Esther (grec) B
B
Bi nyántì mara kí kpɔ̀ kí céetí Juuda yab
14 Ubɔti nín ŋmàn̄ kugbɔŋu kuŋyee sèé:
«Ubɔtikpaan Artaseerseesi ŋmàn̄ kugbɔŋu kí tīī ntiŋgbamu imuŋku iluu nì mululi gɔminab nì bikàliŋkpilib bin bí bi-taapuee.
15 M jíń atimbun kupaau pu dibeel ní m-pɔŋŋu tālim̀ ki gbí kitiŋ kɔkɔ. Nì míǹ kɔkɔee, maa làá yàntī dibeel pɔŋŋu ŋun m cááyee ń kɔ́ǹ-mi dilambilin, ama nì dibasintil nì kulaŋŋaŋfitiiu ní m làá dūú jī dibeel. M yaa ŋá mimmee, m làá ŋmā kí nyāntí bin pu m jīǹ dibeelee agìń poon, kí yàntī dinimbiŋubil ŋanti ń nīn bí m-beelin, kí yàntī binib ń nīn tɔ́ bi-ba kí còom̀ m-beel kɔkɔn ní kí yàntī ŋgbansɔŋfi ŋun unil kamaa nyàab̀ee ń nīn bí ŋyunti kamaa.
16 M bālfì m-saŋkiliibi min ní m làá dī kí ŋmā kí ŋá mimmee. Bi-kansikin ubɔ, bi yíì-u Amaani nìn pée jítiǹ ti-kɔkɔ iciin poon ní ki nìn dàkā-mi nlammɔntiim ki yú nì mi deedee. M-beel poonee, m yaa līntèe, úǹ di nìn pá. 17 U tùkū-mi yii dinibul diba bí ki cáá ilandɔkɔkpiti ki kpátìi gbí duulinya nibuliŋ kɔkɔ kansikin. Binib gbanti cáá marab bin nyáń bi-ba nì atimbun ŋin kíǹee yabee. Bi yíití múlmul kí nīn tɔ́ ubɔti yaa lēē tin ki síiǹee, ní ki ŋūǹ kí yàntī dibeel din m bíi jīǹ nì deedee nì nnyɔɔpee poon an mɔ̄ǹ báà ŋmee ń bīil̀. 18 M gbìl̄ yii dinibul din nyáń di-ba gbanti pée jáà nì inifunaan kɔkɔ ní. Kun gàntī-bee di sá bi nóó marab bin ní atimbun ŋin kíǹee kaa nyée. Bi jáà nì tin kɔkɔ m ŋáańee ní ki tūǹ titumbilindi. Bi ŋáań mimmee ki nàantí ŋgbansɔŋfi ŋun bí m-beelinee. 19 An pu ní m tīī mara yii bí kpɔ̀ kí céetí bin kɔkɔ pu Amaani ŋmàn̄ kugbɔŋuee, ubɔ ń taa kíń. Amaani gbanti di kpòotī dibeel tuuŋŋi, ki bí m-cee ní ki sá dinibul baa. Bi sá ti-nannanliibi ní. Ti làá kpɔ̀ bi-kɔkɔ, kí kpáaǹ binimpoobi nì mbiyaamu. Taa làá sɔ̄ bi-saai, kaa làá yàntī ubɔ. Mara nee sá kí tɔ̄ ditundi dun bindi ní, uŋmal saalaa nì uliliiti, uŋmal un bi yíì Adaaree wiiŋyi ŋubɔ kpá saalku dal. 20 Ti yaa ŋá mimmee, binib bin pée jáà nì bin kíǹee gbanti làá kɔ́ ditaŋkpiilin ŋwimbambaanti, ní kaa làá ti ŋmā kí pìin̄ nsan dibeel tuuŋŋi ń taa còom̀ kii an nín máaǹ puee dibatɔl nì ŋgbansɔŋfin.»
Currently Selected:
Esther (grec) B: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.