Deutéronome 11

Unimbɔti nín ŋá tin ki tīī Isirayeelee

1Nín̄ néeḿmaan ti-Dindaan ni-Nimbɔtiu kí nīn ŋáań u nín bí yii ní ŋá puee, kí nīn ŋúb́ u-bɔkpaaŋi nì u-koobiliŋ nì u-marab baabadal. 2Nimbi bin sí díǹ nee, ní béé yii an kaa sá ni-biyaamu mun kaa nyí kaa ká ti-Dindaan ni-Nimbɔtiu dàkatam nì u-pɔŋŋu nì u-tuŋkpaaŋŋee ní m bíi sòoǹ. 3Múǹ di kaa nìn ká maamaacib nì atuun ŋin ní u nìn ŋá Eejipiti tiŋkin ki dàkā Eejipiti bɔtiu Faaroo nì u-tiŋki nib kɔkɔee#11.3 Kpèè Disa 7.14–12.36.. 4Muaa nìn tí ká ti-Dindaan nín nìn yāntì Tikati mɔɔl nyim gbí ki léeǹ Eejipiti yab janjaliibi nì bi-taamui nì bi-janjatɔrɔkub pu, ki kūū ki céetì-bi kɔkɔ múb ŋyunti ŋun bi nìn bíi jìń ni-boonee #11.4 Kpèè Disa 14. 5An kaa nìn tí sá ni-biyaamu di nìn ká tin kɔkɔ u ŋá ki tīī-ni kuteeun, ki yāntì ni bāań laakin ni bí nee. 6Múǹ di kaa nìn tí ká u nín nìn ŋá Eeliyaab jipɔmbi Datan nì Abiiram bin nìn sá Rubeen naakookunee puee. U nìn yāntì kitiŋ cúu cōotì laakin bi nìn sée, ní bíǹ nì bi-dicaŋŋi nì bi-tantib nì bin kɔkɔ nìn yú bi-boonee jéetì poon ní kitiŋ fātìi dūu ŋéeb́ bi-pu Isirayeel yab kɔkɔ nimbiin#11.6 Kpèè Dikà 16.. 7Ni-nimbilaaliyin ní ti-Dindaan túń atuŋkpaan gbanti kɔkɔ. 8Míǹ puee nín̄ ŋúb́maan marab bin kɔkɔ m tīī-ni díǹ nee. Ni yaa ŋá mimmee, ni làá ŋmā kí ká mpɔn kí kɔ́ kitiŋ kin ni bíi dùtī Jɔɔdan buŋŋu kí tin fōō kí nīn kíǹ ki yì nee poon, 9ní kí ŋmā kí kàl̄ kitiŋ kin ti-Dindaan nìn pōoǹ kí tīī ni-naanjab nì bi-naantiibee poon kí yúntí. Kitiŋ gbanti poonee, tisiil nì nnaabiim còol̀ ní#11.9 Kpèè Disa 3.8 nì tin bi ŋmàn̄ kugbɔŋu faaku taapuee..

Kitiŋ kin ti-Dindaan kpèé tiŋanee

10Kitiŋ kin ni làá cùú fōō kí nīn kíǹ ki yì nee kaa bí kii Eejipiti tiŋki kin poon ni nyánní nee nín bí puee. Niinee, ni yaa nìn kùn̄ ki búĺ ni-wambooliiyee, ni nìn yàantí-i nnyim ní, kii bi nín yàantí tikuŋfaal kpaabu puee. 11Ama kitiŋ kin ni làá dùtī Jɔɔdan buŋŋu kí tin fōō nee sá ajoon nì atantaka tiŋki ní, ní utaa nì ki-pu. 12Kì sá kitiŋ kin pu ti-Dindaan ni-Nimbɔtiu wúńee ní. Ti-Dindaan ni-Nimbɔtiu nimbil pée cɔ́ ki-pu ní baabadal, kí yòon̄ dibindi kíltam kí cáá sāā di-kúntitam.

13Míǹ puee ni yaa tɔ́#11.13 Kpèè Dikà 15.37 nì tin bi ŋmàn̄ kugbɔŋu faaku taapuee. marab bin m tīī-ni díǹ nee, ki néeń ti-Dindaan ni-Nimbɔtiu, ki nóó-u nì ni-pɔbil kɔkɔ nì ni-naŋki kɔkɔee, 14u làá yàntī utaa ń nīn nì ŋyunti ŋun ní an máaǹee, ukpaasiitaa nì useetaa kɔkɔ. Mimmee ni-bileeu nì ni-fiinyib nì ni-ɔliifib làá nīn lòoǹ tiŋan ní. 15U làá yàntī ni-naakpaapɔɔku ń nīn cáá timɔsɔn kí tīī ni-waŋkuti, ní nimbi ni-ba ń jī kí díkí.

16Ama ní nīn nyíǹ ni-ba an taa ŋmàtiǹ-ni ní fàtī ni-boon kí tīī-u, kí cùú nīn gbàantí awaa taapu ki jáaḿ-ŋi. 17Ni yaa ŋá míǹ, ti-Dindaan làá gíí ni-pu diŋuul ní kí dū kutaa kí pìin̄ ní utaa ń taa ti nì. Ni-tiŋki kaa ti làá ŋmā kí lòoǹ tikpaajin. An yaa ŋá mimmee naa làá sūŋkì ní kí kpú kí céetí kitimmɔntii kin ti-Dindaan tīī-nee poon#11.17 B. 13-17. kpèè 7.12-16, 28.1-14, Akoo 26.3-5.. 18Dūmaan marab bin m tīī-ni díǹ nee kí ŋá ni-pɔbiliŋin nì ni-nammun. Dūmaan-bi kí fìn̄ ni-ŋalii nì ni-yigbeeŋi pu án nín làá ŋá pu ní taa súntí bi-puee. 19Dūmaan-bi kí dàkà ni-biyaamu. Báà ni yaa bí ni-diikunaaa, ni tàkā nsanni ki còom̄ ki cáaa, ni dɔ̄ɔɔ, ni yúɔɔɔ, bí nīn kā ni-nyɔkɔn. 20Ŋmàmaan-bi kí nákań ni-diiŋŋi punyɔmmu pu nì ni-timmu punuubi pu. 21Ni yaa ŋá mimmee, ni nì ni-biyaamu làá kàl̄ kitiŋ kin ti-Dindaan pōoǹ kí tīī ni-naanjabee pu kí yúntí kii kutaa kun dàn̄ kitiŋ pu nee nín làá yúntí puee.

22Tiŋman, ni yaa lafun ŋúb́ marab bin m tīī-ni díǹ nee kɔkɔ ki néeń ti-Dindaan ni-Nimbɔtiu ki ŋáań u nín là puee, ki dū ni-ba ki nákáǹ-uee, 23ti-Dindaan làá jà anibul nee kɔkɔ kí tīī-ni ní ní fōō anibul ŋin sá akpaan ki pɔ̄ɔ̄ ki jítiǹ-ni nee timmu kí nīn yì. 24Laakin kamaa ní ni-taal yaa tāāyee làá kpántí ni-wanti ní. Ni-tiŋki làá dāá nīn wāā kí yòon̄ kuteeu kí cáá sāā Leebanɔn, ní kí yòon̄ Eefiraati mɔɔl kí cáá sāā Meediiteeranee tiŋkuu ŋwìiń jeetilaŋki pú. 25Báà ubɔ kaa dāa ŋūǹ kí sīĺ ni-nimbiin kí jáǹ-ni. Laakin kamaa ní ni yaa pée cūtèe, ti-Dindaan ni-Nimbɔtiu làá yàntī niin nib kɔkɔ ń fàŋkì-ni ní bi-wunti ń kpú kii u nín pōoǹ-ni puee#11.25 B. 24-25. kpèè Joos 1.3-5..

26Kpèèmaan, m dū dibiindi nì mbusu kí bíl̀ díǹ ni-nimbiin. 27Ni yaa tɔ́ ti-Dindaan ni-Nimbɔtiu marab bin m tīī-ni díǹ neeyee, dibiindi dee. 28Ama ni yaa kaa tɔ́ ti-Dindaan ni-Nimbɔtiu marab, ní ki yaa fātì ni-boon ki tīī tin kɔkɔ m kpáafì-ni díǹ nee ki cūtìi nóó awaa ŋin naa nyée, mbusu dee.

29Ti-Dindaan ni-Nimbɔtiu yaa láa cáá-ni ki kɔ́ǹ kitiŋ kin ni bíi bɔ́ntí kí cù kí fōō nee poonee, ní tɔ́kɔń Geerisiim jool yilpu kí tīī dibiindi, ní kí tɔ́kɔń Eebaal jool yilpu kí tɔ̄ mbusu. 30Kii ni nín nyí puee, ajoon gbanti bí ni yaa dūtì Jɔɔdan buŋŋu ki yōoǹ didandi din dɔ̄ ŋwìiń nyalaŋki púee, ní ki bí Kanaan yab bin kóò Arabaa tiŋki poonee, Giilgaal caŋin. An kaa dátiǹ Mooree sukpaaŋyi. 31Ni làá dùtī Jɔɔdan buŋŋu kí cù kí fōō kitiŋ kin ti-Dindaan ni-Nimbɔtiu tīī-nee dee. Ní fōō kitiŋ gbanti kí nīn kíǹ ki kóò ki-ni. 32Ní pɔ́ɔm̀maan ni-ba kí nīn tɔ́ abɔkpaa nì akoobil ŋin kɔkɔ m tīī-ni díǹ nee.

Currently Selected:

Deutéronome 11: BASSARDC

Highlight

Copy

Compare