Exode 35

CIRCIR KƆŊKOOŊŊU CÓONTAM (35–40)

Ŋwiŋŋuŋfikaa bɔti

1Mooyiisi kpáfì Isirayeel yab kɔkɔ ní ki bí-bi yii: «Kpèèmaan ti-Dindaan nín yóoǹ mara yii ní ŋá puee sèé: 2<A cáá iwiin iluu kí tɔ̄ ditundi, ama ŋwinluluúti dal sá ŋwiŋŋuŋfikaa ní, ŋwiin ŋun a dūu sú man ni-Dindaanee. Un kamaa yaa túń ditundi ŋwiin gbantee, bí kpɔ̀-u#35.2 Kpèè 20.8-11, Akoo 23.3, Ditee 5.12-14.. 3Laakin kamaa ni yaa kóòyee, ubɔ ń taa kpāā ŋŋmi ŋwiŋŋuŋfikaa dal.>»

Isirayeel yab cáań bi-saraabi

4Mooyiisi bí Isirayeel yab kɔkɔ yii: «Kpèèmaan ti-Dindaan nín yóoǹ mara yii ní ŋá puee sèé: 5<Ní lēēmaan ni-kansikin tigaajati tin ni cááyee poon kí ŋá ti-Dindaan saraa. Bin làá tīīyee ń tīī nì dipɔbil diba. Bí tīī sindaariya nì animbil kúti nì tasa kúti, 6nì bigulifamambi nì gulfab bin bí gùŋgumee nì bigulifamambi cínciŋ nì bigulifapimbi bin bí fálfalee nì tiŋɔkuti, 7nì ipigban in bi mántèe nì igban in dàfì tikpilee nì akasiya dɔi, 8nì ŋkpam min bi làá nīn cáa ŋáań fitilabinee nì talaalu kpam min bi làá nīn cáa sìtī binib yiliŋ pu kí dū-bi kí sú ti-Dindaanee nì talaalub bin bi làá nīn tùutēe, 9nì ataŋkpanyaan ŋin bi yíì soowamee nì ataŋkpanyaan aba mun bí dūú nákań eefoodi nì kilɔbiki kin pāantí usaraaŋakpil bindi puee. 10Bitɔntɔnliibi bin yáb̀ee kɔkɔ ń kpāfì kí tɔ̄ ditundi din ti-Dindaan bālifì yii ní tɔ̄ee. 11Bí kpāfì kí ŋá circir kɔŋkooŋŋu nì ŋu-biiŋkaati nì ŋu-tabikaati nì ŋu-fukuŋkaati nì ŋu-kalimii nì ŋu-dɔjaatii nì i-tílkaati, 12nì Dipoondi dakaau nì u-kpandɔi nì u-bìil nì ŋŋaasakaŋkaa ŋun pìtī circir laŋki nì circir páaa laŋki kansikinee, 13nì teebil nì u-kpandɔi nì tin kɔkɔ bi cáa tūǹ ditundi u-puee nì kpɔnɔb bin bi cāabìń ki pāantí ti-Dindaan nimbiinee, 14nì fitilab tɔ́kɔŋkaati nì ti-wanti kɔkɔ nì fitilab nì bi-kpam, 15nì talaalutuukaa saraafaŋŋu nì ŋu-kpandɔi nì ŋkpam min bi sìtī unil yil pu kí dū-u kí sú Unimbɔtee nì talaalutuukaa nì ŋŋaabu ŋun sàkā circir kɔŋkooŋŋu punyɔkɔkee, 16nì saraawɔkaa faŋŋu nì ŋu-làaŋ́ki kin sá tasa kútee nì ŋu-kpandɔi nì tin kɔkɔ bi cáa tūǹ ŋu-pu ditundee nì kusampeeu nì tikúti tin pu ku tɔ́kɔ́ee, 17nì iŋaabu in bi làá dūú màntīí gíb́ circir kɔŋkooŋŋu cindee nì i-dɔjaatii nì tikúti tin bi làá dūú tíĺ idɔjaa taapuee nì sata un bi làá dūú sàkan̄ dicindi punyɔkɔkee, 18nì circir kɔŋkooŋŋu kpakpaaŋi nì ŋu-cindi kpakpaaŋi nì ŋu-ŋmiii, 19nì tiwampeeŋkaal tin bi làá nīn pèentí ki tūǹ atuun circir kɔŋkooŋŋunee nì usaraaŋakpil Aarɔn wampeeŋkaati nì u-jipɔmbi yati tin bi làá nīn pèentí ki tūǹ disaraatundee.>»

20Niinee ní Isirayeel yab nyáń Mooyiisi cee. 21Bin nìn cáá tiniti ki làá tīī nì dipɔbil dibee nìn cáań ti-Dindaan bi-wanti bí dūú cóoń circir kɔŋkooŋŋu, kí tɔ̄ atuun ŋin kɔkɔ sá bí dūú tɔ̄ee ní kí dūú ŋáĺ circir wampeeŋkaati. 22Míǹ ní bininjab nì binimpoobi bin cáá tinitee yōoǹní akimbil nì falfatib nì mbɔmbiyaamu nì abɔmbil nì sindaariya wanti tin sá tiwannyɔkɔntikaalee ki dī akoobil nín sá puee ki dūu ŋá saraa ki tīī ti-Dindaan. 23Bin kɔkɔ nìn cáá bi-dumpui bigulifamambi gùŋgumee nì gulfab bin máǹ wèeeeyee nì bin máǹ cínciŋee nì bin pīiǹee nì tiŋɔkuti nì ipigban in bi mántèe nì igban in dàfèe, nìn cáań ki tīī. 24Bin kɔkɔ nìn lēē animbil kúti nì tasa kúti ki yóoǹ kí dūú ŋá ti-Dindaan saraayee nìn cáań. Bin kɔkɔ nìn cáá akasiya dɔyee nìn cáań bí dūú tɔ̄ atuun. 25Binimpoobi bin nìn nyí diwanlulee nìn dū gulfab bin máǹ gùŋgumee nì bin máǹ wèeeeyee nì bin máǹ cínciŋee nì bin pīiǹee ki lùn̄ ki cáań. 26Binimpoobi bin nyí diwanlulee nìn dū bi-pɔbiliŋ ki tīī ki dū tiŋɔkuti ki lùn̄ tiwan. 27Samaa kpilib nìn cáań ataŋkpanyaan ŋin bi yíì soowamee nì ataŋkpanyaan aba mun bí dūú nákań eefoodi lɔbiki kin pāantí usaraaŋakpil bindi puee, 28nì talaalub bin sɔ́fèe nì fitilab kpam nì min bi làá nīn cáa sìtī unil yil pu kí dū-u kí sú Unimbɔtee nì talaalutuukaa. 29Isirayeel yab kɔkɔ, bininjab nì binimpoobi nìn dàkā tiniti ki cáań tin kɔkɔ máaǹ bí dūú tɔ̄ atuunee ki ŋá saraa ki tīī ti-Dindaan nì dipɔbil diba.

Bitɔntɔnliibi bin túń circir kɔŋkooŋŋu tundee

30Mooyiisi bí Isirayeel yab yii: «Kpèèmaan ti-Dindaan lēē Uurii jipɔɔn Beesaleel, Uur un sá Juuda naakookunee naantiiu. 31U tīī-u u-Fam tikpil, ú nīn yáb̀ ki cáá iciin kí ŋmā kí tɔ̄ atuun nín bí a-ba a-ba puee kɔkɔ mmɔntiimin. 32U cáá nlandɔkɔ kí dū sindaariya nì animbil kúti nì tasa kúti kí dūú tɔ̄ atuun. 33U ŋūǹ kí kpítí ataŋkpee kí nákań, kí dū ndɔ kí kpítí kí dūú tɔ̄ atuun ŋí nīn bí a-ba a-ba. 34Ti-Dindaan pú-u ŋŋmam ú dàkà bi nín nāantí tiwan kí dūú tɔ̄ atuun puee kii u nín tí pú Ayiisamaaki un sá Daani naakookunee jipɔɔn Ooliyaab puee. 35U pú-bi dinyil bí ŋmā kí kpítí ataŋkpanyaan kí dūú ŋá tikɔkɔ, kí ŋmā kí lēē tiwan kɔkɔ naŋku tiba pu, ní kí ŋmā kí dū gulfa un máǹ gùŋgumee, nì un máǹ wèeeeyee nì un máǹ cínciŋee nì un pīiǹee kí dūú lù àá kí gbá tiwanee. U pú-bi dinyil bí ŋmā kí tɔ̄ bin kɔkɔ kíǹee tuuŋŋi.

Currently Selected:

Exode 35: BASSARDC

Highlight

Copy

Compare