2 Thessaloniciens 1
1
Ijaam
1Man Pɔɔl nì Siilasi nì Tiimootee di ŋmàn̄ kugbɔŋu nee.
Ti ŋmàn̄-ku kí tīī nimbi Kriisitoo nikitil din bí Teesalooniiki#1.1 Kpèè 1 Teesa 1.1. ki sá ti-Baa Unimbɔti nì ti-Dindaan Yeesu Kriisitoo yabee ní. 2Unimbɔti ti-Baa nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.
Ibɔsoon in dāa bí Kriisitoo gítintam dalee
3Nnabiyaamu, ti ŋmāntì kí nīn jáaḿ Unimbɔti ni-pu múlmul. An lafun máaǹ míǹ, kun puee ni-fookiiu mɔ̀tīi wīintí ki cá, ní dineendi din ni cáá tɔb puee mun mɔ̀tīi wīintí. 4Nimbi pu ní timbi mɔ̀ɔǹ Unimbɔti nikitiŋ cee, ni nín gbíntìi pɔ̄ɔntí ki ŋúb́ ni-fookiiu falaabi kɔkɔ nì agìń ŋin poon ni bée.
5Míǹ di dàkà Unimbɔti bɔsooŋyi nín bí deedee miŋyee, kun puee an di làá yàntī ní ŋmā kí kɔ́ Unimbɔti Beel din pu ni bí ki jīǹ falaayee. 6Kun puee Unimbɔti sá deedeedaan ní, falaa ní u làá dāá gíiǹ kí téeǹ bin yàntī ni jīǹ falaayee. 7U làá dāá kàan̄ nimbi bin jíń falaayee nì timbi nsɔŋfin ŋyunti ŋun ti-Dindaan Yeesu yaa láa nyánní yilpu nì u-tuuŋyi ipɔndambee. 8U làá dāan̄ nì ŋŋmi kí dáaĺ bin kaa nyí Unimbɔti#1.8 Dūú ŋmàntī nì Yees 66.15., kaa fōō ti-Dindaan Yeesu Bɔmɔntiitee ki kííyee tafal. 9Bi-tafadaaldi di dāa sá bí nàan̄-bi kí nīn cá jaanjaan, bí taa nín̄ dàbiǹ ti-Dindaan nì u-nyooti nì u-pɔŋŋu#1.9 Dūú ŋmàntī nì Yees 2.10,19,21.. 10Daliŋkin u yaa láa gítìń bin sá u-yabee nì bin kɔkɔ fōō-u ki kííyee cee bí tīī-u tinyoolee kí pàkà-uee, ni mun dāa bí niin, kun puee ni fōō ti-bɔti tin ti sòon̄ nì nee ki kíí.
11An puee ti mèé Unimbɔti ni-pu baabadal ki bàlifī yii ú yàntī ní nīn sá binib bin máaǹ dimaŋfal din pu u yíiń-nee. Ti gíti mèé-u yii u-pɔŋŋu ń yàntī ní ŋmā kí ŋá tiŋan tin ni dàkafī kí ŋée, kí yàntī ni-fookiiu tuuŋŋi ń còom̀ mmɔntiim. 12Mimmee, ni-puee ti-Dindaan Yeesu Kriisitoo yindi làá ká tinyool, ní u mun puee ni mun ń ká tinyool nì ti-Nimbɔtiu nì ti-Dindaan Yeesu Kriisitoo ŋanti pu.
Currently Selected:
2 Thessaloniciens 1: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.