2 Rois 12

Juuda bɔtiu Joowaasi bɔti

(Kpèè 2 Kroo 24.1-3)

1Joowaasi nìn cáá abin aluli#12.1 Tigbɔn tiba poonee, 12.1-22 sá 11.21–12.21. ní ki kpántì ubɔti. 2Isirayeel bɔtiu Jeewuu nín jíń dibeel dibinluluútiil poonee ní Joowaasi kpántì ubɔti. Jeerusaleem ní u nìn kóò ní ki jíń dibeel abin imuŋku ili. U-na nìn sá Beerseeba ní bi yíì-u yii Sibiya. 3Joowaasi maŋfal wiiŋyi kɔkɔ poonee, u nìn ŋá tin kítì ti-Dindaan nimbiinee ní, kun puee usaraaŋakpil Yooyadaa nìn dàkā-u tiŋan. 4Nì míǹ kɔkɔee, isaraafan in nìn bí ŋgbantamu puee nìn gbíntìi bí. Samaa nìn gbíntìi ŋáań saraabi ki tùutī talaalub ŋgbantamu gbanti pu.

Joowaasi fātìi ŋáŋkì ti-Dindaan Diiku

(Kpèè 2 Kroo 24.4-14)

5Dalbee ní Joowaasi bí bisaraaŋaliibi yii: «Animbil ŋin bi cāabìń ti-Dindaan Diikun bí dūú tɔ̄ ku-tundee nì ŋin bi cáa pà patantibee nì ŋin binib pée cāabìń nì dipɔbil dibee#12.5 animbil ŋin binib pée cāabìń nì dipɔbil dibee: kpèè Disa 30.11-16, Akoo 27.1-8, Maat 17.24-27., 6nimbi ni-ba ń fōō an nimbiliŋee bin ni nyée cee kí dūú ŋāŋkì ti-Dindaan Diiku laakin bíil̀ee.»

7Ama Joowaasi nín jíń dibeel abin mmuŋku nì ata poonee, bisaraaŋaliibi kaa nìn dáá ŋáŋkì ti-Dindaan Diiku. 8Ní ubɔti Joowaasi yíiń usaraaŋakpil Yooyadaa nì bisaraaŋaliibi bin kíǹee ki bālifì-bi yii: «Ba pu ní naa ŋáŋkì ti-Dindaan Diiku laakin bíil̀ bíil̀ee? Kí yòon̄ díǹ kí nīn cée, naa ti làá fōō animbil binib bin ni nyée cee, di sá yii ni máaǹ kí dūú tīī bí dūú ŋāŋkì ti-Dindaan Diiku ní.» 9Niinee bisaraaŋaliibi kíí yii baa ti làá fōō samaa cee animbil, kí taa ti kpèè ti-Dindaan Diiku ŋāŋkitam bɔti.

10Usaraaŋakpil Yooyadaa nìn nyàab̄ dakaa ubɔ ní ki sāā ki cíl̀ yilpu ki dūu síiǹ nsaraafan caŋin, a yaa kóò ti-Dindaan Diikunee, ŋŋaŋgiil pú. Bisaraaŋaliibi bin nìn cīití kipunyɔkɔee nìn cáá animbil ŋin kɔkɔ ní binib nìn cāabìń ti-Dindaan Diikunee ki ŋáań poon ní. 11Bi yaa nìn ká yii animbil bí dakaayee poon ki náaǹee, ní ubɔti gbaŋŋmaliu nì usaraaŋakpil ń dāan̄ kí yòon̄ animbil gbanti kí kàaǹ. 12Bi yaa nìn kàan̄ animbil gbanti ki dóòyee ní bí dūú tīī bin nìn tūǹ atuunee nì bin nìn kpèé ti-Dindaan Diiku tuuŋŋee. Bíǹ yaa fōōyee ní bí lēē kí pà bitɔntɔnliibi bin nìn bí ki ŋáŋkée nì kapintab bin nìn bí ti-Dindaan Diikun ki tūǹ ditundee, 13nì bidimaliibi nì bin nìn kpítí ataŋkpeeyee. Bi nìn tí lèekī animbilee poon kí dā idɔ nì ataŋkpee ŋin bi kpítèe kí ŋmā kí dūú ŋāŋkì ti-Dindaan Diiku. Ti-Dindaan Diiku ŋāŋkitam nín nìn pée bàlifī kuŋyee, animbilee poon ní bi nìn lèekī kí ŋá tíǹ kɔkɔ.

14Ama baa nìn lēē animbil ŋin bi nìn cāabìń ti-Dindaan Diikunee kí ŋá tikúti sambiliŋ, àá nsamu mun bi cáa gbíntí fitilabee, àá asambil ŋin poon bi nìn ŋáań fatiku ki cáa yàantí nsaraafan puee, àá akantán, àá sindaariya àá animbil wanti tiba ki síiǹ ti-Dindaan Diiku poon. 15Bi nìn dū animbil gbanti kɔkɔ ki tīī atuun kpilib ní bíǹ dūu ŋáŋkì ti-Dindaan Diiku. 16Binib bin bi nìn cáá animbil gbanti ki tìì bí nīn cáa pà bitɔntɔnliibee, baa nìn bàlifī-bi yii bí gbá akɔntaa bí kpèè bi nín jíń animbil gbanti puee, di sá yii bi nìn sá bibulcinnib ní.

17Baa nìn cáá dibɔkpil saraabi nì ikpiti pɔ̄tam saraabi nimbiliŋ ki ŋáŋkí ti-Dindaan Diiku. Bisaraaŋaliibi di nìn yì an nimbiliŋ#12.17 Dūú ŋmàntī nì Akoo 7.7..

Joowaasi kúm

(2 Kroo 24.23-27)

18Ŋyunti gbantee Siirii bɔtiu Asayeel dɔ́miń ki jáń nì Gaati tiŋki. U jáń ki fōō-kèe ní u lēē yii u làá já nì Jeerusaleem mun. 19Niinee Juuda bɔtiu Joowaasi yōoǹ tiwan tin kɔkɔ ní Juuda bɔtiibi, u-naanjab Joosafaati nì Jooram nì Akasiyasi nì tin úǹ u-ba nìn dūu sú ti-Dindaanee. Bi nìn kpáaǹ sindaariya un nìn bí ti-Dindaan Diikun laakin bi kpáafí animbilee ki cáa cūnnì ki pú ubɔti Asayeel ní úǹ gbēeǹ kaa ti dɔ́miń ki jáń nì Jeerusaleem tiŋki yab.

20Joowaasi tuuŋŋi ŋin kíǹee nì tin kɔkɔ u ŋée ŋmàn̄ ki kā Juuda bɔtiibi tuuŋŋi gbɔŋkun. 21U-janjakpilib nìn bɔ́ntì kí kpɔ̀-u. Dalba Joowaasi sìntī Siila tiŋki watil púee ní bi kíntì-u ki kūū-u.

22U-janjakpilib bin nìn kūū-u gbantee di nìn sá Simeeyaati jipɔɔn Yoosabaadi nì Soomeer jipɔɔn Yeewoosabaadi. Bi nìn síb́-u ki ŋàl̄ u-naanjab Daafiidi Tiŋkin, ní u-jipɔɔn Amasiya fōō u-yil ki kpántì ubɔti.

Currently Selected:

2 Rois 12: BASSARDC

Highlight

Copy

Compare