1 Samuel 29

Fiiliistii yab bí Daafiidi ń taa nóó-bi kí cù kujaau

1Fiiliistii yab nìn kpáfì bi-janjaliibi kɔkɔ Afeeki. Ní Isirayeel yab gāā bi-janjanaapaal ki pìlīǹ Jisirayeel nyimbuliŋu. 2Fiiliistii yab bɔtiibi nìn līī bijanjaliibi dilaataal nì bijanjaliibi kutuku kitiŋi nyɔkɔpu ní ki còom̄ ki cá. Ní Daafiidi nì u-naacimbi bin nìn céeǹ ubɔti Akiisee pá boon ki còom̄ ki dī-bi. 3Fiiliistii bɔtiibee bālifì yii: «Eebru yab nee nyánní la ní?» Ní Akiisi kíí-bi yii: «Naa nyí Daafiidi, Isirayeel yab bɔtiu Saayuul tɔntɔnliuaa? Doooo u nín dɔ́miń ki bí m-cee nee, an ŋá dibindi diba àá ali dee, maa pée ká u-pu dibɔkpil diba.»

4Fiiliistii yab nìn gíí diŋuul Akiisi pu ki bí-u yii: «Jà uninja nee ú nīn gítí laakin a pú-u u kóòyee. Ú taa kūtì ti-pu tí cù kujaau. U dāa ŋūǹ kí lábití kí nīn bíi jáà nì ti kujaaun. U nín làá ŋá pu ní u nì u-kpiliu ń mɔ̄ɔkèe di sá ú tìl̄ ti-janjaliibi yiliŋ kí tīī u-kpiliu. 5An kaa sá Daafiidi gbanti pu ní bi nìn gà ilan ki ŋōō ki lì yii:

<Saayuul kūū binib kutuku,

ní Daafiidi kūū binib cutimaanyeeee?>»

6Niinee Akiisi yíiń Daafiidi ki bí-u yii: «M pūtì ti-Dindaan un bí nee yii a sá unil un pu bi ŋūǹ kí nīn mákée ní. Man ká yii an ŋān̄ á bàà céeǹ-ti tí cù kujaau, di sá doooo a nín bāań ki bí m-cee ki dāa sāā díǹ nee, maa ká a-pu tikpitil tiba. Ama a-bɔti kaa mɔ̄ǹ Fiiliistii yab bɔtiibi bin kíǹee. 7Míǹ puee nín̄ gítí nì ŋgbansɔŋfi, kí taa ŋá tin baa lèe.» 8Ní Daafiidi bālifì yii: «Mimmee ba ní m ŋá? Doooo m nín kpántì a-tɔntɔnliu ki dāa sāā díǹ nee, tibɔkpitil tilati ní a ká m-pu ní an sá yii maa ŋūǹ kí cùú já nì a-nannanliibi?» 9Ní ubɔti Akiisi kíí Daafiidi yii: «Tiŋman pu, a-bɔti fáatì man kii Unimbɔti tuuŋŋuee ní. Ama an sá Fiiliistii yab bɔtiibi di bí yii baa là á cù kujaau. 10An puee á fu yīkì fool kutaafaau pɔ̀lpɔl si nì a-naacimbi bin céeǹní-see. Ní fu yīkì kutaafaau pɔ̀lpɔl, ku tin pée lì yii ku wúntée, ni yíkì.»

11Kutaa wúntì kutaafaauee Daafiidi nì u-naacimbi yíkìi nín gítí Fiiliistii yab tiŋkin. Ní Fiiliistii yab nín cá Jisirayeel tiŋkin.

Currently Selected:

1 Samuel 29: BASSARDC

Highlight

Copy

Compare