2 Corinthiens 1

Ijaam

1Man Pɔɔl un Unimbɔti là m sá Yeesu Kriisitoo kpambalee, nì ti-nabiki Tiimootee di ŋmàn̄ kugbɔŋu nee kí tīī nimbi Unimbɔti yab bin kóò Kɔranti tiŋkinee nì bin kɔkɔ sá Unimbɔti nikitil ki kóò Akaayi timmu mun kíǹee nee#1.1 Kɔranti: kpèè Atuun 18.1. Pɔɔl nín péé péé ki kāl̀ Kɔranti tiŋkin puee, kpèè Atuun 18.1-18.. 2Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

Pɔɔl bíi pàkà Unimbɔti

3Tí nyɔ̄ŋkìmaan Unimbɔti ti-Dindaan Yeesu Kriisitoo Baa un di sūǹ ti-saai ki ŋmēentí-ti tikɔkɔ poonee#1.3 ŋmēentí-ti tikɔkɔ poonee: dūú ŋmàntī nì Yees 40.1, Ilan 94.19.. 4Falaabi bin kɔkɔ jēetí ti-puee, úǹ di ŋmēentí-ti, án nín làá ŋá pu ti mun ń dū diŋmeendi din ti fòol̄ u-ceeyee kí ŋméeǹ bin mun bí báà falaa un kamaa poonee. 5Kii Kriisitoo pu ti nín jīǹ falaa tikpil tikpil puee, míǹ mbaantiim ní u-puee ti tí fòol̄ diŋmeendi tikpil tikpil mun. 6Timbi yaa bí ki jīǹ falaayee, an sá nimbi ń ká diŋmeendi nì difiil pu. Ní timbi yaa ká diŋmeendee, an sá yii ni mun ń ká diŋmeendi kí ŋmā kí ŋmèè nì kimɔtii falaabi bin timbi bíi jīǹee jutiibi yaa láa bāań-nee. 7Ti máká ni-pu mbaamɔmin, kun puee ti nyí yii ni mun bí ki jīǹ falaa kii ti mun nín bí ki jīǹ pu nan ní, an puee ní ni ŋūǹ kí fōō diŋmeendi din bí ki tīī-tee mun.

8Nnabiyaamu, ti là ní béé falaa un ti jíń Asii tiŋkinee. Falaa gbanti nìn cúú-ti ki lákatì ti-pɔŋŋu pu. Taa nìn gíti máká yii ti làá nīn bí dimaŋfalin#1.8 Dūú ŋmàntī nì 1 Kɔra 15.32.. 9Timbi ti-ba nìn pée ká yii tiba kaa ti bí, see ŋkúm ní ti làá kpú. Tin bí nee nìn bāań ti-pu án nín làá ŋá pu tí taa dū ti-mákal kí páań timbi ti-ba pu, ama tí nīn máká Unimbɔti un fìkitī bitaŋkpiibee pu. 10Úǹ di nyántì-ti dinimbinaamandi kúm gbanti poon, ní ki làá dāá nyāntí-ti. Ní ti cáá dimákal u-pu yii úǹ di làá dāá gíti nyāntí-ti, 11kun puee ti nyí yii ni bíi tútúǹ-ti ŋwimmeem poon. Di sá yii kunipaau yaa mēē ti-pu ní Unimbɔti fōō bi-wimmeemee, kunipaau làá dāá tí pàkà-u u nín ŋá tiŋan tin ki tīī-tee pu.

Pɔɔl kpītì u-saŋŋu

12Kun pu an mɔ̄ǹ-tee di sá yii ti-pɔbiliŋ poonee, ti nyí yii ti dū dipɔbil diba nì mbimbimɔntiim ní ki kāl̀ duulinyan, cilinjee ni-kansikin. Tíǹ kɔkɔ nyánní Unimbɔti cee ní. An sá Unimbɔti ŋanti di kpōotì-ti, kaa sá unil ciiŋyi. 13Di sá yii tigbɔn tin kɔkɔ ti ŋmàn̄ ki tīī-nee poonee, taa ti kútì tiba kii tin ni kàan̄ ki gbìl̄ee. Ní m máká yii ni làá gbìl̄ tibɔti nee taapu tiŋan. 14- Di sá yii naa láá gbìl̄ kɔkɔ ki dóò -: Ama ti-Dindaan Yeesu gítintam dalee, timbi puee, án làá dāá mɔ̄ɔkiǹ-ni, ní ni mun puee, án làá dāá mɔ̄ɔkiǹ ti mun.

15Tíǹ pu ní m máká ki bàà là kí dīń ni-cee án nín làá ŋá pu ní ká tiŋan mili puee. 16M bàà dākafì yii ḿ dīń ni-cee ní kí nín càatī Maseeduwaan tiŋkin, ní boonee kí fàtīí tí dīń ni-cee ní bàà tūtuǹ-mi ḿ nìkī m-saŋkindi kí nīn cá Juudee tiŋkin. 17M nín bɔ́ntì kí còom̀ m-saŋŋu puee, an sá man di gāā m-bindi ki là kí cù-ŋu naaa? Àá m sá unil un nyɔkɔ kaa bīī tibɔti kí lì yii iiin, ní kí dāá fàtīí lì yii aayeeyee ní? 18Ibaamɔn, Unimbɔti sá m-seeradaaŋwu. M-bɔti tin m sòon̄ nee kaa sá «Iiin» nì «Aayee» bɔti. 19Di sá yii Unimbɔti Jipɔɔn Yeesu Kriisitoo un bɔti man nì Siilasi nì Tiimootee#1.19 Atuun 18.5. sòon̄ ni-cee niinee kaa sá «Iiin» nì «Aayee» bɔti. Ama, u-nee, an pée sá «Iiin» ŋmaniŋma ní. 20Kun puee Unimbɔti nín pōoǹ tiŋyee, Yeesu pu ní an sá «Iiin» tiŋman. An puee Yeesu Kriisitoo pu ní ti lì yii «Ameeni» ki nyɔ́ŋkí Unimbɔti. 21Unimbɔti di báaǹ timbi nì nimbi inyaan Kriisitoo ni. Unimbɔti u-ba di lútì-ti. 22Úǹ di dū u-daaŋku ki ŋá ti-pu, ní ki dū u-Fam ki ŋá ti-pɔbiliŋin kí dàkà-ti yii ti sá u-yab u kpáafì tiwammɔntiil ki yóoǹ kí dāá tīī-ti fool boon.

23Unimbɔti pu ní m sòoǹ ibaamɔn. Kun pu maa dīń ni-cee Kɔranti tiŋkinee di sá maa là kí yòon̄ ni-pɔbiliŋ. M yaa mɔ́ntì ú kpɔ̀-mi. 24Di sá yii taa là kí dū mpɔn kí dàkà-ni ni nín máaǹ kí fōō kí kíí puee. Ama ti là kí jòò-ni ní nīn cáá dipɔɔpindi ní, kun puee ni-fookiiu pɔ̄ɔ̄.

Currently Selected:

2 Corinthiens 1: BASSARDC

Highlight

Copy