān̄. Ní nīn nyí yii ti-Dindaan yaa dū Seeba nì Salmuuna ki ŋá m-ŋaanee, m làá dāá gítiń kí dū ikuŋkuŋfi in nyēē kuteeunee nì abɔjanaakun kí gbá-ni.» 8U yíkì ki nín jɔ́ḿ Peenuyeel tiŋkin ki bàn̄ ki sòon̄ niin yab tibɔbaantiilee ní Peenuyeel yab mun kíí-u kii Sukooti yab nín kíí-u puee. 9Ní u bí Peenuyeel yab mun yii: «M yaa fātìi gítìń nì laafiya, m làá gbá kí wīī ni-difɔkɔku kun bí nee!»
10Ŋyunti gbantee Seeba nì Salmuuna nìn bí Karkɔɔr tiŋkin bi nì bi-janjakitil, binib kii kutukub saalku nyɔkɔm. Ŋwìiń nyalaŋki pú janjaliibi bin nìn pée kíǹee kɔkɔ dee. Di sá yii bi nìn kūū binib kutukub dilaataal nì mmuŋku bin nìn ŋūǹ ki jáà kujaau nì kitàataajiki tiŋanee. 11Geedeeyɔn nìn nóó nsan ŋun ní bin kóò tantibinee nìn nōotée, an dàkà yii Noobiya nì Yoogibooya timmu mun bí ŋwìiń nyalaŋki púee, ní ki cūtìi jáń ki pɔ́ɔkiǹ dijanjakitil gbanti ŋyunti ŋun ní baa nìn gíti pée cɔ́tí yii tikpitil tiba ŋūǹ kí bàń-bee. 12Seeba nì Salmuuna nìn sáǹ ki kátì, ama ní Geedeeyɔn kùl̄ ki páaǹ Madiyan bɔtiibi bili gbanti boon áli ki tin cúú-bi. U nìn yāntì dinyoondi kɔ́ bi-janjakitil kɔkɔ.
13Joowaasi jipɔɔn Geedeeyɔn nín nìn nyánní kujaau ki fàtīi gítińee, u nìn dūu dīń Eereesi gbantaŋki pú ní. 14U bāań Sukooti tiŋkinee ní ki cúú niin naacimpɔmbiki kiba ki yóoǹ ní ki bālifì-kì Sukooti yab kpilib nì bi-tindaŋkpilib yiŋŋi ní kinaacimpɔmbikee dūu ŋmàn̄ ŋgban pu ki tīī-u. Bi nìn sá binib imuŋku ita nì saalaa ní. 15Ní Geedeeyɔn nín cá Sukooti tiŋki yab cee ki bàn̄ ki bí-bi yii: «Ni téetí yii ni nìn sīī-mi ki lī yii: <Seeba nì Salmuuna gíti dáá kɔ́ a-ŋaan ní timbi ń tīī a-janjaliibi bin gīīyee tijin bí jāaa?> Too, Seeba nì Salmuuna gbanti sɔ̀!» 16Geedeeyɔn lī mimmee ní ki cúú Sukooti yab kpilib, ní ki yōoǹ ikuŋkuŋfi in nyēē kuteeunee nì abɔjanaakun ki dūu dáaĺ Sukooti yab tafal ní an bàn̄-bi tiŋan pu. 17U nìn gbáń ki wīī Peenuyeel tiŋki mun difɔkɔku, ní ki pɔ̄fì ki-nib.
18Míǹ boonee ní u bālifì Seeba nì Salmuuna yii: «Binib bin ni nìn kūū Tabɔɔr jool puee nìn bí mana ní?» Ní bi kíí-u yii: «Bi nìn bí kii sii mun nín pée bí pu nan ní. Bi-kɔkɔ nìn bí kii bɔtiijabee ní.» 19Ní u bí-bi yii: «M-nabiyaamu pēē na ní ni kūūyee! M pūtì ti-Dindaan un bí dimaŋfalinee yii ní yaa kaa bàà lēē bi-maŋfal, maa bàà làá kpɔ̀-ni!» 20Geedeeyɔn lī mimmee ní ki bí u-jipɔŋkpiliu Yeeteer yii: «Yīkì kí kpɔ̀-bi!» Ama ní u-jipɔɔn kaa nìn fúutì u-tàataajiki kujitooun, kun puee u nìn dáá sá kinaacimpɔmbiki ní ki nìn fàŋkí. 21Niinee ní Seeba nì Salmuuna bí-u yii: «Sisi a-ba yīkì kí kpɔ̀-ti, kun puee uninja máaǹ kí dàkà tininjati ní!» Ní Geedeeyɔn yíkì ki kūū Seeba nì Salmuuna ní ki cúú tiléeŋkaal tin bi nìn léeǹ bi-gutaamuyee ki léetì i-neeŋyi.
Geedeeyɔn maŋfal wiiŋyi nín kúntì puee
22Míǹ boonee ní Isirayeel yab tùkū Geedeeyɔn yii: «Nín̄ sá ti-kpootiliu, ní a-kpátam boonee a-jipɔɔn ń dāá fōō a-yil ní a-jipɔɔn jipɔɔn mun ń dāá fōō, kun puee a fīī-ti ki líì Madiyan yab ŋaan.» 23Ní Geedeeyɔn kíí-bi yii: «Man m-ba kaa làá kpòotī-naaa, m-jipɔɔn mun kaa làá kpòotī-ni. Ti-Dindaan u-ba di làá nīn kpòotī-ni.» 24Ní Geedeeyɔn nìkī ki bí-bi yii: «Ama tiba ní m là kí mèè-ni. M bàà là yii ni-kansikin báà ŋma ń lēē tiwan tin ní u ká kujaaunee poon kibɔmbiki kiba kí tīī-mi.» Di sá yii bi-nannanliibi bin bi nìn jáń ki pɔ́ɔkiǹee kɔkɔ nìn cáá sindaariya bɔmbiyaamu bi-wunti pu ní, kii Isimaayeel naakookun yab kɔkɔ nín pée cáá puee. 25Geedeeyɔn lī mimmee ní bi bí-u yii: «Iiin, ti kíí ki làá tīī-si nì dipɔbil diba!» Niinee ní bi kpátì dibɔkutipaaŋkaal diba ki bíl̀ kitiŋ ní báà ŋma lēē tiwan tin u ká kujaaunee poon kibɔmbiki kiba kiba ki tɔ́-u dibɔkutilee pu. 26Sindaariya bɔmbiyaamu mun Geedeeyɔn nìn mēē bi tīī-uee nyiŋfiŋu nìn kpáfì kii kiiloobi mmuŋku nyɔkɔm, ki kpáaǹ tiléeŋkaal nì falfatib nì abɔkutimɔnti ŋin nyim sá mmam Madiyan yab bɔtiibi nìn pèentée, ní kí gíti kūtì tiléeŋkaal tin bi nìn léeǹ bi-gutaamuyee. 27Geedeeyɔn nìn kpáfì an-wantee kɔkɔ ní ki dūu mɔ́ɔ́ diwaal ki cūnnì ki yóoǹ Oofiraa u-tiŋkin. Isirayeel yab kɔkɔ nìn cá niin ki gbàantí ki jáaḿ diwaal gbanti, ní di nìn dūu kpántì kutaliŋŋu ki tīī Geedeeyɔn nì u-dicaŋkun yab.
28Míǹ ní Isirayeel yab nìn nyīī Madiyan yab ki gùl̄ bi-taapu ní baa nìn gíti ŋúń ki yáatì bi-yil. Isirayeel tiŋki nìn sɔ̄ŋkì ki tin sāā abin imuŋku ili ŋyunti ŋun Geedeeyɔn nìn dáá bí dimaŋfalinee.
29Joowaasi jipɔɔn Yeerubaal, an dàkà yii Geedeeyɔn nìn kùn̄ u-dumpu ki kíǹ ki kóò niin. 30Geedeeyɔn biyaamu nninjabiyaamu mun úǹ u-ba nìn màl̄ee nìn kpáfì binib imuŋku ita nì saalaa kɔkɔ ní, kun puee u nìn cáá binimpoobi wīikí. 31U nìn gíti cáá ubɔnti ubɔ Siikeem tiŋkin. Unimpuee mun nìn màl̄-u kibininjabiki ní u pú-kì diyindi yii Abimeeleeki. 32Joowaasi jipɔɔn Geedeeyɔn nìn kpíì titikpitin nì dipɔɔsɔŋkilin. Bi nìn síb́-u u-baa Joowaasi kaakul poon, Oofiraa tiŋki kin nìn sá Abiyeeseer maaliŋun timmu kibee poon ní.
33Ama Geedeeyɔn kúm boonee ní Isirayeel yab fātìi tí kíĺ ki bíi tòotī Baal. Bi nìn dū Baal-Beeriiti ki ŋá bi-nimbɔtiu. 34Isirayeel yab kaa nìn gíti téetì ti-Dindaan bi-Nimbɔtiu un nìn fīī-bi ki líì bi-nannanliibi bin nìn māntìi tú-bee ŋaanee pu. 35Baa nìn ŋá Yeerubaal-Geedeeyɔn dicaŋkun yab mun tiŋan ki téeǹ tiŋan tin kɔkɔ u nìn ŋá ki tīī bíǹ Isirayeel yabee.
Currently Selected:
Juges 8: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
