Deutéronome 31
31
MOOYIISI KĀAǸ ISIRAYEEL YAB KI KPÍÌ
(31–34)
Joosuwa fōō Mooyiisi yil
1Mooyiisi cūtì ki dū tibɔti nee ki tùkū Isirayeel yab kɔkɔ. 2U nìn tùkū-bi yii: «M cáá díǹ nee abin dilaataal nì mmuŋku ní nee. Maa ti ŋūǹ kí nīn gbíntìi līī ni-nyɔkɔpu ki kpòotī-ni. Kí kūtì muee, ti-Dindaan tùkū-mi yii: <Aa làá dùtī Jɔɔdan buŋŋu nee#31.2 Kpèè Dikà 20.12.!> 3Ti-Dindaan ni-Nimbɔtiu u-ba di làá lìntī ni-nyɔkɔpu ní ní dùtī. U làá kpɔ̀ kí céetí atimbun nee nib ní ní fōō bi-timmu kí nīn kíǹ ki yì. Joosuwa di làá nīn līī-ni nsan ní ní dùtī kii ti-Dindaan u-ba nín lī puee. 4Kii ti-Dindaan nín ŋá Amɔɔr yab bɔtiibi Siiwɔn nì Ɔɔgi nì bi-timmu pu ki kūū ki céetì-bee, míǹ mbaantiim ní u làá ŋá bi mun#31.4 Kpèè Dikà 21.21-35.. 5Ti-Dindaan làá dū atimbun gbanti nib kí tīī-ni ní ní ŋá-bi kii m nín kpáafì-ni puee kɔkɔ. 6Ní pɔ́ɔm̀maan ni-ba kí ká dipɔbil. Ní taa fàŋkìmaan-bi kí taa yàntī ni-pɔbiliŋ ń bīil̀ bi-nimbiin. Di sá yii ti-Dindaan ni-Nimbɔtiu làá nīn bí ni-cee. Waa làá yàntī-ni, kaa làá dū-ni kí fá mun.»
7Niinee ní Mooyiisi yíiń Joosuwa ki tùkū-u Isirayeel yab kɔkɔ nimbiin yii: «Pɔ́ɔǹ a-ba kí ká dipɔbil, di sá yii sii di làá cáá dinibul nee kí kɔ́ǹ kitiŋ kin ní ti-Dindaan nìn pōoǹ kí tīī bi-naanjabee poon. Sii di làá yàkatī kitiŋ gbanti kí tīī bi-kɔkɔ an kpántí bi-kpaatanti. 8Ti-Dindaan di làá nīn līī a-nyɔkɔpu ní kí nīn bí a-cee. Waa làá yàntī-si, kaa làá dū-si kí fá mun#31.8 Kpèè Joos 1.5, Eebru 13.5.. Míǹ puee á taa fàŋkì, kí taa yàntī a-wunti ń yɔ̀tī».
Bi máaǹ kí nīn kàaǹ marab abin aluli kamaa
9Niinee Mooyiisi ŋmàn̄ Unimbɔti marab ki dūu tīī Leefii yab bisaraaŋaliibi bin tūntí ti-Dindaan poondi dakaauee nì Isirayeel yab tindaŋkpilib kɔkɔ. 10U kpáafì-bi yii: «Abin aluli kamaa, ŋyunti ŋun ní bi cáá apɔɔn dambi ki pūǹ-bee yaa bàn̄ ni bíi jīǹ tibìń jiŋaaliuee, 11Isirayeel yab kɔkɔ làá cù ti-Dindaan bi-Nimbɔtiu nimbiin mpaan ŋun pu u làá dāá lēē kí nīn bí ní nīn jáaḿ-uee. Ní dāá kàaǹ marab nee Isirayeel yab kɔkɔ nimbiin án kɔ́ bi-tafalin. 12Ní dāá kóoǹ samaa kɔkɔ, an dàkà yii bininjab nì binimpoobi nì mbiyaamu nì binicambi bin kóò ni-puee kí kpāfì. Bí dāá kàaǹ marab gbanti bí gbìl̄ kí bīfì kí nīn fàŋkí ti-Dindaan ni-Nimbɔtiu, kí ŋúb́ marabee ní kí ŋá bi nín lī puee kɔkɔ. 13Niinee, ni-biyaamu mun kaa nìn dá láá nyí marab gbantee ń gbìl̄, ní kí bīfì kí nīn kíǹ ki fàŋkí ti-Dindaan ni-Nimbɔtiu iwiin in kɔkɔ ni cáá kí kàl̄ kitiŋ kin ní ni làá dùtī Jɔɔdan buŋŋu kí cùú fōō kí nín kíǹ ki yì nee poonee.»
Isirayeel kaa làá yūĺ nì Unimbɔti deedee
14Ti-Dindaan bí Mooyiisi yii: «Kpèè, a-wiiŋyi kaa ti náaǹ, a-kúm wiiŋŋu tóobiń. Míǹ puee yíiń Joosuwa ni-kɔkɔ ń dāan̄ kí sīĺ dikpafindi tantiun ḿ tùkù-u tin ní u máaǹ kí ŋée.»
Ní Mooyiisi nì Joosuwa cūtìi kɔ́ circir kɔŋkooŋŋun ki síl̀. 15Bi bí niinee ní ti-Dindaan dɔ́miń bi-cee ntagbanloon#31.15 Kpèè Disa 13.21. poon ní ntagbanloonee cūtì ki síl̀ circir kɔŋkooŋŋu punyɔkɔpu. 16Ní ti-Dindaan bí Mooyiisi yii: «Kpèè, a làá cùú dòon̄ kí ŋàl̄ a-naanjab dee. A-kúm boonee dinibul nee làá cù kí nīn tòotī awaa ŋin bin bí kitiŋ kin bi làá kɔ́ kí fōō kí nīn kíǹ ki yì nee tòotēe. Bi làá dāá dū-mi kí fá ní kí kpìtī dipoondi din m pōoǹ-bee. 17Ŋyunti gbantee, m làá dāá gíí bi-pu diŋuul, kí dū-bi kí fá ní kí fàtī m-boon kí tīī-bi. Agìń tikpil nì dinimbinaamandi làá dāá jēetí bi-pu kí nàan̄-bi ní bi dāa kíǹ ki bàlifī bi-ba yii: <Agìń nee yaa bíi bàń-tee, mimmee an kaa sá ti-Nimbɔtiu nín kaa ti bí ti-kansikinee di yì-tàaa?> 18Bi-kpitii in bi bíi ŋáań ŋyunti ŋun bi cūtìi bíi tòotī awaayee pu ní m làá dāá mɔ̀tīí fàtī m-boon kí tīī-bi. 19Kɔŋkɔnnee, ŋmàmaan nlan ŋun m làá dàkà-ni nee nyɔɔbuŋŋi kí síiń. Sii Mooyiisi, á cáá nlanee kí dàkà Isirayeel yab ní kí yàntī bí bīfì-ŋu kí nīn gà-ŋu. Di sá yii nlan gbanti di làá dāá nīn sá m-seeradaaŋwu Isirayeel yab cee. 20M làá cáá-bi kí kɔ́ǹ kitiŋ kin ní m pūtì ki pōoǹ kí tīī bi-naanjabee, kitiŋ kin pu ní nnaabiim nì tisiil#31.20 Kpèè Disa 3.8. còol̀ee. Bi làá dāá jī kí díkí kí ŋá ŋkpam ní boonee bí dāá cù kí nīn tòotī awaa. Bi làá dāá kpèè-mi fám ní kí gbá kí kpìtī m-poondi. 21Ŋyunti ŋun agìń nì dinimbinaamandi yaa láa bàn̄-bee, nlan nee di làá dāá lēē seera kí kpɔ̀ bi-bɔti. Di sá ki kpáaǹ bi-biyaamu gba kaa làá dāá súntí nlan nee. Bi làá dāá nīn pée téetí ní ki gà-ŋu. M nyí kun bí binib nee pɔbiliŋinee kí wàatī gba ní ḿ nín cáá-bi kí kɔ́ǹ kitiŋ kin m nìn pūtì ki pōoǹ yii m làá tīī-bee poon.»
22Yaadal ní Mooyiisi ŋmàn̄ nlanee ní ki dū-ŋu ki dàkā Isirayeel yab.
23Míǹ boonee ní ti-Dindaan kpáafì Nuuni jipɔɔn Joosuwa ní ki bí-u yii: «Pɔ́ɔǹ a-ba kí ká dipɔbil#31.23 Kpèè Joos 1.6., di sá yii sii di làá cáá Isirayeel yab kí kɔ́ǹ kitiŋ kin m pūtì ki pōoǹ kí tīī-bee poon. Mama m-ba làá nīn bí a-cee.»
24Ŋyunti ŋun Mooyiisi ŋmàn̄ marab nee kɔkɔ ki ŋá kugbɔŋun ki dóòyee, 25ní u kpáafì Leefii yab bin tūntí ti-Dindaan poondi daakaauee yii: 26«Yòom̄maan marab gbɔŋku nee kí dū-u kí bíĺ kí kɔ́ĺ ti-Dindaan ni-Nimbɔtiu poondi dakaau. Niin ní u làá nīn bí kí nīn sá seeradaan ki kù ni-bɔti. 27Di sá yii m nyí ni-pu, m nyí ni-pɔɔpɔŋŋu pu. Ni yaa jáń nì ti-Dindaan ŋyunti ŋun ní m dá bí dimaŋfalin ki bí ni-cee nee, kin ataa aŋa pu ní, m-kúm boonee, naa dāa jáà nì u kí jītíǹ míǹ? 28Kóom̀maan ni-naakɔti kpilib nì ni-kpootiliibi kɔkɔ bí kpāfì m-cee, ḿ sòoǹ nì bi tibɔti nee bí gbìl̄ ní kutagbɔŋu nì kitiŋ mun ń nīn sá m-seeradambee. 29Di sá yii m nyí yii m-kúm boonee ni làá dāá kɔ́ ikpitin ní kí dāá fàtī ni-boon kí tīī tibɔti tin m dūu kpáafì-ni nee. Ŋyunti gbantee, ni-kpitii in ni làá dāá ŋá ti-Dindaan nimbiinee nì ni-tuŋkpitiŋ ŋin ni làá dāá ŋá kí yàntī ú gíí diŋuulee puee, digìńdi làá dāá kɔ́-ni.»
Mooyiisi laŋŋu
30Niinee ní Mooyiisi dū nlan nee nyɔɔbuŋŋi ki sòon̄ mpɔn an kɔ́ Isirayeel nikitil kɔkɔ tafalin.
Currently Selected:
Deutéronome 31: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
