Deutéronome 5

Unimbɔti tīī u-nibul marab saalaa

1Mooyiisi yíiń Isirayeel yab kɔkɔ ki kpáfì ní ki bí-bi yii:

«Pīlifìmaan Isirayeel yab, pīlifìmaan abɔkpaa nì akoobil ŋin m làá dūú sòoǹ kí ŋá ni-tafalin díǹ nee, kí bīfì-ŋi, kí nīn ŋúb́-ŋi, kí nīn ŋáań kii ŋi nín bí yii ní ŋá puee. 2Ti-Dindaan ti-Nimbɔtiu pūtì ki pōoǹ-ti dipoondi Ooreeb jool pu. 3An kaa nìn sá ti-baabi ní ti-Dindaan nìn pūtì ki pōoǹ dipoondi gbanti, ama timbi bin kɔkɔ bí doo díǹ ki bí dimaŋfalin nee ní u nìn pūtì ki pōoǹ dipoondi gbanti. 4Ni-nimbiin niin, dijool pu ní ti-Dindaan sòon̄ nì ni ŋŋmi poon. 5Ŋyunti gbantee, man nìn sí ni nì ti-Dindaan kansikin ní ki cáá ti-Dindaan nyɔɔbundi ki nàatī-ni, kun puee ni nìn fàŋkí ŋŋmi gbanti kaa nìn kíí kí dàb̄ dijool. Ti-Dindaan nìn lī yii:

6«Man di sá a-Dindaan a-Nimbɔtiu un di nyántìń-si kuyuŋun Eejipiti tiŋkinee.

7«Á taa jāam̀ unimbɔti ubɔ kí kūtì man pu.

8«Á taa mɔ́ɔ́ diwaal diba kí nántíǹ tiba tin bí yilpuee àá tin bí kitiŋ pu taapu dooyee àá tin bí nnyimin kitiŋ taapuee. 9Á taa gbàan̄ awaa gbanti nimbiin ní kaa nín jáam̀-ŋi, kun puee mama a-Dindaan a-Nimbɔtiuee, m sá Unimbɔti un cáá ipoompoonee ní. Ubɔ yaa ná-mee, m dátí udaan tafal ní kí dāá dáaĺ u-biyaamu mun tafal kí cáá sāā anaantitɔntɔkɔ ata kii anaa pu. 10Ama bin néeń-mi ki ŋúb́ m-marabee, m ŋáań-bi tiŋan ní kí cáá sāā anaantitɔntɔkɔ kutuku pu.

11«Á taa nín̄ yíì man a-Dindaan a-Nimbɔtiu yindi fám fám, kun puee man a-Dindaan kaa làá dūú pɔ̄ un ŋáań mimmee.

12«Á nīn tɔ́ ŋwiŋŋuŋfikaa ŋú nīn sá circir wiiŋŋu ki tīī-si, kii man a-Dindaan a-Nimbɔtiu nín síiǹ-si á ŋá puee. 13A cáá iwiin iluu kí tɔ̄ ditundi, kí ŋá tin kɔkɔ a cáá kí ŋée. 14Ama ŋwinluluúti dal sá ŋwiŋŋuŋfikaa ní, ŋwiin ŋun a dūu sú man a-Dindaan a-Nimbɔtiuee. Á taa tɔ̄ báà ditundi diba ŋwiin gbanti. Sii a-baaa, a-jipɔmbaaa, a-bisalibaaa, a-tɔntɔnliibi bininjab nì binimpoobaaa, a-naayaaa, a-mammuɔɔɔ, a-waŋkutaaa, binicambi bin kóò a-pueeyaaa, ubɔ ń taa tɔ̄ ditundi. A-tɔntɔnliibi bininjab nì binimpoobi máaǹ kí tɔ̄ bi-ba kí ŋùŋfì kii siiyee ŋwiin gbanti. 15Á téetí yii a nìn kāl̀ kuyuŋu Eejipiti tiŋkin ní man a-Dindaan a-Nimbɔtiu dū m-pɔŋkpaaŋŋu ki nyántìń-si kitiŋ gbantin. An pu ní man a-Dindaan a-Nimbɔtiu tīī-si mara yii á nīn tɔ́ ŋwiŋŋuŋfikaa.

16«Á nīn tɔ́ a-baa nì a-na kii man a-Dindaan a-Nimbɔtiu nín síiǹ-si mara yii á ŋá puee. A yaa ŋá mimmee, a làá kàl̄ kitiŋ pu kí yúntí ní an bútí-si kitiŋ kin man a-Dindaan a-Nimbɔtiu làá dūú tīī-see poon.

17«Á taa kpɔ̀ unil.

18«Á taa ŋá tilaakpaal.

19«Á taa yɔ̀.

20«Á taa lēē inyimɔn seerau kí túń a-juti pu.

21«Á taa nín̄ cáá a-juti nimpuu pu nnimbitaataam. Á taa nín̄ cáá a-juti diiku àá u-tiŋki àá u-tɔntɔnliu uninja àá unimpu àá u-naau àá u-maŋki àá tin pée sá a-juti wantee pu nnimbitaataam.»

22An nìn sá ŋŋmi nì ditagbandi nì dibɔmbɔŋkpaandi poon ní ti-Dindaan nìn sòon̄ nì ni-kɔkɔ mpɔn dijool pu ní ki tīī-ni marab nee. Waa nìn gíti kútì tiba an pu. Míǹ boonee ní u ŋmàn̄ marabee titaŋkpapilindi tili pu ní ki dūu tīī-mi.

Mooyiisi, Unimbɔti bɔnaatiliu

23Ŋyunti ŋun ni gbìl̄ nneen sòoǹ dibɔmbɔndi poon dijool mun fōō ŋŋmee ní ni-naakɔti kpilib kɔkɔ nì ni-kpootiliibi sútì ki pìlīń-mi, 24ní ki lī yii: «Kpèè, ti-Dindaan ti-Nimbɔtiu yāntì ti ká u-nyooti nì u nín sá ukpaan miŋyee, ní ki yāntì ti gbìl̄ u-neen mun pu ŋŋmi poon. Díǹ ní ti nín ká yii Unimbɔti ŋūǹ kí sòoǹ nì unil, ní unil gbantee ń taa kpú kí nīn gbíntìi bí dimaŋfalin! 25Kɔŋkɔnnee, ba pu ní tí dū ti-ba kí tīī ŋŋmikpaan nee ń wà-ti tí kpú ní? Ti yaa gbíntìi bíi pílifí ti-Dindaan ti-Nimbɔtiu nín sòoǹ pu ŋŋmikpaan nee poonee, see tí kpú. 26Di sá yii nisaal ulɔu di pée gbìl̄ dimaŋfal Nimbɔtiu neen pu, u sòon̄ ŋŋmi poon kii timbi nín bíi gbìl̀ pu nee ki ŋmátì#5.26 Isirayeel yab ceeyee, unil yaa wál̀ Unimbɔti àá udaan nì Unimbɔti sòon̄ee, see ú kpú (kpèè 4.33, Bibɔ 13.22).? 27Míǹ puee, sii sútí kí pìl̄ ti-Dindaan ti-Nimbɔtiu kí pīlifì tin u làá sòoǹee. Míǹ boonee á gítiń kí tùkù-ti tin kɔkɔ ti-Dindaan ti-Nimbɔtiu tùkū-see. Timbi làá pīlifì tin a làá sòoǹee kí ŋá míǹ#5.27 B. 22-27: kpèè Eebru 12.18-19..» 28Ti-Dindaan nìn gbìl̄ tibɔti tin ni nìn sòon̄ m-ceeyee ní ki bí-mi yii: «M gbìl̄ tin kɔkɔ binib nee tùkū-see. Tin kɔkɔ bi lēe, an kítì míǹ. 29Bi-pɔbiliŋ yaa bàà bɔ́ntì kí nīn fàŋkí-mi kí ŋúb́ m-marab kɔkɔ baabadal, án bàà làá nīn ŋān̄ ki tīī bi nì bi-biyaamu kí nīn cáa cá jaanjaan! 30Cùú tùkù-bi yii báà ŋma ń nīn gítí u-tantiun. 31Ama siiyee, gbíntí m-cee doo ḿ dū m-marab nì m-bɔkpaaŋi nì m-koobiliŋ kí tīī-si á cáá dàkà-bi, bi yaa bàn̄ kitiŋ kin m làá dūú tīī-bi bí nīn kíǹ ki yèe poonee, bí nīn ŋúb́-bee.»

32An puee ní nīn nyíǹ ni-ba kí ŋá kii ti-Dindaan ni-Nimbɔtiu nín bí yii ní ŋá puee, kí taa kpòotī kí cù ŋgiil púɔɔɔ, kí taa kpòotī kí cù ŋgan pú. 33Ní nīn dī nsan ŋun ti-Dindaan ni-Nimbɔtiu cátì ki bíl̀ ni-nimbiinee, án nín làá ŋá pu ní nīn bí dimaŋfalin kí jī nnaam kí kàl̄ kitiŋ kin ni làá fōō kí nīn kíǹ ki yèe poon kí yúntée.

Currently Selected:

Deutéronome 5: BASSARDC

Highlight

Copy

Compare