2 Timothée 2

Yeesu Kriisitoo janjamɔntiu

1Míǹ puee sii man biki, pɔ́ɔǹ a-ba nì tiŋan tin ti ká ti nì Yeesu Kriisitoo nín ŋá ubaantee pu. 2A nín gbìl̄ m sòon̄ tin diniwul nimbiinee, dū-tì kí ŋúbiǹ binib bin yú deedee ki ŋūǹ kí dàkèe, bi mun ń ŋmā kí dūú dàkà bin kíǹee.

3Si mun kūtì kí jī falaa kii Yeesu Kriisitoo janjamɔntiuee. 4Ujanjal un là kí tɔ̄ ditundi kí fáatíǹ u-kpiliuee kaa ti yì u-ba kí ŋá kii binifantantiibi nín tɔ́ bi-ba ki ŋáań miŋyee. 5Kí wàatī un cūtì ditaatandi kpaŋkpakantikuuee ń ŋmā kí sāǹ kí jītí bin kíǹee pu kí nīn sá upeepeekaa kí fōō tipaalee, see ú nīn sáń ki táá nì kpaŋkpakantiku marau#2.5 Dūú ŋmàntī nì 1 Kɔra 9.24-27.. 6Ukpaal un di kùn̄ u-saaku nì digìńdee di dāa tí sá upeepeekaa kí lēeń tijin u-saakun. 7Á dàkafì tibɔti tin m sòoǹee pu, kun puee ti-Dindaan làá tūtuǹ-si á gbìl̄ ti-taapu kɔkɔ.

8Á téetí Yeesu Kriisitoo un fīkitì ditaŋkpiilinee pu. U sá Daafiidi naantiiu kii Tibɔmɔntiil tin m sòoǹee nín tùkū-ti puee ní. 9Tibɔmɔntiil gbanti sòontam pu ní m bí ki jīǹ falaa bi bóob́-mi ikusaka kii m sá unikpitee, ama baa bóob́ Unimbɔti bɔti tíǹ. 10An pu ní m ŋmèé tikɔkɔ án nín làá ŋá pu bin Unimbɔti lútèe ń ŋmā kí ká difiil din bí Yeesu Kriisitoonee, nì tinyool tin làá nīn bí jaanjaanee. 11Tibɔti tin m làá sòoǹee sá ibaamɔn ní:

«Ti nì u yaa kpáfì ki kpíìyee,

see ti nì u ń dāá nīn tí bí dimaŋfalin.

12Ti yaa pɔ́ɔǹ ki tin kátì-kuee,

ti nì u di dāa tí jīǹ dibeel.

Ti yaa néè yii taa nyí-u,

u mun làá dāá néé yii waa nyí-ti.

13Ti yaa kaa yúliǹ-u deedee,

úǹ làá nīn yú deedee,

kun puee waa ŋūǹ kí néé kí kpántí u-deedeebítam#2.13 B. 11-13: dūú ŋmàntī nì Room 6.8, Maat 10.33 nì Luuki 12.9, Dikà 23.19..»

Utɔntɔnli un sá umɔntee

14Á téetí bi-kɔkɔ kí tùkù-bi yii nì Unimbɔti puee, bí taa nín̄ kpākantí tɔb anyɔɔbun aba pu. An nikpɔŋkpɔkɔkuee kaa cāabìń tiŋan, ama an bíiĺ bin pílifée ní. 15Pɔ́ɔǹ a-ba Unimbɔti ń ká-si kii utɔntɔnli un tuuŋŋi kaa cāabìń icooyee, kí sòoǹ ibaamɔn Bɔmɔntiitee nín sá puee deedee. 16Taa cèeǹ a-nyɔkɔ tibɔfan nikpɔŋkpɔkɔku kun nyáń tiba nì Yeesu Kriisitoo bɔti tin a fōōyee, di sá bin ŋúb́ an bɔtee mɔ̀tīi gáatí Unimbɔti nimbiin ní. 17Binib gbanti dàkatam bí kii mbuunee ní ki ŋmóò ki lɔ̀tī tiwun. Imeenee#2.17 Imeenee : kpèè 1 Tiim 1.20. nì Fiileeti mun bí binib gbanti kansikin. 18Bi nyáń ibaamɔn saŋŋu poon ki yāntì bi-jutiibi bin fōō Yeesu ki kííyee fá bi-fookiiu bi nín lì yii dooooyee ní bitaŋkpiibi fīkitèe pu. 19Ama nì míǹ kɔkɔee, Unimbɔti bɔnyeel din u dūu tíĺ taapuee pée pɔ̄ɔ̄ ní ki yú di-laŋki. An bɔnyeelee di sá yii: «Ti-Dindaan nyí bin sá u-yabee#2.19 Dūú ŋmàntī nì Dikà 16.5.», ní «Un kamaa nyí yii u sá ti-Dindaan yɔuee máaǹ kí fá ikpiti.»

20Diciŋkpaandinee, an kaa sá sindaariya nì animbil kúti booŋŋi baba di bí, ama aboon ŋin bi máń nì kuyɔkɔuee nì itúun mun bí. Sindaariya nì animbil kúti booŋŋi yú ki cí iwiŋkpaan dal ní, ní itúun nì aboon ŋin bi máń nì kuyɔkɔuee sá báà ŋma ń nīn cáa ŋáań min u lèe. 21Un yaa fá ikpiti in bɔti m sòoǹee kpántì umɔnti dee ki sá kii sindaariya booŋŋi ŋin yú ki cí iwiŋkpaanee. Di sá yii u bí ki tīī u-kpiliu an kɔkɔ pu ú dū-u kí tɔ̄ atummɔnti.

22Á fá tinaacimpɔn landɔkɔkpitii kí nyàab̀ deedeebítam nì fookii nì dineendi nì ŋgbansɔŋfi, sii nì bin kɔkɔ jáaḿ ti-Dindaan nì dipɔɔmɔntiilee. 23Ama á fá fám fám nikpɔŋkpɔkɔku kun sá tibɔfanee, kun puee sii a-ba nyí yii an nikpɔŋkpɔkɔkuee pée kúntí nì kujaau ŋma ní. 24An mun kaa máaǹ yii ti-Dindaan tɔntɔnliu nì binib ń nīn jáà, ama u máaǹ kí nīn néeń báà ŋma, kí nīn ŋūǹ ki dàkà binib nì kimɔtii. 25U máaǹ kí nīn sá unil un mɔ̄ee kí ŋmā kí dàkà bin kpākantí-uee. An yaa yíì Unimbɔti táá yàntī bí kpántí bi-bimbim kí ŋmā kí béé ibaamɔn, 26kí gítiń nsammɔnti poon kí ŋmátí Sitaan taliŋku kun sàl̄-bi ki yāntì bi ŋáań min u lèe.

Currently Selected:

2 Timothée 2: BASSARDC

Highlight

Copy

Compare