2 Chroniques 1
1
ISIRAYEEL BƆTIU SALOOMƆN BƆTI
(1–9)
1Daafiidi jipɔɔn Saloomɔn nìn cúú u-beel pɔŋŋu ki báaǹ inyaan. Ti-Dindaan u-Nimbɔtiu nìn bí u-cee ní ki nìn yāntì u kpántì ubɔtikpaŋkpaan.
Saloomɔn mēē Unimbɔti yii ú tīī-u iciin ú dūú kàl̄ dibeel
(Kpèè 1 Bib 3.4-15)
2Saloomɔn nìn sòon̄ nì Isirayeel yab kɔkɔ, cilinjee bijanjakpilib bin nìn sá bijanjaliibi kutuku kutuku kpilibee nì bin nìn sá dilaataal dilaataal kpilibee, nì bibɔsoonliibi nì Isirayeel tindaŋkpilib kɔkɔ, an dàkà yii adican kpilib. 3Saloomɔn nì binib bin nìn kóoǹ ki kpáfì u-cee gbantee nìn táá ki cūtì Circir paaŋŋu ŋun bí Gabawɔn tiŋkinee. Di sá yii niin ní Unimbɔti kpafindi tantiu un ti-Dindaan tɔntɔnliu Mooyiisi nìn ŋá kuteeunee nìn bí#1.3 Gabawɔn tiŋki bɔtee, kpèè 1 Bib 3.4 nì tin bi ŋmàn̄ kugbɔŋu faaku taapuee. - Bi nín máń circir kɔŋkooŋŋu puee, kpèè Disa 36.8-38..
4Daafiidi nìn yōoǹ Unimbɔti Dakaau Kiiriyati-Yeeyariim#1.4 Bi nín túǹ Unimbɔti Dakaau puee, kpèè 1 Kroo 13 nì 15. - Kiiriyati-Yeeyariim bɔtee, kpèè 1 Sami 6.21 nì tin bi ŋmàn̄ kugbɔŋu faaku taapuee. tiŋkin ki cáa cūnnì Jeerusaleem tiŋkin. U nìn dū-u ki síiǹ mpaan ŋun u nìn bɔ́ntèe pu, tanti poon. 5Ama ti-Dindaan circir kɔŋkooŋŋu nyɔkɔpu, Gabawɔn tiŋkin niin ní tasa saraafaŋŋu ŋun Uurii jipɔɔn, Uur naantiiu Beesaleel#1.5 Beesaleel bɔti nì bi nín máń nsaraafan puee, kpèè Disa 35.30-36.1, 38.1-2. nìn máńee bí.
Niin ní Saloomɔn nì samaa nìn cūtì ki bālifì ti-Dindaan. 6Saloomɔn nìn jɔ́m̀ tasa saraafaŋŋu ŋun nìn bí ti-Dindaan nimbiin, dikpafindi tantiu nyɔkɔpuee ki ŋá bisaraawɔkaabi. U nìn kūū tiwaŋkuti kutuku ní ki dū ti-kɔkɔ ki wùn̄ ŋŋmi. 7Kunyeeu gbantee ní Unimbɔti lēē u-ba ki dàkā Saloomɔn ní ki bí-u yii: «Bàlifì kun ní a là ḿ tīī-see!» 8Ní Saloomɔn kíí Unimbɔti yii: «Ti-Dindaan, a dàkā m-baa Daafiidi kulaŋŋaŋfitiiu tikpil, ki yāntì kɔŋkɔnnee m kpántì ubɔti ki fōō u-yil. 9Ti-Dindaan Unimbɔti, a nín nìn pōoǹ m-baa Daafiidi puee, yàntī án ŋá míǹ. Di sá yii sii di dū-mi ki kāaǹ binib bin wīikí kii kitiŋ pu tam nee pu ubɔti#1.9 Kpèè Diny 13.16, 28.14.. 10Tīī-mi iciin nì dinyil ḿ dūú kpòotī a-nibul. An yaa sá fám, ŋma di ŋūǹ kí kpòotī a-nibul dikpaandi nee?»
11Ní Unimbɔti kíí Saloomɔn yii: «Aa bālifì tigaajati àá tigaajawan àá tinyool àá a-nannanliibi kúm, ní kaa bālifì mun yii ḿ tīī-si mmaŋfafɔkɔn. Ama a bālifì kí nīn cáá iciin nì dinyil kí ŋmā kí dūú kpòotī m-nibul din pu m kāaǹ-si dibeelee. A nín bālifì mimmee puee, 12m làá tīī-si iciin nì dinyil. M làá tīī-si tigaajati nì tigaajawan nì tinyool kí kūtì. A làá nīn cáá tíǹ gbanti kɔkɔ kí jītíǹ bibɔtiibi bin līntiǹ-see nì bin làá dāá páanní a-boonee.» 13Niinee Saloomɔn yíkì Circir Paaŋŋu ŋun bí Gabawɔn tiŋkin, laakin ti-Dindaan kpafindi tantiu nìn bée. U nìn fātìi gítì Jeerusaleem tiŋkin ní ki kāl̀ Isirayeel tiŋki pu dibeel.
Saloomɔn gaajati
(Kpèè 1 Bib 10.26-28, 2 Kroo 9.25-28)
14Saloomɔn nìn kóoǹ janjatɔrɔkub nì itaamu ki kpáfì. U nìn cáá janjatɔrɔkub kutuku ubɔ nì alaataa anaa, nì itaamu kutukub saalaa nì bili#1.14 Kpèè 1 Bib 5.6.. Tijanjawan gbanti tiba nìn bí ntimu mun poon ní ajanjanaapaa bée, ní tin kíǹee bí u-cee Jeerusaleem. 15Ubɔti nìn yāntì animbil nì sindaariya gbí Jeerusaleem tiŋkin kii ataŋkpeeyee#1.15 Kpèè Ditee 17.17 nì tin bi ŋmàn̄ kugbɔŋu faaku taapuee., ní seedir dɔi wīikí kii Seefeelaa tiŋki sufii in bi yíì siikoomɔɔree. 16Saloomɔn taamui nìn nyēeń Eejipiti nì Siisilii timmun ní. Niin ní ubɔti nyampoobi nìn dāań-i#1.16 Kpèè 1 Bib 10.28 nì tin bi ŋmàn̄ kugbɔŋu faaku taapuee.. 17Bi yaa nìn cáań kujaau tɔrɔkuu Eejipiti tiŋkinee, u-nyampooku nìn sá animbil kúti jitɔmbi alaataa aluu ní, ní utaamu nyampooku sá animbil kúti jitɔmbi dilaataal nì imuŋku ili nì saalaa. Binyampoobi gbanti nìn cāabìń janjatɔrɔkub nì itaamu gbanti ki nyáfíǹ Eeti yab nì Siirii yab bɔtiibi mun.
Saloomɔn bɔ́ntì kí mā ti-Dindaan Diiku
(Kpèè 1 Bib 5.15-32, 7.13-14)
18Saloomɔn nìn lēē yii u làá mā Kudii kí dūú sú ti-Dindaan, ní kí mā úǹ u-ba kubɔtinaakoou.
Currently Selected:
2 Chroniques 1: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
