Esther (grec) 2
2
Eesiteer kpántì unimpubɔti
1Míǹ jítì boon, ubɔti Asuweerusi ŋuul sɔ̄ŋkèe, ubɔti kaa ti yíiń Fastii ú dāan̄ u-cee. Di sá yii u nìn téetì tin unimpubɔti nìn ŋée nì u mun nín lēē tin ki síiǹ u-puee. 2Niinee ní ubɔti tɔntɔŋkpilib bí-u yii: «An máaǹ tí nyàab̀ bisapɔmbi bin ŋān̄ kunyaaŋŋu tikpil kaa nyí uninjee kí tīī ubɔti. 3An puee ubɔti ń lēē u-tiŋki jaaŋŋi kɔkɔn bikàlimbi bí nyàab̀ bisapɔmbi bin ŋān̄ kunyaaŋŋu tikpil kaa nyí uninjee. Bí cáań-bi Suusi ditiŋyilin, kí kɔ́ǹ-bi binimpoobi diiŋŋin. Bí dū-bi kí ŋúbiǹ Eegee, ubɔti faaliu un cí ubɔti nimpoobee, ní ú tīī-bi ikpafi in ŋáŋkí tiwunee. 4Ní usapɔɔn un yaa fáatì ubɔtee ń kpántí unimpubɔti kí fōō Fastii yil.» Tibɔti gbantee nìn mɔ́ɔkiǹ ubɔti ní u yāntì bi ŋá míǹ.
5Uninja ubɔ nìn bí Suusi tiŋkin, bí yíì-u Maardoosee. U-naanjab di sá Yaayiir nì Simeeyii nì Kiisi. U nìn sá Beenjameen naakookun ní. 6Bi nìn cúuń-u kuyuŋu ní. U nìn kútì binib bin Babiloon yab bɔtiu Neebukadineesaar nìn cúuń kuyuŋu Jeerusaleem tiŋkinee. 7Maardoosee nìn fōō u-baawaai Amiinadaab bisal u kā u-cee, bi yíì-u Eesiteer. U-na nì u-baa nìn kpíì, ní Maardoosee fōō-u ki ŋúb́ kí dāá dū-u kí kpántí u-nimpuu. Usapɔɔnee nìn ŋān̄ tikpil.
8Bi nín dū ubɔti nín lī puee nì u-marau ki báakì ntimu poon yii u nyàab̀ bisapɔmbee, ní bi kóoǹní bisapɔmbi tikpil ki cáań ki kpáfì Suusi tiŋkin, ní Eegee kpèé-bi. Bi cáań Eesiteer mun ubɔti cindi, ki dū-u ki ŋúbiǹ Eegee un cí ubɔti nimpoobee. 9Eesiteer nìn kɔ́ kijapaayee, ki ká diyimɔɔl u-cee. Ní u nyàab̄ ikpafi in u làá nīn ŋmìtī u-wunti ń nīn ŋān̄ee nì tijin tin u làá nīn jīǹee malaa ki tīī-u. U nìn lēē bisapɔmbi bin bí ubɔti cindinee biluli ki tīī-u bí nīn bí u-cee ki tútúǹ-u, ní ki kpēē ubɔti diiŋŋi kumɔntiiu ki cáá-bi ki kɔ́ǹ niin. 10Eesiteer kaa nìn nyántì u-ba ki dàkā yii u sá dinibul dinee àá u-nyeeŋŋu sá doo, kun puee Maardoosee nìn kpáafì-u yii ú taa pée tùkù ubɔ u-nyeeŋŋu. 11Baabadalee Maardoosee pée cá binimpoobi diiŋŋi mɔŋkiŋu ní ki kpèé yii Eesiteer bí mana àá bi ŋúb́-u mana.
12Ŋyunti ŋun ní usapɔɔn yaa dū ikpafi ki ŋmītì u-wunti iŋmal saalaa nì ili ki dóò kii an nín bàlifī unimpu ń dū ŋyunti ŋun kí bɔ́ntí u-bee, ní ú nín cù ubɔti Asuweerusi cee. Di sá bi nìn dù ŋkpam min bi yíì miiree ní kí nùkù bi-wunti iŋmal iluu, ní kí dū iŋmal iluu mun kí ŋmìtī binimpoobi kpafii in ŋáŋkí tiwunee. 13Boonee ní usapɔɔn kamaa ń cù ubɔti cee. Bi nìn lèekī uninja ubɔ ní ú yòon̄ usapɔɔnee binimpoobi diiŋŋin kí céeǹ-u kí cùnnì áli ubɔti dumpu. 14U nìn cá kujoou ní kutaa yaa wúntì kutaafaauee ní ú fàtīí gítiń kí kɔ́ binimpoobi bililiitiibi diikun, ní ubɔti faaliu Gayi un cí ubɔti nimpoobee cí-u. Waa ti gítí ubɔti cee, see un u yaa yíiń u-yindi ki bí yii ú dāan̄ee baba.
15Abinadaab bisal Eesiteer, Maardoosee baawaai bisal yuntiŋu ŋun sá ú dūú bɔ́ntí u-ba kí cù ubɔti ceeyee nín sāāyee, waa yíì isaŋki in ubɔti faaliu un cí binimpoobee tīī-uee báà iba. Eesiteer nìn kāntí diyimɔɔl un kamaa yaa pée ká-uee cee. 16Ubɔti Asuweerusi beel bindi diluluútiil uŋmal un bi yíì Adaaree poon, ní bi cáá Eesiteer ki cūnnì ubɔti dumpu. 17Ubɔti naŋki nìn kɔ́ Eesiteer tikpil ní u ká diyimɔɔl ki jítiǹ bisapɔmbi bin kíǹee kɔkɔ. U nìn dū u-nimpuu beefuuliiki ki cíkiǹ-u. 18Ubɔti nìn ŋá tican ki yíiń u-bɔɔbi nì bikàliŋkpaambi bi jíń u nì Eesiteer nín cáab́ tɔb puee jiŋaaliu iwiin iluli. An puee u nìn pú u-tiŋki jaaŋŋi kɔkɔ yab lampoo.
19Mimmee Maardoosee nìn bí ubɔti cindi ki sá ukàlinja. 20Eesiteer kaa nìn yāntì bi béè yii u sá Juuda yab timbundi, kun puee Maardoosee nìn kpáafì-u yii ú taa pée tùkù ubɔ u-nyeeŋŋu. Ama ní ki bí-u yii ú nīn fàŋkí Unimbɔti ki tɔ́ u-marab kii u nín nìn bí úǹ cee ki ŋáań miŋyee. An puee Eesiteer kaa nìn kpántì mbimbim.
Maardoosee cúú binib bin là kí kpɔ̀ ubɔtee
21Ŋyunti ŋubɔee ní bi kpántì Maardoosee mpaan ki dū-u ki kāaǹ ŋkakakpaan ŋubɔ pu, ní an kaa mɔ́ɔkiǹ bikàliŋkpilib bin kpèé bin cí ubɔtee ní bi fōō diŋuul. Bi nìn bíi nyàab̀ bi nín làá dī pu kí kpɔ̀ ubɔti Asuweerusee. 22Maardoosee gbìl̄ an bɔti ní ki dūu tùkū unimpubɔti Eesiteer, ní u mun dū an bɔtee ki nāatì ubɔti binibee nín sòon̄ u-pu kí ŋá-u miŋyee kɔkɔ. 23Ubɔti yíiń bikàliŋkpilib bilee ki bālifì-bi, ní ki dū-bi ki lúntì idɔ pu. Boonee ní u bí bí dū an bɔtee kí ŋá dibeel bɔti gbɔŋkun, binib ń nīn téetí atummɔnti ŋin Maardoosee túnnée pu.
Currently Selected:
Esther (grec) 2: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.