Exode 32

ISIRAYEEL YAB KPĪTÌ MPÈÉ ŊUN BÍ BI NÌ UNIMBƆTI KANSIKINEE (32–34)

Bi dūntì sindaariya ki mɔ́ɔ́ dinabil

1Samaa nín ká yii Mooyiisi yúntìń dijool pu kaa bíi bàńee ní bi cūtìi kpáfì Aarɔn cee ní ki bí-u yii: «Kpèè doo, mɔ́ɔ́-ti unimbɔti ubɔ ú nīn līī ti-nyɔkɔpu, di sá taa nyí tin di yaa bāań Mooyiisi un di nyántìń-ti Eejipiti tiŋkinee#32.1 Kpèè Atuun 7.40. Dūú ŋmàntī nì Ditee 9.7-21..» 2Ní Aarɔn bí-bi yii: «Lēēmaan ni-nimpoobi nì ni-bisalib nì ni-jipɔmbi sindaariyabɔmbiliŋ bi-tafaliŋ pu kí cáaḿmaan-mi.»

3Dicilpu niin ní Isirayeel yab gbákal̀ bi-bɔmbiliŋ bi-tafaliŋ pu ki cáań ki tīī-u. 4Aarɔn fōō tiwan gbantee bi-ŋaanee ní ki dūntì ki dūu sītì tiwan tin bi ŋá ki nántiǹ dinabilee poon, ní an nyántì dinabil. Niinee ní samaa téeń yii: «Isirayeel yab, kpèèmaan ni-Nimbɔtiu un nyántìń-ni Eejipiti tiŋkinee!» 5Aarɔn ká mimmee ní ki máń nsaraafan dinabilee nimbiin ní ki bí yii: «Foolee ti làá fu jī ti-Dindaan jiŋaaliu.» 6Kutaa wúntì kutaafaau pɔ̀lpɔlee ní samaa ŋá bisaraawɔkaabi nì mpèé saraabi. Boonee ní bi kāl̀ ki jíń ki nyùn̄. Bi dóòyee ní ki dūu gùl̄ agbiil pu#32.6 Kpèè 1 Kɔra 10.7.. 7Niinee ti-Dindaan bí Mooyiisi yii: «Sìntī malaa, di sá a-nibul din a nyántìń Eejipiti tiŋkinee bíi ŋáań ikpitikpaan. 8Bi pūtì kpáàa dū nsan ŋun m dàkā-bee ki fá. Bi dūntì tikúti ki mɔ́ɔ́ dinabil, ki gbāaǹ di-nimbiin, ki ŋá-dì saraabi ki lī yii: <Isirayeel yab, kpèèmaan ni-Nimbɔtiu un nyántìń-ni Eejipiti tiŋkinee!» 9Ti-Dindaan gíti tùkū Mooyiisi yii: «M ká yii dinibul nee sá din gáatèe ní. 10Kɔŋkɔnnee, yàntī ḿ fōō bi-pu mbiim kí kúntí-bi. Boonee m làá dī sii pu kí náań ditimbuŋkpaandi.» 11Ama ní Mooyiisi gbāam̀ ti-Dindaan Unimbɔti ú jī kimɔtii ní ki bí yii: «Ti-Dindaan, ba pu ní a fōō dinibul din a nyántìń Eejipiti tiŋkin nì a-pɔŋkpaaŋŋu nì a-kpabilee pu mbiim míǹ? 12A yaa ŋá mimmee Eejipiti yab làá lì yii: <Unimbɔti là kí cáá-bi kí tɔ̄ mbusu poonee pu ní u nyántì-bi ti-tiŋkin. U là kí cáá-bi kí cūnnì ntimu mun bí ajoon puee kí sàaǹ-bi kí kúntí-bi kitiŋ pu ní.> An puee m-Dindaan, sɔ̀ŋkì a-pɔbil, kí gíiǹ mbusu un a bàà làá dūú tɔ̄ a-nibul puee kí yà. 13Téetí Abraam nì Isaaki nì Jaakɔb pu, a-tɔntɔnliibi bin a nìn pūtì ki pōoǹ-bi yii: <M làá bùtī ni-maaliŋun yab bí nīn wīikí kii iŋmalbijaa in bí kutagbɔŋu puee. M làá dū kitiŋ kin m pōoǹ-bee kí tīī-bi bí nīn kíǹ ki yì kí nīn pée cáa cá jaanjaan#32.13 Kpèè Diny 17.8, 22.16-17..>» 14Niinee ti-Dindaan nín bàà bɔ́ntì kí dū mbusu un kí tɔ̄-bee ní u yāntì kaa ti ŋá míǹ#32.14 B. 11-14. kpèè Dikà 14.13-19..

15Mooyiisi nìn yíkìń dijool pu ki nín kpákatiń ki ŋúbiń titaŋkpapilindi tili u-ŋaan ajan liitil pu bi ŋmàn̄ dipoondi marab. 16Unimbɔti u-ba di nìn kpítì titaŋkpapilindi gbanti. Úǹ u-ba di nìn tí ŋmàn̄ ti-pu kii kigaai ní bi dūu cáká ki ŋmàn̄ee. 17Joosuwa nín gbìl̄ samaa kuŋkuuntii puee ní u bí Mooyiisi yii: «Pīlifì, ijanjakuŋkuunti di tùm̀ ti-naapaal puee.» 18Ní Mooyiisi bí-u yii: «Aayee, doo kaa sá dijajil kuŋkuuntii, kaa tí sá bin bi jáń ki pɔ́ɔkiǹee yaliŋkii. Ilan pu ní man gbìl̀ nee.»

19Bi tóob́ dinaapaalee ní Mooyiisi ká dinabil yú ní samaa bí ki ŋōō ní u fōō diŋuul ŋkpitim pu. U nìn dū titaŋkpapilindi tin u ŋúb́ u-ŋaanee ki lúkú, ní ki gbáń ki wīī-tì dijool taapu niin. 20Ní u cūtìi yōoǹ dinabil din samaa mɔ́ɔ́yee ki tɔ́ ŋŋmin ní an wùn̄. U nìn nàn̄-dì dúsi dusi, ki dūu sītì nnyimin ní ki yāntì Isirayeel yab nyùn̄. 21Ní Mooyiisi bālifì Aarɔn yii: «Ba ní dinibul nee ŋá-si ní a téé-dì ki tɔ́ ikpitikpaan in bí nee poon míǹ?» 22Ní Aarɔn kíí Mooyiisi yii: «M-dindaan, taa fōō m-pu diŋuul. Sii a-ba nyí yii dinibul nee kaa pée pɔ̄ɔ̄ tin kaa ŋān̄ee diŋál. 23Bi bí-mi yii: <Mɔ́ɔ́-ti unimbɔti ubɔ ú lìntī ti-nyɔkɔpu, di sá yii Mooyiisi uninja un di nyántìń-ti Eejipiti tiŋkinee, taa nyí tin di yaa bāań-uee.> 24Niinee ní m bālifì-bi yii: <Ŋma di cáá sindaariya?> Dicilpu niin ní bi túutì abɔmbil bi-tafaliŋ pu ki cáań ki tīī-mi, ní m dūu tɔ́ ŋŋmin ní dinabil nee nyánní.»

Ditafadaaldi

25Mooyiisi ká yii fìkil fikil kɔ́ samaa ní Aarɔn yāntì bi ŋá bi nín là puee, ki dū bi-ba ki tīī binannanliibi ń bèel̀. 26Niinee ní Mooyiisi cūtìi yúl̀ dinaapaal punyɔkɔki nyɔkɔpu ní ki téeń yii: «Bin kɔkɔ bí ti-Dindaan jandee ń dāan̄ man cee!» Ní Leefii naakookun yab kɔkɔ dɔ́miń ki yúl̀ u-cee ki māntìi tú-u. 27Ní u bí-bi yii: «Kpèèmaan, ti-Dindaan Isirayeel Nimbɔtiu nín lī puee sèé yii: <Báà ŋma ń dū u-tàataajiki kí gbìn̄, kí yìiǹ dinaapaal jaŋŋi kɔkɔ poon kí kpɔ̀ u-nabiki nì u-bɔɔ nì u-kɔŋkɔnnaatɔ.>»

28Leefii yab nìn ŋá kii Mooyiisi nín nìn lī puee, di sá yaadal wiiŋŋuee, bi nìn kūū binib kutukub bita. 29Niinee ní Mooyiisi bí Leefii yab yii: «Díǹ nee ni dū ni-ba ki sú ki túń ni-Dindaan tundi, kun puee naa yíì ki ŋúń ki kūū ni-jipɔmbi nì ni-nabiyaamu. An puee ti-Dindaan ń bìin̄ ni-pu díǹ.»

Mooyiisi gbāam̀ Unimbɔti Isirayeel yab pu

30Kutaa wúntèe ní Mooyiisi bí samaa yii: «Ikpitikpaan ní ni baasii ŋá. Kɔŋkɔnnee m làá fàtīí jɔ̄m̀ dijool pu ti-Dindaan cee, an yaa yíì u làá fōō-mi kí dū ni-kpitii kí pɔ̄-ni.»

31Niinee Mooyiisi fātìi nín gítí ti-Dindaan cee, ní ki bí-u yii: «Àaa ti-Dindaan, a-nibul ŋá ikpitikpaŋkpaan ní, bi dū sindaariya ki mɔ́ɔ́ unimbɔti. 32Ama m gbāam̀-si, dū bi-kpitii kí pɔ̄-bi. An yaa kaa ŋá mimmee, á kpìtī man yindi dimaŋfal gbɔŋku kun a ŋmàn̄ee poon.» 33Ní ti-Dindaan bí Mooyiisi yii: «Un yīntiǹ-mee yindi ní m làá kpìtī m-gbɔŋku poon. 34Too kɔŋkɔnnee, nín̄ cá kí yòon̄ dinibul kí cùnnì laakin m bí á cáá-bi kí cùnnèe. M làá yàntī m-tuuŋŋu ń nīn līī a-nyɔkɔpu. Ama dalba m làá dāá dáaĺ bi-tafal bi-kpitii gbanti pu.» 35Ti-Dindaan dáaĺ dinibul tafal Aarɔn nín nìn mɔ́ɔ́-bi dinabil diŋyee pu.

Currently Selected:

Exode 32: BASSARDC

Highlight

Copy

Compare