Colossiens 4

1Nimbi bin cáá iyumbuee, ní nīn ŋúb́-i mmɔntiimin, kí nīn ŋáań-i tiŋan, kí nīn nyí yii ni mun cáá ukpil ubɔ u bí yilpu.

Tibɔkpaafikaal

2Ní nīn mèé múlmul kí taa gbèen̄, kí nīn wálifì kí nīn jáaḿ Unimbɔti u-ŋanti pu. 3Ni yaa bíi mèéyee, ní nīn mèé ki tìì ti mun, yii Unimbɔti ń pìitī-ti nsan tí ŋmā kí sòoǹ u-bɔti kí bìitī tibɔbalkaal tin sá Kriisitoo yatee. Tibɔti gbanti pu ní m bí sarkan nee. 4Ní nīn mèé yii ḿ ŋmā kí nīn sòoǹ ki cántí-tì kii an nín máaǹ puee.

5Ni-bimbiminee, ní nīn cáá iciin bin kaa láá fōō ki kííyee cee, kí taa dū iyunti in ni kāntí bi-ceeyee kí bīil̀. 6Ní nīn sòoǹ anyɔɔbummɔɔn ŋí nīn cáá taapu, kí nīn nyí min ní ni làá nīn kíikí báà ŋma án nīn kítèe.

Ijaam in Pɔɔl dūu kúntèe

7An yaa sá m-bɔtee, ti-nabineeŋkaaki Tiisiiki#4.7 Tiisiiki : kpèè Atuun 20.4, Eef 6.21-22., un sá ti-tɔntɔnjuti ki tūǹ ditundi mmɔntiim ki tìì ti-Dindaanee, làá sòoǹ nì ni tin kɔkɔ m cááyee. 8An pu ní m túnní-u ni-cee ní béé ti-gbampɔŋŋu pu kí ká kunyannyaau. 9Úǹ nì ti-nabineeŋkaaki Ooneesiim#4.9 Ooneesiim : kpèè Fiilm 10-15. un yú deedee ki sá ni-yɔu ubɔee làá dāá nīn táań, kí dāá tùkù-ni tin kɔkɔ bíi jītí dooyee.

10Ariistaarki man nì un bí sarkan dooyee jáamiń-ni, ní Maarki Baarnaabaasi#4.10 Ariistaarki : kpèè Atuun 19.29, 27.2. - Maarki : kpèè Atuun 12.12,25, 13.13, 15.37-39. - Baarnaabaasi : kpèè Atuun 9.27, 11.22,30. naal mun tīiń-ni ijaam. Dooooyee, bi tùkū-ni Maarki gbanti bɔti ki yóoǹ. Mimmee, u yaa láa bāań ni-ceeyee, ní dāá fōō-u mmɔntiim. 11Yeesu un bi yíì Justuusee mun jáamiń-ni. Juuda yab kansikinee, binib bita nee baba di sá man nì bin tūǹ ditundi Unimbɔti Beel ń cù nyɔkɔpuee. Bíǹ di tìì-mi kunyannyaau.

12Ni-yɔu Eepafrasi, Yeesu Kriisitoo tɔntɔnliuee, mun tīiń-ni ijaam. U mèé ni-pu tikpil ŋyunti sá kamaa, kaa gbèentí, yii ní nīn gbíntìi ŋúb́ Yeesu Kriisitoo bɔti mmɔntiim kí wíiǹ kí kpántí biniŋmambi, kí ŋmā kí ŋá tin kɔkɔ Unimbɔti là ní ŋée. 13Mama m-ba ŋūǹ kí lì u-pu yii u gì nimbi nì Lawoodiisee yab nì Eerapooliisi yab pu digìńdi. 14Luuki, ti-nabineeŋkaaki un sá dɔkɔtee, nì Deemasi jáamiń-ni#4.14 Luuki : kpèè 2 Tiim 4.11, Fiilm 24. - Deemasi : kpèè 2 Tiim 4.19, Fiilm 24..

15Ní jāam̀ nnabiyaamu mun bí Lawoodiiseeyee, nì Niŋfasi, kí kpáaǹ Kriisitoo nikitil din kpáfí u-dumpuee. 16Ni yaa kàan̄ kugbɔŋu nee ki tīī ni-yab ki dóòyee, ní dūú tīī Kriisitoo nikitil din bí Lawoodiiseeyee mun ń kàaǹ. Míǹ ní Lawoodiisee yab yaa tīiń-ni bi-yɔkuee ní kàaǹ ku mun. 17Ní tùkù Arkiipi#4.17 Arkiipi : kpèè Fiilm 2. yii ú kpèè soooo kí tɔ̄ ditundi din ti-Dindaan tīī-uee tiŋan.

18Man Pɔɔl di dū m-ŋal ki ŋmàn̄ anyɔɔbun nee ki jáaḿ-ni. - Taa súntímaan yii m bí sarkan. - Unimbɔti ŋanti ń nīn bí ni-pu.

Currently Selected:

Colossiens 4: BASSARDC

Highlight

Copy

Compare