Esther (grec) EE
EE
Kugbɔŋu kun bi ŋmàn̄ kí mɔ̄tì Juuda yab puee
13 Kugbɔŋu kun bi nìn ŋmàn̄ ubɔti yindi puee sèé:
«Mama ubɔtikpaan Aritaseerseesi di ŋmàn̄ kugbɔŋu nee ki tīī m-kàliŋkpilib bin bí ntimu dilaataal nì mmuŋku nì mululi mun bí kí yòon̄ Indiya tiŋki kí tin cáá sāā Eetiiyoopii tiŋkee, nì bin kɔkɔ sá m-yabee.
14 Bilaŋŋaŋfitiibi tìì binib tinyool tikpil ní an yàntī bí kpántí bilambidambi. 15 Niinee ní bi kíǹ ki nyàab̀ tin jítiǹ tinyool tin bi fōōyee pu. Baa nyàab̀ kí ŋá bin bí bi-taapuee tikpitil ŋmaniŋma, ama ní ki nyàab̀ kí bɔ́ntí tin kaa ŋān̄ee kí jáǹ bin ŋáań-bi tiŋanee. 16 Baa nyí tiŋan tin bi ŋá-bee, ní ki yàntī bin kaa nyí tiŋanee jīǹ bi-pu dinyandi ní bi yòontí bi-ba yilpu. Bi ŋáań mimmee ki dàkafī yii bi làá ŋmā kí ŋmátí kí nyā deedee Nimbɔtiu ŋaan, Unimbɔti un wāĺ tikɔkɔ ki ná tikpitilee.
17 «Iyunti tikpilee, bin cáá dibeel pɔŋŋuee dù ditundi kí ŋúbíǹ bi-bɔɔbi bin pu bi mákée bí nīn kpèé. Míǹ boonee ní bí yàntī bi-bɔɔbi gbanti ń kpòotī-bi. Bi ŋūǹ kí kpɔ̀ maanyiibab gba kí jī dibɔkpil ní kí dáaĺ inaabu tikpil kí tɔ̄ bi-ba pu. 18 Di sá yii bibɔɔtiibi gbanti ŋūǹ kí dū biibii nì tinyimɔmbɔti kí ŋmàtiǹ biyidambi bin sá bibulcinnibee. 19 Tiŋman, bin kaa dì nsammɔnti pu ki tūǹ bi-tundee ŋūǹ kí ŋá tibɔkpitil tikpil. Ni ŋūǹ kí kpèè ti-yaajatuuŋŋi maam poon kí ká míǹ, ama ni gíti ŋūǹ kí kpèè tin bíi bàń-ti kɔŋkɔnnee pu kí ká míǹ. 20 An pu ní kí yòon̄ kɔŋkɔnnee kí nīn cée, m làá pɔ́ɔǹ kí yàntī bin kɔkɔ kóò m-beelinee ń nīn bí nsɔŋfi nì ŋgbansɔŋfin. 21 An puee m làá cáań dikpántil din máaǹee, ní kí dū deedee kí kpèè tibɔti tin m làá sòoǹee.
22 «Tí dū umaseeduwaanja Ameedata un kaa sá Peersi tindambikee jipɔɔn Amaani bɔti kí ŋá tibɔŋmantikaal. Kijapaai gbanti kaa cáá kulaŋŋaŋfitiiu kii timbee. Nì míǹ kɔkɔee, m nìn fōō-u m-cee. 23 M nìn píí-u kubɔɔtiiu kii m nín bɔ́ntì ki ŋá dinibul kamaa niliu puee ní. Di sá yii bi nìn yíì-u <dibeel Baa> ní. M yaa nìn līntèe, úǹ di nìn sá unikpaan un pá m-puee, ní báà ŋma nìn gbàantí u-nimbiin. 24 Ama waa ŋúń ki cúú u-ba ki yōoǹ u-ba yilpu, ní ki pɔ́ɔǹ u-ba kí cúú dibeel nì dimaŋfal kí fōō m-cee. 25 Di sá yii u nín sòon̄ tinyimɔmbɔti kɔkɔ nì ti-bulifee, u nyàab̄ yii ḿ bàà kpɔ̀ Maardoosee un di fīī-mi ki pée ŋáań-mi tiŋan kaa gbèentée ní. U nyàab̄ kí bàà kpɔ̀ Eesiteer un di tútúǹ-mi ki tíkí-mi tiŋan m-bɔtiiti poonee. U gíti nyàab̄ kí nàan̄ bi-nibul kɔkɔ. 26 Nì nsan gbanti puee, u dākafì kí kàkatī-ti kí dū Peersi beel kí tīī Maseeduwaan yab. 27 Kijapaai gbanti sá unikpiti ŋfunyɔm mita pu ní. U nyàab̄ kí kpɔ̀ kí céetí Juuda yab. Ama m dáań ki ká yii Juuda yab kaa sá binikpitib, di sá marab bin sá deedee yabee di kpòotī-bi. 28 Kí kūtèe, bi sá dimaŋfal Nimbɔtiu biyaamu ní. Unimbɔti gbanti bí yilpu fɔ́ŋŋŋ ní ki sá ukpaan. U pée tīī m-beel nnaam doooo m-naanjab yuntiŋu ki dāa sāā díǹ. 29 An sɔ́ ní taa dū kugbɔŋu kun Ameedata jipɔɔn Amaani ŋmàn̄ee kí tɔ̄ ditundi. 30 Di sá yii kijapaai kin ŋmàn̄ tigbɔn gbantee, bi lúntì u nì u-dicaŋku kɔkɔ yab ndɔ pu Suusi tiŋki punyɔkɔpu. Unimbɔti un sá tiwan kɔkɔ Dindaanee dáaĺ u-tafal min máaǹee kaa tāaǹ. 31 Kugbɔŋu kun m ŋmàn̄-ni kɔŋkɔnneeyee, ní dū-ku kí nákań imɔŋkijaa pu, ní kí pɔ̄ Juuda yab dibatɔl bí nóó bi-yaajakoobiliŋ. 32 Dibindi poon uŋmal saalaa nì uliliiti, an dàkà yii Adaar ŋmaliu poon iwiin saalaa nì ntataati poonee, ní dāá yīkì kí tūtuǹ-bi bí jáǹ bin làá dāá jáǹ-bee. 33 Tiŋman dinibul din Unimbɔti lēēyee bàà làá nìn kúntí ŋwiin gbanti ní. Too, Unimbɔti un jīǹ tikɔkɔ pu dibeelee dū ŋwiin gbanti ki kpántì dipɔɔpindi wiiŋŋu. 34 Ni mun ń dū ŋwiŋkpaan nee kí kūtì ni-jiŋaalib bin ni pée jīǹee pu kí fàal̀ min làá nyā mi-bee. 35 Kí yòon̄ díǹ kí nīn cée, ŋwiin nee làá nīn téetí yii man nì Peersi yab bin cáá nlammɔntiimee nìn ŋmátì ki nyáń dinimbinaamaŋkpaandin. Ŋu làá nīn téetí bin nìn bóob́ m-pu kí jáǹ-mee yii bi làá dāá nàan̄-bi. 36 M làá gíí kitiŋ kin kamaa àá kitiŋgbaŋ kin kamaa kaa làá ŋá kí nóó nì m-marab nee pu diŋuul. Bi làá tūū mu-nib ŋŋmi ní kí wà mu-diiŋŋi. Uniseen kaa dāa gíti ŋūǹ kí kɔ́ mu-ni. Ki kpáaǹ gba inoon nì ipeel nimbiliŋ kaa dāa gíti là kí wāl̀ ipaan gbanti ní kí dāá dū-i kí fá kí nīn cá jaanjaan.
Currently Selected:
Esther (grec) EE: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.