Deutéronome 22

Á kpèè a-juti wanti tiŋan

1A-nabiki naau yaa wáŋkì àá u-piiiu di wáŋkì ní a kée, á taa fàtī a-boon kí tīī. Péetí unaayee àá upiiyee kí cáá tīī u-dindaan. 2A-nabikee yaa kóò an dátiǹ-si àá saa pée nyí udaanee, á péetí-u kí cáá gbìn̄ a-dumpu kí nīn kpèé-u kí cáá sāā daliŋkin unaayee àá upiiyee dindaan làá dāan̄ kí nyàab̀ u-wantee, ní á gíiǹ kí tīī-u. 3An yaa tí sá a-nabiki maŋki àá u-bɔkutil àá u-wanti tin kamaa yaa pée wáŋkì ní a kée, a nín máaǹ kí ŋá puee dee. Á taa fàtī a-boon kí tīī a-juti wanti.

4A yaa tí ká a-nabiki maŋki àá u-naau lítì ki dɔ̄ nsan caŋinee, á taa fàtī a-boon kí tīī. Tūtuǹ udaan ú yòon̄ kuwaŋkuluuee kí síiń ku-taaŋi pu#22.4 B. 1-4: kpèè Disa 23.4-5..

5Unimpu kaa máaǹ kí lòon̄ tininjawan. Míǹ mbaantiim ní uninja mun kaa máaǹ kí lòon̄ tinimpuwan. Bin bin ŋáań mimmee sá bitiŋwiiliibi ní ti-Dindaan ni-Nimbɔtiu cee.

6A yaa bíi còom̄ ki cá ní ki tin ká nsan caŋinee, kunɔmbidii pá busubu bubɔ pu àá kù dɔ̄ kitiŋ ní kinɔmbiki bí ku-poon nì ki-biyaamu àá ki náká ki-jiŋŋi puee, á taa cúú kinɔmbikee kí kpáaǹ ki-biyaamu. 7Á yòon̄ mbiyaamu kí yàntī unaati ń búntí. A yaa ŋá mimmee, án làá bútí-si ní á kàl̄ kitiŋ pu kí yúntí.

8A yaa máń kudipɔŋuee, á bɔ̀b̄ ku-yilpu kí mā digundi kí màntīí tū yilpu laakin a bɔ̀b̄ee ubɔ ń taa láa nyā kudiiyee yilpu kí lítí kitiŋ kí dū u-kpuulool kí lúntí a-pu.

9A yaa kùn̄ bufiinyikpaayee, á taa dū busubu bubɔ biliŋ kí bɔ̄l̀ bukpaabaantiibuee poon. An yaa kaa sá míǹ, fiinyee nì asubil ŋin a búĺ ki kútèe yaa láa lòon̄ee, an kɔkɔ dāa sá ki tīī Unimbɔti ní. 10Á taa dū unaa nì kimaŋ kí kpāfì kí kpàl̄ bí kpɔ̀ tikpaal. 11Aa máaǹ kí pèen̄ tiwan tin ní bi dū ipii kuti nì gulfa ki ŋmālim̀ ki lùn̄ee#22.11 B. 9-11: kpèè Akoo 19.19..

12Á lù a-satabiiŋkaau nyɔɔjuuŋi naatil pu igbeeŋgbeen#22.12 Dūú ŋmàntī nì Dikà 15.37-41..

Unimpu un bi túǹ dibɔgabilee

13Ubɔ yaa cáá unimpu ní ki dōoǹ nì u, ní boonee kaa ti là-u, 14ní ki túǹ-u dibɔgabil ki bíil̀ u-yindi ki lī yii: «M nín cáá unimpu nee ki dōoǹ nì uee, maa ká kudaaŋŋu kun dàkà yii waa nìn nyí uninjee». 15Niinee ní usapɔɔnee baa nì u-na ń cáań kudaaŋŋu kun dàkà yii bi-bisal kaa nìn nyí uninjee kí tīī bitindaŋkpilib bin kā kitiŋ punyɔkɔpuee. 16Ní ubaati ń bí bitindaŋkpilibee yii: «M dū m-bisal ki tīī uninja nee ticati, ama waa ti là-u, 17ní ki bíi tūntí-u dibɔgabil ki lì yii m-bisal béè uninja ní ki nín mɔ́ǹ-u. Ama kpèèmaan kun dàkà yii m-bisal kaa nìn nyí uninjee.» Niinee ní ubaati ń kpátí sata un pu bi nìn dōoǹ kunyapeepeekaauee kí bíĺ bitindaŋkpilib nimbiin. 18Ní bitindaŋkpilibee ń cúú uninjee kí dáaĺ u-tafal. 19Míǹ boonee ní bí gíí-u dipɔndi animbil kúti dilaataal ú pà kí tīī usapɔɔnee baa, kun puee u bíil̀ uisirayeelsapɔɔn un kaa nyí uninjee yindi. Kí kúntée usapɔɔnee làá nīn gbíntìi sá u-nimpuu ní kí cáá sāā u-kúm dal, waa ti cáá nsan kí jà-u.

20Ama uninjee nín lī puee yaa sá ibaamɔn ní baa lafun ká kudaaŋŋu kun dàkà yii usapɔɔnee kaa nìn lafun nyí uninjee, 21ní bí cáá-u kí cùnnì u-baa diiku punyɔkɔpu ní kitiŋ gbanti yab bin sá bininjabee ń yāŋkì-u ataŋkpee kí kpɔ̀. Di sá yii u ŋá icoo bɔti Isirayeel tiŋkin ki kāl̀ u-baa dicaŋkun ki ŋá tilaakpaal. Míǹ ní ni máaǹ kí ŋá ní kí nyāntí ikpiti ni-kansikin.

22Ubɔ yaa dōoǹ nì u-juti nimpuu ní ni cúú-uee, ní kpɔ̀-u kí kpáaǹ unimpuee mun. Míǹ ní ni máaǹ kí ŋá ní kí nyāntí ikpiti ni-kansikin.

23Usapɔɔn di yaa tí cáá bɔɔn ní uninja ubɔ yaa ká-u kitiŋin ki dōoǹ nì uee, 24ní nyāntí bi-liitilee kitiŋ punyɔkɔpu kí yāŋkì-bi ataŋkpee kí kpɔ̀. Bí kpɔ̀ usapɔɔnee, kun puee u bí kitiŋin kaa kúuǹ ki yíiń binib bí dāá fīī-u, ní kí kpɔ̀ uninjee, kun puee u dōoǹ nì ubɔ nimpuu. Míǹ ní ni máaǹ kí ŋá ní kí nyāntí ikpiti ni-kansikin. 25Ama an yaa sá kusaaun ní ubɔ ká usapɔɔn un cáá bɔɔnee ki ŋá-u mpɔn ki dōoǹ nì uee, uninja un ŋá mimmee baba ní ni máaǹ kí kpɔ̀. 26Ní taa ŋá usapɔɔn tiba, di sá yii waa ŋá ikpiti in máaǹ ŋkúmee. Tibɔti gbantee náań nì ubɔ nín cútí u-juti kí kpɔ̀-u puee ní. 27Di sá yii uninjee ká usapɔɔn kusaaun ní. Báà usapɔɔnee yaa gbáń ibiilaaa, ubɔ kaa bí niin kí fīī-u.

28Ubɔ yaa tí ká usapɔɔn un kaa cáá bɔɔnee ní ki yaa ŋá mpɔn ki dōoǹ nì u ní bi yaa cúú-bee, 29uninjee máaǹ kí pà usapɔɔnee baa tikúti nimbiliŋ jitɔmbi imuŋku ili nì saalaa, ní kí cáá usapɔɔnee, di sá yii u bíil̀-u. Waa ti cáá nsan mun dalba dalba kí jà-u kí cáá sāā u-kúm dal#22.29 B. 28-29: kpèè Disa 22.15-16..

Currently Selected:

Deutéronome 22: BASSARDC

Highlight

Copy

Compare