Deutéronome 1

MOOYIISI SÒON̄ MPEEPEEKAAM UNIMBƆTI MARAB PU

(1.1–4.43)

1Kugbɔŋu nee di sá tibɔti tin Mooyiisi nìn sòon̄ nì Isirayeel yab kɔkɔ ŋyunti ŋun baa nìn dá láá dūtì Jɔɔdan buŋŋu, ki nìn dá láá bí Arabaa teeku puee. Kuteeu gbanti nìn dɔ̄ kitiŋ kin bi yíì Suufee caŋin, ní ki nìn bí Paaran tiŋki nì Toofeel nì Laaban nì Aseerooti nì Dii-Saab timmu kansikin. 2(Kí nyā Ooreeb jool kí dūú dī Seeyiir jool#1.2 Ooreeb jool gbanti dibaantiil ní bi gíti yíì Siinaayi - Seeyiir jool ní bi gíti yíì Eedoom tiŋki. pú kí cù Kadeesi Barneeya tiŋkinee, an sá iwiin saalaa nì ŋubɔ saŋkindi ní.) 3Bi nín nyáń Eejipiti tiŋkin boon abin imuŋku ili, iŋmal saalaa nì ubɔ wimpeepeekaaŋu dalee, ní Mooyiisi dū tibɔti tin ti-Dindaan nìn kpáafì-u ú dūú tùkù Isirayeel yabee ki nāatì-bi. 4Mooyiisi nín jáń ki pɔ́ɔkiǹ Amɔɔr yab bɔtiu Siiwɔn un nìn kóò Asibɔn tiŋkinee, ki jáń ki pɔ́ɔkiǹ Baasan bɔtiu Ɔɔgi un nìn kóò Asitarooti, Eedreeyii tiŋkinee, boon ní u nín dū tibɔti gbanti ki nāatì Isirayeel yab#1.4 Kpèè Dikà 21.21-35..

5Bi nìn dá láá bí Moowaab tiŋkin kaa láá dūtì Jɔɔdan buŋŋu ní Mooyiisi kíĺ ki bíi cántí Unimbɔti marab nì u-dàkatam taapu ki tùkù-bi. U nìn bí-bi yii:

Unimbɔti pú Isirayeel yab nsan bí yīkì

6Ti-Dindaan ti-Nimbɔtiu nìn sòon̄ nì ti Ooreeb jool pu. U nìn lī yii: «Ni kāl̀ dijool nee pu ki yúntì. 7Yīkìmaan kí nīn cá Amɔɔr yab nín kóò ajoon tiŋki kinee. Nín̄ cámaan ntimu mun māntìi tú-ŋee poon, Arabaa teekun nì ajoon ŋin mun dī-kuee ni. Ní càatīmaan kí cù Seefeelaa paal pu nì Neegeeb teekun, nì kitiŋ kin dɔ̄ dimɔɔgbandee, kí bà Kanaan yab nì Leebanɔn timmun, kí cáá sāā Eefiraati buŋkpaaŋŋu#1.7 Kpèè Joos 1.4.. 8Kpèèmaan, m dū kitiŋ nee ki tīī-ni. Nín̄ cámaan kí fōō kitiŋ kin ní man ni-Dindaan nìn pōoǹ kí tīī ni-naanjab Abraam nì Isaaki nì Jaakɔb nì bi-naantiibi bin làá dāá páanní boonee.»

Mooyiisi kāaǹ bibɔsoonliibi

9Niinee ní Mooyiisi nìkī ki lī yii: «M nìn tùkū-ni ŋwiin gbanti yii ni sá diwaŋgul din nyìm̀ tikpilee ki tīī-mi ḿ ŋmā kí túń m-baba#1.9 Kpèè Disa 18.13-26.. 10Ti-Dindaan ni-Nimbɔtiu yāntì díǹ nee, ni būtì ki kíǹ ki wīikí kii iŋmalbijaa in bí kutaa puee. 11M mèé yii ti-Dindaan ni-naanjab Nimbɔtiu ń yàntī ní mɔ̀tīí bùtī míǹ ŋfunyɔm kutuku pu, ní kí bìin̄ ni-boon kii u nín nìn pōoǹ-ni puee. 12Ama mana ní m làá ŋmā kí túń ni-gìŋ́ŋi nì ni-bɔlii kí nīn sòoǹ ni-bɔti m-baba? 13An puee ní lēē kunaakoou kamaa poon binib bin cáá dinyil ki cáá iciin ki gbìl̀ tibɔti taapuee, ḿ dū-bi kí kpántí ni-yidambi.» 14Ní ni kíí-mi yii: «A nín bí yii tí ŋá puee ŋān̄.» 15Míǹ ní m dū ni-naakɔtin yidambi, binib bin cáá dinyil bi nyí bi-puee, ki kpántì ni-kpootiliibi. Biba sá binib kutuku ubɔ kpootiliibi, biba sá binib dilaataal kpootiliibi, biba sá binib imuŋku ili nì saalaa kpootiliibi, biba sá binib saalaa kpootiliibi. M nìn lēē biba mun bí nīn kpèé ni-naakɔti poon bɔti. 16Niinee ní m kpáafì ni-bɔsoonliibi ŋyunti gbanti yii: «Ni-nabiyaamu yaa cáań-ni tibɔti ní sòoǹee, ní pīlifìmaan-bi. Isirayeel yab kansikin ubɔ nì u-nabiki àá unicaan un kóò ni-puee kansikin ní tibɔti yaa bí ní bi cáań-tì ní sòoǹee, ní sòoǹ-tì nì ibaamɔn. 17Taa nín̄ cáámaan digàntil ibɔsoon poon. An yaa sá kibikaaa, unikpaanaaa, ní pīlifiǹ bi-kɔkɔ mbaantiim. Taa fàŋkìmaan báà ubɔ, kun puee Unimbɔti di yì ibɔsoon ki làá sòoǹ kí tīī-ni. Tibɔti tin yaa pɔ̄ɔ̄ ki tīī-nee, ní cáań-tì m-cee ḿ kpèè-tì.» 18Míǹ ní m nìn kpáafì-ni, ŋwiin gbanti tin kɔkɔ ni máaǹ kí ŋée.

Isirayeel yab yīntiǹ Unimbɔti

19Míǹ boonee ní ti yíkì Ooreeb jool taapu ki kíĺ Amɔɔr yab jool saŋŋu kii ti-Dindaan ti-Nimbɔtiu nín nìn tīī-ti mara puee. Kii ni nín nyí puee, ti nìn dūu dī kuteeu kun nimbi ni-ba ká ku sá kukpaaŋŋu ki nyāŋkèe pu ní ki tin nyáń Kadeesi Barneeya tiŋki#1.19 B. 19-45: kpèè Dikà 13.1–14.45. - Kadeesi Barneeya: kpèè Dikà 13.26.. 20Niinee ní m tùkū-ni yii: «Kɔŋkɔnnee, ni bāań Amɔɔr yab jooŋŋi pu dee. Kitiŋ gbanti ní ti-Dindaan ti-Nimbɔtiu dūu tīī-ti. 21Kpèèmaan, ti-Dindaan ni-Nimbɔtiu dū kitiŋ nee ki tīī-ni. Míǹ puee, cùú fōōmaan-kì kí nīn kíǹ ki yì kii ti-Dindaan, ni-baabi Nimbɔtiu nín nìn tùkū-ni puee. Ní taa pée fàŋkìmaan, kí taa yàntī ni-wunti ń yɔ̀tī!»

22Niinee ní ni-kɔkɔ sútìń ki pìl̄-mi ki lī yii: «Tí tɔ̄maan binib ti-nyɔkɔpu bí cù kí kpèè kitiŋ gbanti nín bí puee. Bi yaa cūtì ki fātìi gítìń ti-ceeyee, bí tùkù-ti nsan ŋun ti máaǹ kí dēe nì ntimu mun poon ti cée nín bí puee.» 23Ni lī mimmee ní m ká yii míǹ kítì ní m lēē ni-kansikin binib saalaa nì bili, kunaakoou kamaa poon unil ubɔ ubɔ. 24Niinee ní bi kíĺ dijool saŋŋu ki tin nyáń Eeskool#1.24 Kpèè Dikà 13.23. tantakal pu, ki kpēē kitiŋee nín bí puee kɔkɔ. 25Bi kpēē kitiŋee míǹ ki dóòyee ní ki kītì kitiŋ gbanti sufii biliŋ ki cáań ti-cee. Bi nín fātìi gítìń ti-ceeyee ní bi lī yii: «Kitiŋ kin ti-Dindaan ti-Nimbɔtiu dūu tīī-tee baasii ŋān̄ ní!» 26Nì míǹ kɔkɔee, ni yíì kaa cūtì ní ki ŋá mpɔɔgbifin kaa ŋá ti-Dindaan ni-Nimbɔtiu nín bí yii ní ŋá puee. 27Ni kíĺ ki bíi gbùkum̄ ni-tantib poon ki lì yii: «Kináŋ ní ti-Dindaan ná-ti ní ki nyántìń-ti Eejipiti tiŋkin kí dū-ti kí ŋá Amɔɔr yab ŋaan bí kpɔ̀ kí céetí-ti! 28Ba pu ní tí cù niin ní? Ti-nabiyaamu mun nyánní niinee mun bíil̀ ti-pɔbiliŋ ki lī yii: <Binib bin kóò kitiŋ gbantinee pɔ̄ɔ̄ ní ki sá tinikpaandi ki jítiǹ timbi, ní bi-timmu sá ntiŋkpaamu, ní agun ŋin bi máń ki māntìi tú-muee fɔ̀kɔ̀ ki tin sāā kutagbɔŋu.> Ní bi gíti lī yii: <Áli gba ti ká Anaaki yab tinikpaandi#1.28 Tinikpaandi : kpèè Diny 6.13-22 poon. niin!>»

29Ama ní m tùkū-ni yii: «Ni-pɔbiliŋ ń taa bīil̀. Ní taa pée fàŋkìmaan-bi! 30Ti-Dindaan ni-Nimbɔtiu un līī ni-nyɔkɔpuee di yì dikɔ̀ndi ki làá já kí tīī-ni kii u nín nìn ŋá pu ki tīī-ni ŋyunti ŋun ni nìn dáá bí Eejipiti tiŋkinee, nimbi ni-ba nimbil ká míǹ, 31ní kuteeunee ni gíti ká míǹ. Kí yòon̄ ŋwiin ŋun ni yíkìń Eejipiti tiŋkin ki dāa bāań mpaan ŋun pu ni bí díǹ neeyee, ti-Dindaan ni-Nimbɔtiu di wúń ni-pu kii unil nín wúǹ u-biki pu miŋyee.» 32Nì míǹ kɔkɔee, naa dū ni-mákal ki páaǹ ti-Dindaan ni-Nimbɔtiu pu. 33Too, ni-Nimbɔtiu gbanti mun di nìn līī ni-nyɔkɔpu, ní ki nìn nyàab̀-ni mpaan ni kàal̀ ki ŋùŋfī. Úǹ ubaantee di nìn tí cáá ŋŋmi ki ŋmíntí-ni nsan ŋun ni dēe kunyeeu, ní ki cáá ditagbandi ki dàkà-ni nsan ŋwiimpu.

34Ti-Dindaan nìn gbìl̄ tin ni nìn sòon̄ee ní ki gíí diŋuul ki pūtì ki lī yii: 35«Binikpitib nee kansikin ubɔ kpá kí wāl̀ kitimmɔntii kin m nìn pōoǹ kí tīī bi-naanjabee, 36asee Yeefunee jipɔɔn Kaaleeb baba di làá wāl̀-kì. Úǹ nì u-biyaamu ní m làá dū kitiŋ kin pu u cōom̀ee kí tīī, kun puee u ŋá min ní m lèe kɔkɔ.»

37An ŋá mimmee ní ti-Dindaan gíí ma mun pu diŋuul ni-pu ní ki lī yii: «Si mun, a kpá kí kɔ́ kitiŋee poon. 38Ama Nuuni jipɔɔn Joosuwa un tútúǹ-see di làá cù niin. Míǹ puee á tīī-u kunyannyaau, kun puee úǹ di làá cáá Isirayeel yab kí kɔ́ǹ kitiŋ gbantin. 39Ni-biyaamu mun ni cáá yii mu làá kpántí iyumbu kí tīī ni-nannanliibee, ni-biyaamu mun kaa nyí díǹ pu kí gàntī tiŋan nì tikpitilee, múǹ gba di làá cù kitiŋ gbantin. Múǹ ní m làá dū kitiŋ gbanti kí tīī mú nīn kíǹ ki yì. 40Nimbee, fàtīmaan ni-boon kí cùú dī Tikati mɔɔl#1.40 Tikati mɔɔl ní bi gíti yíì yii Dimɔɔmandi. saŋŋu kí nīn gítí kuteeu watil pú.»

41Niinee ní ni kíí-mi yii: «Ti yīntiǹ ti-Dindaan. Kɔŋkɔnnee ti làá cù dikɔ̀ndi kii ti-Dindaan ti-Nimbɔtiu nín bí yii tí ŋá puee.» Ni lī mimmee ní báà ŋma yōoǹ u-janjawanti ki bàà dākafì yii an làá nīn sá sɔkɔmii ní ŋmā kí já kí fōō ajoon pu tiŋki. 42Ama ní ti-Dindaan bí-mi yii: «Tùkù-bi bí taa cù ní kaa nín jáń, di sá yii maa làá nīn bí bi-kansikin. Bí taa yàntī bi-nannanliibi ń já kí pɔ̄ɔkiǹ-bi.» 43Ní m dū tibɔtee ki tùkū-ni, ama ní naa pílifiǹ-mi. Nì min kɔkɔ ti-Dindaan kpáafì-nee, naa pée fātìi tɔ́-u ní ki ŋá dilambil ki nín jɔ́ḿ ajoon tiŋkin. 44Ŋyunti ŋun Amɔɔr yab bin kóò ajoon pu niinee ká-nee ní bi nyánní, ki kītì ki bīiǹ ni-boon kii dinaŋgbansikpuuloolee, ki jáń ki pɔ́ɔkiǹ-ni sɔ́kɔ sɔkɔ ki kíĺ Seeyiir tiŋki ki tin nyáń Ɔrima tiŋki.

45Ni fātìi bāańee ní ki súń ki yáliŋkì ti-Dindaan nimbiin, ama ti-Dindaan kaa fātìi kpēē-ni gba ní kaa nín gbìl̄ tin ni sòon̄ee. 46Niinee ní ni kpáá ki kāl̀ Kadeesi tiŋkin ki yúntì tikpil.

Currently Selected:

Deutéronome 1: BASSARDC

Highlight

Copy

Compare