Ephésiens 4

Tí ŋámaan ubaanti

1An puee, man Pɔɔl un bí sarkan m nín nóó ti-Dindaanee puee, m mèé-ni yii ní nīn bí mbimbim min poon Unimbɔti yíiń-ni ní nīn bée. 2Ní nīn sìntīǹ ni-ba taapu kí nīn mɔ̄, kí nīn cáá kimɔtii tɔb pu, kí nīn ŋúb́maan tɔb nì dineendi poon. 3Ní pɔ́ɔǹ ni-ba kí nīn ŋúb́ nnyɔɔpee ŋun Unimbɔti Fam tìì-nee, ŋgbansɔŋfi ń nīn bí ni-kansikin ní ŋá ubaanti. 4Yeesu wunti sá tibaantiil#4.4 wunti sá tibaantiil: dūú ŋmàntī nì 2.16, Room 12.5, 1 Kɔra 12.12. ní, ní Unimbɔti Fam mun sá mbaantiim. Míǹ ní ti-kɔkɔ máká kuwambaantiiu kun pu Unimbɔti yíiń-nee. 5Ti-kɔkɔ Dindaan sá ubaanti, ní ti-fookiiu sá ubaanti, ní Unimbɔti nyim fàltam sá mbaantiim. 6Unimbɔti sá ubaanti, ki sá tikɔkɔ Baa, ki tɔ́kɔ́ tikɔkɔ pu, ki dì tikɔkɔ pu ki tūǹ u-tundi ní ki bí tikɔkɔn.

7Un sá kamaa fōō dipɔl kii Kriisitoo nín tīī-u puee. 8Kii an nín ŋmàn̄ Unimbɔti gbɔŋku poon puee yii:

«U nín jɔ́ḿ yilpuee,

u kpáaǹ iyumbu

ní ki pú binib apɔl#4.8 Kpèè Ilan 68.19..»

9Mimmee, dinyɔɔbundi din lī yii: «U jɔ́m̀ yilpuee» là kí lì yii ba dee? An taapu di sá yii u nìn dáá sīntìń taapu doo nee ní. 10Yeesu Kriisitoo un sīntìń taapu dooyee, úǹ ubaantee di tí jɔ́m̀ yilpu fɔ́ŋŋŋ kí gbí duulinya kɔkɔn. 11Úǹ di yākatì atuun ki tīī u-nib, biba ń nīn sá u-kpambaliŋ, biba ń nīn sá Unimbɔti bɔnaatiliibi, biba ń nīn yìiǹ ki sòoǹ Yeesu Bɔmɔntiiti, biba ń nīn sá u-nikitiŋ kpootiliibi ní biba mun ń nīn sá Unimbɔti bɔti dàkaliibi#4.11 Dūú ŋmàntī nì 1 Kɔra 12.28.. 12U yākatì atuun míǹ ki tīī Unimbɔti nib ń ŋmā kí tɔ̄ Unimbɔti tundi mmɔntiim án nín làá ŋá pu Kriisitoo wuntee ń nīn cá nyɔkɔpuee ní. 13Míǹ di làá yàntī ti-kɔkɔ ń kpántí ubaanti ti nín fōō Unimbɔti Jipɔɔn Yeesu Kriisitoo ki kííyee pu, ní kí béé-u mbaamɔm. Mimmee, ti cíkití Unimbɔti bɔtin ní kí kpántí biniŋmambi, kii Kriisitoo u-ba nín bí puee. 14Ŋyunti gbantee, taa ti sá kii campɔntibee biŋmatinliibi cáá bi-bɔti ki ŋmàtíǹ-ti kii nnyim nì kubuŋu nín téekí buŋalimbu pu bu yìiǹ ajan kɔkɔ puee. 15Ama ti máaǹ kí nīn cáá dineendi ki sòoǹ Yeesu bɔti nì ibaamɔn, kí nīn wīintí kí tin ŋmàntīǹ Kriisitoo un sá u-nikitil yilee. 16Úǹ di kpáfì u-nikitil din sá u-wuntee, bi ŋá ubaanti, kii unil wunti jaŋŋi nín kpáfì ki nɔ̀b̄ tɔb pu puee. Ajan kɔkɔ yaa tūǹ ŋi-tundi nín sá puee, tiwun wīintí ní tiŋan. Míǹ ní dineendi yaa bí Kriisitoo nikitil kansikinee, dì cá nyɔkɔpu ní tiŋan.

Kriisitoo yab bí dimaŋfapɔndin

17Tibɔti tin m làá sòoǹ nì ni nee, ti-Dindaan nyɔkɔpu ní m làá sòoǹ-tì. Ni-bimbim ń taa nín̄ bí kii bin kaa nyí Unimbɔtee nín bí puee. Bíǹ nóó bi-landɔkɔkulimii ní. 18Bi-pɔbiliŋ nín gbìfì baa nyí nnimbɔtisanee pu ní bi dáá bí dibɔmbɔndin ki lántì dimaŋfal din Unimbɔti tīīyee. 19Baa nyí icoo, ki dū bi-ba ki tīī atuŋkpiti ní ki ŋáań tijɔkɔndi kɔkɔ nì ti-bulifi ki cá, kaa gbèentí.

20Nimbee, kaa sá míǹ ní bi dàkā-ni ní béé Kriisitoo. 21Ni lafun gbìl̄ tikɔkɔ u-pu, ní bi dàkā-ni ni béè ibaamɔn in bí Yeesunee. 22An puee, fámaan ni-bimbim min kaa ŋān̄ee, min cāabìń-ni nnimbitaataam ki bíiĺ-nee. 23Ní yàntī Unimbɔti ń kpántí ni-pɔbiliŋ nì ni-landɔkɔi mpɔm. 24Ní nīn nóómaan mbimbipɔm min Unimbɔti náań ki nántiǹ u-yam#4.24 Dūú ŋmàntī nì Diny 1.26-27. min sá deedee nì circir ki nyánní ibaamɔnnee.

25An puee, ní fá inyimɔn. Báà ŋma ń sòoǹ u-juti ibaamɔn#4.25 Kpèè Saka 8.16., kun puee ti-kɔkɔ kpáfì ki ŋá tiwumbaantiil ní. 26Ni yaa fōō diŋuulee, ní nīn nyí nì ni-ba kí taa kɔ́ ikpitin#4.26 Ilan 4.5., kí taa nín̄ díkí diŋuul míǹ áli kunyeeu ń tin mɔ́. 27Ní taa pɔ̄maan Sitaan nsan. 28Un nìn sá unaayuuyee ń taa ti yɔ̀. Ú pɔ́ɔǹ u-ba kí tɔ̄ ditundi min máaǹee kí kpíiǹ u-ba kí ká kí tūtuǹ uwɔfi. 29Tibɔkpitil ń taa nín̄ nyēē ni-nyɔmmun, ama ni yaa làá sòoǹee, nín̄ sòom̀maan tin làá tūtuǹ bin fōō Yeesu ki kííyee ń cù nyɔkɔpu, kí kèetī bin bí ki pílifée mun. 30Ní taa kɔ́ǹ Unimbɔti Fam kunimbaau#4.30 Dūú ŋmàntī nì Yees 63.10., u-Famee ní u dūu dáań-ni ki síiǹ yii ŋwiin ŋubɔ dòoń u làá dāá fīī-ni kí líí kɔkɔ. 31Ní nyāntímaan ni-kansikin ntuntun nì kináŋ nì diŋuul tɔb pu, nì kujaau, nì tɔb boon disambiil, kí kúntímaan ntoom nì mi-yalii kɔkɔ. 32Ama nín̄ sámaan binimɔntiibi, kí nīn sūǹ tɔb saai, kí nīn pūǹ tɔb kpitii, kii Kriisitoo puee, Unimbɔti nín dū ni mun kpitii ki pú-ni puee#4.32 Dūú ŋmàntī nì Maat 6.12,14..

Currently Selected:

Ephésiens 4: BASSARDC

Highlight

Copy

Compare