Deutéronome 27
27
ISIRAYEEL YAB BÍI PÀKÀ UNIMBƆTI POONDI
(27.1–28.68)
Ataŋkpee ŋin bi cóoǹ Eebaal jool puee
1Isirayeel tindaŋkpilib nìn kútì Mooyiisi pu ki tīī Isirayeel yab mara nee yii: «Nín̄ ŋúb́maan marab bin kɔkɔ m tīī-ni díǹ nee. 2Ni yaa láa dūtì Jɔɔdan buŋŋu ki kɔ́ kitiŋ kin ti-Dindaan ni-Nimbɔtiu làá dūú tīī-nee poonee, ní dāá nyàab̀ ataŋkpakpaan kí cóoń ní kí dū kaaluupiin kí pīil̀-ŋi. 3Ni yaa láa pée dūtì mbunee, ní dāá ŋmà marab nee ataŋkpee gbanti pu. Boonee ní ní dāá kɔ́ kitiŋ kin ní ti-Dindaan ni-Nimbɔtiu dūu tīī-nee poon. Kitiŋ kin ní ti-Dindaan ni-naanjab Nimbɔtiu làá dūú tīī-ni kii u nín nìn pōoǹ-ni puee poonee, nnaabiim nì tisiil di còol̀#27.3 Kpèè Disa 3.8 nì tin bi ŋmàn̄ kugbɔŋu faaku taapuee.. 4Ni yaa láa dūtì Jɔɔdan buŋŋu ki dóòyee, ní dāá dū ataŋkpee gbanti kí cóoń Eebaal jool pu kii m nín kpáafì-ni díǹ yii ní ŋá puee, ní kí dāá dū kaaluupiin kí pīil̀-ŋi. 5Míǹ boonee ní dū ataŋkpee ŋin baa dū kukúluu ki kpítèe kí mā ti-Dindaan ni-Nimbɔtiu nsaraafan niin. 6Ni nín pée yōoǹ ataŋkpee ŋi bí pu amɔnee, ní dūú mā#27.6 Kpèè Disa 20.25. ti-Dindaan ni-Nimbɔtiu nsaraafan, ní kí ŋá ŋu-pu saraawɔkaa kí tīī ti-Dindaan ni-Nimbɔtiu. 7Ní dāá ŋá mpèé saraau mun, ní kí jī kí fàal̀ ti-Dindaan ni-Nimbɔtiu nimbiin niin. 8Ataŋkpee ŋin ní ni cóoǹee puee, ní dāá ŋmà marab nee an nīn wāĺ tiŋan#27.8 B. 2-8: kpèè Joos 8.30-32..»
9Míǹ boonee ní Mooyiisi nì Leefii yab bisaraaŋaliibee bí Isirayeel yab kɔkɔ yii: «Isirayeel yab, ŋmīĺmaan kí pīlifì. Díǹ nee ni kpántì ti-Dindaan ni-Nimbɔtiu nibul. 10Nín̄ tɔ́maan ti-Dindaan ni-Nimbɔtiu, kí ŋá kii u-marab nì u-bɔkpaaŋi ŋin m tīī-ni díǹ nee nín bí yii ní ŋá puee.» 11Ŋwiin gbanti mbaanti ní Mooyiisi tīī Isirayeel yab mara nee, yii: 12«Ni yaa láa dūtì Jɔɔdan buŋŋuee, Simeeyɔn nì Leefii nì Juuda nì Isakaar nì Jooseefi nì Beenjameen naakɔti ń dāá sīĺ Geerisiim jool pu kí mèè kí bìin̄ diniwul kɔkɔ pu. 13Ní Rubeen nì Gaadi nì Aseer nì Sabulɔn nì Daani nì Neefitalii naakɔti ń dāá sīĺ Eebaal jool pu kí tɔ̄ mbusu.»
Mbusub saalaa nì bili
14 Leefii yab ń téeń mpɔn kí sòoǹ nì Isirayeel yab kɔkɔ yii:
15«Mbusu dɔ̄ ki cí unil un di kpítì diwaal àá ki dūntì tikúti ki máń diwaal kí nīn jáaḿ-dì dibalinee#27.15 Kpèè 4.15-18, Disa 20.4, Akoo 19.4.. Ti-Dindaan nimbil kaa là kí wāl̀ an wanti tin ní unil dū u-ŋalii ki máńee.» Ní samaa kɔkɔ ń kíí yii: <Ameeni!>
16«Mbusu dɔ̄ ki cí unil un di kpēē u-baa nì u-na fámee#27.16 Kpèè Disa 20.12..» Ní samaa kɔkɔ ń kíí yii: <Ameeni!>
17«Mbusu dɔ̄ ki cí un di cúú ditaŋkpal din cɔ́ u nì u-juti kpaanyɔkɔ ki cóotì ki nìkēe#27.17 Kpèè 19.14..» Ní samaa kɔkɔ ń kíí yii: <Ameeni!>
18«Mbusu dɔ̄ ki cí un di kaa dàkā ujɔfu nsammɔnti u tin wáŋkèe#27.18 Kpèè Akoo 19.14..» Ní samaa kɔkɔ ń kíí yii: <Ameeni!>
19<Mbusu dɔ̄ ki cí un di kaa sòon̄ unicaan nì ditaŋkpiibil nì ukpiipu bɔti nì ibaamɔnee#27.19 Kpèè 24.17-18, Disa 22.21, 23.9, Akoo 19.33-34..> Ní samaa kɔkɔ ń kíí yii: <Ameeni!>
20<Mbusu dɔ̄ ki cí un di dōoǹ nì u-baa nimpoobi kansikin ubɔee, di sá yii u nín ŋá mimmee, u kpēē u-baa dooŋu fám dee#27.20 Kpèè 23.1, Akoo 18.8, 20.11..> Ní samaa kɔkɔ ń kíí yii: <Ameeni!>
21<Mbusu dɔ̄ ki cí un di dōoǹ nì kuwaŋkuluuee#27.21 Kpèè Disa 22.18, Akoo 18.23, 20.15-16..> Ní samaa kɔkɔ ń kíí yii: <Ameeni!>
22<Mbusu dɔ̄ ki cí un di dōoǹ nì u-niisal, pēē baa àá pēē nee#27.22 Kpèè Akoo 18.9, 20.17..> Ní samaa kɔkɔ ń kíí yii: <Ameeni!>
23<Mbusu dɔ̄ ki cí un di dōoǹ nì u-coo, an dàkà yii u-nimpuu nee#27.23 Kpèè Akoo 18.17, 20.14..> Ní samaa kɔkɔ ń kíí yii: <Ameeni!>
24<Mbusu dɔ̄ ki cí un di gbáń ki kūū u-juti dibalinee.> Ní samaa kɔkɔ ń kíí yii: <Ameeni!>
25<Mbusu dɔ̄ ki cí un di kíí ki fōō tiba kí kpɔ̀ maanyiibee.> Ní samaa kɔkɔ ń kíí yii: <Ameeni!>
26<Mbusu dɔ̄ ki cí un di kaa tɔ́ Unimbɔti marab nee, kaa ŋá bi nín bí yii ú ŋá puee#27.26 Kpèè Gala 3.10..> Ní samaa kɔkɔ ń kíí yii: <Ameeni!>
Currently Selected:
Deutéronome 27: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
