Deutéronome 20

Kujaau marab

1Ni yaa nyáń kí jáǹ ni-nannanliibi ní ki yaa ká yii bi-taamui nì bi-tɔrɔkub nì bi-janjakitil wīikí ki jítiǹ ni-yabee, ní taa fàŋkì. Di sá yii ti-Dindaan ni-Nimbɔtiu un nyántìń-ni Eejipiti tiŋkinee bí ni-cee. 2Ni yaa láa bɔ́ntì kí nīn cée, usaraaŋakpil ń nyā kí sīĺ samaa nimbiin kí sòoǹ nì samaa kɔkɔ. 3Ú dāá sòoǹ nì bi yii: «Isirayeel yab, pīlifìmaan. Díǹ nee, ni làá nyā kí jáǹ ni-nannanliibi. Ni-wunti ń taa yɔ̀tī. Ní taa fàŋkì-bi kí taa nyɔ̀ ŋkpatim bi-nimbiin. 4Di sá yii ti-Dindaan ni-Nimbɔtiu di bí ni-cee ní ki làá jáǹ ni-nannanliibi, kí tīī-ni dijajil.»

5Míǹ boonee ní bigbaŋŋmaliibi ń sòoǹ nì samaa kɔkɔ ní kí bàlifì yii: «Ubɔ bí ni-kansikin ki máń kudipɔŋ kaa láá kɔ́-kuɔɔɔ? Ubɔ yaa bée, udaan ń nīn gítí u-diikun. An yaa kaa sá míǹ, u ŋūǹ kí tin kpúń dikɔ̀ndin ní ubɔ fám ń dāá pɔ̀ntī u-diiku gbanti. 6Ni-kansikin ubɔ kùn̄ fiinyi kpaabu kaa láá kītì bu-biliŋaaa? Ubɔ yaa bée, ú nīn gítí u-diikun. An yaa kaa sá míǹ, u ŋūǹ kí tin kpúń dikɔ̀ndin ní ubɔ fám ń dāá jī u-fiinyi kpaabu gbanti. 7Ubɔ cáá bɔɔn kaa láá cáá-uaaa? Ubɔ yaa bée, ú gítí u-diikun. An yaa kaa sá míǹ, u ŋūǹ kí tin kpúń dikɔ̀ndin ní ubɔ fám ń dāá cáá u-bɔɔn gbanti.» 8Ní bigbaŋŋmaliibee ń gíti bàlifì tin bí nee yii: «Ubɔ bí ki sá ufaantija u-mul kaa bōotí mmɔ́ɔnaaa? Udaan yaa bée, ú nīn gítí u-diikun, án nín làá ŋá pu ú taa yɔ̀tī u-nabiyaamu wuntee.» 9Bigbaŋŋmaliibi yaa sòon̄ nì samaayee míǹ ki dóòyee ní bí lēē bijanjakpilib bin làá nīn līī samaa nyɔkɔpuee.

10Ni yaa cūtì kí já nì kitiŋ kiba nibee, ní péé péé kí sòoǹ nì bi kí nyàab̀ ŋgbansɔŋfi ń nīn bí ni-kansikin. 11Bi yaa gbìl̄ ki tīiǹ-ni ki yāntì ni kɔ́ bi-tiŋkinee, bí kpántí ni-yumbui kí nīn kíǹ ki tūǹ ditundi ki tìì-ni. 12Ama bi yaa yíì kaa là ŋgbansɔŋfi ń nīn bí ni nì bi kansikin, ní ki yíkìi bíi jáà nì nee, ní màntīí tū bi-tiŋki kí jàkà-kì. 13Ti-Dindaan ni-Nimbɔtiu yaa dū-bi ki ŋá ni-ŋaanee, ní kpɔ̀ bininjab kɔkɔ. 14Ama binimpoobi nì mbiyaamu nì tiwaŋkuti nì tin kɔkɔ pée bí kitiŋ gbantinee, ní yòon̄. Ni-jajil wanti dee. Nimbi di yì kí jī tin kɔkɔ ti-Dindaan ni-Nimbɔtiu fōō ni-nannanliibi ŋaan ki dūu tīī-nee. 15Míǹ ní ni máaǹ kí ŋá ntimu mun kɔkɔ dátiǹ-ni, kaa kútì ntimu mun sá ní fōō kí nīn kíǹ ki yèe.

16Ama an yaa kíǹ anibul ŋin timmu ti-Dindaan ni-Nimbɔtiu làá dūú tīī-ni ní nīn kíǹ ki yèe poonee, ní kpɔ̀ tin kɔkɔ pée cáá kufoouee kí taa kíń tiba. 17An puee ní dāá kpɔ̀ kí céetí Eeti yab nì Amɔɔr yab nì Kanaan yab nì Peeriisi yab nì Eefi yab nì Jeebusi yab kii ti-Dindaan ni-Nimbɔtiu nín kpáafì-ni puee. 18An yaa kaa sá mimmee, ni làá fōō bi-waatootii tuuŋŋi ŋin sá ntimbiilee. Ni mun yaa ŋá mimmee, ni yīntiǹ ti-Dindaan ni-Nimbɔtiu dee.

19Ni yaa láa bíi jáà nì kitiŋ kiba ní ki lùkū gíb́-kì, ní ki kpēē yii an sá ní kàl̄ niin kí yúntí ní kí nín ŋmā kí já kí fōō-kèe, ní taa yòon̄ ni-ceekub kí nīn gà isufi in sí niinee ki féeń, kun puee ni ŋūǹ kí ŋmɔ́ i-biliŋ. Ní taa pée gāā-i kí fá. Isufi in yú akpaannee kaa sá binib ní nīn bíi jáà nì i! 20Ama ni ŋūǹ kí gàatì isufi in kaa lòoǹ abil ŋin bi ŋmóòyee kí dūú ŋá ni-jaaku tuuŋŋi kí nīn cí ŋyunti ŋun ní kitiŋ kin ni cūtì kí já kí fōōyee làá kɔ́ ni-ŋaanee.

Currently Selected:

Deutéronome 20: BASSARDC

Highlight

Copy

Compare