Esther (grec) 7
7
Amaani cooi nì u-kúm
1Ubɔti nì Amaani búntì unimpubɔti Eesiteer cee kí jī tijin. 2Ŋwinliliiti dal bi jíń ki nyùn̄ ki dóòyee ní ubɔti bālifì unimpubɔti Eesiteer yii: «Ba ní a là ní? Báà an yaa sá m-beel dijandi ní a yaa bālifì-mi, m làá tīī-si.» 3Ní unimpubɔti bí yii: «Too ti-baa ubɔti, m yaa ká diyimɔɔl a-cee ní an yaa fáatiǹ-see, á dā man nì m-nibul maŋfal kí líí. Tin páb́-mi m là kí mèè-see dee, ti-baa ubɔti. 4Di sá yii bi dū man nì m-nibul ki nyáfì bí kpɔ̀ kí céetí-ti, kí fūkul̀ ti-gaajawanti, ní ti nì ti-biyaamu ń kpántí iyumbu. Ama m ŋmí kaa lī tiba ki dāa sāā díǹ, di sá an kaa kítì yii ukuŋfil un bí mimmee ń nīn bí ubɔti tundin.» 5Niinee ní ubɔti bālifì yii: «Ŋma di sá-u ní ki ŋá míǹ?» 6Ní Eesiteer kíí-u yii: «Ti-nannanliu di sá Amaani unikpiti nee!»
Niinee dinyoondi kɔ́ Amaani ubɔti nì unimpubɔti nimbiin. 7Ní ubɔti fōō diŋuul ní ki yíkì ki yāntì tijin ki nyáń ki yú mmɔŋki. Amaani nìn gbíntì Eesiteer cee ki bíi gbàam̄-u, kun puee u nìn ká yii tin poon u bée kaa ti ŋān̄. 8Ubɔti nyánní bukpaan ki kɔ́nnée, Aaman dɔ̄ kilambaŋ kin pu Eesiteer nìn kēe ki bíi gbàam̄-u. Dicilpu niinee ní ubɔti téeń yii: «A ŋá tin bí nee kɔkɔ an kaa bàn̄-see, a gíti là kí dòon̄ nì m-nimpuu m-diikunaa!» Amaani gbìl̄ mimmee ní icoo cúú-u ní u fātì u-nimbiin.
9Niinee Buugatan, ubɔti faabi kansikin ubɔ bí ubɔti yii: «Ti-baa ubɔti, Amaani u-ba bɔ́ntì ndɔ ŋubɔ kí dū Maardoosee un mɔ́tì ubɔti puee kí lúntí, ndɔ gbanti dìin̄ u-mɔŋkiŋu. Ŋu-fɔkɔŋŋu sá meetab mmuŋku nì biŋmoo.» Ní ubɔti bí yii: «Bí dū Amaani kí lúntí ndɔ gbanti pu.» 10Ní bi dū Amaani ki lúntì ndɔ ŋun u nìn bɔ́ntì ki yóoǹ bí dū Maardoosee kí lúntée. Niinee ní ubɔti ŋuul sɔ̄ŋkì.
Currently Selected:
Esther (grec) 7: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.