1 Thessaloniciens 2

Pɔɔl nín túń ditundi din Teesalooniikee

1Nnabiyaamu, kii nimbi ni-ba nín pée nyí puee, kaa sá yii ti dɔ́miń ni-dumpu fám. 2Ni nyí yii bi sāaǹ-ti ki sīī-ti Fiiliipi tiŋkin ní ti dāa nín bāań ni-cee Teesalooniiki. Ama ní Unimbɔti tīī-ti kunyannyaau tí sòoǹ nì ni u-Bɔmɔntiiti nì dikɔ̀ndi poon#2.2 Kpèè Atuun 16.19-24, 17.1-9.. 3Ti-bɔti tin ti sòoǹee kaa sá tinyimɔmbɔti, kaa sá ilandɔkɔkpiti bɔti, kaa tí sá tibɔŋmatiŋkaal. 4Ama Unimbɔti cɔ́ŋkì-ti ní ki dū u-Bɔmɔntiiti ki ŋúbiǹ-ti tí sòoǹ. An puee ní ti sòoǹ min làá nīn fáatiǹ Unimbɔti un wāĺ ti-pɔbiliŋinee, an kaa sá kí fáatíǹ binib. 5Nimbi ni-ba nyí yii taa sòon̄ nì ni tibɔkiilkaal ki ká jaanjaan. Taa tí sòoǹ ki nyàab̀ ni-cee animbil yam, Unimbɔti nyí ti-pu míǹ. 6Taa nyàab̀ ubɔ ń tīī-ti tinyool. Taa nyàab̀ nimbi nyootaaa, kaa nyàab̀ bin kíǹee mun yati. 7Ama ti bàà cáá nsan kii ti nín sá Kriisitoo kpambaliŋee puee kí tùkù-ni yii nimbi di máaǹ kí nīn kpèé-ti, ama taa ŋá míǹ. Ti kāl̀ ni-cee ki mɔ̄ kii ubinaati nín mɔ̄ pu ki ŋúb́ u-biyaamuee ní. 8Ti nín néeń-ni puee, ti là yii án taa nín̄ sá Unimbɔti bɔti ŋmaniŋma ní tí tīī-ni, ama tí dū ti-maŋfal kí kūtì kí tīī-ni, kun puee ni kɔ́-ti tiŋan tiŋan. 9Nnabiyaamu, nimbi ni-ba ká ti nín túń atuun pu ŋwiimpu nì kunyeeu ki gīī kí ŋmā kí ŋúb́ ti-ba kí nīn sòoǹ Unimbɔti bɔti, án taa nín̄ sá yii ni-kansikin ubɔ ní ń nīn tú ti-gìńdee.

10Nimbi ni-ba ká. Unimbɔti mun ká yii ti-bimbim min ti dūu kāl̀ nimbi bin fōō Unimbɔti bɔti ki kííyee kansikinee bí circir ki bí deedee. Taa yīntì báà tiba nì tiba poon. 11Min ní ni nyí yii ubaati ŋáań u-biyaamuee, míǹ ní ti ŋá ni-kansikin ubɔ ubɔ. 12Ti sáŋkì-ni ki tīī-ni kunyannyaau ki páb́-ni yii ní nīn còom̄ min fáatiǹ Unimbɔtee, úǹ un yíiń-ni ní dāá kɔ́ u-Beel nì u-nyootinee.

13Kun pu ti gíti pàkà Unimbɔti kaa gbèentée di sá ti nín cáań Unimbɔti bɔti ki sòon̄ nì nee, ni pílifì-tì ki fōō-tì kaa dūu yíiń binib bɔti, ama ki fōō-tì yii tì sá Unimbɔti bɔti tiŋman. Tibɔti gbantee di tūǹ nimbi bin fōō ki kííyee pɔbiliŋ poon atuun. 14An puee, nnabiyaamu, ni dī Unimbɔti nikitil din bí Juudee ki sá Yeesu Kriisitoo yabee tabɔbiliŋ dee. Di sá yii falaabi bin ni jíń ni-jutiibi ceeyee, falaabee bibaantiibi ní bi mun jíń Juuda yab ŋaan#2.14 Kpèè Atuun 17.5-6.. 15Bíǹ di kūū ti-Dindaan Yeesu nì Unimbɔti bɔnaatiliibi ki sāaǹ ti mun#2.15 Kpèè Atuun 9.23,29, 13.45,50, 14.2,5,19, 17.5,13, 18.12.. Unimbɔti kaa gèetíǹ-bi ní bi sá binib kɔkɔ pulincɔntiibi. 16Bi pìintí-ti nsan tí taa sòoǹ nì bin kaa sá Juuda yabee Unimbɔti bɔti tin ŋūǹ kí cáań-bi difiilee. Bi mɔ̀tīi gbēentí bi-kpitii pu ŋyunti kamaa. Ama Unimbɔti fōō bi-pu diŋuul ki dóò.

Pɔɔl nyàab̀ kí gíti ká Teesalooniiki yab

17An yaa sá timbee, nnabiyaamu, doooo ŋyunti ŋun ti yāaǹ tɔbin nì tiwun yàantam, kaa sá nì ti-pɔbiliŋee, ti nyàab̄ nì dinimbinaamandi kí bàà fàtīí ká ni-nimbiin ti-pɔbiliŋ ń bàà sɔ̀ŋkì. 18Ti mɔ̀n̄ yii tí gítiń ni-cee, cilinjee man Pɔɔl, m mākaǹ ŋfunyɔm kupaau kí bàà gítiń ni-cee. Ama Sitaan pīiǹ-ti nsan. 19Nimbi di sá bin pu timbi cɔ́tée, ki sá ti-pɔɔpindi nì ti-jajil daaŋku kun pu ti-Dindaan Yeesu yaa láa gítìńee, ti dāa gbàntī u-nimbiinee. 20Tiŋman nimbi di sá timbi nyooti nì ti-pɔɔpindi.

Currently Selected:

1 Thessaloniciens 2: BASSARDC

Highlight

Copy

Compare