2 Samuel 2

Daafiidi bí Eebrɔn tiŋkin

1Tíǹ jítèe ní Daafiidi bālifì ti-Dindaan yii: «M ŋūǹ kí cùú kàl̄ Juuda yab timmu kiba poonaaa?» Ní ti-Dindaan kíí-u yii: «A ŋūǹ kí cù.» Ní Daafiidi gíti bālifì yii: «Kitiŋ kilaka poon ní ḿ cù?» Ní ti-Dindaan kíí-u yii: «Eebrɔn tiŋkin.» 2Ní Daafiidi yōoǹ u-nimpoobi liitil, Ayiinoowaam un sá Jisirayeel tiŋkinee, nì Naabaal un kpíìyee nimpuu Abiigayiil un sá Kaarmeel tiŋkinee ki nín cá#2.2 Kpèè 1 Sami 25.42-43.. 3Daafiidi nìn kpáaǹ u-nib bin kɔkɔ nìn bí u-ceeyee nì bi-dicaŋŋi, ní bi cūtìi kāl̀ Eebrɔn tiŋkin. 4Niinee ní Juuda yab dɔ́miń Eebrɔn ki bātì ŋkpam ki sītì Daafiidi yil pu ki kāaǹ-u dibeel Juuda yab pu.

Bi nìn tùkū Daafiidi yii Yaabeesi tiŋki kin bí Galaadi tiŋkinee yab di síb́ Saayuul. 5Ní Daafiidi tú binib bi-cee bí cùú jāam̀-bi kí tùkù-bi yii: «Ti-Dindaan ń bìin̄ ni-boon ni nín dàkā ni-dindaan Saayuul dineeŋkpaandi din ki píí-u ki síb́ee pu. 6Ti-Dindaan mun ń dàkà-ni u-neeŋkpaandi kí ŋá-ni tiŋan. Tin ni ŋá nee puee, ma mun làá ŋá-ni tiŋan. 7Kɔŋkɔnnee ní pɔ́ɔm̀maan ni-ba kí ká dipɔbil. Ni-kpiliu Saayuul kpíì, ama ní béé yii Juuda yab bātì ŋkpam ki sītì m-yil pu ḿ nīn sá bi-bɔtiu.»

Isirayeel yab kāaǹ Isi-Booseeti dibeel

8Ŋyunti gbantee, Neer jipɔɔn Abineer, Saayuul janjakpiliu yōoǹ Saayuul jipɔɔn Isi-Booseeti ki cūnnì Maanayiim#2.8 Maanayiim : kpèè Diny 32.3 nì tin bi ŋmàn̄ kugbɔŋu faaku taapuee.. 9Niin ní u kāaǹ-u dibeel ú nīn kpòotī Galaadi nì Aseer nì Jisirayeel nì Eefiraayiim nì Beenjameen timmu, an dàkà yii Isirayeel naakɔti tin bí ŋgan púee kɔkɔ. 10Saayuul jipɔɔn Isi-Booseeti nìn cáá abin imuŋku ili ní ki kpántì Isirayeel yab bɔtiu, ní ki kāl̀ dibeel abin ali. Ama Juuda yab bíǹ nìn yú Daafiidi boon. 11Úǹ nìn kāl̀ Eebrɔn tiŋkin ki jíń Juuda naakookun yab pu dibeel abin aluli nì iŋmal iluu.

Juuda yab nì Isirayeel yab jaaku

12Neer jipɔɔn Abineer nì Saayuul jipɔɔn Isi-Booseeti nib nyáń Maanayiim ki búntì Gabawɔn. 13Joowaab un na bi yíì Seeruyee nì Daafiidi nib mun kíĺ nsan ki nín cá, ní akiti alee cūtìi kpáfì Gabawɔn nyimbɔbil caŋin. Biba nìn bí dinyimbɔbil jandi diba pú ní bin kíǹee mun bí dijandi din kíǹee pú. 14Ní Abineer bí Joowaab yii: «Ti-naacimpɔmbi ń nyā kí mɔ̀ bili bili ti-nimbiin dooyaa!» Ní Joowaab kíí yii: «Too!». 15Ní Beenjameen naakookun binaacimpɔmbi saalaa nì bili nyáń ki yúl̀ Saayuul jipɔɔn Isi-Booseeti jandi pú, ní saalaa nì bili nyáń ki yúl̀ Daafiidi jandi pú. 16Báà ŋma nìn cúú u-juti yil ní ki dū kitàataajiki ki sāā u-takakal, ní bi-kɔkɔ tin lítì dicilpu. Bi nìn pú mpaan gbanti diyindi yii Ataŋkpee Saaku. Ŋu bí Gabawɔn tiŋkin ní.

17Ŋwiin gbanti mbaantee, kujaau nìn pōō ki píĺ ki pɔ́ɔkì. Daafiidi yab nìn jáń ki pɔ́ɔkiǹ Abineer nì Isirayeel yab. 18Joowaab nì Abisayeel nì Asayeel bin na nìn sá Seeruyee nìn bí. Asayeel nìn tóotí kii ukɔniiyee ní. 19Asayeel nìn pá Abineer boon ki jì-u, ki kā u-pu kàtì kati. 20Ní Abineer fātìi bālifì-u yii: «An sá sii Asayeel níii?» Ní u kíí-u yii: «Iiin, an sá man.» 21Ní Abineer bí-u yii: «Kpèè ŋgiil pú àá ŋgan pú kí jà kí cúú ujanjal ubɔ kí fōō u-wanti.» Ama ní Asayeel kaa kíí kí gbèen̄, ní ki gbíntìi kā u-pu. 22Ní Abineer gíti bí-u yii: «Asayeel, páatí m-boon. Ba pu ní a là kí páb́-mi ḿ kpɔ̀-si ní? M yaa ŋá míǹ, mana ní m gíti ŋūǹ kí kpèè a-maan Joowaab nimbiin?» 23Ama ní u yíì ki gbíntìi dī-u. Niinee ní Abineer dū u-kpaŋki yil#2.23 Isirayeel yab nìn kpítí bi-kpammu yiliŋ ní an cɔ́m̀, ní bi nìn ŋūǹ kí dūú sāā kí cóoń kitiŋ. ki sāā u-pool ní an tin nyáń u-boon, ní u lítì dibɔbil pu niin ki kpíì. Bin kɔkɔ yaa nìn bāań laakin Asayeel nìn kpíì ki dɔ̄ee nìn sàatī kí yūĺ ní.

24Niinee Joowaab nì Abisayi nìn kùl̄ ki bīiǹ Abineer boon. Ŋwìiń tin lì yii ŋu jēetée, bi bàn̄ Amma gbantaŋki pu. Mpaan gbanti bí Giiya tiŋki, ŋwìiń nyalaŋki pú, Gabawɔn teeku saŋŋu pu. 25Beenjameen naakookun yab nìn kóoǹ ki kpáfì ki yúl̀ Abineer boon. Bi nìn dūu kpáfì ki ŋá dikitil ki cūtìi yúl̀ kigbantaŋ kiba yilpu. 26Ní Abineer kúuǹ ki bí Joowaab yii: «Ti làá nīn pée jáà yéè ki cáaa? Aa nyí yii án làá dāá kúntí nì kunimbaauaaa? Kí tin sāā ŋyunti ŋulɔŋu ní a làá tùkù a-yab bí gbèen̄ kí taa ti jà bi-nabiyaamu ní?» 27Ní Joowaab bí yii: «Nì Unimbɔti un bí nee pu, a yaa kaa bàà lī min a lī nee, m-naacimpɔmbi bàà làá nīn jì bi-nabiyaamu míǹ ní áli kutaa ń wúntí.»

28Niinee Joowaab búń ŋyin ní u-janjaliibi gbēeǹ kaa ti bíi jì Isirayeel yab janjaliibi ní kujaau gbēeǹ. 29Abineer nì u-janjaliibi nìn dū kunyamɔŋu ki cōom̀ Jɔɔdan tantakalin. Bi nìn dūtì Jɔɔdan buŋŋu, ki cōom̀ kutaafaau ki tin cáa sāā kuwiŋkuluu ní ki tin bàn̄ Maanayiim. 30Joowaab nín nìn gbēeǹ kaa ti bíi jì Abineer ki fātìi gítìńee, u nìn kóoǹ u-naacimbi ki kpáfì. Daafiidi janjaliibi ubɔ kpá mmuŋku di nìn fɔ́tì kí kūtì Asayeel pu. 31Ama Daafiidi yab bíǹ nìn kūū Abineer nì Beenjameen naakookun yab alaataa ata nì binib imuŋku ita ní. 32Bi nìn yōoǹ Asayeel ki cáa síb́ u-baa kaakulin Beetileem. Míǹ boonee Joowaab nì u-janjaliibi nìn cōom̀ kunyamɔŋu. Bi nìn bāań Eebrɔn tiŋkinee, ŋwiin nyáń.

Currently Selected:

2 Samuel 2: BASSARDC

Highlight

Copy

Compare