Exode 24

Unimbɔti pōoǹ Isirayeel yab dipoondi

1Unimbɔti bí Mooyiisi yii: «Jɔ̄mìń m-cee, sii nì Aarɔn nì Nadaab nì Abiyuu nì Isirayeel yab kpilib imuŋku ita nì saalaayee. Ni yaa dòoń ki dáá bíń ndanee, ní gbàan̄. 2Ama sii Mooyiisi baba ń sútiń kí pìl̄-mi. Bin kíǹee ń taa sútiń, ní samaa mun ń taa nóó-si kí jɔ̄mìń.» 3Mooyiisi nìn cáá tibɔti nì marab bin kɔkɔ ti-Dindaan dàkā-uee ki máafì samaa. Ní samaa kíí nì kinyɔɔbaantii yii: «Tibɔti tin kɔkɔ ti-Dindaan sòon̄ee, ti làá ŋá míǹ.»

4Mooyiisi nìn ŋmàn̄ tibɔti tin ti-Dindaan tùkū-uee. Kutaa wúntì kutaafaau pɔ̀lpɔlee, ní Mooyiisi máń nsaraafan dijoolee taapu. U nìn dū ataŋkpee saalaa nì ali, Isirayeel naakɔti nín sá puee, ní ki máń. 5U nìn dū Isirayeel naacimpɔmbi biba ki tú bi cūtìi ŋá bisaraawɔkaabi. Bi nìn kūū inajaa mun ki ŋá mpèé saraabi. 6Mooyiisi nìn dū tiwaŋkutee fatikuu dijandi ki ŋá disambilin, ní ki dū dijandi din kíǹee ki kpáatìi pɔ̀l̄ nsaraafan pu. 7Boonee ní u yōoǹ dipoondi taŋkpapilinti ki kàan̄ mpɔn ki tīī samaa. Ní samaa kɔkɔ bí yii: «Tin kɔkɔ ti-Dindaan lēe, ti làá gbìl̄ kí tīiǹ-u kí ŋá míǹ.» 8Niinee Mooyiisi dū fatiku ki yāaǹ samaa pu ki bí yii: «Kpèèmaan, fatiku nee di sá dipoondi din ti-Dindaan pūtì ki pōoǹ-ni ki tīī-ni marabee daaŋku#24.8 Kpèè Maat 26.28, Maar 14.24, Luuki 22.20, 1 Kɔra 11.25, Eebru 9.19-20, 10.29..»

9Mooyiisi ŋá míǹ ki dóòyee ní Aarɔn nì Nadaab nì Abiyuu nì Isirayeel yab kpilib binib imuŋku ita nì saalaayee nín jɔ́ḿ dijool yilpu. 10Bi nìn ká Isirayeel yab Nimbɔtiu. U-taaŋi taapuee, an nìn bí kii dikɔl din bi dū ataŋkpamɔnti ŋin bi yíì safiir ŋi wāĺ kílkil ki bɔ̀ǹ kii kutagbɔŋuee ki nákáǹee ní. 11Ti-Dindaan kaa nìn yāntì Isirayeel yab kpilibee kpíì. U nìn yāntì bi kpēē úǹ Unimbɔti, boonee ní bi jíń ki nyùn̄.

Mooyiisi bí ti-Dindaan cee dijool pu

12Ti-Dindaan bí Mooyiisi yii: «Jɔ̄mìń m-cee dijool pu kí dāá yūĺ niin. M làá dū marab bin m ŋmàn̄ ataŋkpee pilinti puee kí tīī-si, á cáá dàkà Isirayeel yab.» 13Niinee ní Mooyiisi yíkì kutaafaau u nì Joosuwa un u dūu ŋàl̄ u-bee, ní bi nín jɔ́ḿ Unimbɔti jool pu. 14U tùkū Isirayeel kpilib yii: «Ní cīití-ti doo, timbi ń cù kí gítiń. Aarɔn nì Uur làá nīn bí ni-cee. Ubɔ yaa cáá tibee, udaan ń ká-bi.» 15Ní Mooyiisi nín jɔ́ḿ, ní ditagbandi dɔ́miń ki bīiǹ dijool pu. 16Ti-Dindaan nyooti nìn bí Siinaayi jool pu ní ditagbandi nìn bīī di-pu míǹ ki tin cáa sāā iwiin iluu. Ŋwinluluúti dalee ní ti-Dindaan yíiń Mooyiisi ditagbandee poon. 17Ti-Dindaan nyooti tin nìn dɔ́miń Isirayeel yab ceeyee nìn bí kii ŋŋmi ŋun pɔ̄ɔ̄ kpaŋkpamee ní dijoolee yil pu. 18Mooyiisi nìn kɔ́ ditagbandee poon ki nín jɔ́ḿ dijool pu. U nìn gbíntì dijool pu niin ki ŋá iwiin imuŋku ili, ŋwiimpu nì kunyeeu#24.18 Kpèè Ditee 9.9..

Currently Selected:

Exode 24: BASSARDC

Highlight

Copy

Compare