2 Rois 14

Amasiyaawuu, Juuda bɔtiu

(2 Kroo 25.1-4,11-12,17-28, 26.1-2)

1Joowakaasi jipɔɔn Joowaasi nín kāl̀ Isirayeel beelin pu tibɔtiil abin alee, ní Joowaasi jipɔɔn Amasiyaawuu kpántì Juuda tiŋki bɔtiu. 2U nìn cáá abin mmuŋku nì aŋmoo ní ki kpántì ubɔti ní ki jíń dibeel abin mmuŋku nì awa Jeerusaleem tiŋkin. U-na nìn sá Jeerusaleem ní bi yíì-u yii Yoowadan. 3Amasiyaawuu nìn ŋá tin fáatiǹ ti-Dindaanee, ama waa nìn nín bàn̄ u-naanja Daafiidi ní. U nìn pée ŋá kii u-baa Joowaasee ní. 4Nì míǹ kɔkɔee waa nìn kúntì isaraafan in nìn bí ŋgbantamu puee. Samaa nìn gbíntìi cáà niin ki ŋáań saraabi ki tùutī talaalub.

5Ŋyunti ŋun Amasiyaawuu beel kāl̀ tiŋan ki báaǹ inyaanee ní u kūū u-janjakpilib bin nìn kūū u-baa ubɔti Joosiyaasee. 6Ama waa nìn kūū binikpɔliibi gbanti biyaamu, ki nóó nì án nín ŋmàn̄ Mooyiisi Marau gbɔŋkun puee. Ti-Dindaan nìn sòon̄ mara gbɔŋku gbanti poon yii: «Baa máaǹ kí kpɔ̀ bibaatiibi, bi-biyaamu kpitii pu, kaa tí máaǹ kí kpɔ̀ mbiyaamu, mu-baabi kpitii pu. Un ŋá ikpitee, úǹ ní bí kpɔ̀#14.6 Tibɔti nee gíti kā Ditee 24.16.». 7Úǹ di jáń ki pɔ́ɔkiǹ Eedoom yab janjaliibi binib kutukub saalaa Ŋyaam tantakalin. Kujaau gbanti poon ní u jáń ki fōō Seera tiŋki ki pú-kì diyindi yii Yookiteel. Bi gbíntìi yíì kitiŋ gbanti míǹ ki dāa sāā díǹ.

8Niinee ní Amasiyaawuu lēē ituun ki tú Isirayeel bɔtiu Joowaasi, Joowakaasi jipɔɔn nì Jeewuu naantiiu cee bí tùkù-u yii: «Dāan̄, man nì si tí já!» 9Ní Isirayeel bɔtiu Joowaasi tú bí cùú tùkù Juuda bɔtiu Amasiyaawuu yii: «Bukuŋkumbu subiki kiba di nìn bí Leebanɔn jool pu. Dalbee ní kì cūtìi ká Seedir subu ní ki bí-bu yii: <Dū a-bisal kí tīī m-jipɔɔn ú cáá!> Ama upeel ubɔ nyánní Leebanɔn joolee pu ní ki tāā ki mátì bukuŋkumbuee. 10Tiŋman a jáń ki pɔ̄ɔkiǹ Eedoom yabee ní an yòontí-si. Nín̄ kā a-dumpu soooo kí nīn fàal̀ a-jajil gbanti pu. Ba pu ní a là kí kíĺ kujaau kun poon ní bi làá já kí pɔ̄ɔkiǹ sii nì Juuda janjaliibee?»

11Ama Amasiyaawuu kaa nìn pílifiǹ-u. Niinee Isirayeel bɔtiu Joowaasi yíkìń kujaau pu ki bāań ki dūu sìkī nì Juuda bɔtiu Amasiyaawuu Beeti-Seemeesi tiŋkin, Juuda tiŋkpaaŋki kiban. 12Isirayeel yab nìn jáń ki pɔ́ɔkiǹ Juuda yab ní bíǹ sáǹ ki nín kùǹ. 13Isirayeel bɔtiu nìn cúú Juuda bɔtiu Amasiyaawuu, Joosiyaasi jipɔɔn, Akasiyasi naantiiu kuyuŋu Beeti-Seemeesi tiŋkin, ní ki dɔ́miń Jeerusaleem ki gbáń ki wīī digundi an wāā kii meetab alaataa ali kí yòon̄ Eefiraayiim punyɔkɔki kí cáá sāā Ŋfaŋfakam punyɔkɔki. 14U nìn yōoǹ sindaariya nì animbil nì tiwan tin kɔkɔ nìn bí ti-Dindaan Diikun nì tigaajawan tin kɔkɔ nìn bí dibeecindinee. U nìn cúú binib biba mun ki kpáàa búntì Samaarii tiŋkin.

15Joowaasi tuuŋŋi ŋin kíǹee nì tin kɔkɔ u ŋée nì u-pɔ́ɔǹtam nì u nì Juuda bɔtiu nín jáń kujaau kuŋyee kɔkɔ ŋmàn̄ ki kā Isirayeel bɔtiibi tuuŋŋi gbɔŋkun. 16Joowaasi kpíì ki cūtìi ŋàl̄ u-baabi ní bi síb́-u Samaarii tiŋkin Isirayeel bɔtiibi kaakulin. U-jipɔɔn Jeerooboowaam di nìn fōō u-yil ki kpántì ubɔti.

17Isirayeel bɔtiu Joowaasi, Joowakaasi jipɔɔn nín kpíì boonee, Juuda bɔtiu Amasiyaawuu, Joowaasi jipɔɔn gíti ŋá abin saalku ní ki nín kpíì. 18Amasiyaawuu tuuŋŋi ŋin kíǹee ŋmàn̄ ki kā Juuda bɔtiibi tuuŋŋi gbɔŋkun.

19Bi nìn bɔ́ntì kí kpɔ̀-u Jeerusaleem ní u sáǹ ki búntì Lakiisi. Ní bi tú binib jìn̄ u-boon ki tin kūuń-u niin. 20Boonee ní bi dū-u ki ŋá tɔrɔku un itaamu kupaau dátée poon ki gíiǹní Jeerusaleem, ní bi dū-u ki síb́ u-baabi kaakulin Daafiidi Tiŋkin. 21U-jipɔɔn Asariyasi#14.21 Asariyasi : Krooniiki liliiti nì bibɔnaatiliibi gbɔntinee, ubɔti gbanti ní bi gíti yíì yii Oosiyasi. nìn cáá abin saalku nì diba ní Juuda yab kɔkɔ dū-u ki kāaǹ dibeel u-baa yil pu. 22U-baa Amasiyaawuu kpíì ki cūtìi ŋàl̄ u-naanjab boonee, ní u fātìi fōō Eelaati tiŋki ki tīī Juuda yab ní ki fātìi máń-kì.

Jeerooboowaam liliiti, Isirayeel bɔtiu

23Juuda bɔtiu Amasiyaawuu, Joowaasi jipɔɔn nín jíń dibeel abin saalku poonee, ní Isirayeel bɔtiu Joowaasi jipɔɔn Jeerooboowaam kpántì Isirayeel bɔtiu. U nìn kóò Samaarii ní ki jíń dibeel abin imuŋku ili nì diba. 24U nìn ŋá tin kaa kítì ti-Dindaan nimbiinee. U nìn dū u-ba ki yá ki nákáǹ ikpiti in Neebaati jipɔɔn Jeerooboowaam nìn ŋá ki yāntì Isirayeel yab kɔ́ ikpitinee. 25Úǹ di jáń ki fātìi fōō Isirayeel timmu kí yòon̄ Leeboo-Amaati kí cáá sāā Arabaa tiŋkuu, ki nóó nì ti-Dindaan, Isirayeel Nimbɔtiu nín nìn dī u-bɔnaatiliu Yoona, Amiitaayi jipɔɔn, ugaati-Eebeerja pu ki sòon̄ tiŋyee. 26Di sá yii ti-Dindaan nìn lafun ká inimɔɔn in poon ní Isirayeel yab nìn bée. Bi nìn bíi jīǹ falaa tikpil. Uyumbuɔɔɔ, un tɔ́ u-beeyaaa, báà ubɔ nì ubɔ kaa nìn bí kí ŋmā kí jòoń-bi. 27Ama ti-Dindaan kaa nìn lēē yii u làá pítí Isirayeel nibul kitiŋ pu. An pu ní u nìn dī Joowaasi jipɔɔn Jeerooboowaam pu ki fīī-bi.

28Jeerooboowaam tuuŋŋi ŋin kíǹee nì tin kɔkɔ u ŋée nì u-pɔ́ɔǹtam nì u nín jáń tijáti puee nì u nín fātìi fōō Juuda timmu Damaasi nì Amaati ki tīī Isirayeel puee kɔkɔ ŋmàn̄ ki kā Isirayeel bɔtiibi tuuŋŋi gbɔŋkun. 29Jeerooboowaam kpíì ki cūtìi ŋàl̄ u-naanjab ní bi síb́-u Samaarii tiŋkin, Isirayeel bɔtiibi kaakulin. U-jipɔɔn Sakari di nìn fōō u-yil ki kpántì ubɔti.

Currently Selected:

2 Rois 14: BASSARDC

Highlight

Copy

Compare