Exode 16

Maana nì njikpacimamu bɔti

1Isirayeel yab kɔkɔ yíkì Eeliim tiŋkin ní ki bàn̄ Siini teeku kun bí Eeliim nì Siinaayi kansikinee. Isirayeel yab nín nyáń Eejipiti tiŋkin uŋmaliliiti iwiin saalku dalee ní bi bàn̄ Siini teekun. 2Kuteeun niinee ní Isirayeel yab kɔkɔ bíi wòoǹ Mooyiisi nì Aarɔn. 3Bi nìn bí-bi yii: «Ba pu ní ti-Dindaan kaa yāntì ti kpíì ŋyunti ŋun ti nìn bí Eejipiti ki kā ki kɔ́ĺ anaŋkumboon ki jīǹ tijin ki díkèe. Ama ní ni yōoǹní samaa nee kɔkɔ ki cáań kuteeun ŋkùm ń kpɔ̀-bi!»

4Ní ti-Dindaan bí Mooyiisi yii: «M làá tīī-ni tijin tin làá nīn nyēeń yilpu ki lítí kitiŋ kii utaa nín nì puee#16.4 Kpèè Yoow 6.31.. Kutaa kamaayee binib làá nīn fà min làá ŋmàntī-bi ŋwiin ŋubɔ jītamee ní. M là kí cɔ̄ŋkì-ni kí kpèè yii ni làá nīn tɔ́ m-marabaaa, naa làá nīn tɔ́-bi. 5Iwiin iluu dal, ni yaa láa fāā ki tɔ́kɔǹee, án làá bùtī mili pu kí jītíǹ ni nín kpààa fà pu ŋwiin kamaayee.» 6Ní Mooyiisi nì Aarɔn bí Isirayeel yab kɔkɔ yii: «Díǹ kujoou nee ní ni làá béé yii ti-Dindaan di nyántìń-ni Eejipiti tiŋkin. 7Fool kutaafaauee, ni làá fu ká u-nyooti, kun puee ti-Dindaan gbìl̄ ni nín bíi gbùkum̄ puee. Ní taa dàkafì yii timbi ní ni wòoǹ. Timbi di sá bilab ní ni wòoǹ-ti?» 8Mooyiisi gíti bí-bi yii: «Ti-Dindaan làá tīī-ni kujoou nee tinan ní ŋmɔ́, ní kutaafaauee ú fu tīī-ni tijin ní jī kí díkí, kun puee u gbìl̄ ni-gbukumii pu. Ní taa dàkafì yii timbi pu ní ni gbùkum̄. Timbi kaa pée sá tiba, an sá ti-Dindaan pu ní ni bíi gbùkum̄.»

9Ní Mooyiisi bí Aarɔn yii: «Tùkù Isirayeel samaau kɔkɔ bí sútiń kí dāan̄ ti-Dindaan nimbiin, kun puee u gbìl̄ bi-gbukumii pu.» 10Ŋyunti ŋun Aarɔn fōō dinyɔɔbundi ki bíi sòoǹ nì bee, ní bi fātì bi-nimbiin ki túĺ kuteeu pú. Dicilpu kpalaayee ní ti-Dindaan nyooti cílìń bi-pu ditagbancancaal poon. 11Ní ti-Dindaan bí Mooyiisi yii: 12«M gbìl̄ Isirayeel yab gbukumii pu. An puee tùkù-bi yii: <Kujoou nee, ni làá ŋmɔ́ tinan kí báĺ, ní fool kutaafaauee, ní fu jī tijin kí díkí ní kí béé yii man di sá ni-Dindaan ni-Nimbɔtiu.>»

13Kujoouee ní inoon iba, i bí kii njikpacimamuee dɔ́miń#16.13 Dūú ŋmàntī nì Dikà 11.13-34. ki kpátìi gbí Isirayeel yab kaaŋu pu, ní kutaafaauee dimalindi bīiǹ bi-kaaŋu boon ki māntìi tú. 14Dimalindee nín fóotèe ní mbilimu mbilimu mubɔ dōoǹ ki pīiǹ ki kpátìi gbí an kɔkɔ. 15Isirayeel yab kée kaa nyí kun an sée, ní ki bàlifī tɔb yii: «Ba wanti dee ní?» Ní Mooyiisi kíí-bi yii: «Tijin tin ti-Dindaan tīī-ni ní jēe dee#16.15 Kpèè 1 Kɔra 10.3.. 16Ti-Dindaan nín yóoǹ mara uŋyee sèé: <Ní fāā min unil kamaa ŋūǹ kí jēe. Báà ŋma ń fāā u-cindin niliu kamaa yil pu disambil diba kí sāā u-nib nyɔkɔm.>»

17Isirayeel yab nìn ŋá míǹ. Biba nìn fāā tikpil ki lákatì ní biba mun fāā fiii an kaa bàn̄. 18Ní bi dū disambilee ki ŋmāntì báà ŋma jinti, ní un fāā tikpilee kaa ká tiba ki páaǹ, ní un fāā fiiiyee kaa lóò tiba#16.18 Kpèè 2 Kɔra 8.18.. Báà ŋma nìn pée ká min làá ŋmàntī ú jēe ní.

Marab bin bi nìn síiǹ maana puee

19Mooyiisi bí-bi yii: «Ubɔ ń taa kíń tijin kí kpāafì fool kutaafaau pu.» 20Ama biba kaa nìn pílifì Mooyiisi nín nìn lī puee, ní ki kíǹ tijin ki kpáafì kutaa wúntì. Ku wúntèe ní an sūū ki ŋá akoosibil. Niinee ní Mooyiisi fōō diŋuul bi-pu. 21Kutaafaau sá kamaayee, báà ŋma nìn fà min làá ŋmàntī ú jēe ní. Ŋwìiń yaa nìn píĺee ní un kíǹee ń dùntī.

22Iwiin iluu dalee ní bí fāā bi nín nìn kpààa pée fà puee mili pu, unil kamaa yil puee asambil ali. Ní Isirayeel yab kpilib dɔ́miń ki tùkū Mooyiisi an bɔti. 23Ní Mooyiisi bí-bi yii: «Ti-Dindaan nín yóoǹ mara uŋyee dee. Fool fu sá ŋwiŋŋuŋfikaa ní, ŋwiin ŋun sá ti-Dindaan wiiŋŋuee#16.23 Kpèè 20.8-11.. Ní ŋàan̄ tin ni làá ŋàan̄ee, kí tɔ́kɔń tin ni làá tɔ́kɔńee. Tin yaa kíǹee, ní dūú kpāafì kí yóoń fool kutaafaau pu.» 24Ní bi bɔ́ntì tijin ki yóoǹ fool pu, kii Mooyiisi nín bí yii bí ŋá puee. Ku wúntèe an kaa sūūyaaa, akoosibil mun kaa kɔ́. 25Ní Mooyiisi bí-bi yii: «Jīmaan tijin tin ni fu ŋá foolee díǹ, kun puee díǹ di sá ŋwiŋŋuŋfikaa ki tīī ti-Dindaan. Ni yaa nyáń mmɔŋki díǹ, naa làá ká báà tiba dɔ̄. 26Ni làá nīn pée fà tijin míǹ ní iwiin iluu, see ŋwinluluúti ŋun sá ŋwiŋŋuŋfikaayee dal baba ní naa làá ká tiba ki fāā.»

27Nì míǹ kɔkɔee, Isirayeel yab kansikin biba nìn nyáń ŋwinluluúti dal kí bàà tí cùú fāā ní kaa ká. 28Ní ti-Dindaan bí Mooyiisi yii: «Ni làá nīn pée yíití m-marab nì m-dàkatam yéè kí tin cáá sāā ŋyunti ŋulɔŋu ní? 29Ní béé yii m tīī-ni ŋwiŋŋuŋfikaa ní dūú kàl̄ kí ŋùŋfì ní. An pu ní m tìì-ni iwiin iluu dal iwiin ili jinti, án nín làá ŋá pu winluli dalee, báà ŋma ń nīn kā u-dumpu kí taa nyā kí cù laabee.» 30Ní Isirayeel yab kíǹ ki kàal̀ ŋwinluluúti dal ki ŋùŋfī.

31Isirayeel yab nìn pú tijin gbanti diyindi yii maana. U nìn bí mbilimu mbilimu ki pīiǹ, ní ki mɔ̄ kii tisiil kalaauee.

32Ní Mooyiisi bí yii: «Kpèèmaan ti-Dindaan nín lī puee sèé yii: <Ní lēē tijinee disambil diba kí kpāafì kí dāá nīn cáa dàkà ni-naantiibi bi mun ń ká ti-Dindaan nín nìn nyántìń-ni Eejipitee tijin tin u nìn cáa kpīintí-ni kuteeunee.>» 33Ní Mooyiisi bí Aarɔn yii: «Fāā tijinee disambil diba kí ŋá diboolin ki cáá yóoń ti-Dindaan nimbiin, kí kpāafì-tì ni-naantiibi mun ń dāá yīkìí ká#16.33 Kpèè Eebru 9.4..» 34Kii ti-Dindaan nín nìn bí Mooyiisi ń ŋá puee, Aarɔn nìn cáá tijinee nì dibool ki yóoǹ ti-Dindaan Poondi daaŋku#16.34 Dipoondi daaŋku: An dàkà yii ataŋkpee ali ŋin pu ti-Dindaan ŋmàn̄ marab saalaa an kā dakaa poonee. nimbiin án ŋmā kí nīn bí ki téetí-bi.

35Isirayeel yab nìn jíń tijin gbanti míǹ ní abin imuŋku ili, áli ki tin kɔ́ kitiŋ kin binib kóòyee. An dàkà yii bi pée jíń tijin gbanti míǹ ní ki tin bàn̄ Kanaan tiŋki kpaanyɔkɔ#16.35 Kpèè Joos 5.12.. 36Bi-sambil din bi nìn cáa ŋmàntī tijinee saalaa di sá bi-gɔŋgɔŋwu.

Currently Selected:

Exode 16: BASSARDC

Highlight

Copy

Compare