Juges 12
12
Kujaau kɔ́ Jeefita nì Eefiraayiim yab kansikin
1Eefiraayiim yab kóoǹ ki kpáfì ní ki dūtì Jɔɔdan buŋŋu ki cūtì Saafɔn tiŋkin ki bālifì Jeefita yii: «Ba pu ní a kɔ́ Amɔn yab tiŋkin a-baba ki cūtìi jáń nì bi kaa yíiń-ti ti nì si ń nóó kí cù? Ti làá wà a-dicaŋku ŋŋmi kí kpáaǹ sisi a-ba!» 2Ní Jeefita kíí-bi yii: «Man nì m-nib nìn bí kujaau pu an pɔ̄ɔ̄, ti nì Amɔn yab. M nín nìn yíiń-nee, naa nìn dɔ́miń ki fīī-mi bi-ŋaan. 3M nín nìn ká yii naa bíi dòoń kí fīī-mee, maa mɔ́tì m-maŋfal pu ní ki kɔ́ Amɔn yab tiŋkin ki jáń nì bi, ní ti-Dindaan dū-bi ki ŋá m-ŋaan. Too, ba gíti ŋá ní ni yíkìń díǹ nee kí dāá já nì mi?» 4Niinee ní Jeefita kpáfì Galaadi janjaliibi kɔkɔ ní bi jáń nì Eefiraayiim naakookun yab ki pɔ́ɔkiǹ-bi. Kun pu bi nìn jáń kujaau gbantee di sá yii Eefiraayiim yab nìn lī-bi yii: «Nimbi Galaadi yab, ni sá Eefiraayiim naakookun nib ní ki yíkì Eefiraayiim yab kansikin ki sáǹní ki dɔ́miń ki kā Manasee naakookun yab kansikin!» 5Galaadi yab nìn pīiǹ Eefiraayiim naakookun yab isan in bi nìn dìŋfī ki dùtī Jɔɔdan buŋŋuee. Ŋyunti ŋun ní Eefiraayiim naakookun yab bin nìn sáǹ ki ŋmátèe kansikin ubɔ yaa nìn bāań ki là kí dùtēe, ní Galaadi yab ń bàlifì-u yii: «A sá Eefiraayiim niliu níii?» Udaan yaa kíí yii: «Aayeeyee», 6ní Galaadi yab ń bí-u yii: «Lì yii: <Ciibooleeti>.» Ní udaan ń bí yii: <Siibooleeti>, kun puee Eefirayiim yab kaa nìn ŋūǹ kí lì an nín bàà sá bí lì puee. Niinee ní bí cúú udaan kí làntì kí bíĺ laakin ní bi dìŋfī ki dùtī Jɔɔdan buŋŋuee caŋin niin. An yuntiŋuee, bi nìn kūū Eefiraayiim janjaliibi binib kutukub imuŋku ili nì bili ní.
7Ugalaadija Jeefita nìn kpōotì Isirayeel yab abin aluu ní ki dāa nín kpíì, ní bi síb́-u Galaadi timmu kiba poon.
Yibisan nì Eelɔn nì Abidɔn
8Jeefita kúm boonee, Yibisan un sá Beetileem tiŋkinee#12.8 Beetileem tiŋki kin bɔti bi sòoǹ nee sá Sabulɔn naakookun tiŋki ní, an kaa sá Juuda naakookun tiŋki, kpèè Joos 19.15 nì tin bi ŋmàn̄ kubɔŋu faaku taapuee. di nìn kpōotì Isirayeel yab. 9U nìn cáá jipɔmbi mmuŋku nì saalaa ní ki nìn cáá bisalib mun mmuŋku nì saalaa. U nìn dū u-bisalib ki tīī biniyaŋyambi ticati ní ki nìn cáá bisapɔnnyanyambi mmuŋku nì saalaa ki tīī u-jipɔmbi. U nìn kpōotì Isirayeel yab abin aluli ní. 10Yibisan nìn kpíì ní bi síb́-u Beetileem tiŋkin.
11Yibisan kúm boonee, Eelɔn un nìn sá Sabulɔn naakookunee di nìn kpōotì Isirayeel yab. U nìn kpōotì Isirayeel yab abin saalaa ní. 12Eelɔn nìn kpíì ní bi síb́-u Eelɔn, Sabulɔn tiŋki poon.
13Eelɔn kúm boonee, Yileel un nìn sá Pireeyatɔn tiŋkinee jipɔɔn Abidɔn di nìn kpōotì Isirayeel yab. 14Abidɔn nìn cáá jipɔmbi imuŋku ili nì naantiibi mmuŋku nì saalaa ní, ní bi nìn kàal̀ mmanjamu imuŋku ita nì saalaa. U nìn kpōotì Isirayeel yab abin anii ní. 15Yileel un nìn sá Pireeyatɔn tiŋkinee jipɔɔn Abidɔn nìn kpíì ní bi síb́-u Pireeyatɔn tiŋki kin sá Eefiraayiim naakookun timmu kibee poon, Amaleeki yab jool pu.
Currently Selected:
Juges 12: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
